ཧྥ་རན་སིས་དབྱིན་ཇི་དང་ལྷན་དུ་འཚོགས་གཏན་འཁེལ་བའི་རྒྱལ་སྲུང་གྲོས་མོལ་ཕར་འགྱངས་བྱས་འདུག
ཨ་རི་དང་། དབྱིན་ཇི། ཨོ་སི་ཁྲུ་ལི་ཡ་གསུམ་གྱི་ཞི་བདེ་རྒྱ་མཚོའི་བདེ་འཇགས་སྲུང་སྐྱོབ་ཀྱི་གྲོས་མཐུན་གསར་ཤོས་ཏེ། ཨ་ཁུའུ་སཱ་(Aukus) ཡིས་བསླངས་པའི་རྩོད་རྙོག་ཁྲོད། ཧྥ་རན་སིའི་རྒྱལ་སྲུང་ལས་ཁུངས་ནས་དབྱིན་ཇི་དང་ལྷན་དུ་འཚོགས་གཏན་འཁེལ་བའི་རྒྱལ་སྲུང་གྲོས་མོལ་ཚོགས་འདུ་ཞིག་ཕར་འགྱངས་བྱས་ཡོད་འདུག
བསྟན་འཛིན་འཛོམས་སྐྱིད་ལ་སྦེལ་ཇེམ་གྱི་མཛངས་མ་ཆེན་མོའི་རྒྱལ་ཁ་ཐོབ་འདུག
ཟླ་༩ པའི་ཚེས་༡༨ ཉིན་ཡུ་རོབ་སྦེལ་ཇེམ་དུ་ཕྱི་ལོ་༢༠༢༡ ལོའི་སྦེལ་ཇེམ་གྱི་མཛངས་མ་ཆེན་མོ་(Miss Grand Belgium) ཞེས་པ་དེའི་རྟིང་རྩོད་འགྲན་སྡུར་བྱས་འདུག་པ་དང་། མཐའ་མའི་གྲུབ་དོན་དུ་རྒྱལ་ཁའི་དབུ་རྒྱན་དེ་བོད་མི་བསྟན་འཛིན་འཛོམས་སྐྱིད་ལ་ཐོབ་འདུག
བོད་པའི་སྲོག་རྩ་གང་ཡིན་ནམ།
མི་རིགས་ཀྱི་སྲོག་རྩ་གང་ཡིན་མིན་གྱི་སྐོར་ལ་གླེང་ཕྱོགས་མང་པོ་ཡོད་པ་དང་། མི་རིགས་ཤིག་གནས་དང་མི་གནས་མི་རིགས་དེའི་སྐད་ཡིག་རིག་གནས་ཀྱི་འཆི་གསོན་ལ་ཐུག་ཡོད་ཅེས་ཤོད་མཁན་མང་པོ་ཡོད་ལ།
ཁ་ཆེའི་འགྲོ་བ་མིའི་ཐོབ་ཐང་ཚོགས་པ་༤༠ ལས་མང་བས་ཞབས་ཞུ་ཚོང་ལས་ཁང་ཆེན་པོ་ཞིག་ལ་ངོ་རྒོལ་བྱེད་བཞིན་འདུག
རྒྱལ་སྤྱིའི་ནང་མགྲོན་ཁང་མང་པོ་ཡོད་པའི་ཞབས་ཞུའི་ཚོང་ལས་ཁང་ཧིལ་ཊོན་གྱིས། ཡུ་གུར་ཁུལ་དུ་རྒྱ་ནག་གཞུང་གིས་གཏོར་བཤིག་བཏང་བའི་ཁ་ཆེའི་ལྷ་ཁང་ཞིག་གི་ཡུལ་གནས་སུ་མགྲོན་ཁང་རྒྱག་འཆར་ཡོད་འདུག་པས། ལས་དོན་དེར་ཁ་ཆེའི་འགྲོ་བ་མིའི་ཐོབ་ཐང་ཚོགས་པ་མང་པོ་ཞིག་གིས་རྒྱལ་སྤྱིའི་ནང་ངོ་རྒོལ་ལས་འགུལ་སྤེལ་འགོ་བཙུགས་འདུག
རྡ་ས་ཁུལ་དང་གཞིས་ཆགས་ཁག་ཅིག་ཏུ་ཏོག་ནད་མང་དུ་འགྲོ་བཞིན་ཡོད་འདུག
འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་ཏོག་དབྱིབས་ནད་གཞི་ཕོག་པ་ར་འཕྲོད་བྱུང་བ་མི་གྲངས་༣༦ བྱུང་ཡོད་པ་ལས་སྐྱེས་པ་གྲངས་༡༣ དང་། བུད་མེད་གྲངས་༢༣། དེའི་ནང་ནས་ལོ་ན་མཐོ་ཤོས་དེ་༨༣ དང་ཆུང་ཤོས་དེ་ལོ་ན་༢ ཡིན་འདུག དེ་བཞིན་རྡ་ས་ཁུལ་དང་བཙན་བྱོལ་བོད་མིའི་གཞིས་ཆགས་ཁག་གཅིག་གི་ནང་ཏོག་དབྱིབས་གཉན་རིམས་འཕོག་མཁན་ཇེ་མང་དུ་འགྲོ་བཞིན་ཡོད་འདུག ཟླ་༩ པའི་ཚེས་༡༦ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༧ པ་དེ་སྤེལ་ཡོད་པ་རེད། ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་གཅིག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༡༣ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་ ༥ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་ ༡༨ ནང་གི་བོད་མི་རང་ཁྱིམ་དུ་མི་གྲངས་༥༠༤ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་༤༦༥ བཅས་ཁྱོན་བསྡོམས་བོད་མི་གྲངས་ ༩༦༩ འགོག་དབྱེ་ཟུར་བཀག་ཐོག་བཞུགས་ཡོད་པ་རེད་འདུག ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་༥༡༩༩༨ ལ་རིན་མེད་བགོ་འགྲེམས་གནང་ཡོད། ནད་ཡམས་ཁྱབ་གདལ་སྔོན་འགོག་སླད་བདུན་ཕྲག་འདིའི་ནང་རྒྱ་གར་ནང་གི་ས་གནས་གྲངས་༡༥ དང་བལ་ཡུལ་ནང་གི་ས་གནས་གྲངས་༣ བཅས་ཀྱི་བོད་མི་གྲངས་༡༡༧༤ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད། དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་ལོ་ན་༡༨ ཡན་གྲངས་ ༣༢༠༦ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀར་བརྒྱབ་ཟིན་པ་དང་། མི་གྲངས་༡༧༠༤༦ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་གྲངས་༥༣༣ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་དང་མི་གྲངས་༣༡༩༡ ལ་སྔོན་འགོག་སྨན་ཁབ་ཆ་ཚང་ཐོབ་ཡོད་འདུག འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་ནད་གཞི་ཕོག་པ་ར་འཕྲོད་བྱུང་བ་མི་གྲངས་༣༦ བྱུང་ཡོད་པ་ལས་སྐྱེས་པ་གྲངས་༡༣ དང་། བུད་མེད་གྲངས་༢༣། དེའི་ནང་ནས་ལོ་ན་མཐོ་ཤོས་དེ་༨༣ དང་ཆུང་ཤོས་དེ་ལོ་ན་༢། ད་བར་རྒྱ་གར་དང་བལ་ཡུལ་ནང་གི་བོད་མིར་ནད་གཞི་ཕོག་པ་ཁྱོན་མི་གྲངས་ ༦༣༡༠ དང་། དྲག་སྐྱེད་བྱུང་བ་མི་གྲངས་ ༦༡༠༥། འདས་གྲོངས་སུ་གྱུར་བ་མི་གྲངས་ ༡༥༠། […]
ཆབ་སྲིད་བཙོན་ཟུར་དང་རྩོམ་པ་པོ་རྭ་ཚེ་རིང་དོན་གྲུབ་འདས་གྲོངས་སུ་ཕྱིན་འདུག
ཆབ་སྲིད་བཙོན་ཟུར་དང་རྩོམ་པ་པོ་རྭ་ཚེ་རིང་དོན་གྲུབ་ལགས་ལོ་ན་༣༤ ཐོག་ལ་འདས་གྲོངས་སུ་ཕྱིན་འདུག དེ་ཡང་ཁོང་བཙོན་ཁང་ནང་ཡོད་པའི་སྐབས་སུ་མནར་གཅོད་སོགས་ལ་བརྟེན་ནས་གཟུགས་པོའི་གནས་སྟངས་ཧ་ཅང་སྐྱོ་བོ་ཆགས་ཡོད་འདུག དེ་ཡང་ཟླ་༩ པའི་ཚེས་༡༥ ཉིན་ཁྲིན་ཏུའུ་ཡི་སྨན་ཁང་ཞིག་ནས་ཆབ་སྲིད་བཙོན་ཟུར་དང་རྩོམ་པ་པོ་རྭ་ཚེ་རིང་དོན་གྲུབ་འདས་གྲོངས་སུ་ཕྱིན་ཡོད་འདུག་པ་དང་། ཁོང་ནི་དེ་སྔ་སྤྱི་ལོ་༢༠༠༨ ལོའི་རྗེས་ལ་བོད་ནང་གི་དངོས་ཡོད་གནས་སྟངས་སྐོར་གྱི་དཔེ་དེབ་གསོན་མིག་རྩོམ་སྒྲིག་དང་དཔར་བསྐྲུན་བྱས་བའི་ཉེས་མིང་འོག རྒྱ་ནག་གི་ཉེན་རྟོག་པས་མདོ་སྨད་རྔ་བ་ཕྱོགས་ནས་བོད་མི་བཞི་བཙོན་འཇུག་བྱས་བའི་ཁྲོད་ནས་གཅིག་ཡིན་པ་དང་། ཕྱི་ལོ་༢༠༡༠ ལོའི་ཟླ་༢ པའི་ནང་རྒྱ་ནག་གི་ཉེན་རྟོག་པས་འཛིན་བཟུང་རྗེས་འབར་ཁམས་ནས་བཀག་ཉར་དང་བཅས་མི་ལོ་གསུམ་གྱི་དུས་བཀག་བཙོན་འཇུག་གི་ཁྲིམས་ཐག་བཅད་པ་དང་། དེའི་རྗེས་མེན་ཡཱང་བཙོན་ཁང་དུ་༢༠༡༣ ལོ་བར་བཙོན་འཇུག་བྱས་རྗེས་གློད་གྲོལ་བཏང་ཡོད་འདུག བཙོན་ཁང་ནང་དུ་སྡོད་རིང་མནར་གཅོད་ཚད་མེད་མྱངས་བ་དང་ཟས་གོས་གནས་མལ་སོགས་ཀྱི་གནས་སྟངས་ཞན་པོ་ཡོད་རྐྱེན། བོད་ཀྱི་ཆབ་སྲིད་བཙོན་པ་མང་པོ་ཞིག་ལྟར་ཁོང་ཡང་བཙོན་གྲོལ་ཐོབ་སྐབས་གཟུགས་པོའི་གནས་སྟངས་ཧ་ཅང་ཞན་པོ་ཡོད་པ་མ་ཟད། ལྷག་པར་མཆིན་པ་ནད་མནར་གྱི་རྐྱེན་པས་ཡུན་རིང་སྨན་བཅོས་བྱས་ཀྱང་ཕན་ཐོག་མ་བྱུང་བར་ཚེ་ལས་འདས་བ་ཡིན་འདུག ཁོང་བཙོན་གྲོལ་ཐོབ་རྗེས་རྒྱ་ནག་གཞུང་གིས་ཁོང་གི་འགྲོ་འདུག་སོགས་ལ་ལྟ་ཞིབ་བྱེད་ཀྱི་ཡོད་མིན་ལ་མ་ལྟོས་པར། བཙོན་ཁང་ནས་བྲིས་བའི་རྩོམ་ཡིག་གི་གཙོས་རྔུལ་ཁྲག་ཞེས་བའི་རྩོམ་དེབ་ཞིག་ཀྱང་དཔར་བསྐྲུན་བྱས་ཡོད་འདུག རྩོམ་པ་པོ་ཁོང་གི་དངོས་མིང་ལ་རྭ་ཚེ་རིང་དོན་གྲུབ་དང་སྨྱུག་མིང་ལ་ཤིང་ལོ་དམར་པོ་འབོད་ཀྱི་ཡོད་པ་དང་། མདོ་སྨད་རྔ་བ་ཁུལ་ཁྱུང་མཆུ་རྫོང་གསེར་དེའུ་རོང་ཐ་དགོན་པའི་དགེ་འདུན་པ་ཡིན་འདུག ། གསར་འགོད་པ་སྐལ་བཟང་དོན་གྲུབ།
སྟོབས་ཆེན་རྒྱལ་ཁབ་གསུམ་གྱིས་རྒྱ་ནག་གི་ཉེན་ཁར་དམིགས་ནས་དམག་ཆེན་གཉིས་པའི་རྗེས་ཀྱི་དམག་ཤུགས་ཆིག་སྒྲིལ་གྱི་གྲོས་མཐུན་ཆེ་ཤོས་དེ་བཞག་འདུག
མང་གཙོའི་རྒྱལ་ཁབ་རྣམས་ཀྱིས་རྒྱ་ནག་གི་དབང་ཤུགས་དང་ཧམ་ཤེད་ལ་སེམས་འཚབ་དང་། དེར་ཁ་གཏད་གཅོག་རྒྱུར་བྲེལ་བཞིན་པའི་སྐབས་འདིར། ནུབ་ཕྱོགས་ཀྱི་རྒྱལ་ཁབ་ཆེ་ཤོས་གསུམ་སྟེ། ཨ་རི་དང་། དབྱིན་ཇི། ཨོ་སི་ཁྲུ་ལི་ཡ་གསུམ་གྱིས་ཞི་བདེ་རྒྱ་མཚོའི་ཁུལ་དུ་དམག་ཤུགས་ཆིག་སྒྲིལ་བྱེད་རྒྱུའི་གྲོས་མཐུན་ཞིག་བཞག་འདུག་ཅིང་། ཉམས་ཞིབ་པ་ཚོས་དེ་ནི་འཛམ་གླིང་དམག་ཆེན་གཉིས་པའི་རྗེས་ཀྱི་“རྒྱལ་སྲུང་མཉམ་འབྲེལ་ཆེ་ཤོས་དེ་”ཡིན་པའི་འགྲེལ་བརྗོད་བྱས་འདུག ཕྱི་ཟླ་ ༩ ཨ་རིའི་ཚེས་ ༡༥ རེས་གཟའ་ལྷག་པའི་ཉིན་ཕྱིར་བསྒྲགས་བྱས་པའི་ཨ་ཁུའུ་སཱ་(Aukus)ཞེས་པའི་“ལོ་རྒྱུས་རང་བཞིན་ཅན་”གྱི་གྲོས་མཐུན་དེའི་ནང་། མང་གཙོའི་སྟོབས་ཆེན་རྒྱལ་ཁབ་གསུམ་གྱིས་ཕན་ཚུན་གསང་བའི་གནས་ཚུལ་མཁོ་སྤྲོད་དང་། གོ་མཚོན་དང་། འཕྲུལ་ཆས། དྲ་བའི་མ་ལག་སོགས་མཉམ་སྤྱོད་བྱས་ཏེ་ཞི་བདེ་རྒྱ་མཚོའི་ཁུལ་དུ་དམག་ཤུགས་ཆིག་སྒྲིལ་བྱེད་རྒྱུ་ཡིན་འདུག་པ་མ་ཟད། གྲོས་མཐུན་དེའི་འོག་ལ། ཨོ་སི་ཁྲུ་ལི་ཡས་ཨ་རིས་མཁོ་སྤྲོད་བྱས་པའི་འཕྲུལ་ཆས་མ་ལག་བེད་སྤྱོད་བྱས་ཏེ་རྡུལ་ཕྲན་ཆུ་འོག་གྲུ་གཟིངས་(nuclear-powered submarines)ཐོག་མ་རྣམས་ཀྱང་བཟོ་རུ་འཇུག་གི་ཡོད་འདུག ཉེ་བའི་ལོ་ཤས་ནང་། རྒྱ་ནག་གིས་ཞི་བདེ་རྒྱ་མཚོའི་ཁུལ་དུ་བཙན་འཛུལ་དང་ཧམ་ཤེད་ངོམ་པ་ཤུགས་ཆེ་རུ་འགྱུར་བཞིན་པར་བརྟེན། འཛམ་གླིང་གི་མང་གཙོའི་རྒྱལ་ཁབ་རྣམས་དེ་ལ་སེམས་འཚབ་དང་འཇིགས་སྣང་ལངས་ནས་རྒྱ་ནག་གི་བཙན་ཤེད་འགོག་ཐབས་ལ་རིག་པ་སྒྲིམ་བཞིན་པའི་སྒང་ཡིན། ཨ་རིའི་སྲིད་འཛིན་བྷ་ཌན་དང་། དབྱིན་ཇིའི་སྲིད་བློན་ཇོན་སན། ཨོ་སི་ཁྲུ་ལི་ཡའི་སྲིད་བློན་མོ་རཱ་ས་སོན་གསུམ་གྱིས་མཉམ་འབྲེལ་ཐོག་ནས་བཏང་བའི་བསྒྲགས་གཏམ་ནང་། རྒྱལ་ཁབ་གསུམ་གྱི་མཉམ་འབྲེལ་གསར་པ་དེ་ནི་ཞི་བདེ་རྒྱ་མཚོའི་ཁུལ་དུ་“ཞི་བདེ་དང་འཕེལ་རྒྱས་”གོང་མཐོར་གཏོང་བའི་ཆེད་དུ་དམིགས་པ་ཞིག་ཡིན་པའི་འགྲེལ་བརྗོད་བྱས་འདུག དུས་རྒྱུན་ལྟར། ཝ་ཤིན་ཏྲོན་དུ་ཡོད་པའི་རྒྱ་ནག་གི་གཞུང་ཚབ་ཁང་ནས་རྒྱལ་ཁབ་གསུམ་གྱིས་“གྲང་དམག་དང་དབྱེ་འབྱེད་ཀྱི་བསམ་བློ་”ཐོགས་ནས་མཉམ་འབྲེལ་གྱི་བྱ་སྤྱོད་དེ་སྤེལ་གྱི་ཡོད་ཅེས་སྐྱོན་བརྗོད་བྱས་འདུག རྒྱ་ནག་གི་དབང་ཤུགས་ལ་སེམས་ཁྲལ་དང་། དེ་ལ་མཉམ་འབྲེལ་ཐོག་ནས་ཁ་གཏད་གཅོག་པའི་གྲ་སྒྲིག་བྱེད་མཁན་གོང་གི་རྒྱལ་ཁབ་གསུམ་པོ་ཙམ་མ་ཡིན་པར་ཨེ་ཤི་ཡའི་ཁྱིམ་མཚེས་རྒྱལ་ཁབ་རྣམས་ཀྱང་ཡོད་དེ། བདུན་ཕྲག་གོང་མ་རང་ལ་ཉི་ཧོང་དང་ཝི་ཊི་ནཱམ་(Vietnam)གཉིས་ཀྱི་བར་དུ་རྒྱལ་སྲུང་མཚོན་ཆ་དང་འཕྲུལ་ཆས་ཉོ་ཚོང་གི་གྲོས་ཆོད་གསར་པ་ཞིག་བཞག་ཡོད། ། གསར་འགོད་པ་དཀོན་མཆོག་རབ་བརྟན།
ཧི་མ་ཅལ་བློན་ཆེན་ཞིག་གིས་བོད་སློབ་འཛིན་ཚོགས་སློབ་གྲྭ་ཁག་རྩིས་སྤྲོད་ལ་དགག་བྱ་བྱས་འདུག
ད་ལྟའི་ཆར་བོད་སློབ་འཛིན་ཚོགས་ཀྱི་སློབ་གྲྭ་ལྷག་མ་དྲུག་རྩིས་ལེན་པའི་ལས་རིམ་འགྲོ་བཞིན་ཡོད་པ་དང་བསྟུན། སིམ་ལའི་རྒྱ་གར་མི་མང་ཁག་ཅིག་དང་དེ་བཞིན་ཧི་མ་ཅལ་མངའ་སྡེའི་བློན་ཆེན་ཞིག་གིས་རྒྱ་གར་གྱི་སློབ་ཕྲུག་ཚོའི་ཆེད་དུ། བོད་སློབ་འཛིན་ཚོགས་ཀྱི་སློབ་གྲྭ་རྣམས་རྒྱ་གར་དབུས་གཞུང་གི་སློབ་གྲྭར་སྒྱུར་དགོས་སྐོར་བརྗོད་བཞིན་འདུག དེ་ཡང་ཟླ་༩ པའི་ཚེས་༡༥ ཉིན་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ན། ཉེ་ཆར་ཧི་མ་ཅལ་མངའ་སྡེའི་གྲོང་ཁྱེར་འཛུགས་སྐྲུན་དང་འཕེལ་རྒྱས་ཀྱི་བློན་ཆེན་སུ་རཱེཤ་བྷར་ཌ་ཝཇེ་(Suresh Bhardwaj)ཡིས། རྒྱ་གར་གཞུང་འཛིན་ཚོགས་པ་བྷི་ཇི་བྷི་ཡི་རྒྱལ་ཡོངས་ཚོགས་གཙོ་དང་། དེ་བཞིན་རྒྱ་གར་དབུས་གཞུང་གི་ཤེས་ཡོན་བློན་ཆེན། དབུས་གཞུང་གི་རྩེད་རིགས་བློན་ཆེན་བཅས་ལ་ཡི་གེ་བཏང་ནས། བོད་སློབ་འཛིན་ཚོགས་ཀྱི་སློབ་གྲྭ་རྣམས་སམ་བྷོ་ཊ་བོད་སློབ་ཚོགས་པར་རྩིས་སྤྲོད་མི་བྱེད་པའི་རེ་སྐུལ་བྱས་འདུག བློན་ཆེན་ཁོང་གིས་ཕྱི་ལོ་༢༠༡༣ ལོར་བོད་སློབ་འཛིན་ཚོགས་ཀྱི་སློབ་གྲྭ་ཚང་མ་སམ་བྷོ་ཊ་བོད་སློབ་ཚོགས་པར་རྩིས་སྤྲོད་བྱེད་རྒྱུ་ཐག་གཅོད་བྱས་ཡོད་འདུག་པ་དང་། དེ་དང་འབྲེལ་ནས་ཉེ་ཆར་བོད་སློབ་འཛིན་ཚོགས་ཀྱི་སློབ་གྲྭ་དྲུག་རྩིས་སྤྲོད་དགོས་པའི་བཀའ་བཏང་ཡོད་ཀྱང་། སློབ་གྲྭ་དེ་དག་ནང་རྒྱ་གར་སློབ་ཕྲུག་གི་ཁ་གྲངས་དང་བོད་པའི་སློབ་ཕྲུག་གི་ཁ་གྲངས་བསྡུར་ན། བོད་པའི་སློབ་ཕྲུག་གི་ཁ་གྲངས་ནི་ཤིན་ཏུ་ཉུང་ཉུང་ཡིན་ཁར། ཉེ་ཁུལ་དུ་བོད་པའི་སློབ་གྲྭ་གཞན་ཡང་ཡོད་པས་བོད་པའི་སློབ་ཕྲུག་རྣམས་དེ་གར་སློབ་འཇུག་བྱེད་ཆོག་གི་ཡོད་པ། འོན་ཀྱང་གལ་ཏེ་བོད་སློབ་འཛིན་ཚོགས་སློབ་གྲྭ་རྣམས་སམ་བྷོ་ཊ་བོད་སློབ་ཚོགས་པར་རྩིས་སྤྲོད་བྱས་ཚེ་རྒྱ་གར་སློབ་ཕྲུག་རྣམས་སློབ་གྲྭ་ནས་རྩ་དགོངས་ཞུ་རྒྱུ་ལས་ཐབས་ལམ་གཞན་མེད་པས། རྒྱ་གར་གྱི་སློབ་ཕྲུག་ཚོའི་ཁ་གྲངས་ཆེན་པོ་ཡིན་པས་ཁོ་ཚོའི་མ་འོངས་པའི་མདུན་ལམ་སྲུང་སྐྱོབ་ཆེད་དུ། སློབ་གྲྭ་དེ་དག་རྒྱ་གར་དབུས་གཞུང་གི་འཛིན་སྐྱོང་འོག་ཡོད་པའི་རྒྱ་གར་གྱི་སློབ་གྲྭར་(Kendriya Vidyalaya)ལ་སྒྱུར་བའི་རེ་སྐུལ་ཞུ་ཡི་ཡོད་སྐོར་བརྗོད་འདུག དེ་སྔོན་ཟླ་༨ པའི་ཚེས་༡༨ ཉིན་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཞིག་སྤེལ་ཡོད་པ་དང་། དེའི་ནང་ཧི་མ་ཅལ་མངའ་སྡེའི་སིམ་ལར་ཡོད་པའི་བོད་སློབ་འཛིན་ཚོགས་ཀྱི་སློབ་གྲྭའི་ནང་ཡོད་པའི་རྒྱ་གར་གྱི་སློབ་ཕྲུག་ཚོའི་ཕ་མ་རྣམས་ཀྱིས། བོད་སློབ་འཛིན་ཚོགས་ཀྱི་སློབ་གྲྭ་དེ་དག་ནང་དུ་རྒྱ་གར་གྱི་སློབ་ཕྲུག་མང་པོ་ཞིག་སློབ་སྦྱོང་བྱེད་བཞིན་ཡོད་པས། སློབ་ཕྲུག་དེ་དག་གི་ཁེ་ཕན་སྲུང་སྐྱོབ་བྱེད་པའི་ཆེད་དུ་སློབ་གྲྭ་རྣམས་རྒྱ་གར་དབུས་གཞུང་གི་སློབ་གྲྭར་སྒྱུར་རྒྱུ་ནི་ལམ་ཁ་ཡག་ཤོས་ཡིན་སྐོར་བརྗོད་ནས། དབུས་གཞུང་གིས་བོད་སློབ་འཛིན་ཚོགས་ཀྱི་སློབ་གྲྭ་རྣམས་སམ་བྷོ་ཊར་རྩིས་སྤྲོད་བྱེད་རྒྱུའི་ཐག་གཅོད་དེར་ཁྲིམས་ཁང་དུ་ཞུ་གཏུག་བྱེད་རྒྱུའི་ཐག་གཅོད་བྱས་ཡོད་འདུག ཞུ་གཏུག་བྱེད་མཁན་རྒྱ་གར་སློབ་ཕྲུག་ཁག་གི་ཕ་མ་དང་ལྷན་དུ་སྤྱི་ཚོགས་ཞབས་ཞུ་ལས་འགུལ་བ་ཁག་ཅིག་ཀྱང་ཡོད་སྐོར་འདུག དེ་བཞིན་ཁོ་ཚོས་བོད་སློབ་འཛིན་ཚོགས་སློབ་གྲྭ་དེ་དག་རྩིས་སྤྲོད་བྱེད་རྒྱུའི་ཐག་གཅོད་དེ་ནི་ཧི་མ་ཅལ་མངའ་སྡེའི་ས་ཁང་གི་ཁྲིམས་དང་འགལ་གྱི་ཡོད་ཁར། སློབ་གྲྭ་དེ་དག་གི་ས་ཁང་རིན་གོང་ནི་ཧིན་སྒོར་ས་ཡ་མང་པོ་ཡིན་ཁར། སློབ་གྲྭ་དེ་དག་འཛིན་སྐྱོང་བྱེད་རྒྱུའི་འགྲོ་སོང་ནི་ཉུང་ཉུང་ཡིན་པས། དབུས་གཞུང་གིས་ཐག་གཅོད་དེར་བསྐྱར་ཞིབ་བྱེད་དགོས་སྐོར་ཡང་བརྗོད་འདུག རྒྱ་གར་སློབ་ཕྲུག་རྣམས་ཀྱི་ཕ་མ་ཚོས་ཁྲིམས་ཁང་དུ་ཞུ་གཏུག་བྱེད་སྐབས་བོད་སློབ་འཛིན་ཚོགས་སློབ་གྲྭ་༤༥ རྩིས་སྤྲོད་ཀྱི་ཐག་གཅོད་ལ་ཞུ་གཏུག་བྱེད་ཀྱི་ཡོད་སྐོར་བརྗོད་འདུག ། གསར་འགོད་པ་སྐལ་བཟང་དོན་གྲུབ།
མཱ་ཁའོ་མི་མང་གིས་དྲང་བདེན་མིན་པའི་འོས་བསྡུར་ངོ་རྒོལ་བྱས་འདུག
ཧོང་ཀོང་ནང་དུ་མང་གཙོར་རྒྱབ་སྐྱོར་བྱེད་མཁན་རྣམས་གྲོས་ཚོགས་ཀྱི་འོས་བསྡུར་འོས་འགྲན་བྱེད་ཐུབ་ཐབས་མེད་པ་བཟོས་ཏེ་བཀག་འགོག་བྱེད་བཞིན་ཡོད་པ་ལྟར། མཱ་ཁའོ་ནང་དུ་ཡང་དེ་ལྟར་བྱས་འདུག་པས་མི་མང་གི་རྣམ་པ་འདྲ་མིན་ཐོག་ནས་འོས་བསྡུར་ངོ་རྒོལ་བྱས་འདུག
རྒྱ་ནག་གི་བཟོ་ཚོང་ཁང་ཆེ་ཤོས་ཤིག་ལ་མ་འཇོག་བྱེད་མཁན་ཚོས་སེམས་འཚབ་དང་ངོ་རྒོལ་བྱེད་ཀྱི་འདུག
རྒྱ་ནག་གི་བཟོ་ཚོང་ཁང་ཆེ་ཤོས་ཨེ་ཝར་གྷི་རན་ཌི་(China Evergrande Group) ལ་ཨ་སྒོར་ཐེར་འབུམ་༣༠༠ ཙམ་གྱི་བུ་ལོན་ཟུག་ནས་བཟོ་ཚོང་ཁང་གི་དངོས་ཟོག་རྣམས་སྒོར་མོར་སྒྱུར་མི་ཐུབ་པའི་དཀའ་ངལ་འཕྲད་བཞིན་པར་བརྟེན། མ་འཇོག་བྱེད་མཁན་བརྒྱ་ལྷག་གིས་གྲོང་ཁྱེར་ཧྲེན་ཌིན་(Shenzhen) ལ་ཡོད་པའི་ལས་ཁུངས་ཨ་མའི་མཐའ་བསྐོར་ནས་ངོ་རྒོལ་ཤུགས་ཆེན་བྱས་ཡོད་འདུག