ཨ་མདོ་དང་འབྲེལ་བའི་རྒྱལ་སྤྱིའི་ཞིབ་འཇུག་ཟབ་སྦྱོང་ཚོགས་ཆེན་ཞིག་འཚོག་འཆར།

༢༠༢༠ ལོའི་ཕྱི་ཟླ་༤ ཚེས་༡༦ ནས་༡༨ བར་ཨཱོག་སུ་སྤོར་ཌི (Oxford University)སློབ་གྲྭ་ཆེན་མོ་རུ་ཨ་མདོ་་་་བསྣོལ་མཚམས་དེ་ན་ཞེས་པའི་བརྗོད་གཞིའི་ཐོག་ཚོགས་ཆེན་ཞིག་འཚོག་འཆར་འདུག

ཟླ་འདིའི་ཚེས་༢༡ ཉིན་ཚོགས་འདུ་དེའི་གོ་སྒྲིག་པ་སྦྲ་རིག་ཐོགས་མེད་ཀྱིས་གནས་ཚུལ་འགྲེལ་བརྗོད་གནང་བ་ལྟར་ན། “ཨ་མདོ་དང་འབྲེལ་བའི་ཞིབ་འཇུག་ཟབ་སྦྱོང་ཚོགས་ཆེན་སྐབས་གསུམ་པ་དེ། ཨཱོག་སུ་སྤོར་ཌི་སློབ་ཆེན་དང་མཉམ་འབྲེལ་གྱིས་སློབ་གྲྭ་ཆེན་མོ་འདི་རང་དུ་འཚོགས་གཏན་འཁེལ་ཡོད།  “ཨ་མདོ། — བསྣོལ་མཚམས་དེ་ན།” ཞེས་པའི་ཚོགས་ཆེན་ཐེངས་གསུམ་པ་འདིའི་དམིགས་ཡུལ་གཙོ་བོ།  བོད་རིག་པའི་ཞིབ་འཇུག་ཁྱབ་ཁོངས་ཀྱི་བརྗོད་གཞི་བྱེ་བྲག་པ་ཞིག་དམིགས་སུ་བཟུང་ནས།   བོད་རིག་པ་སྤྱིའི་ཞིབ་འཇུག་གི་སྤུས་ཚད་གཏིང་ཇེ་ཟབ་དང་རྒྱ་ཇེ་ཆེར་གཏོང་བར་འཕྱར་གྲུ་མཉམ་འདེགས་བྱེད་རྒྱུ་དེ་ཡིན།   དེ་བཞིན།   བོད་རིག་པའི་ཞིབ་འཇུག་གི་ཁ་ཕྱོགས་ཀྱང་དབུས་གཙང་གཅིག་བུ་ལྟེ་བར་བཟུང་པའི་སྲོལ་རྒྱུན་གྱི་ལྟ་ཚུལ་ལས་བརྒལ་ཏེ།  ཁམས་དང་ཨ་མདོ།  མངའ་རིས་དང་ལ་དྭགས།  འབྲས་ལྗོངས་དང་འབྲུག་ཡུལ་སོགས་ཡུལ་ལུང་རྒྱ་ཆེ་ལ།  རིག་གཞུང་སྣ་མང་བའི་རྒྱལ་སྤྱིའི་བོད་རིག་པའི་མ་འོངས་པའི་ཞིབ་འཇུག་གི་ཁ་ཕྱོགས་དེ་ཐབས་ལམ་སྣ་འཛོམས་དང་འཐུས་ཚང་ཅན་དུ་གཏང་རྒྱུ་དེ་ཡིན་”དེ་ཡིན་ཞེས་བརྗོད་སོང་།

ཞིབ་འཇུག་ཚོགས་ཆེན་འདིའི་ཁོངས་སུ་བོད་ཤར་ཕྱོགས་ཨ་མདོ་དང་དངོས་ཤུགས་གང་རུང་ནས་འབྲེལ་ཡོད་ཀྱི་ལོ་རྒྱུས། ཆོས་ལུགས། སྤྱི་ཚོགས། ཡུལ་སྲོལ། དཔལ་འབྱོར། རྩོམ་རིག  སྲིད་དོན། ཤེས་ཡོན། འབྲོག་ལས། ཡུལ་སྐོར་སོགས་ཞིབ་འཇུག་གི་ཁྱབ་ཁོངས་སྣ་ཚོགས་པ་ཞིག་འདུ་བ་ཡིན།  དེ་བཞིན།  ཚོགས་ཆེན་འདིའི་དགོས་དམིགས་གལ་ཆེན་ཞིག་ནི། ཨ་མདོ་ལྟ་བུ་ས་ཁོངས་བྱེ་བྲག་པ་ཞིག་གལ་ཆེར་བཟུང་རྒྱུ་མ་ཡིན་པར། ས་ཁོང་བྱེ་བྲག་པ་དེ་བརྒྱུད་ནས་ཚུར་བོད་ཀྱི་སྤྱི་ཚོགས་སྤྱི་ཡོངས་ལ་ཞིབ་འཇུག་བྱེད་རྒྱུ་དེ་གཙོ་བོ་ཡིན།  དེར་བརྟེན།  ཚོགས་ཆེན་འདིའི་ཁོངས་སུ་ཤེས་ཡོན་གྱི་རྒྱབ་ལྗོངས་དང་། ས་གནས།  སྐྱ་སེར་སོགས་ལ་དབྱེ་བ་མེད་པར།  ཨ་མདོ་དང་འབྲེལ་ཡོད་ཀྱི་ཞིབ་འཇུག་གནང་མཁན་གྱི་བོད་རིག་པ་བ་སུས་ཀྱང་ཆ་ཤས་དང་གོ་སྐབས་ལེན་ཆོག་པ་ཡིན།  ཆ་ཤས་ལེན་འདོད་མཁན་གྱི་ཞིབ་འཇུག་པ་རྣམས་ཀྱིས་ཚིག་འབྲུ་༢༦༠ ལས་མ་བརྒལ་བའི་དཔྱད་རྩོམ་གྱི་སྙིང་དོན་དང་།  དོ་བདག་གི་མིང་།  གློག་འཕྲིན་ཁ་བྱང་།  འབྲེལ་ཡོད་ཀྱི་ལས་ཁུངས་དང་ཤེས་ཡོན་སྡེ་ཚན་གྱི་མིང་བཅས་གང་མགྱོགས་ང་ཚོར་བསྐུར་གནང་རོགས་ཞེས་གསལ་བསྒྲགས་སྤེལ་འདུག

གསར་འགོད་པ་ཆོས་ཉིད་འོད་ཟེར།

Share this:
༨༥༦ ཀློག་གྲངས།