Author: བོད་ཀྱི་བང་ཆེན།

རྒྱ་གར་ལྷོ་ཕྱོགས་སེ་ར་དགོན་དུ་ཡོད་པའི་ཉི་དར་རྒྱས་གླིང་གི་གྲྭ་རྒྱུན་ཐུན་མོང་ནས་གནས་ཚུལ་བརྒྱུད་སྤྲོད་གནང་བ་ལྟར་ན། འདི་ལོར་བོད་ཡོངས་སུ་མ་གྲོས་བསམ་པ་གཅིག་མཐུན་གྱིས་རྒྱ་ནག་དམར་པོའི་སྲིད་གཞུང་ལ་ངོ་རྒོལ་སྐད་འབོད་ཀྱིས་རང་དབང་དགོས་པའི་ཞི་རྒོལ་བྱེད་སྐབས། དཀར་མཛེས་སྟོང་འཁོར་ཉི་ཁོག་དར་རྒྱས་གླིང་དགོན་དུ་ཡང་རྒྱ་ནག་སྲིད་གཞུང་ནས་རྒྱལ་གཅེས་ཆོས་གཅེས་སོགས་ཀྱི་ལས་འགུལ་སྤེལ་རྩིས་བྱས་པ་དང༌། དགོན་པའི་བླ་གྲྭ་ཡོངས་ནས་ངོས་ལེན་མི་བྱེད་རྒྱུའི་དམ་བཅའ་བཞག་ཡོད་པ་མ་ཟད། གལ་ཏེ་རྒྱལ་གཅེས་ཆོས་གཅེས་ཀྱི་ལས་འགུལ་སྤེལ་མཚམས་སུ་བླ་གྲྭ་ཡོངས་ཀྱིས་མཐའ་གཅིག་ཏུ་ངོ་རྒོལ་བྱེད་རྒྱུའི་གྲ་སྒྲིག་བྱས་ཡོད་འདུག

བོད་ས་གང་སར་ལོ་འདིའི་ལོ་སྟོད་ཙམ་ལ་ཞི་རྒོལ་ཁྲོད་ཞུགས་མཁན་ཚོར་རིམ་བཞིན་ཁྲིམས་ཐག་གཅོད་བཞིན་ཡོད་པ་དང༌། ཉེ་བའི་ཆར་དཀར་མཛེས་ཁུལ་ནས་ཞི་བའི་ཡར་ལངས་ཁྲོད་ཞུགས་མཁན་རྣམས་ལ་དཀར་མཛེས་ཁུལ་འབྲིང་རིམ་མི་དམངས་ཁྲིམས་ནས་རིམ་བཞིན་ཁྲིམས་ཐག་གཅོད་བཞིན་ཡོད་པ་རེད། དེ་ཡང་ཕྱི་ཟླ་༤ ཚེས་༢༣ ཉིན་ངོ་རྒོལ་སྐད་འབོད་བྱེད་མཁན་གྱི་གྲས་སུ་ཡོད་པ་དཀར་མཛེས་བྲག་དཀར་བཙུན་དགོན་གྱི་བཙུན་མ་བསོད་ནམས་བདེ་སྐྱིད་ལོ་༣༢ ཡིན་པ་ཁོང་ལ་ཕྱི་ཟླ་༡༡ ཚེས་༧ ཉིན་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་ནས་ལོ་༣ གྱི་ཁྲིམས་ཐག་བཅད་ཡོད་པ་དང༌། དགོན་པ་དེ་ཉིད་ནས་ཡིན་པ་བཙུན་མ་ཐུབ་བསྟན་སྒྲོལ་མས་ཕྱི་ཟླ་༥ ཚེས་༡༡ ཉིན་ངོ་རྒོལ་འཛིན་བཟུང་བྱས་པ་ཁོང་ལ་ལོ་༤ ཁྲིམས་ཐག་བཅད།

འབྲེལ་ཡོད་ནས་འདི་གར་ནས་གནས་ཚུལ་མཁོ་སྤྲོད་གནང་བ་ལྟར་ན། ཉིན་ཤས་སྔོན་དུ་ཁམས་དཀར་མཛེས་རྫོང་ཁུལ་དུ་ཡོད་པའི་ཁང་སར་སྐྱབས་མགོན་སྤྲུལ་སྐུའི་སློབ་གྲྭ་དང་སྨན་ཁང༌། ལམ་བྲག་སྤྲུལ་སྐུའི་སྨན་ཁང༌། དཀར་མཛེས་རྫོང་བོད་ཡིག་སློབ་འབྲིང་བཅས་སྒོ་རྒྱག་རྒྱུའི་གྲོས་ཆོད་བཞག་ནས་མང་ཚོགས་ལ་ཁྱབ་བསྒྲགས་བྱས་འདུག ཕྱི་ཟླ་༡༢ པའི་ཚེས་༡ ཉིན་དཀར་མཛེས་རྫོང་གྲོང་ཁུལ་དུ་ཡོད་པའི་སློབ་ཕྲུག་གི་ཕ་མ་སོགས་རྒན་རྒོན་བགྲེས་སོང་དང་ན་གཞོན་སོགས་བོད་རིགས་མི་མང་ཚོས་བློ་ཕམ་ཆེན་པོའི་ངང་ནས་མ་བསྐུལ་དྭང་བླངས་ཀྱིས་རྫོང་སྲིད་གཞུང་དུ་སྨན་ཁང་དང་སློབ་གྲྭ་དེ་ཚོ་སྒོ་བརྒྱབ་ན་མི་འགྲིག་པའི་ཡི་གེ་དང་ཞུ་བ་ཕུལ་ཡོད་འདུག