བཀའ་བློན་ཁྲི་ཟུར་འཇུ་ཆེན་མཆོག་སྐུ་གཤེགས་པའི་ཡིད་སྐྱོའི་གནས་ཚུལ།

བཀའ་བློན་ཁྲི་ཟུར་འཇུ་ཆེན་ཐུབ་བསྟན་མཆོག་ནི་ཁམས་སྡེ་དགེ་རྨེ་ཤོད་དུ་སྐུ་འཁྲུངས་ཤིང་དགོངས་པ་རྫོགས་སྐབས་དགུང་གྲངས་ ༨༢ ཡིན་པ་རེད།
བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་མཆོག་ནི་ཕྱི་ལོ་ ༡༩༢༩ ལོར་ཁམས་སྡེ་དགེའི་ཁོངས་རྨེ་ཤོད་འཇུ་ཆེན་ཚང་དུ་འཁྲུངས། ཆུང་དུས་ནས་དགེ་བའི་བཤེས་གཉེན་བསྟེན་ཏེ་བོད་ཀྱི་བརྡ་དག་རིག་གནས་དང་ཆོས་ཕྱོགས་ཀྱི་སློབ་གཉེར་གནང༌། དགུང་ལོ་ ༡༧ ཐོག་ལྷ་ས་དང་ས་སྐྱ་སོགས་ལ་གནས་གཟིགས་དང་ཆོས་ཕྱོགས་ཀྱི་སློབ་གཉེར་གནང་སྟེ་དགུང་ལོ་ ༡༩ ཐོག་རང་ཡུལ་དུ་ཕེབས།

རྒྱ་ནག་གཞུང་གིས་བོད་ལ་བཙན་འཛུལ་བྱས་རྗེས་མཐུན་ཟབ་ཀྱི་ལས་འགན་གནང་བ་ལྟར་རྒྱ་ནག་བརྒྱུད་ཀོ་རི་ཡ་དང་དྲིན་ཐུར་ཐེངས་གཅིག་ཕེབས། ༡༩༥༥ ལོར་ཁམས་ཁུལ་དམངས་གཙོའི་བཅོས་བསྒྱུར་ཞེས་པ་ལག་བསྟར་བྱེད་སྐབས་ལས་འགུལ་དེར་ངོ་རྒོལ་འཐབ་འཛིང་བྱས་པ་དང་སྡེ་དགེ་ཚང་གི་གནས་སྟངས་གཞུང་སར་སྙན་གསན་དང༌། སྡེ་དགེ་ཁུལ་མི་མང་གིས་རྒྱ་གཞུང་ལ་ངོ་རྒོལ་བྱ་རྒྱུར་བོད་གཞུང་གིས་མཚོན་ཆའི་མཐུན་འགྱུར་ཡོང་བ། དེ་བཞིན་གཞུང་གི་མཛད་བྱུས་དང་འབྲེལ་བའི་ལམ་སྟོན་ཇི་ཡོད་དང་ཆུ་སྒང་གི་སྒེར་ལངས་སྐོར་བཅས་ཤེས་རྟོགས་སླད་ལྷ་སར་ཐེངས་ལྔ་ཙམ་མངགས་པ་ལྟར་ཕེབས།
༡༩༥༩ ལོའི་ལོ་སྟོད་དུ་ལྷ་ས་ནས་ཕ་ཡུལ་དུ་ཐེངས་རྗེས་མ་ཕེབས་ལམ་ཆབ་མདོར་འབྱོར་སྐབས་ཁམས་ཤར་ནུབ་སྟོད་སྨད་གང་ས་ནས་རྒྱ་དམར་ལ་རྒོལ་འཛིང་བྱས་ཟིན་སྟབས་ཆབ་མདོ་ནས་ཕར་ཕེབས་མ་ཐུབ་པར་ལྷ་སར་ཕེབས། ཉིན་ཉི་ཤུ་ཙམ་གྱི་རྗེས་ ༡༩༥༩ ཟླ་ ༣ ཚེས་ ༡༠ ཉིན་གྱི་སྒེར་ལངས་ཆེན་མོ་བྱུང་བར་བརྟེན་ནོར་གླིང་དུ་དང་བླང་མི་དམངས་ཀྱི་ཁོངས་ཕེབས་ནས་སྡེ་དགེ་ཤོག་གི་མི་གྲངས་ ༢༠༠ སྐོར་གྱི་འགོ་འཁྲིད་གནང༌།

ྋགོང་ས་མཆོག་ནོར་གླིང་ནས་ཆིབས་ཐོན་གནང་བའི་ཕྱི་ཉིན་ནོར་གླིང་དམག་སྤྱི་ཁང་གི་བཀའ་བཀོད་ལྟར་ར་མ་སྒང་གྲུ་ཁར་རྒྱ་དམག་རྗེས་དེད་དུ་འགྲོ་མཁན་བཀག་འགོག་ཆེད་འགྲོ་སྐབས་རྒྱ་དམག་སྔོན་འབྱོར་ཟིན་པར་འཁྲུག་འཛིང་དང༌། དེ་ནས་ཆུ་ཤུལ་དང་ཡར་འབྲོག་མཚོ་ཁ། གཉན་སྦྱོར་ར། ཁ་བཏགས་དགོན་སོགས་སུ་རྒྱ་དང་འཁྲུག་འཛིང་ལན་མང་གནང་མཐར་རྨ་སྒོ་ལ་བརྒྱུད་རྒྱ་གར་ལ་ཕེབས་ནས་མི་ས་མ་རི་དང་ཀ་སྦུག་ལ་བཞུགས། ཕྱི་ལོ་ ༡༩༦༠ ལོར་མཱེ་སོར་གཞིས་ཆགས་སུ་ཕེབས་ཏེ་བཅུ་དཔོན་དང་མི་མང་གི་འཐུས་མི་གནང༌། ཕྱི་ལོ་ ༡༩༦༣ ནས་ ༡༩༦༥ བར་རྡོར་གླིང་ཁུལ་དུ་བཞུགས། ཕྱི་ལོ་ ༡༩༦༥ ལོར་མཱེ་སོར་དུ་ཕྱིར་ཕེབས་ཀྱིས་སྡོད་སྒར་གཉིས་པའི་སྤྱི་མི་ལོ་བརྒྱད་དང༌། མཉམ་སྦྲེལ་ཚོགས་མི་ལོ་དགུ་གནང༌། ཕྱི་ལོ་༡༩༧༢ ལོར་ས་གནས་རང་བདེན་ཚོགས་ཆུང་གི་ཚོགས་གཙོ་གནང༌།

ཕྱི་ལོ་༡༩༧༢ ཟླ་ ༡༢ ཚེས་ ༢༥ ནས་ ༡༩༧༦ ཟླ་ ༥ ཚེས་ ༥ བར་སྐབས་ལྔ་པའི་མདོ་སྟོད་སྤྱི་འཐུས་གནང་སྐབས་སྤྱི་འཐུས་ཚོགས་གཙོའི་མཛད་འགན་ཡང་བཞེས། ༡༩༧༦ ཟླ་ ༥ ཚེས་ ༡༡ ཉིན་དྲིལ་བསྒྲགས་བཀའ་བློན་དུ་བསྐོས། དེ་རྗེས་རྒྱུན་བཞུགས་བཀའ་བློན་གྱི་འགན་ཁུར་བཞེས། ཕྱི་ལོ་ ༡༩༧༩ ལོར་རྒྱ་ནག་བརྒྱུད་བོད་ནང་ལྟ་བསྐོར་སྐུ་ཚབ་ཐེངས་དང་པོའི་ཚོགས་གཙོར་ཕེབས། དེ་རྗེས་ལོ་དེ་གའི་ནང་རྒྱུན་བཞུགས་བཀའ་བློན་ཡིན་མུས་ཁར་ཤེས་རིག་བཀའ་བློན་དུ་བསྐོ་སྩལ་ལྟར་ཕྱི་ལོ་ ༡༩༨༠ ཟླ་ ༨ ཚེས་ ༢༤ ནས་ ༡༩༨༥ ཟླ་ ༡ བར་དང༌། དེ་རྗེས་བཀའ་བློན་ཁྲི་པ་ཡིན་མུས་ཁར་ཕྱི་ལོ་ ༡༩༨༧ ཟླ་ ༩ ནས་ ༡༩༨༨ ཟླ་ ༡༡ བར་བཅས་ཤེས་རིག་བཀའ་བློན་གྱི་མཛད་ཁུར་ཐེངས་གཉིས་བཞེས། ༡༩༨༢ ལོར་ཡང་བསྐྱར་རྒྱ་ནག་ཏུ་སྐུ་ཚབ་མི་གསུམ་བཏང་བའི་གཙོ་བོར་ཕེབས། ཕྱི་ལོ་༡༩༨༣ ཟླ་ ༣ ཚེས་ ༡༡ ཉིན་ནས་ཆོས་དོན་དང་ནང་སྲིད་བཀའ་བློན་བཅས་འཕར་སྣོན་དུ་བསྐོ་སྩལ་ལྟར་ཕྱག་ལས་གནང༌། དེ་རྗེས་ཕྱི་ལོ་ ༡༩༨༤ ལོར་སླར་ཡང་རྒྱ་ནག་ཏུ་འབྲེལ་མཐུན་ཉམས་ཞིབ་ལས་དོན་མཇུག་སྐྱོང་ཆེད་སྐུ་ཚབ་མི་གསུམ་བཏང་བའི་གཙོ་བོར་ཕེབས། ཕྱི་ལོ་ ༡༩༨༣ ནས་བཟུང་བཀའ་བློན་ཁྲི་པའི་འགན་ཁུར་ལོ་བརྒྱད་དང༌། ཁྱོན་བསྡོམས་བཀའ་བློན་གྱི་མཛད་ཁུར་ལོ་ངོ་ ༡༥ གནང༌།
ལས་ཡུན་དེའི་རིང་ཤེས་རིག་ལས་དོན་བོད་སློབ་འཛིན་སྐྱོང་ཚོགས་པའི་ཚོགས་མི་ དང༌། དྷ་ས་བོད་ཀྱི་དཔེ་མཛོད་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་བཅས་ཕྱི་ལོ་ ༡༩༩༢ བར་གནང༌། བོད་ཀྱི་ཟློས་གར་ཚོགས་པའི་ཚོགས་གཙོ་ཕྱི་ལོ་ ༡༩༩༥ ལོ་བར་དང༌། མ་སུ་རི་བོད་ཁྱིམ་དང་དྷ་ས་བོད་ཁྱིམ་གྱི་འགན་འཛིན་ལྷན་ཚོགས་ཀྱི་ཚོགས་གཙོ་བཅས་ད་ལྟའང་(ཕྱི་ལོ་ ༢༠༡༠ ལོར་གོ་དགོས་)གནང་མུས།
ཕྱི་ལོ་ ༡༩༩༡ ཟླ་ ༦ པ་ནས་ ༡༩༩༥ བར་བོད་ཀྱི་རྩ་ཁྲིམས་བསྐྱར་ཞིབ་འཆར་ཟིན་ཚོགས་ཆུང་གི་འགན་འཛིན་དང༌། ཕྱི་ལོ་ ༡༩༩༩ ནས་ ༢༠༠༡ བར་ལོ་གཉིས་དང་ཟླ་བ་དྲུག་རིང་ཞིབ་འཇུག་ཚོགས་ཆུང་གི་འགན་འཛིན་བཅས་ཀྱི་ལས་དོན་གནང་ཡོད།

དམ་པ་གང་ཉིད་མི་ཚེ་ཧྲིལ་པོ་བོད་སྤྱིའི་རྩ་དོན་དང་༸གོང་ས་མཆོག་གི་བཀའ་སློབ་ལམ་སྟོན་གཞིར་གཟུང་གིས། བསྟན་སྲིད་སྤྱི་སྨན་གྱི་མཛད་འགན་རྒྱ་ཆེར་བཞེས་པའི་ལོ་རྒྱུས་ནི། རྒྱ་མཚོ་ལྟར་གཏིང་ཟབ་ཅིང་། རི་བོ་ལས་དཔངས་མཐོ་བས། མཐའ་དག་ནི་བརྗོད་ཀྱིས་མི་ལངས་ལ། སྐུ་ཚེའི་མཛད་འགན་གྱི་སྙིང་པོ་ལྟ་བུ་ནི། བོད་ཀྱི་རྩ་དོན་ཐོག་ནམ་ཡང་གཏོང་གློད་མེད་པའི་དམ་བཅས་བརྟན་པ། ༸གོང་ས་མཆོག་གི་བཀའ་དགོངས་གཞི་གཟུང་གིས་ཕྱི་ནང་སྤྱི་སྒེར་སུ་ལའང་གདོང་ལེན་ཐུབ་པ། བོད་ཀྱི་ཆོས་ལུགས་ཆོས་རྒྱུད་ཁག་ཡོངས་ལ་ལྟ་སྟངས་གཅིག་པའོ་ཐོག་ནས་སྲུ་ཞུ་འབད་འབུངས་ལྷུན་ལེན་དང་། ལྷག་དོན་བོད་ཀྱི་བླ་ཆེན་ཁག་དང་གདན་ས་དགོན་སྡེ་ཁག་གི་མཁན་ལས་བླ་སྤྲུལ་དགེ་བཤེས་རྣམ་པ་ཚོའི་ཐུགས་ཀྱི་དགོངས་པའི་གཞེད་པ་ལ་མཐའ་གཅིག་ཏུ་དད་གུས་རྒྱབ་སྐྱོར་ལྷུན་བླངས་མཛད་པ་ནི། དམ་པ་ཁོང་གི་སྐུ་ཚེ་འཚོ་བཞུགས་རིང་གི་མཛད་པའི་སྙིང་དོན་ཡིན་ཞེས་བརྗོད་ན་ཆོག།
གསོན་ན་རླབས་ཆེ། གྲོངས་ན་གཟི་བརྗིད་ཆེ་བའི་སྐུ་གཤེགས་མི་རྗེ་དམ་པ་ཁོང་ལ་གནམ་འོག་ཀྱི་གཞིས་བྱེས་བོད་རིགས་སྤྱི་དང་། ལྷག་དོན་རྒྱལ་ཞེན་ལྷག་བསམ་དང། དགྲ་གཉེན་ངོ་ཐག་ཆོད་མཁན་གྱི་ཁམས་རིགས་སེམས་སྐྱ་མི་དམངས་ཡོངས་རྫོགས་ཀྱིས་དམ་པ་གང་གི་མཛད་པ་དང་། བཀའ་དྲིན་ནམ་ཡང་མི་བརྗེད་པའི་རྗེས་དྲན་དང་། མྱ་ངན་གུས་འདུད་དང། གདུང་སེམས་མཉམ་བསྐྱེད་ཐོག ཤུལ་སྡོད་ནང་མི་སྤུན་ཉེ་འབྲེལ་ཡོད་ལྟོས་བཅས་ཡོངས་ལ་ཐུགས་གསོའི་འཚམ་འདྲི་ཞུ་རྒྱུ་བཅས།། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་ནས་༢༠༡༡ ལོའི་ཟླ་༩ ཚེས༣ ཉིན།

Share this:
༨༣ ཀློག་གྲངས།