ལས་དང་ལས་ཀྱི་འབྲས་བུ་ལ་ཡིད་ཆེས་བྱ་བ།

ལ་ལས་དེ་ཙམ་གྱིས་འབད་པ་ཆེན་པོ་ཅི་ཡང་མ་བྱས་ཀྱང་ནམ་དུའང་ལོངས་སྤྱོད་ཀྱིས་མི་གཏོང་བ་དང༌། འགའ་ཞིག་ནི་གཟུགས་བཟང་ཞིང༌། འགའ་ཞིག་ནི་ཤིན་ཏུ་མི་སྡུག་པ་དང་གཞན་ཡང་དཔྲལ་བའི་དབུས་སུ་གཅིག་མ་གཏོགས་མེད་པ། སྐེ་རྔ་མོང་གི་སྐེ་ལྟར་རིང་བ། དབུགས་འབྱིན་རྔུབ་དང༌། ཟས་སྐོམ་འགྲོ་བའི་བུ་ག་ཙམ་མ་གཏོགས་མིག་སྣ་སོགས་ཤུལ་ཙམ་ཡང་མེད་པ། ལུས་ལ་པགས་ཡེ་མེད་པ། མགོ་ལ་རྭ་སྐྱེས་པ། ཕོ་ཁ་དྲུག་སྐྱེས་ཏེ་རྟག་ཏུ་མུ་གེའི་སྡུག་བསྔལ་བཟོད་དཀའ་བ་མྱོང་བ། ལུས་ལ་མེ་ལྕེ་རང་འབར་ཏེ་གསོན་གསོན་དུ་ཚིགས་ནས་ཤི་བ་དང༌། རྐང་པ་བཞི་ཅན། ལྕེ་གཉིས་ཅན། མགོ་གཉིས་ཅན། མིག་བཞི་ཅན། མགོ་ལ་རྭ་ཡལ་ག་བཞི་པ་དང༌། ལག་སོར་རྣམས་རིང་ཐུང་དུ་སྐྱེས་ཏེ་སྡིག་སྲིན་ཇི་ལྟ་བ་བཞིན་དུ་གྱུར་པ་སོགས་བརྗོད་ཀྱིས་མི་ལངས་པ་ཞིག་འདུག་སྟེ་མདོར་ན་འཇིག་རྟེན་གྱི་ཁམས་འདིར་བདེ་སྡུག་མི་མཉམ་དབྱར་གྱི་རྩི་ཤིང་ལྟ་བུ་ཞིག་ཏུ་སྣང་བ་འདི་དག་རྒྱུ་མེད་རྐྱེན་མེད་དུ་བྱུང་བ་ནི་མི་སྲིད་ལ། བྱེད་པ་པོ་གཞན་ཞིག་གིས་ཆེད་དུ་བཀོད་སྒྲིག་བྱས་པ་ཡིན་པ་ཡང་མི་འགྲུབ། དེས་ན་བདག་ཅག་གི་སྟོན་པས་གསུངས་པ་བཞིན་རང་རང་གིས་ལས་བསགས་པའི་འབྲས་བུ་ཡིན་པར་བདེ་བླག་ཏུ་གྲུབ་པ་ཡིན་ཏེ། ཇི་ལྟར་ན། ལས་རེ་རེ་ལའང་འབྲས་བུ་བཞི་བཞི་སྟེ། རྣམ་སྨིན་གྱི་དང༌། རྒྱུ་མཐུན་གྱི་དང༌། བྱེད་པའི་དང༌། དབང་གི་འབྲས་བུའོ། རྣམ་སྨིན་གྱི་འབྲས་བུ་ནི་དགེ་བས་བདེ་བ་དང༌། མི་དགེ་བས་སྡུག་བསྔལ་བསྐྱེད་པ་དེ་ཡིན། རྒྱུ་མཐུན་གྱི་འབྲས་བུ་ནི་ཚེ་རབས་སྔ་མ་རྣམས་སུ་མི་དགེ་བ་སོགས་བྱེད་པ་ཞིག་ཡིན་ན་ཚེ་འདིར་ཡང་བག་ཆགས་གོམས་པས་དེ་ཉིད་བྱེད་པ་སྟེ། ལས་བརྒྱ་པ་ལས། དེ་མི་དགེ་བ་ཀུན་ཏུ་གོམས་ཤིང་འདྲིས་པར་བྱས་པས། ཕྱིར་ཡང་མི་དགེ་བ་ལ་བརྟེན། མི་དགེ་བ་ལ་སྤྱོད། མི་དགེ་བའི་རྗེས་སུ་འཇུག་པ་ཉིད་དུ་སྐྱེ་སྟེ། ཞེས་གསུངས་པ་ཉིད་དོ།
    ལས་ཀྱི་འབྲས་བུ་འདི་དག་ནི་མངོན་སུམ་དུ་བལྟར་ཡོད་པ་ཞིག་སྟེ། གོང་དུ་བཤད་པ་བཞིན་བཤན་པས་ལག་པ་ཡ་གཅིག་གིས་སངས་རྒྱས་ལ་ཐལ་མོ་སྦྱར་ཞིང་དད་བཞིན་དུ་ཤི་བས་དེའི་རྣམ་སྨིན་ཕག་ཏུ་སྐྱེས་ཀྱང་ལག་པ་ཡ་གཅིག་མིའི་ལག་པར་གྱུར་པ་དང༌། སྲོག་གི་འཇིགས་པ་ལས་ཐར་བར་གྱུར་པ་དང༌། ཆིན་རྒྱལ་རབས་ཀྱི་སྐབས་སུ་ཟི་ཁྲོན་ཁྲིན་ཏུའུ་གྲོང་ཁྱེར་གྱི་ཉེ་འགྲམ་པའོ་ཀྭང་སི་སྟེ་ནོར་འོད་གླིང་གི་གྲྭ་པ་ཞིག་གི་དྲུང་དུ་སྦྱིན་བདག་ཅིག་གིས་གསེར་དང་དངུལ་བུམ་པ་གང་ཕུལ་ཏེ། འདི་གཉུག་མར་གནས་པའི་དགེ་འདུན་པ་དག་ལ་འཚོ་བ་ཡིན་ཟེར། གྲྭ་པས་མལ་ཁྲིའི་འགྲམ་ལ་འཇོག་ཏུ་བཅུག རང་ཉིད་གཞན་དུ་སོང་ནས་མཚན་མོ་སླར་ལོག་སྟེ་ཉལ་བའི་ཚེ་མལ་ཁྲིའི་འོག་གི་བང་ལེབ་ཆག་སྟེ་བུམ་པ་བང་ལེབ་ཀྱི་འོག་ཏུ་ལྷུང༌། གྲྭ་བས་དེར་གསེར་ཡོད་པ་བརྗེད་པར་གྱུར། པང་ལེབ་སླར་འཆོས་པའི་ཚེ་ནའང་མ་མཐོང་བས་གཉུག་མར་གནས་པ་རྣམས་ཀྱི་ལོངས་སྤྱོད་ལ་གནོད་པར་གྱུར། གྲྭ་པ་དེ་ཉིད་ཤི་རྗེས་ལོ་འགའ་ཞིག་ནས་ཉིན་གཅིག་མ་ཧེ་ཞིག་དགོན་པར་འོངས་ཏེ་ཤར་རེ་སྔོན་གྱི་གྲྭ་པའི་ཁང་པའི་ནང་དུ་ཕྱིན་ནས་ངུ་ཞིང་པང་ལེབ་སྟེང་དུ་ལག་རྡེབ་བྱས། པང་ལེབ་རྭས་བརྡེགས་དེ་བཅག་པས་འོག་ན་གསེར་དངུལ་གྱི་བུམ་པ་དེ་ཡོད་པར་མཐོང༌། ཐམས་ཅད་ཡ་མཚན་ཏེ་ཞིབ་ཏུ་བལྟས་པས་མ་ཧེ་དེའི་རྭ་ངོས་ན་སྔོན་གྱི་གྲྭ་པ་དེའི་མིང་གསལ་བར་དོད་ཡོད། ཀུན་སྐྲག་ཅིང་སྙིང་རྗེ་ནས་མ་ཧེ་ཉོས་ཏེ་དགོན་པར་བཞག ཕྱིས་སུ་ཤི་ཚེ་རྭ་དེ་བླངས་ནས་ཉར་ཚགས་བྱས་ཏེ་ལོ་རེ་བཞིན་དགོན་པའི་རྒྱུ་རྫས་རྩིས་སྤྲོད་བྱེད་པའི་ཚེ་ཐམས་ཅད་ལ་རྭ་དེ་བསྟན་ནས་དགེ་འདུན་གྱི་ནོར་རྫས་ལ་བག་ཡོད་བྱ་དགོས་པའི་བསླབ་བྱ་བྱེད་དོ། རྭ་འདི་རིག་གནས་གསར་བརྗེའི་སྐབས་བརླགས་ཀྱང་འདི་དངོས་སུ་མཐོང་མྱོང་མཁན་གྱི་གྲྭ་རྒན་དང་སྦྱིན་བདག་མང་པོ་ད་དུང་ཡོད་འདུག་གོ།
    དེ་བཞིན་དུ་ངོར་མཁན་ཆེན་དཔལ་ལྡན་ཆོས་སྐྱོང་སྡེ་དགེ་ན་བཞུགས་སྐབས། ཉིན་གཅིག་དེ་རིང་དངུལ་མདའི་ཆུ་ནང་འདིར་ཅི་བྱུང་ཡང་གཏོང་མི་ཉན་ཞེས་གྲྭ་པ་མང་པོར་སྒུག་ཏུ་བཅུག ཕྱི་དྲོ་ཙ་ན་ཤིང་སྡོང་ཆེན་པོ་ཞིག་ཆུས་ཁྱེར་བྱུང་བ་དེ་བླངས་ནས་དེ་ལས་གཞན་གང་ཡང་མ་བྱུང་ཞུས་པས། དེ་ཡིན། སྡོང་དུམ་དེ་གཤོགས་དང་གསུངས། སྡོང་དུམ་གཤགས་པའི་ནང་ན་སྦལ་བ་ཆེན་པོ་ཞིག་ལ་སྲོག་ཆགས་མང་པོས་ཟ་བཞིན་འདུག་པ་དེ་ལ་ཁྲུས་ཆོག་སོགས་མཛད། དེ་སྡེ་དགེའི་གཉེར་བ་པོ་རྒྱས་བྱ་བ་ཞིག་གི་སྐྱེ་བ་ཡིན་གསུངས་སོ། དེ་དག་ནི་རྣམ་སྨིན་གྱི་འབྲས་བུ་ཡིན།
    དེ་བཞིན་རྒྱུ་མཐུན་གྱི་འབྲས་བུ་ཡང༌། ཀྲུང་གོའི་ཁྲོའི་ཀུག་གྲོང་རྡལ་ན་༡༩༤༠ ལོར་སྐྱེས་པའི་བགྲེས་མོ་རུས་མིང་པང་ཟེར་བ་ཞིག་ཡོད། འདིས་སྐྱེ་བ་སྔ་མར་ས་འོག་ཏུ་སྦས་པའི་དངུལ་སྒོར་མང་པོ་མོས་བཤད་པ་བཞིན་སྔོན་གྱི་གནས་ཁང་གི་འོག་ནས་རྙེད་པ་སོགས་ཚེ་རབས་དྲན་པའི་བདེན་དཔང་སྟོབས་ལྡན་ཡོད་པ་ཞིག་རེད། འདི་སྐྱེ་བ་སྔ་མར་ཐ་མག་འཐེན་རྒྱུར་ཤིན་ཏུ་སྲེད་པ་ཆེ་བས་ཚེ་འདིར་ལོ་གསུམ་ཙམ་ནས་མི་ཆེན་པོ་དག་ཇི་ལྟ་བ་བཞིན་དུ་ཐ་མག་འཐེན་པར་བྱེད་དོ། དེ་ལྟར་ལས་བརྒྱ་པ་ལས་གསུངས་པ་བཞིན། འདིའི་སྐྱེ་བ་སྔ་མར་མི་དགེ་བ་ཐ་མ་འཐེན་རྒྱུ་འདྲིས་ཤིང་གོམས་པས་ད་ལྟའང་མི་དགེ་བ་ཐ་མ་འཐེན་རྒྱུར་བརྟེན། དེ་ལ་སྤྱོད། དེའི་རྗེས་སུ་འཇུག་པ་ཉིད་དུ་སྐྱེ་བ་ནི་མངོན་སུམ་མོ། དགེ་བ་དང་མི་དགེ་བའི་ལས་ཀྱི་རྣམ་གྲངས་བསྟན་པའི་མདོ་ལས། སྐྱེ་བ་སྔ་མར་རོལ་མོ་མཁན་བྱེད་པ་དག་ནི་སྐྱེ་བ་ཕྱི་མར་གླུ་གར་ལ་དགའ་བ་ཉིད་དུ་སྐྱེ་བར་གསུངས་པ་དེ་ཉིད་དངོས་གནས་དེ་ལྟར་དུ་བྱུང་འདུག་སྟེ། སྐད་གྲགས་ཅན་གྱི་གླུ་གར་བ་ཕུས་ལུས་ཧྲི་ལུས་ཤི་ནས་སླར་སྐྱེ་བའི་ཚེ་ལུས་ཀྱི་སྟེང་ན་སྔ་མའི་མགོ་བརྙན་ཇི་ལྟ་བ་བཞིན་ཤ་གཏིང་ན་དོད་ཡོད་པ་སོགས་སྔ་མའི་ཡང་སྲིད་ཡིན་པའི་རྟགས་མཚན་ངོ་མཚར་ཅན་དང་ལྡན་པ་དེས་ཟླ་ངོ་དྲུག་ཙམ་ལོན་པ་ནས་གླུ་མང་པོ་ལེན་པའི་ཕྱིར་རོ། སྔོན་གནས་དྲན་མཁན་འདི་དག་གི་འགྲོ་སྟངས། གཏམ་བཤད་སྟངས་སོགས་གཤིས་ཀ་ཐམས་ཅད་སྔ་མ་དག་དང་འདྲ་ཞིང༌། ཐ་ན་སྔ་མར་མི་བཟའ་རྒྱུའི་ཟས་དག་ཚེ་འདིར་ཡང་བཟའ་མི་འདོད་པར་འདུག་པས་སྔ་མར་དགེ་མི་དགེ་གང་བྱེད་རྣམས་ཕྱི་མར་ཡང་བྱེད་རྒྱུ་ཡིན་པ་ནི་གདོན་མི་ཟ་བས་བྱེད་པ་རྒྱུ་མཐུན་གྱི་འབྲས་བུ་འདི་ནི་མངོན་སུམ་དུ་གྲུབ་པ་ཞིག་གོ། དེར་མ་ཟད་ལས་འགའ་ཞིག་གི་འབྲས་བུ་འཕྲལ་དུ་སྨིན་པའང་ཡོད་དེ། ཉེ་ཆར་ཙ་དབྱིན་རྒྱལ་ཁབ་ཏུ་རྔོན་པ་ཞིག་ལུས་མ་བརྗེས་པར་གཅན་གཟན་དུ་གྱུར་འདུག་སྟེ། ལོ་ཕུས་ཁུ་ལིའུ་ཁུ་ཞེས་པའི་རྔོན་པ་འདིའི་ལུས་ཡོངས་ལ་རི་མོ་སེར་པོ་དང་ཐིག་ལེ་ནག་པོས་ཁྱབ་ཅིང༌། སོ་རྣམས་གཅན་གཟན་གྱི་མཆེ་བ་ལྟར་རིང་པོར་གྱུར། གདོང་དབྱིབས་གཟིག་དང་འདྲ་ཞིང་གདུག་པའི་ང་རོ་སྒྲོག ཤ་རློན་ཟ་ཞིང་རྒྱུད་ཤིན་ཏུ་གཏུམ་པའི་མིའི་གཟིག་ཅིག་ཏུ་གྱུར་ཏོ། འདི་འདྲ་བ་སྔོན་དང་ད་ལྟར་བྱུང་བ་མང་པོ་སྣང་ངོ༌།
    ཡང་༡༩༩༠ ལོའི་ཟླ་༡༠ ཚེས་༢ ཉིན་ཀྲུང་གོའི་ཀྭང་ཀྲུའུ་སྤྲིན་དཀར་གནམ་གྲུ་ཐང་དུ་གནམ་གྲུ་ལ་ཉེས་སྐྱོན་བྱུང་སྟེ་མི་བརྒྱ་ཕྲག་ལྷག་ཅིག་ཤི་རྨས་བྱུང་བའི་ནང་དུ་ནང་པའི་དགེ་བསྙེན་གསུམ་ཅིག་འདུག ཁོང་རྣམས་ཀྱིས་གནམ་གྲུའི་འཛིན་ཤོག་དེ་ཉོས་པ་ནས་བཟུང་རྒྱུ་མཚན་མེད་པར་སེམས་མི་བ་བདེ་ཞིག་བྱུང་བས་ལྷོ་གྲུ་འཛིན་དགོན་དུ་ཕྱིན་ནས་སྤྱན་རས་གཟིགས་ལ་གསོལ་བ་དྲག་ཏུ་བཏབ་པས་འཕྲལ་དུ་སེམས་མི་བ་དེ་ཞི་བར་གྱུར། ཟླ་༡༠ ཚེས་༢ ཉིན་གནམ་གྲུ་བར་སྣང་དུ་འཕུར་བཞིན་པའི་སྐབས་སུ་ཉེས་རྐྱེན་དང་འཕྲད་པར་དྲིལ་བསྒྲགས་པའི་ཚེ་ཁོང་གསུམ་པོས་སྤྱན་རས་གཟིགས་དང་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ། རེ་ཞིག་ནས་གནམ་གྲུའི་སྣུམ་ཟད་དེ་ཀྭང་ཀྲུའུ་སྤྲིན་དཀར་གནམ་གྲུ་ཐང་དུ་མྱུར་འབབ་བྱས་པས་གནམ་གྲུ་གཞན་དང་འཕྲད་དེ་དགེ་བསྙེན་གསུམ་པོའི་སྡོད་གནས་ཀྱི་རྒྱབ་ཕྱོགས་འདོམ་གང་ཙམ་གྱི་མཚམས་ནས་དུམ་བུ་གཉིས་སུ་གྱུར་ཏེ་གནམ་གྲུའི་ཁོག་པའི་ཁ་ཕྱེས་ཁོང་རྣམས་འཕྲལ་དུ་ཕྱི་རོལ་ཏུ་བྲོས། དེ་མ་ཐག་མགོ་རྔ་གཉིས་པོ་འབར་གས་སུ་གྱུར་ཏེ་མེའི་ཕུང་པོ་ཞིག་ཏུ་གྱུར། དེ་ལྟར་གནམ་གྲུ་གང་པོ་ལས་མི་བཅུ་ཕྲག་ཙམ་མ་གཏོགས་ཐམས་ཅད་ཤི་ལ། བཅུ་ཕྲག་ཙམ་དེ་ཡང་རྐང་བཅད་ལག་རྡུམ་གྱི་རྨས་སྐྱོན་ཤིན་ཏུ་ཆེན་པོ་ཐེབས་པ་འབའ་ཞིག་རེད། ཁོང་གསུམ་པོར་རྨས་སྐྱོན་ཅུང་ཟད་ཀྱང་མ་བྱུང་ངོ༌

 

དེ་ནས་གནམ་གྲུ་ཐང་གཙང་བཤེར་བྱེད་སྐབས། དངོས་པོ་གཞན་ཐམས་ཅད་ཐལ་བ་འབའ་ཞིག་ཏུ་གྱུར་ཀྱང་དགེ་བསྙེན་རྣམས་ཀྱིས་བླུས་པའི་ཆོས་ཀྱི་དཔེ་དེབ་འགའ་ཞིག་ཡོད་པ་དེ་ཁོ་ན་སྐྱོན་ཅི་ཡང་མེད་པར་ལུས་ནས་འདུག་པས་ཐམས་ཅད་ཀྱིས་དམ་པའི་ཆོས་ཀྱི་ནུས་པ་ནི་བསམ་གྱིས་མི་ཁྱབ་པར་འདུག་ཅེས་ཧ་མི་ལས་པ་གཅིག་ཀྱང་མི་འདུག་གོ། དེས་མཚོན་ནས་དེ་འདྲ་ཆེས་མང་པོ་ཡོད་པ་རྣམས་ཀྱང་ཤེས་པར་བྱའོ། དེས་ན་ལས་ཀྱི་འབྲས་བུ་འདི་རྣམས་ནི་དངོས་ཡོད་ཀྱི་འཚོ་བའི་ནང་ནས་མིག་མཐོང་ལག་ཟིན་དུ་བྱུང་བ་ཡིན་པས་བསྙོན་འདིང་ན་མ་གཏོགས་གཞན་ཁས་མི་ལེན་པའི་ཐབས་མི་འདུག་གོ། གལ་ཏེ་ད་དུང་ཁས་མི་ལེན་ན་ནི་བླུན་པོའི་ཨུ་ཚུགས་ཡིན་པས་ཅི་བྱར་ཡོད། འདི་རིགས་པས་ཀྱང་འགྲུབ་སྟེ། ཕྱི་རོལ་གྱི་དངོས་པོ་རྣམས་ལས་སྨན་གྱིས་བདེ་བ་སྐྱེད། དུག་གིས་སྡུག་བསྔལ་སྐྱེད་པ་འདི་སུས་ཀྱང་མ་བསྒྲིགས་མོད། དངོས་པོ་རང་གི་ཆོས་ཉིད་རེད། དེ་བཞིན་དུ་གཞན་ལ་གནོད་སེམས་སོགས་རྣམ་རྟོག་ཕྱིན་ཅི་ལོག་པ་དང༌། གཞན་ལ་ཕན་སེམས་སོགས་རྟོགས་པ་བཟང་པོ་རྣམས་ལའང་རང་རང་གི་འབྲས་བུ་ཞིག་ཅི་ཕྱིར་མེད། གཞན་ཡང་སྤྱོད་པ་ངན་པས་ཟས་དུག་ཅན་ཟོས་པས་སྡུག་བསྔལ་སྐྱེད། སྤྱོད་པ་ལེགས་པོ་འཕྲོད་བསྟེན་ཚུལ་བཞིན་དུ་བྱས་པས་བདེ་བ་སྐྱེད་པ་བཞིན་དུ། བྱ་བ་ངན་པ་གཞན་གྱི་ཤིན་ཏུ་གཅེས་ཤིང་ཕངས་པའི་སྲོག་གཅོད་པ་དང༌། ངལ་བ་ཆེན་པོས་བསྒྲུབས་པའི་ནོར་རྫས་རྣམས་དབང་མེད་དུ་འཕྲོགས་པ་སོགས་དང༌། བྱ་བ་བཟང་པོ་སྲོག་སྐྱོབ་པ། སྦྱིན་པས་གཞན་ཚིམ་པར་བྱེད་པ་སོགས་ལ་རང་རང་གི་འབྲས་བུ་ཅི་སྟེ་མེད་དེ་རྒྱུ་མཚན་མཚུངས་པའི་ཕྱིར་རོ། དེ་བས་ཁྱིམ་ཚང་ཞིག་གི་ནོར་རྫས་ཇག་པས་འཕྲོགས་ཏེ་དབུལ་པོར་གྱུར་པ་ལྟ་བུར་མཚོན་ན་དངུལ་པོར་གྱུར་པའི་རྒྱུ་དངོས་སུ་མཐོང་བ་ནི་དགྲས་བཅོམ་པ་དེ་ག་རེད། འོན་ཀྱང་དེ་མ་གཏོགས་མ་མཐོང་བའི་རྒྱུ་མཚན་མེད་ཅེས་སྨྲ་མི་ནུས་ཏེ། དཔེར་ན་སྒྲ་སྡུད་འཕྲུལ་ཆས་ཀྱིས་སྒྲ་འབྱིན་པའི་རྒྱུ་དངོས་སུ་མཐོང་བ་ནི་འཕྲུལ་ཆས་ཀྱི་ལྷུ་ལག་དེ་ཙམ་ཞིག་རེད། འོན་ཀྱང་དེ་ག་རང་ལས་གཞན་པའི་མ་མཐོང་བའི་རྒྱུ་མེད་ཅེས་སྨྲ་ག་ལ་ནུས་ཏེ། རང་དགར་མི་མཐོང་བའི་གློག་གི་རྦ་རླབས་ཀྱང་མེད་ཐབས་མེད་པའི་ཕྱིར་རོ། དེ་བཞིན་དུ་གློག་སྒྲོན་གྱིས་འོད་འབྱིན་པ་ལའང་དངོས་སུ་མཐོང་བའི་སྒྲིག་ཆས་འདི་དག་ཀྱང་དེའི་རྒྱུ་ཡིན་མོད། གཙོ་བོ་ནི་མིག་སོགས་ཀྱིས་མི་མཐོང་བའི་གློག་ཤུགས་ཉིད་ཡིན་པ་ལྟ་བུའོ། དེས་ན་འཇིག་རྟེན་གྱི་བདེ་སྡུག་སོགས་ལ་མིག་གིས་མཐོང་རྒྱུ་ཡོད་པ་དང༌། ལག་པས་རེག་རྒྱུ་ཡོད་པ་འདི་དག་ལས་གཞན་པའི་རྒྱུ་མེད་ཟེར་བ་ནི་གནའ་རབས་དང་དེང་རབས་ཀྱི་རིགས་པ་གཉིས་ཀ་དང་མི་མཐུན་པ་ཞིག་གོ། འགའ་ཞིག་གིས་དགེ་བ་བསྒྲུབས་ཀྱང་མི་འདོད་པ་བྱུང་བས་ལས་འབྲས་ལ་ཡིད་གཉིས་བྱེད་ཀྱང༌། མི་འདོད་པ་བྱུང་བ་ནི་སྔོན་གྱི་ལས་འབྲས་ཡིན་ལ། ད་ལྟ་དགེ་བ་བསྒྲུབས་པ་ལ་འབྲས་བུ་མེད་པ་མིན་ཡང་དེ་མ་ཐག་ཏུ་སྨིན་པའི་ངེས་པ་མེད་དེ། ལས་ལ་སྐྱེ་བ་ཕྱི་མ་ཉིད་ལ་མྱོང་འགྱུར་དང༌། ཕྱི་མ་རྣམས་ལས་གང་རུང་ཞིག་ཏུ་མྱོང་འགྱུར་སོགས་ཡོད་པའི་ཕྱིར་རོ། ལ་ལས་རྒྱུ་འབྲས་མེད་ཟེར་བ་འདི་ལ་རྒྱུ་མཚན་དང་དགོས་པ་རྩ་བ་ནས་མི་འདུག ང་ཚོའི་མིའི་རིགས་ཐམས་ཅད་སྡུག་བསྔལ་མི་འདོད་ཅིང་བདེ་བ་འདོད་པ་ལ་འདྲ་མཉམ་རེད། དེའི་ཕྱིར་འཕྲལ་ཡུན་གྱི་སྡུག་བསྔལ་ཞི་བ་དང་བདེ་བ་སྐྱེད་པའི་ཐབས་ཤིག་ཡིན་ཕྱིན་རྒྱུ་མཚན་ཡོད་ན་ལྟ་ཞོག གལ་ཏེ་མེད་ཀྱང་རེ་ཞིག་དགོས་པའི་དབང་གིས་ཀྱང་ཁས་བླང་འོས་ན། རྒྱུ་མཚན་དང་བཅས་པའི་མི་རིགས་ཀྱི་བསམ་བློའི་དཔལ་ཡོན་གོང་དུ་འཕེལ་དུ་འགྲོ་བའི་ཐབས་ཐུན་མོང་མ་ཡིན་པ་འདི་དག་ལ་རྒྱུ་མཚན་རྣམ་དག་ཅི་ཡང་སྨྲ་རྒྱུ་མེད་བཞིན་གྱ་ཚོམ་དུ་དགག་པ་ཅིའི་ཕྱིར་བྱེད། ད་ལྟ་འཛམ་གླིང་ཞི་འཇམ་དང༌། སྐྱེ་དངོས་དོ་མཉམ་བྱེད་དགོས་ཞེས་ཁ་ནས་ཀུན་གྱིས་ཤོད་བཞིན་འདུག་ཀྱང༌། དོན་དུ་ཇི་བཞིན་ཞིག་གཏན་ནས་བྱེད་ཐུབ་པ་མི་འདུག དེའི་རྒྱུ་མཚན་གཙོ་བོ་ནི་ཚེ་སྔ་ཕྱི་དང་ཁྱད་པར་ལས་དང་ལས་ཀྱི་རྣམ་པར་སྨིན་པ་ལ་ཡིད་ཆེས་དང་བརྩི་འཇོག་མེད་པ་འདི་ཁོ་ན་ལ་ཐུག་སྟེ། རང་འཚོ་འདོད་ཀྱིས་གཞན་གསོད་པ་དང༌། དེའི་ཕྱིར་དུ་འཛམ་གླིང་རྩ་མེད་དུ་གཏོང་བའི་མཚོན་དང་རྫས་སྦྱོར་ངན་པ་སྣ་ཚོགས་འབད་པ་ཆེ་ཐང་གིས་བསྒྲུབས། རང་ལོངས་སྤྱོད་མངའ་ཐང་ལྡན་འདོད་ཀྱིས་གཞན་གཞོམ་འདོད་སགས་བློ་ངན་སྣ་ཚོགས་བྱུང་སྟེ། འཛམ་གླིང་དམག་ཆེན་གཉིས་པའི་སྐབས་སུ་ཡེའུ་ཐེའི་མི་རིགས་རྐྱང་པར་ཡང་མི་འབུམ་ཐེར་དྲུག་ཅུ་ཐམ་པ་སྲོག་དང་ཕྲལ་བ་དང༌། མི་རེ་རེས་ཀྱང་མི་ཉམ་ཆུང་ཁྲི་ཚོ་སུམ་ཅུ་ལྷག་རེ་བསད་པ་སོགས་ཡ་ང་ཞིང་ཡི་མུག་པའི་སྤྱོད་པ་མ་རུངས་པ་དེ་དག་ཐམས་ཅད་ཀྱང་གཙོ་བོ་ལས་འབྲས་ལ་ཡིད་མི་ཆེས་པ་རང་ལ་ཐུག གལ་ཏེ་ལས་འབྲས་ལ་སྙིང་ཐག་པ་ནས་ཡིད་ཆེས་པ་ཞིག་ཡོད་ན་རང་གི་ངང་གིས་ཡ་རབས་ཚུལ་ལྡན་གྱི་སྤྱོད་པ་ལ་གནས་པར་འགྱུར་བས་འཛམ་གླིང་ཞི་བདེ་འོང་བ་ལའང་དེ་ལས་ལྷག་པ་མེད། གཞན་སྐྱེ་དངོས་དོ་མཉམ་དགོས་ཚུལ་སོགས་ཀྱི་སློབ་གསོ་གང་ཞིག་བཏང་ཡང་རུང་སྟེ་ལས་རྒྱུ་འབྲས་ལ་ཡིད་ཆེས་པ་ལྟ་བུའི་ནུས་པ་ཞིག་གཏན་ནས་ཐོན་ཐབས་མེད་དོ། དེའི་ཕྱིར་འཛམ་གླིང་སྟེང་དུ་ཆོས་ལུགས་མི་འདྲ་བ་དུ་མ་ཞིག་ཡོད་པ་རྣམས་ཀྱང་སྐྱེ་བ་སྔ་ཕྱི་ཁས་བླངས་ཏེ་ལས་འབྲས་ལ་ཡིད་ཆེས་བྱེད་པར་ཕལ་མོ་ཆེ་ཞིག་མཐུན་པས་ང་ཚོ་འཛམ་གླིང་གི་མིའི་ལྔ་ཆ་གསུམ་ཟིན་པའི་རྒྱ་ཆེའི་ཆོས་དད་མང་ཚོགས་སྐྱེ་བོ་དུང་ཕྱུར་ཉེར་ལྔ་བརྒལ་བ་ཙམ་ཡོད་པ་ཀུན་གྱིས་རྡོག་རྩ་གཅིག་སྒྲིལ་གྱིས་མི་ཚེ་སྔ་ཕྱི་དང་ལས་རྒྱུ་འབྲས་ཀྱི་རྨང་གཞི་འདིའི་སྟེང་ནས་མིའི་རིགས་ཀྱི་མདུན་ལམ་ལ་བྱས་རྗེས་འཇོག་ཆེད་འབད་པ་ཆེ་ཐང་དུ་བྱ་རྒྱུ་ནི་ཆེས་གལ་ཆེ་བའི་ལས་སུ་གཟུང་བར་བྱ་སྟེ། གཞན་དུ་ན་ཙན་དན་ཤིན་ཏུ་བསིལ་བ་ཡང་བརྡར་དྲགས་ན་རང་ལས་མེ་བྱུང་བའི་མེས་རང་སྲེགས་པ་བཞིན་དུ་དེང་རབས་ཀྱི་རིག་པ་འདི་ཤིན་ཏུ་དར་དྲགས་ནས་རང་གིས་རང་བརླགས་པའི་གནས་འགྱུར་ཉེན་ཡོད་པ་ཤེས་པར་བྱའོ།།
 

Share this:
༢༡༨ ཀློག་གྲངས།