༧གོང་ས་མཆོག་གིས་ཤེས་རབ་སྙིང་པོའི་གསུང་ཆོས་དབུ་འཛུགས་གནང་།

ཀོ་རི་ཡའི་དད་ལྡན་ཆོས་ཞུ་བས་གསོལ་འདེབས་ཞུས་དོན་ཟླ་འདིའི་ཚེས་༤ ནས་ཉིན་གྲངས་གསུམ་རིང་༧གོང་ས་མཆོག་གིས་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་ཤེས་རབ་སྙིང་པོའི་ཆོས་འབྲེལ་གནང་གི་ཡོད་པ་རེད། 

༧གོང་ས་མཆོག་གིས་སྔོན་འགྲོའི་གསུང་ཆོས་སྐབས་ལམ་སྟོན་བཀའ་སློབ་གནང་དོན། “ད་ལྟ་ང་ཚོ་དུས་རབས་༢༡ ནང་སླེབས་ཡོད། དངོས་པོ་ཡར་རྒྱས་ཆེན་པོ་ཕྱིན་ཡོད། ཆོས་ཀྱིས་མི་ལ་ཕན་ཐོགས་གང་ཡོད། ཆོས་ཟེར་བ་དེ་སྨོན་ལམ་རྒྱག་རྒྱུ་ཙམ་ཞིག་ཡིན་ན་དེ་ཙམ་ཧ་ལས་རྒྱུ་མེད། འོ་ན་ད་ཆ་དུས་རབས་༢༡ ནང་འདིར་ཆོས་ཀྱི་འབྲེལ་བ་གང་འདུག་ཅེས་དྲི་བ་དང་པོ་འདི་ཕལ་ཆེར་སླེབ་ཀྱི་རེད། འཛམ་གླིང་འདིའི་སྟེང་ཆོས་ལུགས་མི་འདྲ་བ་མང་པོ་ཡོད་པ་དེ་དག་ཚང་མས་བྱམས་བརྩེ་དགོས་པ་དེ་བསླབ་བྱ་གཙོ་བོ་རེད། བྱམས་པ་དང་བརྩེ་བ་ཞེས་པའི་བསླབ་བྱ་འདི་མིའི་ལྷན་སྐྱེས་རང་བཞིན་ཡིན་པ་མ་ཟད། དགོས་མཁོ་ཡོད་པ་ཧ་ཅང་གསལ་པོ་རེད། དེ་འདྲའི་བྱམས་བརྩེ་སྤེལ་བར་ལྟ་གྲུབ་འདྲ་མིན་ཡོང་བཞིན་ཡོད་ཡོད་”ཅེས་བཀའ་སློབ་གནང་།

༧གོང་ས་མཆོག་གིས་ཆོས་ལུགས་འདྲ་མིན་དང་འབྲེལ་ནས་བྱམས་བརྩེའི་སྐོར་བཀའ་སློབ་གནང་དོན། “རིགས་གཅིག་གིས་འཇིན་རྟེན་བཀོད་པ་པོ་དཀོན་མཆོག་ཟེར་རྒྱུ་འདི་བཤད་ནས་སྣོད་བཅུད་ཚང་མ་དཀོན་མཆོག་གིས་བཀོད་པ་རེད། དེར་བརྟེན་དཀོན་མཆོག་གིས་བསླབ་བྱ་གཙོ་བོ་ནི། བྱམས་བརྩེ་གསུང་གི་ཡོད་སྟབས་བྱམས་བརྩེ་གལ་ཆེན་པོ་རེད། དཀོན་མཆོག་ནི་བརྩེ་བའི་བདག་ཉིད་རེད། ང་ཚོ་ཚང་མ་བརྩེ་བའི་བདག་ཉིད་དཀོན་མཆོག་གི་སྲས་ཆགས་ཀྱི་ཡོད་པར་བརྟེན་འཛམ་གླིང་འདིའི་སྟེང་མི་དུང་ཕྱུར་དྲུག་ཅུ་བདུན་ཅུ་ཙམ་ཡོད་པ་དེ་དག་ཚང་མ་གང་ལྟར་དཀོན་མཆོག་གཅིག་གི་སྲས་ཆགས་སྟབས། ང་ཚོ་ཚང་མ་སྤུན་མཆེད་ནང་བཞིན་རེད། ང་ཚོས་ཕན་ཚུན་བརྩེ་བ་བྱེད་དགོས། ང་ཚོའི་ཡབ་ལྟ་བུ་དཀོན་མཆོག་ཆགས་ཡོད། ང་ཚོ་ཚང་མ་དཀོན་མཆོག་གཅིག་གི་སྲས་གཅིག་གྱུར་ཡིན་པར་བརྟེན། ང་ཚོས་ནང་ཁུལ་འཁྲུག་པ་བརྒྱབ་ནས་ཕན་ཚུན་གསོད་རེས་བཏང་བ་ཡིན་ན་ཤིན་ཏུ་མི་འོས་པ་རེད། དཔེར་ན།  ཁྱིམ་ཚང་གཅིག་པ་ནང་ཁུལ་གསོད་རེས་བྱས་ན་འཇིག་རྟེན་ཕལ་པའི་ཁྲོད་དུའང་ཧ་ཅང་ཐབས་སྡུག་པོར་བརྩི་རྒྱུ་རེད།  དེར་བརྟེན་འཇིག་རྟེན་བཀོད་པ་པོ་གཅིག་གི་སྲས་ཡིན་བསམ་པའི་འདུ་ཤེས་དེ་ཕན་ཐོགས་ཧ་ཅང་འདུག འཇིག་རྟེན་བཀོད་པ་པོ་མི་འདོད་མཁན་གྱི་ཆོས་ནི་རྒྱ་གར་ནང་ཕལ་ཆེར་ལོ་སུམ་སྟོང་ཙམ་གྱི་གོང་ནས་ཆོས་བརྒྱུད་མང་པོ་ཞིག་བྱུང་ཡོད། ཐོག་མར་ཕལ་ཆེར་གྲངས་ཅན་པ་རེད། མུ་སྟེགས་པའི་གཞུང་ནང་འཇིག་རྟེན་བཀོད་པ་པོ་དཀོན་མཆོག་གི་སྐད་ཆ་མེད་པ་དང་། དཔེར་ན་སྤྱི་གཙོ་བོ་ཟེར་བ་རེད།  འཇིག་རྟེན་གྱི་ཆོས་ཐམས་ཅད་ཀྱི་བྱེད་པོ་ཡིན་པ་དང་། དེའི་རང་བཞིན་རྟག་པ་ཡིན་པར་འདོད།  རིགས་ཁ་ཤས་ཀྱིས་དབང་ཕྱུག་ཟེར་གྱི་ཡོད་པ་རེད། རྟག་པ་རང་བྱུང་གི་སྐྱེས་བུ་ཟེར་བ་ཞིག་བཤད་ནས་གང་ལྟར་ལྟ་གྲུབ་མི་འདྲ་བ་ཡོད། དེ་རྗེས་གཅེར་བུ་པ་རེད། གཅེར་བུ་པས་འཇིག་རྟེན་བཀོད་པ་པོ་མི་འདོད་པ་རེད། དེ་ནས་སངས་རྒྱས་པའི་ཆོས་བྱུང་བ་རེད། སངས་རྒྱས་པས་ཀྱང་འཇིག་རྟེན་བཀོད་པ་པོ་མི་འདོད་པ་རེད། བཅོམ་ལྡན་འདས་ཀྱིས། བདག་ཉིད་བདག་གི་མགོན་ཡིན། ཞེས་སོ་སོའི་མགོན་དེ་སོ་སོ་རེད། དེ་ལྟར་ཡིན་པའི་རྒྱུ་མཚན་ནི། སོ་སོས་ཡག་པོ་བྱས་ན། སོ་སོར་ཡག་པོ་ཡོང་བ་དང་། རང་གིས་གཞན་ལ་གནོད་པ་དང་འཚེ་བ་སོགས་སྡུག་པོ་བྱས་པ་ཡིན་ན་རྣམ་སྨིན་རང་ཉིད་ཀྱིས་མྱོང་དགོས་པ་གསུངས་”ཡོད་པ་རེད་ཅེས་བཀའ་སློབ་གནང་།

༧གོང་ས་མཆོག་གིས་སྡུག་བསྔལ་མི་འདོད་པ་གཅིག་མཚུངས་ཡིན་སྐོར་དང་འབྲེལ་བཀའ་སློབ་གནང་དོན། “མདོ་དོན་སྙིང་པོ་དྲི་བ་དང་པོ་འདི་ང་ཚོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། འབུ་སྲིན་ཞིག་ཡིན་ནའང་ཉེན་ཁ་ལྟ་བུ་ཞིག་སླེབ་པ་ཡིན་ན། དེ་ལས་གཡོལ་ཐབས་སྣ་ཚོགས་བྱེད་ཀྱི་རེད། སྐབས་རེ་རང་ལ་གནོད་དོགས་ཀྱིས་ཤི་རྫུན་བཏབ་པ་དེ་འདྲ་བྱེད་ཀྱི་འདུག དེ་ནི་སྡུག་བསྔལ་མི་འདོད་པས་བྱས་པ་ཡིན་སྟབས་སྡུག་བསྔལ་མི་འདོད་པ་དང་བདེ་བ་འདོད་པ་ནི་རྒྱུན་མཚན་སྒྲུབ་བྱེད་དུ་བཀོད་མི་དགོས་པར་ཚང་མར་རང་གི་ངང་གིས་ཡོང་བཞིན་འདུག སངས་རྒྱས་པའི་ཆོས་ཀྱི་འགྲོ་སྟངས་ནི། སེམས་ལ་བཟོ་བཅོས་རྒྱག་རྒྱུ་ཞིག་དང་། དེ་ཡང་བདེ་སྡུག་ཟེར་རྒྱུ་འདི་ལ་ལུས་ཀྱི་བདེ་སྡུག་ཅིག་ཡོད་པ་རེད། ལུས་ཀྱི་བདེ་སྡུག་ལ་སེམས་མེད་ན་བེམ་པོ་བྱས་ནས་བསྡད་རྒྱུ་རེད། དེར་ན་བདེ་སྡུག་གི་ཚོར་བ་ཡོང་རྒྱུ་མི་འདུག གང་ལྟར་བདེ་སྡུག་གི་ཚོར་བ་ཚང་མ་ཤེས་པའི་སྟེང་ནས་ཡོང་བཞིན་འདུག ང་ཚོའི་མངོན་པ་ཀུན་བཏུས་ནང་སེམས་དང་སེམས་བྱུང་གཉིས་ཕྱེ་ནས་སེམས་ལ་རྣམ་ཤེས་ཚོགས་དྲུག སེམས་བྱུང་ཀུན་འགྲོ་ལྔ། ཡུལ་ངེས་ལྔ། དགེ་བ་བཅུ་གཅིག རྩ་ཉོན་དྲུག ཉེ་ཉོན་ཉི་ཤུ། གཞན་འགྱུར་བཞི་བཅས་ཀུན་བཏུས་ནང་དེ་ལྟར་གསུངས་འདུག མངོན་པ་མཛོད་ལས་གསུང་གི་ཡོད་ཀྱང་མངོན་པ་གོང་འོག་གཉིས་བཤད་པའི་ནང་ནས་མངོན་པ་གོང་མ་འདི་རླབས་ཆེ་བ་ལྟ་བུ་འདུག  དེ་བཞིན་ཚོར་བ། འདུ་ཤེས། འདུ་བྱེད། སེམས་པ། ཡིད་ལ་བྱེད་པ། རེགས་པ་ཟེར་རྒྱུ་འདིས་སོ་སོ་ཀུན་གྱི་འཁོར་དུ་འགྲོ་ཕྱིར་ཀུན་འགྲོ་ཞེས་བྱ་བའོ། ཞེས་ཀུན་འགྲོ་ལྔ་ཟེར་རྒྱུ་འདིའི་ཐོག་ནས་བདེ་སྡུག་གི་ཚོར་བ་འདི་སླེབ་ཡོང་གི་འདུག བདེ་སྡུག་གི་ཚོར་བ་འདི་ལྟར་བཤད་ཡོང་གི་འདུག གང་ལྟར་བསྡེ་སྡུག་བཤད་དུས་ཤེས་པའི་སྟེང་འགྲོ་བཞིན་ཡོད། དེང་སྐབས་དངོས་པོ་ཁོ་ནའི་ཐོག་ནས་བསམ་བློ་གཏོང་མཁན་ཤེས་པ་ཟེར་རྒྱུ་འདི་ལ་དོ་སྣང་གང་ཡང་མེད་པའི་བཟོ་འདྲ་བོ་འདི་མ་འདང་པའི་གནས་ཚུལ་རེད།  དེར་བརྟེན་སྤྱིར་འཇིག་རྟེན་བཀོད་པ་པོ་འདོད་མཁན་གྱི་ཆོས་བརྒྱུད་ཀྱིས་སྨོན་ལམ་རྒྱག་རྒྱུ་ལྟ་བུ་གཅིག་པོ་མ་གཏོགས་ནང་གི་ཤེས་པའི་སྟེང་ནས་བདེ་སྡུག་ཡོང་རྒྱུ་ཟེར་བ་དེ་ཚོའི་གྲས་ལ་འགྲེལ་བཤད་གང་ཡང་མི་འདུག སངས་རྒྱས་པའི་གཞུང་ནང་སེམས་རྟོགས་པ་རྟོགས་མེད་དབྱེ་བ་འབྱེད་རྒྱུ་དང་། ཚད་མ་དང་ཚད་མིན་གྱི་དབྱེ་བ་འབྱེད་རྒྱུ། སེམས་དང་སེམས་བྱུང་གི་དབྱེ་བ་འབྱེད་རྒྱུ་དེ་ཚོའི་གྲས་གནད་འགག་ཆེན་པོ་རེད་འདུག ཐོན་ས་འདི་དཔེ་ཆའི་ནང་ནས་ཡོང་གི་ཡོད་ཀྱང་ང་ཚོའི་མི་ཚེའི་ནང་འབྲེལ་བ་ཡོད་པ་ཞིག་རེད། ངོས་ཀྱིས་ནམ་རྒྱུན་འདི་ལྟར་རྗོད་ཀྱི་ཡོད། ཆོས་ཕྱོགས་ཀྱི་གཞུང་ནས་ཐོན་པ་དེ་ཚོའི་གྲས་ཆོས་ཀྱི་སྡེ་ཚན་ནང་མ་བཞག་པར་ཤེས་ཡོན་གྱི་སྡེ་ཚན་ནང་བཞག་དགོས། གང་ལྟར་བདེ་སྡུག་ཟེར་བའི་བདེ་བ་འདོད་པ་དང་སྡུག་བསྔལ་མི་འདོད་པ་རང་གི་ངང་གིས་ཡོད་པ་ཡིན་སྟབས། བདེ་སྡུག་ཟེར་རྒྱུ་འདི་རྒྱུ་དང་རྐྱེན་ག་འདྲའི་ཐོག་ནས་ཡོང་གི་འདུག་རྩད་གཅོད་བྱས་ནས་སྡུག་བསྔལ་མི་འདོད་པ་ཡིན་ན།  སྡུག་བསྔལ་གྱི་རྒྱུ་དེ་རྩད་བཅད་ནས་སྡུག་བསྔལ་གྱི་རྒྱུ་དེ་གང་རེད་འདུག  དེ་འགོག་ཐབས་བྱེད་རྒྱུ་འདུག་གམ་མི་འདུག་བསམ་བློ་གཏོང་དགོས།  བདེ་བ་འདོད་པ་ཡིན་སྟབས། བདེ་བའི་རྒྱུ་ག་འདྲ་རེད་འདུག བདེ་བའི་རྒྱུ་གོང་ནས་གོང་དུ་སྤེལ་དགོས་འདུག བསམ་པའི་ཀུན་སློང་སྐྱེ་རྒྱུ་རེད།  དཔེར་ན། ཤིང་ཏོག་ལྟ་བུར་མཚོན་ན། འབྲས་བུ་ཤིང་ཏོག་འདི་ང་ཚོ་འདོད་ཀྱི་ཡོད་པར་བརྟེན་དེའི་རྒྱུ་ས་བོན་དང་། ས་བོན་དེ་ཉེར་ལེན་གྱི་རྒྱུ་ཡིན་པ་དང་། ས་བོན་དེ་བཏབ་ནས་རླན་དང་དྲོད་སོགས་མང་པོ་ཞིག་གིས་རྐྱེན་བྱས་ནས་གང་ལྟར་ཉེར་ལེན་གྱི་རྒྱུ་ཡོད་པ་ཙམ་གྱི་མི་ཆོག་པར་རྐྱེན་མང་པོ་ཞིག་འཛོམས་པའི་འོག་ནས་སྡོང་པོ་ཡར་འཚར་ལོངས་བྱས་ནས་མཐར་འབྲས་བུ་ལོངས་སྤྱོད་ཐུབ་པ་ཡོང་གི་ཡོད། དེ་ལྟར་ཤེས་པའི་སྟེང་ནས་ཡོང་བཞིན་པའི་བདེ་སྡུག་དེ་རྒྱུ་དང་རྐྱེན་ལ་བརྟེན་ནས་ཡོང་གི་ཡོད་པ་ཞིག་ཡིན་སྟབས། སྤྱིར་ཆོས་ལུགས་ཚང་མས་དད་པ་གལ་ཆེན་པོ་གསུང་གི་ཡོད་པ་རེད། སངས་རྒྱས་པའི་གཞུང་གིས་དད་པ་ཁོ་ན་མིན་པར་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་དཔྱད་པ་བྱས་ནས་རྒྱུ་དང་རྐྱེན་ཟེར་རྒྱུ་དེ་ཚོའི་གྲས་དཔྱད་པ་བྱས་ནས་འགྲོ་རྒྱུ་ཞིག་ཡོང་གི་འདུག དེར་བརྟེན་སངས་རྒྱས་བཅོམ་ལྡན་འདས་རང་ཉིད་ཀྱིས་འདི་ལྟར་གསུང་པ་རེད་”ཅེས་དང་། “ནང་པའི་གཞུང་ནང་སེམས་ཁམས་རིག་པའི་སྐོར་ཧ་ཅང་ཤུགས་ཆེན་པོ་གསུང་གི་ཡོད་པ་རེད། དེ་ཚོ་གནད་འགག་ཆེན་པོ་རེད་འདུག ཆོས་ཀྱི་སྐད་ཆ་མིན་པར་ཤེས་ཡོན་གྱི་སྡེ་ཚན་ལ་བཞག་ནས་འཕྲོད་བསྟེན་དང་འབྲེལ་བ་ཡོད་པ་རེད་”ཅེས་བཀའ་སློབ་གནང་རྗེས་གསུང་ཆོས་དངོས་གཞི་དབུ་འཛུགས་གནང་ཡོད་པ་རེད།

ཐེངས་འདིའི་ཆོས་འབྲེལ་བོད་སྐད་དང། རྒྱ་སྐད། ཨིན་ཇི། ཀོ་རི་ཡ། ཉི་ཧོང་། ཧིན་རྡི། འཇར་མན།  ཨུ་རུ་སུ། སོག་པོ།  ལྦེ་ཏི་ནམ། ཨི་ཊ་ལི་བཅས་ཀྱི་སྐད་ཡིག་མི་འདྲ་བ་བཅུ་གཅིག་ནང་གསུང་སྒྱུར་ཞུས་འདུག་པ་མ་ཟད། དྲ་ལམ་ཐོག་ནས་ཐད་ཀར་གསན་གཟིགས་ཐུབ་ཀྱི་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

Share this:
༡༩༦ ཀློག་གྲངས།