ཀྲུང་གུང་ཀྲུང་དབྱང་གི་ཆོག་མཆན་འོག་ཀྲུང་དབྱང་འཐབ་ཕྱོགས་གཅིག་གྱུར་ལས་ཁུངས་ནས<<ཏཱ་ལའི་རུ་ཚོགས་དང་ཕྱི་རྒྱལ་དུ་བྲོས་བྱོལ་སོང་བའི་བོད་མི་དག་ཕྱིར་ལོག་བྱ་ཐབས་གནད་དོན་སྐོར་དགོངས་སྐོར་སྙན་ཞུ>>

ལོ་ཙཱ་བ། སད་མི། སྒྱུར་བ་པོའི་སྐད་ཆ། (སྤྱིར་བཏང་བྱས་ན། རྒྱ་ནག་གིས་བོད་ལ་འཛིན་པའི་སྲིད་ཇུས་སྐོར་ཡིག་ཆ་འདི་ནི་རྙིང་པ་ཞིག་རེད་མོད། ད་ཕན་པར་གཞི་འདི་རྒྱ་མིའི་ཡི་གེ་ལས་མེད་སྟབས་བཙན་བྱོལ་བོད་མི་མང་ཆེ་བས་ཀློག་ཐུབ་ཀྱི་མེད། དེས་ན། དགྲ་ཕྱོགས་ནས་ང་ཚོ་ཕམ་ཉེས་གཏོང་ཐབས་སུ་ཇུས་ངན་ཅི་ཞིག་བཤམས་ཡོད་པ་དང་། བྱེད་སྟངས་ལས་སྟངས་ག་འདྲ་ཞིག་རེད་ཚང་མས་ཤེས་ན་བསམ་ནས་བོད་འགྱུར་བྱས་པ་ཡིན་ལ། བོད་པ་མང་པོ་ཞིག་ལ་བོད་རྒྱའི་གནད་དོན་སྐོར་དོ་སྣང་དང་རྒྱུས་ལོན་ཅི་ཆེ་བྱ་རྒྱུའི་འདོད་འདུན་ཡོད་པས། ཡིག་ཆ་འདི་བོད་ཡིག་ཏུ་བསྒྱུར་བས་དེ་དག་ལའང་དཔྱད་གཞི་ཚུན་དུ་ཕན་ངེས་པས་ཡིན།)

 

ཀྲུང་དབྱང་།

ཏཱ་ལའི་རུ་ཚོགས་དང་ཕྱི་རྒྱལ་དུ་བྲོས་བྱོལ་ལ་སོང་བའི་བོད་མི་ཕྱིར་ལོག་བྱ་ཐབས་གནད་དོན་སྐོར་ལ། ཉེ་ཆར་ང་ཚོས་རྒྱལ་ཁབ་མི་རིགས་ཨུ་ལྷན་དང་། ཕྱི་འབྲེལ་ལས་ཁུངས། སྤྱི་བདེ་ལས་ཁུངས། ཀྲུང་དབྱང་ཞིབ་འཇུག་ལས་ཁུངས། དམག་སྤྱི་བཀོད་འདོམས་ལས་ཁུངས། ཆབ་སྲིད་འབྲེལ་མཐུད་ལས་ཁུངས་སོགས་ཀྱི་འགན་འཁུར་བློ་མཐུན་ཚོས་ཞིབ་འཇུག་ཐེངས་དུ་མ་བྱས་ཡོད། མ་ཟད། ཀྲུང་དབྱང་གི་ཚོགས་འདུ་དང་སྦྲགས་ཏེ། བོད་ལྗོངས་དང་། སི་ཁྲོན། མཚོ་སྔོན། ཀན་སུའུ། ཤིན་ཅང་། ཡུན་ནན་ཞིང་ཆེན། རང་སྐྱོང་ལྗོངས་དང་ལན་ཀྲུའུ། ཁྲིན་ཏུའུ་དམག་སྒར་འགན་གཙོ་བློ་མཐུན་བཅས་ཀྱི་བསམ་འཆར་གཤམ་དུ་འགོད་རྒྱུ་ཡིན།

དང་པོ། ཏཱ་ལའི་རུ་ཚོགས་ཀྱི་རྩ་བའི་གནས་སྟངས།

ཏཱ་ལའི་རུ་ཚོགས 1959 ལོར་རྒྱ་གར་ལ་བྲོས་བྱོལ་སྐབས། དྲག་དམག་ངོ་ལོག་ཟིང་འཁྲུག་པ་ཕལ་ཆེར་ཉིས་ཁྲི་ཙམ་དང་། མགོ་སྐོར་བསླུ་བྲིད་བྱས་པ་དྲུག་ཁྲི་ཙམ་བཅས་རེད། དེ་དག་མང་ཆེ་བ་བོད་ལྗོངས་ནས་ཡིན་པ་དང། དེ་མིན་སི་ཁྲོན། མཚོ་སྔོན། ཀུན་སུའུ་བོད་མི་བཅས་ཡོད། ཡུན་ནན་བའང་ཡོད་མོད་ཧ་ཅང་ཉུང་ཉུང་རེད། ཤེས་གསལ་ལྟར་ན། ད་ལྟའང་ངོ་ལོག་པ་ཆིག་ཁྲི་སུམ་སྟོང་ལྷག་ཡོད་པ་དང་། བོད་དམངས་ཁྲི་བརྒྱད་ཙམ་ཡོད། (རང་བཞིན་འཕར་སྣོན་ཆིག་ཁྲི་ལྔ་སྟོང་ཙམ་རེད)རྒྱ་གར་དུ་གནས་སྡོད་ཁྱོན་བསྡོམས་ཁྲི་ལྔ་དང་ཉིས་སྟོང་ལྷག་རེད། དེ་འཕྲོས་བལ་ཡུལ་དང་། འབྲུག་ཡུལ། འབྲས་ལྗོངས་བཅས་སུ་ཡོད་ལ། ཕལ་ཆེར་བོད་མི་ལྔ་སྟོང་ཙམ་ཨ་རི་དང་ཡོ་རོབ་རྒྱལ་ཁབ་ཁག་ཏུ་འཐོར་བསྡད་ཡོད་པ་རེད། རྒྱ་གར་དུ་ཡོད་པའི་ངོ་ལོག་པ་ཚོར 1962 ནས་རྒྱ་བོད་ས་མཚམས་དམིགས་བསལ་དམག་དཔུང་ལ་བསྒྱུར་བ་དེ། རྒྱ་གར་ནང་སྲིད་ལས་ཁུངས་ཀྱི་བྲན་འཁོར་དུ་ཆགས་ཡོད། དོན་དུ། རྒྱ་གར་གྱི་རྒྱུག་ཁྱི་རེད། ཏཱ་ལའི་རུ་ཚོགས་མེས་རྒྱལ་དང་ཁ་བྲལ་རྗེས། དཀའ་སྡུག་མྱངས་ཚར་ཡོད་ལ། ནང་ཁུལ་འགལ་བ་ཆེ་བས་མིག་སྔར་དཀའ་ངལ་གྱི་གནས་སྟངས་ནང་ལྷུང་བསྡད་ཡོད། ཤེས་གསལ་ལྟར་ན། ཏཱ་ལའི་རུ་ཚོགས་ནང་རོལ་དུ་བོད་རང་བཙན་དང་མེས་རྒྱལ་དུ་ཕྱིར་ལོག་གནད་དོན་ཐད་ལ་རྣམ་པ་མི་འདྲ་བ་གསུམ་ཡོད་པ་སྟེ། གཅིག བོད་རང་བཙན་ལྟ་བ་མཚམས་བཞག་ནས་མེས་རྒྱལ་དུ་ལོག་རྒྱུ། གཉིས། མུ་མཐུད་ནས་བོད་རང་བཙན་ལངས་ཕྱོགས་འཛིན་རྒྱུ། གསུམ། ཅང་ཅེ་ཧྲི་ཚོགས་ཁག་དང་ངན་སྦྲེལ་བྱ་འདོད་པའམ། སུའུ་ལན་ལ་མགོ་བཅོལ་བྱ་འདོད་པ་བཅས་རེད། ཏཱ་ལ་སོགས་མི་ལ་ལ་ཐེ་ཚོམ་དང་ནེམ་ནུར་ངང་ལུས་ཡོད་ལ། རྒྱལ་ཁབ་ཏུ་ཕྱིར་ལོག་དྲན་མོད་དོགས་པ་རྣམ་རྟོག་ཀྱང་ཡོད་པ་རེད། ཏཱ་ལས་ཐེངས་དུ་མར་སྤྱི་བསྒྲགས་ཏེ་ནས་ང་ཚོར་ཉམས་ཚོད་བླངས་ཡོད། ངེད་བོད་རང་སྐྱོང་ལྗོངས་དྲིལ་བསྒྲགས་ལས་ཁུངས་ནས་ངོ་ལོག་བཙོན་པ་གཙོ་གྲས་ཚང་མ་གློད་གྲོལ་བཏང་བས། ཁོང་ཚོར་གཡོ་འགུལ་ཆེན་པོ་བྱུང་བ་རེད། རྒྱ་གར་སྲིད་གཞུང་གིས་ཀྱང་རང་རྒྱལ་དང་འབྲེལ་བ་ཞི་འཇམ་ཡོང་ཆེད། ཏཱ་ལའི་རུ་ཚོགས་གནད་དོན་ཐད་ཀྱི་དཀའ་ངལ་ལས་གཡོལ་ཐབས་བྱེད་བཞིན་ཡོད། ཀྲུང་ཨ་ཕྱི་འབྲེལ་བཙུགས་ཚུན་རྒྱལ་སྤྱིའི་གནས་སྟངས་མྱུར་སྟབས་ཆེན་པོས་འགྱུར་བ་སོང་བས་ཀྱང་ཏཱ་ལའི་རུ་ཚོགས་ནང་ཁུལ་ཁ་འཐོར་འགྲོ་བའི་ཤུགས་རྐྱེན་སྔར་ལས་ཆེ་བ་ཐེབས་ཡོད་སྟབས། མེས་རྒྱལ་དུ་ལོག་འདོད་བྱེད་མཁན་ཇེ་མང་དུ་འགྲོ་རྒྱུ་རེད།

གཉིས་པ། ཏཱ་ལའི་རུ་ཚོགས་ཀྱི་རྩ་བའི་ཁ་ཕྱོགས།

མིག་སྔའི་རྒྱལ་ཕྱི་ནང་གི་གནས་སྟངས་དང་འཐབ་རྩོད་ཀྱི་དགོས་མཁོ་ལ་གཞིགས་ཡོང་དུས། ཏཱ་ལའི་རུ་ཚོགས་མེས་རྒྱལ་དུ་ཕྱིར་ལོག་བྱ་ཐབས་འབད་བརྩོན་བྱ་དགོས། དེ་ནི་ང་ཚོར་ཁེ་ཕན་ཡོད་པ་རེད་ལ། འགྲུབ་སྲིད་པ་ཞིག་ཀྱང་རེད། རང་ཕྱོགས་ནས་ཁོང་ཚོར་འཛིན་པའི་རྩ་བའི་ཁ་ཕྱོགས་ནི་རྒྱལ་གཅེས་ཁྱིམ་ཚང་གཅིག རྒྱལ་གཅེས་ལ་སྔ་ཕྱི་མེད། ཧུར་བརྩོན་སྒོ་ནས་བརྩོན་ལེན་བྱེད། འདས་དོན་ལ་ཁག་འགེལ་མི་བྱ། གལ་ཏེ་སུ་ཞིག་ཕྱིར་ལོག་བྱ་འདོད་ཚེ། ཐམས་ཅད་ལ་དགའ་བསུ་ཞུ་རྒྱུ་ཡིན། ཚུར་ལོག་ཡོང་ནས་ཕྱིར་ཐོན་མིན་པ་དག་ལ་འོས་འཚམ་སྒོ་ནས་སྡོད་གནས་བཀོད་སྒྲིག་བྱ་དགོས། ཚུར་ལོག་ནས་ཕར་ཐོན་མཁན་ཚོར་གུས་པ་ལྡན་པའི་སྒོ་ནས་སྐྱེལ་མ་བྱ་དགོས། རྗེས་སུ་ཁོང་ཚོར་ཏཱ་ལའི་རྒྱལ་ཁབ་ངོ་ལོག་རུ་ཚོགས་ཟེར་འབོད་མི་རུང་། དེའི་ཚབ་ཏུ་ཏཱ་ལ་དང་ཕྱི་རྒྱལ་དུ་ཡོད་པའི་དེ་སྔའི་བོད་ལྗོངས་མཐོ་རིམ་མི་སྣ་འབོད་དགོས། ངོ་ལོག་ཟིང་འཁྲུག་ཟེར་འབོད་མི་ཉན། དེའི་ཚབ་ཏུ་བོད་རིགས་སྤུན་ཟླའམ་ཕྱི་རྒྱལ་དུ་ཡོད་པའི་བོད་རིགས་སྤུན་ཟླ་ཟེར་དགོས།

ང་ཚོས་ལས་ཀའི་གཙོ་གནད་འཛིན་དགོས་ས་ནི། ཏཱ་ལ་དང་རུ་ཚོགས་ཀྱི་མཐོ་རིམ་མི་སྣ། དེ་བཞིན་དྲག་སྤྲས་ངོ་ལོག་ཟིང་འཁྲུག་པ་ཁ་འཐོར་གཏོང་རྒྱུ་དེ་རེད་ལ། ཁོ་ཚོ་མང་ཆེ་བའམ་ཚང་མ་མེས་རྒྱལ་དུ་ལོག་ཐུབ་པ་བཟོ་རྒྱུ་དེ་རེད། མགོ་སྐོར་བསླུ་བྲིད་ཐེབས་པའི་བོད་འབངས་དེ་དག་ལ་ཡང་ལས་ཀ་བྱེད་དགོས། ཁོ་ཚོར་མེས་རྒྱལ་ལ་དགའ་ཞེན་བྱ་དགོས་པའི་སློབ་གསོ་སྤྲོད་དགོས། ཕྱིར་ལོག་བྱ་འདོད་པ་ཚོར་དགའ་བསུ་ཞུ་རྒྱུ་དང་། ལོག་འདོད་མེད་པ་ཚོའང་ཕྱི་རྒྱལ་དུ་གནས་སྡོད་ཆོག་ལ། གནས་ཡུལ་རྒྱལ་ཁབ་ཀྱི་ཆབ་འབངས་སུ་འཛུལ་ཞུགས་ཀྱང་བྱ་ཆོག རྒྱལ་ནང་དུ་ལོག་ནས་ཉེ་དུ་ཐུག་འཕྲད་བྱ་འདོད་པ་ཚོར་འགྲོ་འོང་རང་དབང་ཡོད་ལ། སྟབས་བདེའི་མཐུན་འགྱུར་བྱ་རྒྱུ།

ཏཱ་ལ་ཡི་ལས་ཀའི་ཐད་དུ། ང་ཚོས་དམིགས་བསལ་གཙིགས་འཛིན་བྱ་དགོས། ཅི་སྟེ་ཁོ་རང་རྒྱལ་ནང་དུ་ལོག་འདོད་པ་ཡིན་ན། ང་ཚོས་ཆོས་ལུགས་འགོ་ཁྲིད་ཅིག་ཏུ་བལྟ་དགོས་ལ། མུ་མཐུད་འོས་འཚམས་ཀྱི་ལས་ཀ་བཀོད་སྒྲིག་བྱ་དགོས། ལས་ཀའི་བརྒྱུད་རིམ་ཁྲོད་ལ་ངེས་པར་དུ་གསང་བ་དམ་པོ་བྱ་དགོས། ཏཱ་ལའི་བདེ་འཇགས་ལ་གཟབ་དགོས། རྒྱ་གར་གྱི་ལོག་སྤྱོད་སྟོབས་ཤུགས་དང་ཏཱ་ལའི་རུ་ཚོགས་ཀྱི་མཁྲེགས་འཛིན་ཤོག་ཁག་ལ་ཡིད་གཟབ་བྱ་དགོས། ལྷག་པར་དུ་སུའུ་ལན་གསང་མྱུལ་བས་གཏོར་བཤིག་གཏོང་བར་གཟབ་དགོས།

ཏཱ་ལ་ཡི་ལས་ཀའི་ཐད་ལ། ང་ཚོས་ཧ་ཅང་མཐོང་ཆེན་བྱ་དགོས། ཅི་སྟེ་ཁོ་རང་མེས་རྒྱལ་དུ་ཚུར་ལོག་འདོད་ཡོད་ཚེ། ང་ཚོས་ཆོས་ལུགས་དབུ་ཁྲིད་དུ་བཞག་ནས་སྣེ་ལེན་བྱ་རིགས། དེ་ལྟར་བྱས་པས། བོད་ལྗོངས་བརྟན་ལྷིང་དང་། ལྷོ་ནུབ་མཐའ་མཚམས་ས་ཁུལ་སྲ་བརྟན། མེས་རྒྱལ་གཅིག་གྱུར་སྲ་བརྟན་བཅས་ལ་ཧ་ཅང་གལ་འགངས་ཆེ་བའི་དོན་སྙིང་ལྡན་ཡོད།གནད་དོན་འདི་ཐག་གཅོད་བྱ་ཐུབ་ཚེ། རྒྱལ་སྤྱིའི་ཕྱོགས་འགལ་ཤོག་ཁག་གི་སྟོབས་ཤུགས་དང་། ལྷག་པར་དུ་སུའུ་ལན་བཙན་རྒྱལ་ཤོག་ཁག་གིས་བོད་ཀྱི་གནད་དོན་ཟེར་བ་འདིར་ཁ་གཡར་ནས་འུ་ཚོའི་རྒྱལ་ཁབ་ཁ་བྲལ་གཏོང་རྒྱུའི་སྟོང་བསམ་བཅས་ཕྱེ་མར་གཏགས་པ་རེད། དེས་ན། དོན་གནད་འདིས་ང་ཚོའི་རྒྱལ་ཁབ་ལྷིང་འཇགས་མཐུན་སྒྲིལ་ལ་ཕན་པ། དེས་མ་ཚད། ཅང་ཅིན་ཀོ་དང་ཐེ་ཝན་དབང་འཛིན་པ་ལའང་ཤུགས་རྐྱེན་ཏན་ཏན་ཐེབས་ངེས་རེད་ལ། ཐེ་ཝན་འདི་ཉིད་མེས་རྒྱལ་པང་དུ་ལོག་ནས་མེས་རྒྱལ་གཅིག་གྱུར་ཆེན་མོའི་རླབས་ཆེན་བྱ་བཞག་མངོན་འགྱུར་ཡོང་བར་ཕན་ཐོགས་ངེས་ཡིན། དེ་འདྲ་ཡིན་སྟབས། ང་ཚོས་ཏཱ་ལ་དང་ཕྱོགས་གཏོགས་རུ་ཚོགས། དྲག་སྤྲས་ངོ་ལོག་ཚོའི་ལས་ཀའི་ཐད་དུ་ཅི་བས་གལ་གནད་ཅན་དུ་བཟུང་སྟེ། རྣམ་འགྱུར་ལ་ཧུར་སེམས་ཡོད་པ། ལས་ཀར་ཟབ་བརླིང་འཐུས་སྒོ་ཚང་བ་མ་ཟད། ཡུན་རིང་རྩིས་གཞི་ཡོད་པ། ཁ་ཐུང་སྣ་ཐུང་རྩ་བ་ཉིད་ནས་བྱ་མི་རུང་།

གསུམ། བོད་མི་ཕྱིར་ལོག་གི་སྲིད་ཇུས་གནད་དོན་སྐོར།

( དང་པོ། ) ཕྱིར་ལོག་བོད་མི་ཚོར་སྣེ་ལེན་བྱ་ཕྱོགས་ཐད་དུ། ཏང་གི་སྤྱིའི་ལམ་ཐིག་དང་དུས་སྐབས་གསར་པའི་ལས་འགན་ལམ་སྟོན་འོག་ཏུ། ཕྱི་ལྟར་དུ་ལྷོད་ལ་ནང་དུ་དམ་པ། སྤྲོ་སེམས་འཁོལ་པོས་སྣེ་ལེན་པ། བདེ་འཇགས་ལ་འགན་སྲུང་བྱེད་པ། ཕྱིར་ལོག་མི་སྣའི་གནས་བབ་ལ་གཞིགས་ཏེ་འོས་ཤིང་འཚམ་པའི་བློ་མཐུན་བཀོད་མངགས་བྱས་ནས་ཐུག་འཕྲད་གླེང་མོལ་བྱེད་དགོས་ལ། ལྟ་སྐོར་འགྲོ་རྒྱུ་ལ་བཀོད་སྒྲིག་བྱ་དགོས། གལ་ཏེ། སྐམ་ས་དང་མཚོ་ངོགས་ས་ཚུགས་ཁག་བརྒྱུད་ནས་ཕྱིར་ལོག་ཡོང་བའི་བོད་མི་ཡིན་ན། ཐད་གཏོགས་ཞིང་ཆེན་དང་གྲོང་ཁྱེར་སོ་སོའི་ཡུལ་སྐོར་ལས་ཁུངས་ནས་འགན་འཁུར་སྣེ་ལེན་བྱ་དགོས། གལ་ཏེ། ཏཱ་ལ་དང་ཏཱ་ལའི་རུ་ཚོགས་ཀྱི་མི་སྣ་གཙོ་གྲས་ཕྱིར་ལོག་བྱས་ཡོང་ན། ཀྲུང་དབྱང་རིམ་པའི་ལས་ཁུངས་ནས་འགན་འཁུར་སྣེ་ལེན་བྱ་དགོས། བོད་ལྗོངས་ས་མཚམས་འགག་སྒོ་ནས་ཕྱིར་ལོག་ཡོང་བའི་བོད་མི་ཡིན་ཚེ་བོད་རང་སྐྱོང་ལྗོངས་ཀྱིས་སྣེ་ལེན་བྱ་དགོས། བཀོད་སྒྲིག་བྱ་དགོས་རིགས་ལ་འོས་འཚམ་སྒོ་ནས་བཀོད་སྒྲིག་བྱ་དགོས། བོད་ལྗོངས་ཁོངས་སུ་གཏོགས་པ་ཡིན་ན། བོད་ལྗོངས་ནས་འགན་འཁུར་དགོས། ཞིང་ཆེན་དང་ས་ཁུལ་གཞན་གྱི་ཁོངས་སུ་གཏོགས་པ་ཡིན་ན། ཞིང་ཆེན་དང་ས་ཁུལ་དེ་དང་དེས་འགན་འཁུར་དགོས། ཕྱི་རྒྱལ་དུ་བཙུགས་པའི་གཞུང་ཚབ་ལས་ཁུངས་མ་བརྒྱུད་པར་རང་མོས་སྒོོ་ནས་ས་མཚམས་བརྒྱུད་ཚུར་ལོག་ཡོང་མཁན་མང་ཚོགས་ཡིན་ནའང་བཀོད་སྒྲིག་བྱ་དགོས། དེ་དག་འཚོ་བ་བརྟེན་ས་ཡོད་པ་བྱ་དགོས།

ཀྲུང་དབྱང་ནས་ཚུར་ལོག་ཡོང་རྒྱུར་མོས་མཐུན་བྱས་ཚར་བའི་བོད་མི་ལྔ་པོ་ནི། ཏཱ་ལའི་རུ་ཚོགས་ཀྱིས་ཆེད་དུ་ཚུར་གློད་ཡོང་ནས་ཉམས་ཚོད་ལེན་པའི་ཆེད་དུ་རེད། ཁོང་ཚོས་གཅིག་ནས་བོད་ལྗོངས་ཀྱི་དངོས་ཡོད་གནས་སྟངས་བལྟ་འདོད་པ་རེད་ལ། གཉིས་ནས་ང་ཚོས་ཁོ་ཚོར་འཛིན་པའི་རྣམ་འགྱུར་དང་སྲིད་ཇུས་ཐད་ལག་ཉུལ་དྲ་མ་བྱ་དགོས་བསམ་ཡོད། རྒྱུ་མཚན་དེའི་ཕྱིར་ན། མི་འདི་ལྔ་པོའི་སྣེ་ལེན་དང་ལས་ཀའི་སྐོར་ལ། ང་ཚོས་ངེས་པར་དུ་ནན་ཏན་བྱ་དགོས།

( གཉིས་པ། )གལ་ཏེ་ཚུར་ལོག་བྱེད་མཁན་བོད་མི་དཀྱུས་མ་ཞིག་ཡིན་ན། རྒྱ་གར་དུ་ཡོད་པའི་གཞུང་ཚབ་ཁང་གི་ཆོག་མཆན་འོག་ལམ་ཡིག་དང་ཐོན་མཆན་ཡི་གེ་གང་རུང་སྤྲད་དགོས། གལ་ཏེ། ཏཱ་ལའི་རུ་ཚོགས་ཀྱི་སྲོག་ཤིང་མི་སྣ་དང་རྐང་འཛིན་ཤོག་ཁག དེ་བཞིན་དུ་ཏཱ་ལ་རང་ཉིད་བཅས་ཡིན་ན། ངེས་པར་དུ་རྒྱལ་ནང་ལ་ཆོག་མཆན་ཞུ་དགོས།

(གསུམ་པ།)ཆོག་མཆན་ཞུས་ནས་ཚུར་ལོག་བྱེད་མཁན་དག་ལས། རྒྱལ་ནང་དུ་ལོག་ནས་ཉེ་དུ་ཐུག་འཕྲད་དང་སྒེར་དོན་སོགས་ཡིན་ན། རྩ་བའི་ཆ་ནས་ལམ་རྒྱགས་སོ་སོས་གཏོང་དགོས། དཀའ་ངལ་ཡོད་མཁན་ལ་འོས་འཚམ་སྒོ་ནས་རོགས་པ་བྱ་དགོས། གལ་ཏེ། རྒྱལ་ནང་དུ་ལོག་སྟེ་འཛུགས་སྐྲུན་ལས་ཀར་ཞུགས་པར་འདོད་ན། ལམ་རྒྱགས་ང་ཚོས་གཏོང་དགོས།

(བཞི་པ།) རྒྱལ་ནང་གི་བོད་འབངས་དང་ཕྱི་རྒྱལ་ལ་བྲོས་བྱོལ་ལ་སོང་བའི་བོད་མིའི་དབར་གཉེན་ཉེའི་འབྲེལ་བ་ཡོད་ཚེ། ཕན་ཚུན་ཡིག་འབྲེལ་དང་ཅ་དངོས་གཏོང་ལེན་བྱ་ཆོག རྒྱ་གར་དུ་གཉེན་ཉེ་ཐུག་པར་འགྲོ་འདོད་ཡོད་རིགས་རྣམས་ལ། གལ་ཏེ་ཆབ་སྲིད་ཀྱི་གནད་དོན་ཆེན་པོ་མེད་ན། ཕྱི་རྒྱལ་དུ་འགྲོ་རྒྱུར་ཆོག་མཆན་སྤྲད་ཆོག

(ལྔ་པ།) ཚུར་ལོག་བོད་མི་སྣེ་ལེན་དང་བཀོད་སྒྲིག་ཐད་ཀྱི་འགྲོ་སོང་སྐོར། བོད་ལྗོངས་དང་འབྲེལ་ཡོད་ཞིང་ལྗོངས་ནོར་སྲིད་ལས་ཁུངས་ནས་དངོས་དོན་ལ་གཞིགས་ནས་འགྲོ་སོང་གཏོང་དགོས།

 བཞི་པ། རྒྱལ་ནང་གི་ལས་ཀ་ཡག་པོ་བྱེད་དགོས་པ་དང་། ཏང་གི་སྲིད་ཇུས་ཁག་དོན་འཁྱོལ་བྱ་དགོས།

ཕྱིར་བྲོས་བོད་མི་ཚུར་འགུག་བྱ་རྒྱུའི་ལས་དོན་ཡག་པོ་འགྲུབ་ཆེད། ཐོག་མར་རྒྱལ་ནང་གི་ལས་དོན་ཡག་པོ་བསྒྲུབ་དགོས། མིག་སྔར་གལ་འགངས་ཆེ་ཤོས་ཀྱི་ལས་དོན་ནི་སྲིད་ཇུས་དོན་འཁྱོལ་བྱ་རྒྱུ་དེ་རེད། དེ་སྔོན་ལིང་པེའོ་དང་མི་བཞི་ཤོག་ཁག་འཕྲེད་བསྐྱོད་བྱས་པའི་སྐབས་སུ། ཁ་བཤད་དང་ལག་བསྟར་མ་མཐུན་པའི་སྲིད་ཇུས་འགའ་ལག་ལེན་བྱས་པ་དེ་དག་ངེས་པར་དུ་ནོར་བཅོས་གཙང་སེལ་བྱ་དགོས།

(དང་པོ།) ས་མཚམས་འགོག་སྲུང་ལས་ཀ་ཁག་དོན་འཁྱོལ་བྱ་དགོས། ཞུ་དོན་ལྟར་ན། ས་མཚམས་ཁུལ་དུ་སྲིད་ཇུས་ལག་བསྟར་སྐོར་གནད་དོན་མང་པོ་ཡོད། དཔེར་ན། ཕྱིར་བྲོས་བོད་མི་ཡིན་ནོ་ཅོག་རྒྱལ་འཚོང་བ་བརྩིས་པ་དང་། ཕྱིར་བྲོས་བོད་མིའི་ཁྱིམ་ཚང་ངོ་ལོག་ཁྱིམ་ཚང་དུ་བརྩི་བ། ཚུར་ལོག་ཡོང་བའི་བོད་མི་མྱུལ་མ་རུ་བལྟ་བ་བཅས་རེད། ཅི་སྟེ་ལས་ཀ་འདི་རིགས་ནོར་བཅོས་མ་བྱས་ན་སྐབས་བབ་ལས་དོན་བསྒྲུབ་རྒྱུར་ཕན་ཐོགས་མེད་པ་ཡིན། བོད་རང་སྐྱོང་ལྗོངས་ཏང་ཨུད་དང་འབྲེལ་ཡོད་ཞིང་ཆེན། དེ་བཞིན་ས་ཁུལ་ཁག་བཅས་ནས་ས་མཚམས་སྲིད་ཇུས་ལག་བསྟར་ཐད་ཕྱོགས་ཡོངས་ནས་ཞིབ་བཤེར་ཐེངས་གཅིག་བྱ་དགོས་པར་བསམ་འཆར་འདོན་གྱི་ཡོད། ལས་བྱེད་དང་མི་དམངས་ནས་ས་མཚམས་སྲིད་ཇུས་དང་། ཕྱི་འབྲེལ་སྲིད་ཇུས། མི་རིགས་སྲིད་ཇུས་སློབ་གསོའི་ཐད་ཁྲིམས་འགལ་བྱུང་རིགས་དག་ལ་དུས་ཐོག་ཏུ་ཡོ་བསྲང་བྱ་རྒྱུ་དང་། ཐག་གཅོད་ནན་པོ་བྱ་དགོས།

(གཉིས་པ།) ཕྱི་རྒྱལ་ལ་བྲོས་བྱོལ་སོང་བའི་ཁྱིམ་ཚང་དང་གཉེན་ཉེ་དག་ལ་ལས་དོན་ཡག་པོ་བསྒྲུབ་དགོས། ཁོང་ཚོར་མཐོང་ཆུང་གཏན་ནས་བྱ་མི་རུང་། ངོ་ལོག་ཁྱིམ་ཚང་དེ་བས་ཀྱང་འབོད་མི་རུང་། ཁོང་ཚོར་མ་ཉེས་ཁ་གཡོག་ཕོག་པ་དང་། གྱོད་གཞི་ནོར་བ། གྱོད་གཞི་རྫུན་བཟོ་བྱས་པ་བཅས་ལ་ནོར་བཅོས་བྱ་དགོས། རིག་གནས་གསར་བརྗེ་ཚུན་རྒྱུ་དངོས་གཞུང་བཞེས་ནོར་བ་ཐེབས་པ་རྣམས་ཕྱིར་སྤྲོད་བྱ་དགོས། འཚོ་བ་དཀའ་ངལ་ཡོད་པ་རྣམས་དབུལ་སྐྱོབ་བྱ་དགོས།

(གསུམ་པ།) མཐོ་རིམ་མི་རིགས་ཆོས་ལུགས་ལས་དོན་ཐད་ལས་ཀ་ཡག་པོ་བྱ་དགོས། ཞིང་ཆེན་དང་ས་ཁུལ་ཁག་སོ་སོས་དངོས་ཐོག་བདེན་འཚོལ་གྱི་སྙིང་དོན་གཞིར་བཟུང་སྟེ། མཐོ་རིམ་མི་རིགས་ཆོས་ལུགས་གནད་དོན་ཐད་གཙང་སེལ་བྱ་དགོས། མི་དམངས་ཁྲོད་དུ་ཤུགས་རྐྱེན་ཡོད་པའི་མཐོ་རིམ་མི་སྣར་འོས་འཚམ་སྒོ་ནས་བཀོད་སྒྲིག་བྱ་དགོས། འཚོ་བ་དཀའ་ངལ་ཡོད་པ་རྣམས་ལ་འོས་འཚམ་སྒོ་ནས་རོགས་པ་བྱ་དགོས། གནོད་སྐྱོན་ཐེབས་མཁན་ཞིག་ཡིན་ཚེ་ཞོད་འཇགས་དང་དཀར་འདོན་བྱ་དགོས་པར་བསམ་འཆར་འདོན་བཞིན་ཡོད། ( ཉེ་ཆར་བོད་རང་སྐྱོང་ལྗོངས་སུ་གཙོ་བདག་བཙོན་པ་ཚང་མ་གློད་བཀྲོལ་བཏང་བས། རྒྱལ་ཕྱི་ནང་ཀུན་ཏུ་གྲག་འགུལ་ཐེབས་ཡོད། རེ་བ་ལ་སི་ཁྲོན་དང་། མཚོ་སྔོན། ཀན་སུའུ་བཅས་ནས་འདི་ལྟར་བྱས་ཏེ། ཆབ་སྲིད་ཤུགས་རྐྱེན་རྒྱ་བསྐྱེད་དགོས། པཎ་ཆེན་སྐོར་གྱི་ལས་དོན་ཡག་པོ་བྱ་དགོས། དེས་ནུས་པ་རྩེ་མོར་ཐོན་པ་ཡོང་རྒྱུ་མ་ཟད། ཏཱ་ལ་དང་ཏཱ་ལའི་རུ་ཚོགས་ལའང་ནུས་པ་ཐོན་རྒྱུར་བརྩོན་ལེན་བྱ་དགོས། སྐབས་རྗེས་མ་རྒྱལ་ཡོངས་སྲིད་གྲོས་ཚོགས་ཆེན་སྐབས་སུ། པཎ་ཆེན་རྒྱལ་ཡོངས་སྲིད་གྲོས་གཙོ་འཛིན་དུ་བསྐོ་བཞག་བྱ་དགོས་པར་བསམ་འཆར་འདོན་གི་ཡོད།

(ལྔ་པ།) ཕྱི་ཕྱོགས་དྲིལ་བསྒྲགས་གནད་དོན་སྐོར།

ཚགས་པར། རླུང་འཕྲིན་སོགས་ནས་ཕྱི་ལོགས་སུ་དྲིལ་བསྒྲགས་བྱེད་པར་ཤུགས་སྣོན་བརྒྱག་དགོས། དྲིལ་བསྒྲགས་བྱེད་པའི་ནང་དོན་ནི། 1) ང་ཚོའི་མི་རིགས་འདྲ་མིན་གྱི་མཐུན་སྒྲིལ་ཆེན་མོ་དང་མིག་སྔའི་རྒྱལ་ནང་གི་དུས་བབ་བཟང་པོ། 2) བོད་ལྗོངས་ཀྱི་འཛུགས་སྐྲུན་གྲུབ་འབྲས། ཤུགས་ཆེའི་འགྱུར་བ་དང་སྲིད་ཇུས་དོན་འཁྱོལ་རྣམ་པ། 3) ཏང་གིས་ཏཱ་ལའི་བླ་མ་དང་ཕྱི་རྒྱལ་བྲོས་བྱོལ་བོད་མིའི་སྲིད་ཇུས། དྲིལ་བསྒྲགས་དངོས་ཐོག་བདེན་འཚོལ་ཡིན་དགོས་ལ། ཁ་གཏད་རང་བཞིན་ཡོད་དགོས། ཐབས་ཇུས་སྤྱད་དགོས། ཚད་གཞི་ཚོད་ཐིག་དགོས། བོད་རིགས་ནང་གི་སྐད་གྲགས་ཡོད་པའི་མི་སྣ་རྩ་འཛུགས་གང་མང་བྱས་ཏེ་རྩོམ་ཡིག་སྤེལ་རྒྱུ་དང་། གཏམ་བཤད་བྱར་འཇུག་དགོས། ལས་དོན་འདི་ཀྲུང་དབྱང་དྲིལ་བསྒྲགས་ལས་ཁུངས་དང་ཤིན་ཧྭ་ལས་ཁུངས་ནས་འོས་འཚམ་སྒོས་བཀོད་སྒྲིག་བྱ་དགོས།

( དྲུག་པ། ) འགོ་ཁྲིད་རྩ་འཛུགས་གནད་དོན་སྐོར།

བོད་མི་རྒྱལ་ནང་དུ་ལོག་ཐབས་བྱ་རྒྱུའི་གནད་དོན་ཐད་ལ། ལས་ཁུངས་དང་ས་ཁུལ་ཁ་ཤས་ལ་འབྲེལ་བ་ཆགས་ཡོད། ཀྲུང་དབྱང་གི་ལས་ཁུངས་ཁག་སོ་སོ་དང་ས་ཁུལ་ཁག་སོ་སོའི་རྩ་འཛུགས་འགོ་ཁྲིད་ཚང་མས་ལས་དོན་འདིར་ཤུགས་སྣོན་རྒྱག་དགོས། ཀྲུང་དབྱང་ནང་ཁོངས་སུ། ཀྲུང་དབྱང་འཐབ་ཕྱོགས་གཅིག་གྱུར་པུའུ་དང་རྒྱལ་ཁབ་དམངས་ལྷན། དེ་བཞིན་དུ་ཕྱི་འབྲེལ་ལས་ཁུངས་ཀྱིས་གཙོ་འཛིན་བྱས་ཐོག སྤྱི་བདེ་ལས་ཁུངས་དང་། ཀྲུང་དབྱང་ཞིབ་འཇུག་ལས་ཁུངས། ཀྲུང་དབྱང་དྲིལ་བསྒྲགས་ལས་ཁུངས། ཕྱི་སྡོད་རང་མིའི་ལས་ཁུངས། སྤྱི་ཁྱབ་ཆབ་སྲིད་འབྲེལ་མཐུད་ལས་ཁུངས། སྤྱི་ཁྲབ་དྲག་ཇུས་ལས་ཁུངས་གཉིས་པ་སོགས་མཉམ་ཞུགས་གནང་བ་མ་ཟད། རྟག་ཏུ་ཞིབ་འཇུག་དང་ལས་འགན་མཉམ་འཁུར་བྱས་ཡོད། ཞིང་ཆེན་དང་ས་ཁུལ་ཏང་ཨུད་ཁག་སོ་སོ་ནས་ལས་དོན་འདིར་འགོ་འཁྲིད་རྒྱུར་ཤུགས་སྣོན་རྒྱག་དགོས། གནས་སྟངས་བབ་མཐུན་བྱུང་ན་ཆེད་དོན་ལས་ཁུངས་སམ་ལས་ཁུངས་གང་རུང་ཞིག་གིས་འདི་སྐོར་ཞིབ་ཕྲའི་ལས་དོན་འགན་འཁུར་རྒྱུ། འཆར་ལོའི་འོས་འཚམ་དུས་ཚོད་ཅིག་ཏུ་བོད་ལྗོངས་གཙོ་བོར་བཟུང་སྟེ། འབྲེལ་ཡོད་ཞིང་ལྗོངས་ས་ཁུལ་ཁག་ཚོགས་འདུ་བསྐངས་ནས་ཆེད་དུ་གནད་དོན་འདི་སྐོར་ཐག་གཅོད་བྱ་ཆེད་ཞིབ་འཇུག་བྱ་དགོས། དེས་སྲིད་ཇུས་གཅིག་གྱུར་དང་། ཉམས་མྱོང་སྤེལ་རེས་སོགས་བྱས་ཏེ་ལས་དོན་འདི་ཡག་པོ་བསྒྲུབ་དགོས།

1978.12.12 རྫོགས། མ་རྩོམ་དྲ་ཐག https://blog.boxun.com/hero/201210/xsj19/1_1.shtml?fbclid=IwAR3Dh-_u3Ok-IFi3u_21hCMv7MH2F1YhMyo8JYnt2VO0ZTtzEvmmXvsxhOg

སྒྱུར་བ་པོའི་སྐད་ཆ།

སྤྱིར་བཏང་བྱས་ན། རྒྱ་ནག་གིས་བོད་ལ་འཛིན་པའི་སྲིད་ཇུས་སྐོར་ཡིག་ཆ་འདི་ནི་རྙིང་པ་ཞིག་རེད་མོད། ད་ཕན་པར་གཞི་འདི་རྒྱ་མིའི་ཡི་གེ་ལས་མེད་སྟབས་བཙན་བྱོལ་བོད་མི་མང་ཆེ་བས་ཀློག་ཐུབ་ཀྱི་མེད། དེས་ན། དགྲ་ཕྱོགས་ནས་ང་ཚོ་ཕམ་ཉེས་གཏོང་ཐབས་སུ་ཇུས་ངན་ཅི་ཞིག་བཤམས་ཡོད་པ་དང་། བྱེད་སྟངས་ལས་སྟངས་ག་འདྲ་ཞིག་རེད་ཚང་མས་ཤེས་ན་བསམ་ནས་བོད་འགྱུར་བྱས་པ་ཡིན་ལ། བོད་པ་མང་པོ་ཞིག་ལ་བོད་རྒྱའི་གནད་དོན་སྐོར་དོ་སྣང་དང་རྒྱུས་ལོན་ཅི་ཆེ་བྱ་རྒྱུའི་འདོད་འདུན་ཡོད་པས། ཡིག་ཆ་འདི་བོད་ཡིག་ཏུ་བསྒྱུར་བས་དེ་དག་ལའང་དཔྱད་གཞི་ཚུན་དུ་ཕན་ངེས་པས་ཡིན།

རྣམ་པ་གཞན་ཞིག་ནི། བཙན་བྱོལ་བོད་མིའི་ཁྲོད་དུ་ལ་ལ་ཞིག་གིས་རྡ་རམ་ས་ལས་དབུ་མའི་ལམ་གྱི་སྲིད་ཇུས་བཟུང་བས་བོད་ཕྱི་ནང་འགྲོ་འོང་ཅུང་ཟད་བྱུང་ཡོད་ཟེར། དེ་དབུ་མའི་ལམ་གྱི་གྲུབ་འབྲས་ཡིན་ཟེར། ཁ་ཅིག་གིས་རྒྱལ་ལོ་དོན་འགྲུབ་ནས1979.3.12 ཉིན་རྒྱ་རྒན་ཏེང་ཐུག་པས་བྱས་རྗེས་བཞག་ཡོད་མདོག་མདོག་བྱེད་པ་བཅས་ནི་དྲང་བདེན་མིན་པ་མ་ཟད། སྡུག་ས་ནས་བཤད་ན་ངོ་ཚ་མ་ཤེས་པའི་བསམ་བློ་དང་སྐད་ཅ་ལས་མེད།

ཅིའི་ཕྱིར་དུ་ཞེ་ན། དོན་བརྒྱད་ལོར་བོད་ཕྱི་ནང་གི་འགྲོ་འོང་སྒོ་མོ་ཅུང་ཟད་ཕྱེས་པ་འདི་ནི། དགྲ་ཕྱོགས་ནས་དུས་ཡུན་རིང་པོར་གལ་གནད་ཆེ་བའི་ལས་ཁུངས་ཅི་འདྲའི་མང་པོ་དག་ལན་གྲངས་དུ་མ་འཚོགས་ཏེ་ཐག་གཅོད་བྱས་པའི་ཆབ་སྲིད་གཡོ་ཇུས་ཤིག་རེད། གཞན་ལྟ་ཅི། གཅིག་དགུ་བདུན་ཅུའི་ནང་པཎ་ཆེན་རིན་པོ་ཆེ་གཙོ་བྱས་པའི་བོད་ཀྱི་ཆབ་སྲིད་པ་གཙོ་གྲས་མང་པོ་གློད་གྲོལ་བཏང་དོན་ཡང་གཡོ་ནག་ཞིག་བསྒོམས་ཡོད་པ་ད་གཟོད་གཞི་ནས་ཤེས་རྒྱུ་ཡོད།

འདི་སྐོར་ཡིག་ཆ་རང་གི་སྐད་ཆ་ཁ་ཤས་ཟུར་འདོན་བྱས་ན། མིག་སྔའི་རྒྱལ་ཕྱི་ནང་གི་གནས་སྟངས་དང་འཐབ་རྩོད་ཀྱི་དགོས་མཁོ་ལ་གཞིགས་ཡོང་དུས། ཏཱ་ལའི་རུ་ཚོགས་མེས་རྒྱལ་དུ་ཕྱིར་ལོག་བྱ་ཐབས་འབད་བརྩོན་བྱ་དགོས། དེ་ནི་ང་ཚོར་ཁེ་ཕན་ཡོད་པ་རེད་ལ། འགྲུབ་སྲིད་པ་ཞིག་ཀྱང་རེད།

ང་ཚོས་ལས་ཀའི་གཙོ་གནད་འཛིན་དགོས་ས་ནི། ཏཱ་ལ་དང་རུ་ཚོགས་ཀྱི་མཐོ་རིམ་མི་སྣ། དེ་བཞིན་དྲག་སྤྲས་ངོ་ལོག་ཟིང་འཁྲུག་པ་ཁ་འཐོར་གཏོང་རྒྱུ་དེ་རེད་ལ། ཁོ་ཚོ་མང་ཆེ་བའམ་ཚང་མ་མེས་རྒྱལ་དུ་ལོག་ཐུབ་པ་བཟོ་རྒྱུ་དེ་རེད།

ཉེ་ཆར་བོད་རང་སྐྱོང་ལྗོངས་སུ་བཙོན་པ་གཙོ་བདག་ཚང་མ་གློད་བཀྲོལ་བཏང་བས། རྒྱལ་ཕྱི་ནང་ཀུན་ཏུ་གྲག་འགུལ་ཐེབས་ཡོད། རེ་བ་ལ་སི་ཁྲོན་དང་། མཚོ་སྔོན། ཀན་སུའུ་བཅས་ནས་འདི་ལྟར་དུ་བྱས་ཏེ། ཆབ་སྲིད་ཤུགས་རྐྱེན་རྒྱ་བསྐྱེད་དགོས་ཟེར་བ་སོགས་ནི་གོ་དོན་གཙོ་བོའི་གྲས་རེད།

དེ་མིན། ཐེ་ཝན1987ལོར་རྒྱ་ནག་དང་འགྲོ་འོང་སྒོ་མོ་ཕྱེས་པ་རེད། འོ་ནའང་ཐེ་ཝན་ལ་དབུ་མའི་ལམ་ཟེར་བ་ཞིག་མེད་པ་མ་ཟད། དབུ་ལམ་ཕྱོགས་མཚུངས་པའི་སྲིད་ཇུས་ཤིག་འཛིན་གྱི་མེད་པའི་སྒང་ལ་མུ་མཐུད་སོ་སོའི་བདག་དབང་དང་རང་དབང་དམངས་གཙོ་རྒྱུན་འཛིན་བྱེད་པར་ནུས་པ་འདོན་མུས་རེད། འོ་ན་ཅིའི་ཕྱིར་དུ་ཞེ་ན། དེ་ནི་རྒྱ་ནག་གིས་ཐེ་ཝན་ལ་རྣམ་པ་ཅི་རིགས་སྒོ་ནས་སིམ་འཛུལ་བྱ་འདོད་པ་དང་འཇམ་པོའི་སྟོབས་ཤུགས་བསྐྱེད་པའི་ཆེད་དུ་རེད། དེ་ལྟ་བས་ན། ཕྱོགས་སོ་སོ་ནས་འགྲོ་འོང་སྒོ་མོ་ཟུར་ཙམ་ཕྱེ་བ་དེ་ནི་རྒྱ་ནག་ཁོ་རང་གི་ཆབ་སྲིད་ཁེ་ཕན་ཁོ་ནར་གཞིགས་པ་ལས། ལ་ལ་ཞིག་གིས་ཤོད་ཀྱིན་པའི་གྲུབ་འབྲས་ཟེར་བ་དེ་མིན་པ་ཁ་ཚོན་གཅོད་ཕོད།

2020.1.15 ཉིའུ་ཡོག

Share this:
༡༥༩༤ ཀློག་གྲངས།