བོད་རྒྱ་འབྲེལ་མོལ་ཆད་མཐུད་མང་པོ་བྱུང་བ་རེད།

ཟླ་འདིའི་ཚེས་༢༤ རེས་གཟའ་ལྷག་པའི་ཉིན་སིངྒ་པུར་ནང་རྟེན་གཞི་བྱས་པའི་ལྷོ་ཨེ་ཤི་ཡའི་ཤེས་ཡོན་བསྟི་གནས་ཁང་ (Institute of South Asian Studies) གི་མཐུན་འགྱུར་འོག་༧གོང་ས་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་བོད་རྒྱ་འབྲེལ་མོལ་གྱི་ད་ལྟའི་གནས་བབ་ཐོག་གསུང་བཤད་གནང་དོན། ང་ཚོས་ལོ་བཅུ་ཕྲག་རིང་རྒྱ་ནག་གཞུང་འཛིན་པ་ཚོ་དང་ལྷན་འབྲེལ་བ་ཆད་མཐུད་ལན་མང་བྱས་མཐར། ད་ལྟའི་འཆར་༧གོང་ས་མཆོག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་ཀྱི་གནད་དོན་སེལ་གནང་མཛད་རྒྱུའི་ཞེངས་ཕྱོགས་དེ་རྒྱ་ནག་གཞུང་འཛིན་པ་ཚོར་ཐེ་ཚོམ་དང་གོ་བ་ལོག་གྲུབ་ཀྱི་གཞི་རྩ་ཕྲ་མོ་ཙམ་མེད་པའི་ཐོག་ར་སྤྲོད་ཐུབ་པ་ཞིག་བྱུང་ཡོད། སྤྱིར་ད་ལྟའི་ཆར་ང་ཚོས་བོད་ཀྱི་གནད་དོན་སེལ་རྒྱུའི་འབྲེལ་མོལ་བྱས་པ་དེར་དོན་ཕན་ལྡན་པའི་བཟང་ཕྱོགས་ཀྱི་འགྱུར་བ་གང་ཡང་བྱུང་མེད་ཀྱང། ང་ཚོའི་འབྲེལ་མོལ་དེས་རྒྱ་བོད་ཕྱོགས་གཉིས་ཀྱི་གནས་སྟངས་དང་སེམས་ཚབ་ཇི་འདྲ་ཡོད་པའི་སྐོར་ཕན་ཚུན་ཤེས་རྟོགས་ཇེ་བཟང་དུ་གཏོང་ཐུབ་པ་བྱུང་ཡོད་ཅེས་གསུངས་པ་རེད།

དེ་བཞིན་ཚོགས་ཐོག་ཏུ་ཕྱི་ལོ་ ༡༩༧༠ ནས་ ༡༩༨༥ བར་རྒྱ་ནག་གཞུང་དང་འབྲེལ་བ་ཐོག་མ་འགོ་འཛུགས་སྟངས་དང། དེ་རྗེས་ཕྱི་ལོ་ ༡༩༨༥ ནས་ ༡༩༩༣ བར་གྱི་བོད་རྒྱ་འབྲེལ་མོལ་གྱི་གནས་སྟངས་དང། ཕྱི་ལོ་ ༡༩༩༣ ལོར་རྒྱ་གཞུང་གིས་འབྲེལ་བ་བཅད་ཚུལ་དང། ཕྱི་ལོ་ ༢༠༠༢ ལོར་སླར་ཡང་རྒྱ་ནག་གཞུང་དང་འབྲེལ་བ་སླར་གསོ་བྱུང་ཚུལ། འབྲེལ་མོལ་སླར་གསོ་བྱུང་རྗེས་རྒྱ་ནག་གཞུང་གིས་བཏོན་པའི་གནད་དོན་གལ་ཆེ་རིགས་དང་༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་དབུ་མའི་ལམ་གྱི་སྐོར། བོད་ཀྱི་གནད་དོན་སེལ་མ་ཐུབ་ཚེ་སྤྱི་ཡོངས་ཀྱི་རྗེས་འབྲས་ཇི་བྱུང་སྐོར་དང། བོད་རྒྱ་འབྲེལ་མོལ་སྐབས་ཕྱོགས་གཉིས་ལ་འཕྲད་བཞིན་པའི་དཀའ་ངལ། བོད་ཀྱི་གནད་དོན་སེལ་ཆེད་བོད་རྒྱ་འབྲེལ་མོལ་གྱི་གནས་སྟངས་དེར་ཕྱོགས་གཉིས་ཀས་གོམ་པ་མདུན་སྤོས་ཇི་འདྲ་དགོས་མིན་སོགས་ཀྱི་གནད་དོན་རྣམས་ཞི་ཕྲ་གསལ་བཤད་གནང་ཡོད་འདུག །{jcomments on}

Share this:
༤༩ ཀློག་གྲངས།