ཨ་རིས་བོད་དོན་ཆེད་སྲིད་བྱུས་གསར་པ་ཞིག་གཏན་འབེབས་གནང་འཆར་འདུག 

ཟླ་འདིའི་ཚེས་༡༡ ཉིན་སྲིད་སྐྱོང་བློ་བཟང་སེང་གེས་ཨ་རིའི་གྲོས་ཚོགས་གོང་མའི་འཐུས་མི་ལྕམ་ཌ་ཨིན་ཧྥ་ཨིན་སི་ཊེ་ཨིན་(Dianne Feinstein) དང་ཐུག་འཕྲད་གནང་ཡོད་པ་དང་། སྐབས་དེར་ལྕམ་ཌ་ཨིན་ཧྥ་ཨིན་སི་ཊེ་ཨིན་གྱིས་བོད་དོན་ཆེད་སྲིད་བྱུས་གསར་པ་ཞིག་གཏན་འབེབས་(The new Tibet Policy Act) གནང་འཆར་ཡོད་པ་དེར་མཉམ་འབྲེལ་གྱིས་མཐུན་རྐྱེན་སྦྱོར་རྒྱུའི་ཁས་ལེན་གནང་འདུག

དེ་བཞིན་སྐྱོང་གིས་ཨ་རིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གི་(Sam Brownback) ལ་ཐུག་འཕྲད་ཀྱིས་བོད་དོན་ཆེད་སྲིད་བྱུས་གསར་པ་ཞིག་གཏན་འབེབས་གནང་འཆར་ཡོད་པ་དེའི་དགོས་པ་དམིགས་ཡུལ་གཙོ་བོ་ནི་བོད་མིའི་ཆོས་དད་རང་དབང་དང་། བོད་མིའི་སྒྲིག་འཛུགས་དང་བོད་ཀྱི་ཁོར་ཡུག་ཡར་རྒྱས་གོང་འཕེལ་གཏོང་ཆེད་ཡིན་སྐོར་གྲོས་བསྡུར་གནང་ཡོད། སྐབས་དེར་སྲིད་སྐྱོང་གིས། མཉམ་འབྲེལ་རྒྱལ་ཚོགས་ཀྱི་རྒྱལ་སྤྱིའི་མཚོ་དང་གཙང་ཆུ་(UN Convention on the Protection and Use of Transboundary Watercourses and International Lakes) བེད་སྤྱོད་དང་སྲུང་སྐྱོབ་གནང་ཕྱོགས་ཀྱི་གྲོས་མཐུན་ཆིངས་ཡིག་ཐོག་རྒྱ་ནག་གཞུང་གིས་མིང་རྟགས་བཀོད་མེད་པར་བརྟེན། དེས་ཨེ་ཤི་ཡའི་མི་འབོར་ཐེར་འབུམ་༡.༥ ཡིས་བོད་མཐོ་སྒང་གི་གཙང་ཆུ་ལ་བརྟེན་ནས་འཚོ་བཞིན་པ་རྣམས་ཀྱི་འཚོ་རྟེན་ལ་དོ་ཕོག་འགྲོ་ཉེན་ཆེ་བའི་སྐོར་དང་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་སྐོར་གསུངས། ཨ་རིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སམ་བྷི་རོན་བྷེ་གིས་བོད་དོན་ཆེད་སྲིད་བྱུས་གསར་པ་ཞིག་གཏན་འབེབས་གནང་འཆར་ཡོད་པ་དེ་ལམ་ལྷོངས་ཡོང་བར་ཤུགས་རྒྱག་རྒྱུ་དང་། ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོས་ཨ་རིའི་སྲིད་འཛིན་ཊོམ་དང་མཇལ་འཕྲད་ཀྱིས་བོད་དོན་ཐོག་རྒྱབ་སྐྱོར་མུ་མཐུད་ཡོང་བ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་གངས་ཅན་ལྗོངས་སུ་གདན་འདྲེན་ཞུ་རྒྱུར་རྒྱབ་སྐྱོར་ཡོང་བའི་འབོད་སྐུལ་ཞུས་ཡོད་པ་དགའ་པོ་བྱུང་ཞེས་དང་།  ང་ཚོ་ངོས་ནས་བོད་མིའི་སྤྲུལ་སྐུ་ངོས་འཛིན་གནང་ཕྱོགས་ཀྱི་ལམ་ལུགས་དེ་བོད་མི་རང་གི་ཆོས་ལུགས་ཀྱི་བྱེད་སྒོ་ཞིག་ཡིན་པ་ཡིད་ཆེས་བྱེད་ཀྱི་ཡོད་ཅེས་གསུངས། 

སྲིད་སྐྱོང་གིས་ཨ་རིའི་གྲོས་ཚོགས་འཐུས་མི་ཝན་བྷུ་ཁ་ནན་(Vern Buchanan) དང་ཐུག་འཕྲད་གནང་སྐབས།  ཁོང་གིས་བོད་དོན་ཐད་མཐའ་གཅིག་ཏུ་རྒྱབ་སྐྱོར་གནང་རྒྱུ་ཡིན་པའི་སྐོར་གསུངས། དེ་བཞིན་དཔལ་ལྡན་སྲིད་སྐྱོང་མཆོག་གིས་ཝ་ཤིན་ཊོན་སྦྲག་ཡིག་(Washington Post) ཅེས་པའི་ཚགས་པར་གྱི་རྩོམ་སྒྲིག་པ་དང་ཐུག་འཕྲད་ཀྱིས་བོད་དོན་ཆེད་སྲིད་བྱུས་གསར་པའི་སྐོར་དང་ད་ལྟའི་བོད་ནང་གི་གནས་སྟངས་སྐོར་ངོ་སྤྲོད་གནང་།།

གསར་འགོད་པ་ཆོས་ཉིད་འོད་ཟེེར།

Share this:
༨༩༩ ཀློག་གྲངས།