རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ།

རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་དེ་ཕྱི་ཟླ་༡༡ ཚེས་༢༩ ནས་ཟླ་འདིའི་ཚེས་༡ བར་ཉིན་གསུམ་རིང་རྒྱ་གར་གྱི་རྒྱལ་ས་ལྡི་ལིའི་ཉེ་འགྲམ་དུ་འཚོགས་ཡོད་པ་དང༌། ཚོགས་ཆེན་དེར་རྒྱལ་ཁབ་སུམ་ཅུ་ལྷག་ནས་ཚོགས་མི་༡༠༠ ལྷག་མཉམ་འཛོམས་གནང་ཡོད་པ་རེད། བོད་ནང་གི་ཛ་དྲག་གནས་སྟངས་དང༌། རྒྱལ་སྤྱིའི་འཕེལ་རིམ་བཅས་ལ་བསྟུན་བོད་དོན་འཐབ་རྩོད་བྱེད་སྟངས་སྐོར་ལ་བགྲོ་གླེང་གནང་སྐབས། ཆབ་སྲིད་ཀྱི་ལངས་ཕྱོགས་དང༌། བོད་དོན་རྒྱབ་སྐྱོར་ཚོགས་པ་སོ་སོས་ལས་དོན་བྱེད་ཕྱོགས་སྐོར་ཡིན་པ་རེད། ཚོགས་ཆེན་དེར་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་དམིགས་བསལ་གསུང་འཕྲིན་ཞིག་གནང་ཡོད་པ་དང༌། གསུང་འཕྲིན་དེ་བཀའ་བློན་དང་ལྡི་ལི་དོན་གཅོད་གཅིག་ལྕོགས་བསྟན་པ་ཚེ་རིང་མཆོག་གིས་སྒྲོགས་སྦྱང་གནང་བ་དེའི་ནང་རྒྱ་ནག་གི་རྩ་ཁྲིམས་གཞིར་བཟུང་རྒྱ་བོད་གཉིས་ཀྱི་དཀའ་རྙོག་སེལ་ཐབས་གནང་ཡོད་ནའང༌། རྒྱ་ནག་གཞུང་གིས་རྒྱུ་མཚན་ལ་མ་གཟིགས་པར་ྋགོང་ས་མཆོག་སྐུ་སྒེར་གྱི་གནད་དོན་ལས་བོད་མིའི་གནད་དོན་ཞིག་མིན་སྐོར་བརྗོད་ཀྱི་ཡོད་པ་རེད། བོད་རྒྱའི་དཀའ་རྙོག་དེ་བོད་མི་ས་ཡ་དྲུག་གི་གདན་དོན་ཞིག་ཡིན་པས། དཀའ་ངལ་དེ་སེལ་ཐབས་ལ་རྒྱལ་སྤྱིའི་སྤྱི་ཚོགས་ནས་སྔར་ལྷག་རྒྱབ་སྐྱོར་ཡོང་བར་ཐུགས་རེ་གནང་གི་ཡོད་སྐོར་འཁོད་ཡོད་པ་རེད། མཛད་སྒོའི་ཐོག་ཏུ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་ད་ལྟའི་བོད་ནང་གི་གནས་སྟངས་དང༌། དབུ་མའི་ལམ་གྱི་བྱུང་རིམ་སོགས་ངོ་སྤྲོད་གསུང་བཤད་གནང་བ་དང༌། སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་གིས་བཙན་བྱོལ་བོད་གཞུང་གི་དམིགས་བསལ་ཚོགས་ཆེན་ཐེངས་དང་པོའི་སྐོར་ངོ་སྤྲོད་གསུང་བཤད་གནང་ཡོད་པ་རེད།།

Share this:
༡༢༣ ཀློག་གྲངས།