ཁྲིམས་ཞིབ་ཁང་ལ་ཁྱད་གསོད་བྱས་པའི་བཅོས་གསོའི་ཆད་པ་འགེལ་མ་དགོས་པའི་རྒྱུ་མཚན་བརྗོད་རྒྱུའི་ཉན་ཞིབ།

ཁ་མཆུ་ཨང་༢༠ པའི་བཅད་ཁྲ་ཁྱབ་བསྒྲགས་བྱས་པའི་ཐད་རྩོད་ལན་པ་བཀའ་ཤག་གི་ཁྲིམས་རྩོད་པ་བློ་བཟང་གྲགས་པས་གསར་འགོད་པར་གཏམ་བཤད་བྱས་པ་དེ་རིགས་སྤྱི་མང་ཁྲིམས་ཡིག་དོན་ཚན་༨༥ [ཁ] ནང་གསལ་ཆེས་མཐོའི་ཁྲིམས་ཞིབ་ཁང་ལ་ཁྱད་གསོད་བྱས་པའི་བཅོས་གསོའི་ཆད་པ་འགེལ་མ་དགོས་པའི་རྒྱུ་མཚན་བརྗོད་རྒྱུའི་ཆེད་ཕྱི་ལོ་༢༠༡༩ ཟླ་༡༢ ཚེས་༦ ཉིན་འཚོགས་ཡོད་ནའང་། རྩོད་ལན་པའི་ཁྲིམས་རྩོད་པ་བློ་བཟང་གྲགས་པ་ཁྲིམས་རར་བཅར་མེད་པས། ཕྱི་ཟླ་༡༢ ཚེས་༩ ཉིན་ཉན་ཞིབ་བྱེད་གཏན་འཁེལ་བའི་གསལ་བསྒྲགས་བཏང་འདུག

ཕྱི་ཟླ་༡༢ པའི་ཚེས་༦ ཉིན་ཁྲིམས་ཞིབ་ཁང་གིས་གསལ་བསྒྲགས་སྤེལ་བའི་ནང་། “ཁ་མཆུ་ཨང་༢༠ པའི་རྩོད་ལན་པའི་ཁྲིམས་རྩོད་པ་བློ་བཟང་གྲགས་པས་ཕྱི་ལོ་༢༠༡༩ ཟླ་༡༠ ཚེས་༡༤ ཉིན་ཁ་མཆུ་ཨང་༢༠ པའི་བཅད་ཁ་ཁྱབ་བསྒྲགས་བྱས་པའི་ཐད་གསར་འགོད་པར་གཏམ་བཤད་བྱས་པ་དེ་རིགས་སྤྱི་མང་ཁྲིམས་ཡིག་དོན་ཚན་༨༥ [ཁ] ནང་གསལ་ཆེས་མཐོའི་ཁྲིམས་ཞིབ་ཁང་ལ་ཁྱད་གསོད་བྱས་པའི་བཅོས་གསོའི་ཆད་པ་འགེལ་མ་དགོས་པའི་རྒྱུ་མཚན་བརྗོད་རྒྱུའི་ཆེད་ཕྱི་ལོ་༢༠༡༩ ཟླ་༡༢ ཚེས་༦ ཉིན་ཕྱི་དྲོའི་ཆུ་ཚོད་༢་༣༠ སྟེང་ཉན་ཞིབ་བྱ་རྒྱུའི་བརྡ་ཐོ་༢༠༡༩།༡༡།༢༢ ཉིན་བརྡ་ཐོ་སྐྱེལ་མཁན་ཆེད་གཏོང་གིས། བོད་མིའི་ཁྲིམས་ལུགས་རིག་པ་བའི་ལས་ཁུངས་ཀྱི་ལས་བྱེད་རིན་ཆེན་བཟང་བོ་ལ་སྤྲད་དེ་འབྱོར་ལྡན་མིང་རྟགས་བླངས་ཟིན་ནའང་། དོ་བདག་གོང་གསལ་དུས་བཀག་ཉིན་ཁྲིམས་ཞིབ་ཁང་དུ་ཉན་ཞིབ་ལ་ངོ་བཅར་བྱས་མ་སོང་བས། ཁྲིམས་ཞིབ་ཁང་གི་བརྡ་ཐོར་བརྩི་བཀུར་མ་ཞུས་པའི་རྒྱུ་མཚན་ཆབས་ཅིག་ཕྱི་ལོ་༢༠༡༩ ཟླ་༡༢ ཚེས་༩ ཉིན་སྔ་དྲོའི་ཆུ་ཚོད་༡༠་༣༠ སྟེང་ཉན་ཞིབ་བྱེད་གཏན་འཁེལ་བའི་གསལ་བསྒྲགས་སུ་”ཞེས་འཁོད་ཡོད་པ་རེད།།

གསར་འགོད་པ་ཆོས་ཉིད་འོད་ཟེར།

 

Share this:
༡༣༠༣ ཀློག་གྲངས།