བསམ་པ་བཟང་པོ་བྱ་རྒྱུ།

གཞན་གྱིས་ཚིག་ངན་ཞིག་སྨྲས་པ་ཙམ་ཐོས་པར་མི་འདོད་པ་དེ་བཞིན་དུ་རང་རེ་མིའི་རིགས་ཐམས་ཅད་ཙམ་དུ་མ་ཟད་འབུ་སྦྲང་ཡན་ཆད་དེ་ག་ཁོ་ན་ལྟར་ཡིན་པས་གཞན་ལ་རང་དགར་གནོན་པར་བྱ་བའི་སེམས་དང༌། གསོད་སེམས་སྤང་བར་བྱ། གཞན་དབུལ་པོ་ཉམ་ཐག་པ་ཞིག་གིས་ནོར་རྫས་ཅུང་ཟད་རྙེད་པའམ། དུད་འགྲོ་ཞིག་བཤས་རྭ་ནས་ཐར་པའམ། ཐ་ན་མི་ཞིག་གིས་བོར་སྟོར་བྱུང་བའི་དངོས་པོ་ཞིག་སླར་རྙེད་པ་ཡན་ཆད་ལའང་ཅི་མི་སྙམ་དུ་མི་འཇོག་པར་དགའ་བར་བྱ། དེ་དག་ལ་སྙིང་རྗེ་དང་བྱམས་པ་ཟེར། དེ་གཉིས་རང་རེའི་བོད་མི་ཙམ་དུ་མ་ཟད་སྐྱེ་འགྲོ་སྤྱི་ལ་དམིགས་ཏེ་བསམ་དགོས། ཤ་རུས་གཅིགཔའི་རང་རིགས་ཀྱི་སྤུན་ཟླ་རྣམས་ལ་དུང་སེམས་ལྷག་པར་དུ་བྱ་རྒྱུ་དང༌། རང་རིགས་ཀྱི་ཡོན་ཏན་ལ་ཕངས་སེམས་ཁྱད་པར་ཅན་བྱ་རྒྱུ་ནི་སྐྱེ་བོ་དམ་པའི་ངང་ཚུལ་ཡིན་ཏེ་མི་རིགས་དེ་ཉིད་ནམ་གནས་ཀྱི་བར་དུ་མེད་ཐབས་མེད་པའི་བསམ་བློ་རིན་ཐང་དང་བྲལ་བ་ཞིག་ཡིན། དེ་འདྲའི་བྱམས་པ་དང་སྙིང་རྗེ་དེ་ཉིད་མི་གཅིག་ལ་ཡོད་ན་སེམས་ཁོང་འཁྲུགས་པ་མེད་པར་རྟག་ཏུ་སྣང་བ་དགའ་ཡ་ལེ་གནས་ཤིང༌། ཡུལ་གང་དུ་ཕྱིན་ཀྱང་གཞན་ཕན་འབྱུང་བ། གྲོགས་སུ་དང་འགྲོགས་ཀྱང་མི་མཐུན་པ་མེད་པ། སྐྱེ་བོ་ཀུན་གྱིས་བསྟོད་བཀུར་བསྔགས་པའི་གནས་སུ་གྱུར་ཏེ་རང་གི་བསམ་དོན་ཐམས་ཅད་ངང་གིས་འགྲུབ། སྐྱེ་བ་ཕྱི་མར་ཡང་སྤྱོད་འཇུག་ལས། སེམས་གསལ་གཅིག་གི་འབྲས་བུ་ཡང༌།། ཚངས་ལ་སོགས་པ་ཡིན་པར་འདོད།། ཅེས་པ་ལྟར་བྱམས་དང་སྙིང་རྗེའི་རྣམ་སྨིན་གྱི་འབྲུས་མངོན་མཐོ་ལྷ་མིའི་དཔལ་ལ་སྤྱོད་ཅིང༌། རྒྱུ་མཐུན་གྱི་འབྲས་བུས་ཚེ་རབས་ཐམས་ཅད་དུ་བྱམས་དང་སྙིང་རྗེ་གཞན་ཕན་ཅན་དུ་འགྱུར་བ་གོར་མ་ཆག་པས་ཚེ་འདི་ཙམ་དུ་མ་ཟད། སྐྱེ་ཞིང་སྐྱེ་བའི་ཕྲེང་བ་ཐམས་ཅད་དོན་དང་ལྡན་པ་ཡིན་ནོ། ཡང་དེ་འདྲའི་བསམ་པ་བཟང་པོ་དེ་ཁྱིམ་ཚང་གཅིག་གི་ཁྱིམ་མི་ཡོངས་ལ་ཡོད་ན་ཁྱིམ་ཚང་དེ་དབུལ་པོ་ཐ་ཆད་ཇི་འདྲ་ཞིག་ཡིན་ཡང་རུང་སྟེ། བདེ་བ་ཐམས་ཅད་ཀྱི་རྩ་བ་སེམས་སྐྱིད་པ་ཞེས་པ་ལྟར་དུ་ཐམས་ཅད་དགའ་དགའ་སྐྱིད་ཀྱི་ངང་ནས་དུས་འདའ་བ་ཞིག་འོང༌། དེ་བཞིན་དུ་བསམ་པ་དེ་གྲོང་ཚོ་གཅིག་ལ་ཡོད་ན་གྲོང་ཚོ་གཅིག་དང༌། རྒྱལ་ཁབ་གཅིག་ཡོད་ན་རྒྱལ་ཁབ་གཅིག འཛམ་གླིང་གི་མི་ཡོངས་ལ་ཡོད་ན་འཛམ་གླིང་ཧྲིལ་པོ་བདེ་ཞིང་སྐྱིད་པ་འོང་བ་ལ་ཐེ་ཚོམ་མེད། རང་རེས་འདས་ཟིན་པའི་ལོ་རྒྱུས་དེ་ཚོར་ཕྱི་མིག་གཅིག་བལྟས་ན་འཛམ་གླིང་སྤྱི་དང་བྱེ་བྲག་ལ་གོད་ཆག་བྱུང་ངོ་ཅོག་ཐམས་ཅད་རང་གི་དོན་དུ་གཞན་ལ་འཚེ་བར་འདོད་པའི་བསམ་པ་མ་རུང་པས་བྱས་པ་འབའ་ཞིག་སྟེ། དུས་རབས་འདི་ཉིད་ཀྱི་སྟོད་དུ་འཛམ་གླིང་འཁྲུག་ཆེན་དང་པོ་དང་གཉིས་པ་བྱུང་སྟེ་སྐྱེ་བོ་བགྲང་གིས་མི་ལང་པ་ཞིག་གིས་དམར་གསོད་བྱས། ཨ་རིས་འཇར་པན་གྱི་སྟེང་དུ་རྡུལ་ཕྲན་འབར་མདེལ་འཕངས་ཏེ་མི་འབུམ་གྱི་ཚེ་སྲོག་དུས་གཅིག་ཏུ་བརླགས། ཉེ་ཆར་མཚོ་ཁུག་ཏུ་འཁྲུག་པ་ལངས་ཏེ་དེང་རབས་ཀྱི་མཚོན་ཆ་ཡ་ང་བ་རྣམས་སྤྱད་ནས་དཀའ་སྡུག་གིས་བསགས་པའི་ནོར་རྫས་དང་རིན་ཐང་བྲལ་བའི་སྐྱེ་འགྲོའི་ཚེ་སྲོག་ཅི་ཙམ་ཞིག་འཕྲོ་བརླག་ཏུ་བཏང༌། གཞན་ཡང་རྒྱལ་ཁབ་དང་རྒྱལ་ཁབ་བར། མི་རིགས་དང་མི་རིགས་བར་ཕན་ཚུན་མཐོང་ཆུང༌། བརྙས་བཅོས། བཙན་དབང་ཅི་ཙམ་བྱས་པ་ཐམས་ཅད་ཀྱི་རྩ་བ་བྱམས་པ་སྙིང་རྗེ་མེད་པ་འདི་ཁོ་ན་ལ་ཐུག ཁྱད་པར་དུ་ཡང་འཛམ་གླིང་སྤྱི་ལ་མཚོན་ན་ད་ལམ་སྔོན་མེད་དེང་རབས་ཀྱི་མཚོན་ཆ་འཇིགས་སུ་རུང་བ་གྲངས་ཀྱིས་མི་ཆོད་པ་ཞིག་བཟོས་ཏེ་ས་འོག་ས་སྟེང་ས་བླ་ཐམས་ཅད་བཀང་ནས་ཡོད་པའི་དུས་འདི་འདྲའི་སྐབས་སུ་བྱམས་དང་སྙིང་རྗེའི་དཔྱང་ཐག་ཆད་ན་འཛམ་གླིང་ཧྲིལ་པོའི་དཔལ་འབྱོར། རིག་གཞུང༌། སྐྱེ་འགྲོའི་ཚེ་སྲོག་དང་བཅས་པ་རེ་ཐག་གཏིང་ནས་ཆད་ཚར་བ་རེད། དེ་ལྟ་བས་ན་གཞན་ཕན་གྱི་བསམ་པ་བཟང་པོ་བརྒྱ་ལ་སྐྱེད་མ་ནུས་ནའང༌། ཇི་སྐད་དུ། རང་གི་ལུས་ལ་དཔེ་ལོངས་ལ།། གཞན་ལ་གནོད་པ་མ་བྱེད་ཅིག ཅེས་པ་ལྟར་དུ་རང་གི་ལུས་སེམས་ལ་སྡུག་བསྔལ་འབྱུང་བར་མི་འདོད་པ་དཔེར་བྱས་ཏེ་རང་བདེ་བ་ཅུང་ཟད་འཐོབ་པའི་ཆེད་དུ་གཞན་གྱི་ལུས་སྲོག་ལ་གནོད་པ་བྱ་འདོད་ཀྱི་བསམ་ངན་དེ་དུག་བཞིན་དུ་སྤང་དགོས། ལར་རང་རེའི་སེམས་འདི་རྟ་སར་ལ་ཁ་ལོ་བསླབ་པ་དང་འདྲ་སྟེ་གང་བསླབ་དེ་ཉིད་ལོབ་སྟེ་འོང༌། དང་པོ་ནས་བསམ་པ་འཆོས་མི་དགོས་པར་ངང་གིས་ཕན་སེམས་ཅན་ནི་དཀོན་པོ་རང་ཡིན་ཡང་མི་ཚེ་དོན་དང་ལྡན་པ་ཞིག་བྱ་འདོད་ཕན་ཆད་འདི་མི་སློབ་ཀ་མེད་ཡིན། བསམ་བཟང་འདི་ཡོད་ན་ཆོས་དང་འཇིག་རྟེན་གྱི་ལེགས་ཚོགས་མ་ལུས་པའི་གཞི་རྟེན་གཅིག་ཡིན་པས་ཤིན་ཏུ་གལ་ཆེའོ།།
 
ཆོས་རྗེ་མཁན་ཆེན་འཇིགས་མེད་ཕུན་ཚོགས་འབྱུང་གནས་མཆོག་གིས་མཛད་པའི་སྙིང་གཏམ་སྤྲིན་གྱི་རོལ་མོ་ལས་བཏུས།

Share this:
༤༡ ཀློག་གྲངས།