འབྲེལ་མོལ་གྱི་རིམ་པ་གཅིག་ཚུལ་མཐུན་མཐའ་བསྡོམས་བྱས་ཡོད།

    ཟླ་འདིའི་ཚེས་༡༠ ཉིན་ནི་ྋགོང་ས་སྐྱབས་མགོན་ཆེན་པོ་མཆོག་ལ་འཛམ་གླིང་ནང་སྙན་གྲགས་ཆེ་ཤོས་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་བཅུ་དགུ་འཁོར་བ་དང༌། ཧི་མ་ཅལ་མངའ་སྡེའི་གཞུང་ནས་ཞི་བདེའི་གཟེངས་རྟགས་འབུལ་བཞེས་ལ་ཆེ་བསྟོད་རྒྱལ་ཡོངས་ཧི་མ་ལ་ཡའི་དགའ་སྟོན་ཐེངས་བཅུ་བཞི་པ། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་དུས་དྲན་སུམ་འཛོམས་བོད་གཞུང་མང་གཉིས་ནས་དྷ་ས་ཐེག་ཆེན་གཙུག་ལག་ཁང་དུ་སྲུང་བརྩི་ཞུས་ཡོད་པ་རེད། བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་སྒྲོགས་སྦྱང་གནང་བ་དང༌། བཀའ་ཤག་གི་གསུང་བཤད་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་སྒྲོགས་སྦྱང་གནང་ཡོད་པ་རེད།
    བཀའ་ཤག་གི་གསུང་བཤད་དེའི་ནང་འཁོད་དོན། ལོ་འདིའི་ནང་འབྲེལ་མོལ་ཐེངས་བརྒྱད་པའི་སྐབས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་སྤྲད་པ་དང༌། དམིགས་བསལ་ཚོགས་ཆེན་བརྒྱུད་བོད་ཕྱི་ནང་དུ་གནས་པའི་བོད་མི་རྣམས་ཀྱིས་ཧ་ཅང་ཚད་མཐོའི་མང་མོས་ཀྱིས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་བསྐྱར་ནན་ཐོབ་པ་འདི་གཉིས་ནི་ལོ་རྒྱུས་ཀྱི་དོན་སྙིང་ལྡན་པའི་གལ་ཆེའི་བྱུང་བ་ཞིག་ཏུ་ངོས་འཛིན་བྱེད་ཀྱི་ཡོད། གང་ལགས་ཤེ་ན། ཕྱི་ལོ་༢༠༠༢ ལོར་བོད་རྒྱའི་འབྲེལ་ལམ་བསྐྱར་གསོ་བྱུང་བ་ནས་བཟུང་གཞུང་འབྲེལ་གྱི་བརྒྱུད་ལམ་གཅིག་དང་གྲོས་གཞི་གཅིག་གི་སྲིད་བྱུས་བརྟན་བཟུང་ཐོག་འབྱུང་འགྱུར་བོད་མིའི་མདུན་ལམ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་བཙལ་རྒྱུའི་ཆོད་སེམས་ཀྱིས་བོད་རིགས་ཡོངས་ལ་འཛིན་སྐྱོང་གཅིག་གི་འོག་རང་སྲིད་རང་སྐྱོང་གི་གནས་བབ་ཆ་ཚང་དགོས་སྐོར་གྲོས་མོལ་གཏིང་ཟབ་ཕུར་ཚུགས་སུ་བྱས་པའི་མཐའ་དོན་དུ། འབྲེལ་མོལ་བདུན་པའི་སྐབས་རྒྱ་ཕྱོགས་ནས་ྋགོང་ས་མཆོག་གིས་མིང་དོན་མཚུངས་པའམ་དོན་སྙིང་ལྡན་པའི་རང་སྐྱོང་དགོས་ཚུལ་གསུངས་པའི་དགོངས་དོན་ངོ་མ་ཇི་ཡིན་འགྲེལ་བརྗོད་གསལ་པོ་དགོས་ལུགས་བརྗོད་པ་ལྟར། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང༌། མི་རིགས་ས་གནས་རང་སྐྱོང་གི་བཅའ་ཁྲིམས་ཀྱི་དོན་ཚན་ཁག་ཏུ་གསལ་བའི་རང་སྐྱོང་གི་གནས་བབ་མིང་དོན་མཚུངས་པ་ཞིག་བོད་རིགས་ཡོངས་ལ་ཡོང་ཐབས་ཀྱི་འགྲེལ་བརྗོད་ཆ་ཚང་ཡིག་ཐོག་ཏུ་སྤྲད་དེ། རྒྱལ་སྤྱིའི་ནང་ཕྱོགས་གཉིས་ཀའི་ལངས་ཕྱོགས་གསལ་སྟོན་བྱས་པ་འདིས་འབྱུང་འགྱུར་གྲོས་མོལ་མུ་མཐུད་བྱུང་ན་དེའི་གྲོས་གཞི་ངེས་ཅན་དང༌། གནས་སྐབས་གྲོས་མོལ་མུ་མཐུད་མ་བྱུང་ཡང་རྒྱ་ནག་གི་མང་ཚོགས་དང་རྒྱལ་སྤྱིའི་སྤྱི་ཚོགས་གཉིས་ཀར་ྋགོང་ས་མཆོག་གི་བཞེད་དགོངས་ཇི་ཡིན་ངོ་སྤྲོད་ཞིབ་གསལ་བྱུང་བའི་དབང་གིས་སུས་ཀྱང་ཚོད་དཔག་དང་སྒྲོ་སྐུར་བྱ་ཡུལ་མེད་པའི་དངོས་དོན་གཏན་འབེབས་བྱས་ཟིན་པས་འབྱུང་འགྱུར་གྲོས་མོལ་གྱི་གནས་བབ་ཇི་ཆགས་ཀྱི་འགན་ཁུར་ཆ་ཚང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་ཚོར་ཡོད་པ་དང༌། བོད་མིའི་ངོས་ནས་གསལ་བརྗོད་བྱ་དགོས་ཆ་ཚང་ཟིན་ཏེ་ཕྱི་ལོ་༢༠༠༢ ནས་འགོ་འཛུགས་བྱས་པའི་འབྲེལ་མོལ་གྱི་རིམ་པ་གཅིག་ཚུལ་མཐུན་མཐའ་བསྡོམས་བྱས་ཡོད།
    འབྲེལ་མོལ་གྱི་ལས་རིམ་ལ་བརྟེན་ནས་རྒྱ་གཞུང་གིས་བོད་ལ་འཛིན་པའི་སྲིད་བྱུས་ལ་བཟང་ཕྱོགས་ཀྱི་འགྱུར་བ་གང་ཡང་མ་བྱུང་བའི་ཁར། བོད་ནང་གི་གནས་བབ་ཇེ་ཞན་ཇེ་སྡུག་ཏུ་སོང་བའི་དབང་གིས་བོད་མིའི་སྤྱི་ཚོགས་སུ་བློ་འཚབ་དང་ཡིད་ཞུམ་ཇེ་ཆེར་སོང་བ་མ་ཟད། འབྲེལ་མོལ་གྱི་ལས་རིམ་ལ་སྐྱོན་བརྗོད་ཀྱང་ཕྱོགས་གང་ས་ནས་ཡོང་བཞིན་པར་བརྟེན། མང་ཚོགས་ཀྱི་བཀའ་ལུང་བསྐྱར་དུ་ལེན་དགོས་ཀྱི་དུས་མཚམས་སུ་སླེབས་པར་གཟིགས་ནས་སྤྱི་ནོར་ྋགོང་ས་ྋསྐྱབས་མགོན་ཆེན་པོས་བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པའི་ཆ་རྐྱེན་འོག་དམིགས་བསལ་ཚོགས་ཆེན་ཐེངས་དང་པོ་བསྡུ་བསྐོང་མཛད་པ་དང༌། ཚོགས་ཆེན་དེའི་ནང་བཙན་བྱོལ་བོད་མིའི་གནས་ཡུལ་ཡོངས་ནས་སྐུ་ཚབ་འཐུས་མི་༥༦༠ ལ་ཉེ་བ་ཆེད་ཕེབས་ཀྱིས་ཉིན་གྲངས་དྲུག་རིང་བགྲོ་གླེང་སྦྱང་བཤད་མཐིལ་ཕྱིན་གནང་རྗེས་ཚོགས་ཆུང་བཅོ་ལྔ་ནས་བརྒྱད་ཀྱིས་མང་མོས་དང༌། གསུམ་གྱིས་སྤྱི་མོས་ཐོག་དབུ་མའི་ལམ་ལ་རྒྱབ་སྐྱོར་དང༌། ཚོགས་ཆུང་བཞིས་སྤྱི་མོས་མང་མོས་གསལ་ཁ་མེད་ནའང་དབུ་མའི་ལམ་ལ་རྒྱབ་གཉེར་ཡོད་པ་དང༌། བོད་མིའི་གནས་ཡུལ་གཞིས་ཆགས་གྲངས་༥༠ དང་དགོན་སྡེ་གྲངས་༢༠ ཤེས་རིག་སྒྲིག་འཛུགས་གྲངས་༤༤ བོད་རིགས་མཐུན་ཚོགས་གྲངས་༢༥ གཞུང་འབྲེལ་མིན་པའི་ཚོགས་སྐྱིད་གྲངས་ ༢༢ བཅས་ཁྱོན་བསམ་ཤོག་གྲངས་༡༦༡ འབྱོར་བ་ནས་བསམ་ཤོག་ཁག་༡༠༣ གྱིས་དབུ་མའི་ལམ་ལ་སྤྱི་མོས་དང༌། གྲངས༢༨ ཀྱིས་མང་མོས། དེ་བཞིན་བོད་ཀྱི་ས་ཁུལ་གང་ས་ནས་བསམ་འཆར་བསྡུ་རུབ་ཐུབ་པ་བྱུང་བ་བཅས་ཁྱོན་ཡོངས་ནས་ྋགོང་ས་ྋསྐྱབས་མགོན་ཆེན་པོའི་དབུ་ཁྲིད་ལམ་སྟོན་འོག་ཤར་བསྐྱོད་བྱ་རྒྱུར་སྤྱི་མོས་དང༌། དབུ་མའི་ལམ་ལ་ཚད་མཐོའི་མང་མོས་ཀྱི་རྒྱབ་སྐྱོར་ཐོབ་པ་དང༌། དེ་ལས་གཞན་པའི་དགོངས་ཚུལ་ཡོད་པ་རྣམས་ཀྱང་གསལ་སྟོན་བྱུང་བ་བཅས་ནི་བོད་མིའི་གཞི་རིམ་མང་ཚོགས་ཀྱི་ཆབ་སྲིད་ཀྱི་གོ་རྟོགས་དང༌། ཕུགས་རྒྱང་གི་མཐོང་སྣང་ཡོངས་སུ་སྨིན་ཞིང༌། ལངས་ཕྱོགས་སྲ་བརྟན་དང་ཆིག་བསྒྲིལ་གྱི་ནུས་པ་འགྱུར་མེད་ཡོད་པ་བཅས་གསལ་སྟོན་བྱུང་བ་མ་ཟད། མང་ཚོགས་ནས་འགན་ཁུར་ཡོད་པའི་ཐོག་ནས་ཆ་ཤས་བླངས་པར་བརྟེན་མང་གཙོའི་ལམ་སྲོལ་གྱི་འཕེལ་རིམ་ཡང་ཚད་མཐོར་སོན་པ་མཚོན་ཡོད།
    དེ་བཞིན་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ་ཁག་གི་དམིགས་བསལ་ཚོགས་ཆེན་ཞིག་བསྡུ་བསྐོང་བྱས་པའི་ནང་དུའང་གོང་མཚུངས་ྋགོང་ས་ྋསྐྱབས་མགོན་ཆེན་པོའི་ལམ་སྟོན་དང༌། དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཤུགས་ཆེ་ཐོབ་ཡོད་པ་བཅས་ལ་བརྟེན། ད་ཆ་བཙན་བྱོལ་གཞུང་གིས་གདེང་ཚོད་ཆེན་པོས་དབུ་མའི་ལམ་གྱི་སྲིད་བྱུས་རྒྱུན་འཁྱོང་དམ་འཛིན་ཐུབ་རྒྱུ་མ་ཟད། རྒྱལ་སྤྱིའི་ནང་སྒྲུབ་ཕྱོགས་ཀྱི་ལས་འགུལ་ཤུགས་ཆེ་རུ་གཏོང་རྒྱུ་དང༌། ཁྱད་པར་རྒྱ་ནག་མང་ཚོགས་དང་འབྲེལ་མོལ་གོང་མཐོར་སྤེལ་དགོས་པའི་གོ་སྐབས་སུ་སླེབས་ཡོད། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབུ་ཁྲིད་ཚོས་ང་ཚོའི་བསམ་འཆར་ཡིག་ཆའི་ཐོག་གྲོས་མོལ་རྒྱུན་སྐྱོང་གནང་འདོད་ཡོད་ཚེ་ང་ཚོའི་ངོས་ནས་གྲོས་མོལ་གྱི་སྒོ་མོ་རྒྱུན་དུ་ཕྱེ་ཡོད།
    ཉེ་ཆར་འདི་ཟླའི་ཚེས་༤ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོས་ཡོ་རོབ་གྲོས་ཚོགས་སུ་བསྩལ་བའི་སྦར་སིལ་གསུང་བཤད་དེ་ནི་འབྱུང་འགྱུར་ཆབ་སྲིད་ཀྱི་ལམ་སྟོན་བླ་མེད་ཅིག་ཡིན་པས་དེ་ལ་ཚང་མས་ཐུགས་སྣང་དང་གསན་སྦྱོང་གནང་དགོས། གོང་གསལ་རྒྱུ་མཚན་དེ་དག་ལ་བརྟེན། བཙན་བྱོལ་བོད་གཞུང་གིས་རྒྱལ་སྤྱིའི་ནང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་འགྲེམས་སྤེལ་དྲིལ་བསྒྲགས་དང་སྦྲགས། གོ་རྟོགས་སྤེལ་བའི་ལས་འགུལ་དང༌། རྒྱ་རིགས་མང་ཚོགས་དང་འབྲེལ་མོལ་ཤུགས་ཆེ་རུ་གཏོང་རྒྱུའི་ལས་འགུལ་བཅས་འཆར་གཞི་ལྡན་པའི་ལས་འགུལ་ཁག་གཉིས་ཤུགས་ནུས་བསྐྱེད་དེ་བརྩམ་རྒྱུ་ཡིན་པས་བོད་རིགས་ཡོངས་ནས་ཐུགས་སྣང་དང་མཐུན་འགྱུར་ཤུགས་ཆེ་གནང་བའི་རེ་སྐུལ་བྱེད་ཀྱི་ཡོད། དེ་བཞིན་རྗེས་ལོར་དུས་ཚེས་དང། ས་གནས་གང་འོས་ཤིག་ཏུ་རྒྱ་རིགས་གྲོགས་པོ་རྣམས་ཀྱི་ཚོགས་ཆེན་ཞིག་ཀྱང་བསྐོང་འཆར་ཡོད། མདོ་དོན་འདི་ལོ་བོད་དུ་བྱུང་བའི་ཞི་རྒོལ་གྱི་ནུས་པ་དང༌། བོད་རྒྱ་འབྲེལ་མོལ་གྱི་མཇུག་འབྲས། རྒྱལ་སྤྱིའི་ཆབ་སྲིད་ཀྱི་གནས་བབ་བཅས་གང་གི་ཆ་ནས་ཀྱང་བོད་ཀྱི་གནད་དོན་གལ་འགངས་དང་ཛ་དྲག་ཆེ་བའི་གོ་སྐབས་ཤིག་ཏུ་སླེབས་ཡོད་ན་བོད་མི་སྤྱི་བོ་གནམ་བསྟན་ཡོངས་ཀྱིས་སྙིང་ལ་རུས་པ་བཅུག་སྟེ་བོད་ནང་ཡོད་པའི་བོད་མི་བརྒྱ་ཕྲག་མང་པོས་ལུས་སྲོག་བློས་བཏང་བྱས་པ་རྣམས་ཆུད་ཟོས་སུ་མི་འགྲོ་བའི་ཆེད་སྒྲུབ་ཕྱོགས་ཀྱི་ལས་འགུལ་རྒྱུན་སྤེལ་དགོས་པ་དང༌།  བོད་མིའི་སྤྱི་མཐུན་གྱི་བསོད་ནམས་གོང་མཐོར་སྤེལ་བའི་ཐབས་ཚུལ་ལ་སྒོ་ཀུན་ནས་འབད་འབུང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན་ཞེས་སོགས་འཁོད་ཡོད་པ་རེད།།

Share this:
༩༠ ཀློག་གྲངས།