News

བོད་དོན་ཆེད་སྟོད་ཐུང་འགྲེམས་སྤེལ།

ཚེ་བརྟན་ནོར་བུ་ལགས་སྒེར་གྱིས་འགྲོ་གྲོན་བཏང་སྟེ་བཟོས་པའི་སྟོད་གོས་ནག་པོའི་རྒྱབ་མདུན་གཉིས་ལ་དབྱིན་བོད་སྐད་ཡིག་གཉིས་སྦྱར་གྱི་༢༠༠༨ བོད་ནང་དྲག་གནོན་གྱི་ལོ་ནག་སྲུང་བརྩི། ཧུའུ་ཅིན་ཐའོ་ཡིས་མི་གསོད་བཙོན་འཇུག་མཚམས་འཇོག་བྱེད་དགོས། རྒྱ་བོད་ཞི་འགྲིག་ཆེད་ྋགོང་ས་མཆོག་དང་ཧུའུ་ཅིན་ཐའོ་བཀའ་མོལ་གནང་དགོས། རྒྱ་བོད་མང་གཙོ་དར་སྤེལ་ཚོགས་པ་འཛུགས་དགོས། ཞེས་བྲིས་པའི་སྟོད་ཐུང་གྲངས་ཁྲི་གཅིག་བཟོས་ཡོད་འདུག སྟོད་ཐུང་དེ་དག་བལ་ཡུལ་དུ་ས་གླང་ལོའི་ལོ་གསར་པ་ཚེས་དུས་དང༌། རྒྱ་གར་དུ་གསུམ་བཅུའི་དུས་དྲན་གྱི་སྐབས་སུ་འགྲེམ་རྒྱུ་ཡིན་པ་རེད།

Bangchen admin· · Comments are Disabled ·

བོད་རྒྱ་ཞི་མོལ་ཚོགས་ཆུང་གི་ཚོགས་འདུ།

 བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཞིག་ཟླ་འདིའི་ཚེས་༡༢ ནས་༡༤ བར་ལྡི་ལིའི་བོད་ཁྱིམ་དུ་འཚོགས་ཡོད་པ་དང༌། སྐབས་དེར་བཀའ་བློན་ཁྲི་པ་ཟབ་གདོང་རིན་པོ་ཆེ་མཆོག་གིས་དབུས་ཚོགས་མི་རྣམས་ལྷན་ཞུགས་གནང་ཡོད་པ་རེད། སྐབས་དེར་སྔོན་མ་རྒྱ་ནག་ལ་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་ཡོང་ཐབས་ཀྱི་བསམ་འཆར་ཕུལ་བ་དེར། རྒྱ་མིའི་ཕྱོགས་ནས་ལན་འདེབས་བྱས་པ་ཁག་གི་ཐོག་བཀའ་བསྡུར་གནང་བ་དང༌། མ་འོངས་པར་ག་རེ་གནང་དགོས་མིན་སོགས་ཀྱི་ཐོག་བཀའ་བསྡུར་གནང་ཡོད་པ་རེད། ཚོགས་མིའི་ཁོངས་སུ་ད་ཐེངས་ཨ་ཀྱ་རིན་པོ་ཡང་དངོས་སུ་ཚོགས་ཐོག་ཏུ་ཕེབས་ཡོད་པ་རེད།

Bangchen admin· · Comments are Disabled ·
ཏཱ་ལའི་བླ་མ་མཐོ་རིམ་སློབ་གཉེར་ཁང་དབུ་འབྱེད་མཛད་སྒོ།

ཏཱ་ལའི་བླ་མ་མཐོ་རིམ་སློབ་གཉེར་ཁང་དབུ་འབྱེད་མཛད་སྒོ།

ཟླ་འདིའི་ཚེས་༡༦ ཉིན་ྋགོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་བྷེང་ལོར་གྲོང་ཁྱེར་དུ་ཆིབས་བསྒྱུར་གནང་བ་དང་འབྲེལ། ལྷོ་གཞིས་ཁག་གི་ས་གནས་འགོ་འཛིན་རྣམ་པ་དང༌། བོད་མི་མང་སྤྱི་འཐུས་རྣམ་པ། ལྷོ་སྤྱི་སོགས་གནད་ཡོད་མི་སྣ་ཁག་ཅིག་གིས་ཕེབས་བསུ་དང༌། ཆུ་ཚོད་༡༢ ཐོག་བྷེང་ལོར་བོད་ཀྱི་མཐོ་སློབ་༼ཏཱ་ལའི་བླ་མའི་མཐོ་རིམ་སློབ་གཉེར་ཁང་༽གསར་པ་དབུ་འབྱེད་གནང་ཡོད་པ་རེད། ཏཱ་ལའི་བླ་མའི་མཐོ་རིམ་སློབ་གཉེར་ཁང་དེའི་ནང་དུ་བོད་ཀྱི་རིག་གཞུང་དང༌། དེང་དུས་ཀྱི་ཤེས་ཡོན་ཟུང་འབྲེལ་གྱི་སློབ་སྦྱོང་སྤྲོད་སའི་སློབ་མ་སུམ་སྟོང་ཙམ་བསྡུ་རྒྱུའི་འཆར་གཞི་ཡོད་འདུག མཐོ་སློབ་དེ་བོད་ཁྱིམ་སློབ་གྲྭས་གཙོ་འགན་བཞེས་ཏེ། གསར་འཛུགས་གནང་ཡོད་པ་རེད།

Bangchen admin· · Comments are Disabled ·

ྋགོང་ས་མཆོག་ཀོ་གྷལ་དོན་ལྡན་གླིང་དུ་ཆིབས་བསྒྱུར།

ཟླ་འདིའི་ཚེས་༡༧ ཉིན་ྋགོང་ས་མཆོག་རྒྱ་གར་ལྷོ་ཕྱོགས་ཀོ་ལེ་གྷལ་དོན་ལྡན་གླིང་ནས་ལྷ་མི་ཡོངས་ཀྱིས་ཇི་ལྟར་གསོལ་བ་བཏབ་པ་བཞིན་ས་གནས་དེར་ཆིབས་བསྒྱུར་བཀའ་དྲིན་བསྐྱངས་ཡོད་པ་རེད།
སྔ་དྲོ་ཆུ་ཚོད་༡༠ ཐོག་མཁའ་ལམ་བརྒྱུད་དོན་ལྡན་གླིང་ཉིན་སློབ་རྩེད་ཐང་དུ་ཞབས་སོར་འཁོད་པ་དང༌། དེར་ཡོད་ཕེབས་བསུ་བ་རྒྱ་གར་ས་གནས་རྫོང་དཔོན་ Mr. Narendra R MLA-Kollegal ལགས་དང་ས་གནས་སྐོར་སྲུང་སྤྱི་ཁྱབ་པ། བཙན་བྱོལ་བོད་གཞུང་གི་ནང་སྲིད་དྲུང་ཆེ། རྟ་རྣ་སྤྲུལ་སྐུ། བསྟན་པ་ཉི་མ་རིན་པོ་ཆེ། ལྷོ་སྤྱི། ས་གནས་འཐུས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་བཅས་ནས་ཕེབས་བསུའི་མཇལ་དར་ཕུལ་བ་དང༌།ཆོལ་གསུམ་བོད་མིའི་ཆས་གོས་ཀྱི་སྤྲས་པའི་སློབ་ཕྲུག་གསུམ་གྱིས་རྟེན་འབྱུང་ཕྱེ་མར་འདེགས་འབུལ་དང་བཀྲིས་ཞོལ་པ་འཁྲབ་ཏེ། སློབ་ཕྲུག་གིས་ཕེབས་སྒོ་ནས་གདན་ཞུ་ཞུས། གྲོང་སྡེ་ཁག་གི་དད་ལྡན་མི་མང་གིས་བཀྲིས་མཇལ་དར་དང་

Bangchen admin· · Comments are Disabled ·

ཨ་རིའི་རྒྱལ་དོན་དྲུང་ཆེའི་གཟིགས་སྐོར་ཐོག་མ།

ཟླ་འདིའི་ཚེས་༡༦ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ཨ་རིའི་རྒྱལ་དོན་དྲུང་ཆེ་གསར་པ་ཧིལ་ལ་རི་ཁི་ལན་ཊོན་ཉི་ཧོང་དུ་གཟིགས་སྐོར་ལ་འབྱོར་ཡོད་པ་དང༌། དེ་ནས་རིམ་གྱིས་ལྷོ་ཀོ་རི་ཡ་དང༌། ཧིན་དྷུ་ནེ་ཤི་ཡ། རྒྱ་ནག་སོགས་ཨེ་ཤ་ཡའི་རྒྱལ་ཁབ་ཁག་ལ་གཟིགས་སྐོར་དུ་འགྲོ་རྒྱུ་ཡིན་པའི་གནས་ཚུལ་ཐོན་ཡོད་པ་རེད།  རྒྱལ་དོན་དྲུང་ཆེས་ནེའུ་ཡོག་ཏུ་ཨེ་ཤ་ཡའི་མཐུན་ཚོགས་དང་གསར་འགོད་པར་བརྗོད་གསལ་ལྟར་ན། དྲུང་ཆེ་མཆོག་ཨེ་ཤ་ཡའི་རྒྱལ་ཁབ་ཁག་ཏུ་གཟིགས་སྐོར་འགྲོ་དོན་གཙོ་བོ་ནི་འཛམ་གླིང་གི་དཔལ་འབྱོར་ཉམས་གསོ་དང་གོ་ལའི་ཚ་དྲོད་འགྱུར་ལྡོག བྱང་ཀོ་རི་ཡའི་རྡུལ་ཕྲན་བཟོ་བསྐྲུན་གྱི་གནད་དོན་སོགས་ལ་གྲོས་བསྡུར་དང་དཔྱད་ཞིབ་བྱ་རྒྱུ དེ་བཞིན་ཞི་བདེ་རྒྱ་མཚོའི་ཤར་ནུབ་ཁུལ་གྱི་རྒྱལ་ཁབ་རྣམས། ཨ་རིའི་འཛིན་སྐྱོང་གསར་པ་ལ་རོགས་པ་ངེས་པར་དུ་དགོས་ངེས་ཡིན་པ་དང༌།

Bangchen admin· · Comments are Disabled ·

རྒྱ་ནག་གི་གསར་འགོད་པའི་ཐོ་གཞུང་ནག་པོ།

  ཟླ་འདིའི་ཚེས་ ༡༤ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། གསར་འགོད་པ་སུ་ཞིག་གིས་རྒྱ་ནག་གཞུང་གི་གསར་འགོད་ཁྲིམས་ལུགས་དང་འགལ་བའི་གནས་ཚུལ་སྐྱེལ་ལེན་སོགས་བྱས་ན། གསར་འགོད་ཆེད་ལས་པ་གསར་འགོད་པའི་ཐོ་གཞུང་ནག་པོ་ཟེར་བ་ཞིག་བཟོས་ཡོད་པས། དེའི་ནང་ཐོ་འགོད་བྱ་རྒྱུ་ཡིན་པས་མ་ཚད་ལས་གནས་ནས་ཕྱིར་འབུད་ཀྱང་གཏོང་རྒྱུ་ཡིན་ཞེས། རྒྱ་ནག་དུས་བབ་དང་གསར་འགོད་སྤེལ་སྐྲུན་ཁང་གི་འཛིན་སྐྱོང་ལྷན་ཚོགས་ཀྱི་ཚོགས་གཙོ་གཞོན་པ་ལིའི་ཌན་དོན་ཟེར་བས་བརྒྱུད་བསྒྲགས་བྱས་ཡོད་པ་རེད། ཡང་ཁོ་པས་རྒྱ་ནག་གི་གསར་འགོད་པ་དང་དུས་དེབ་རྩོམ་སྒྲིག་པ་སོགས་ལ་གསར་འགོད་ཀྱི་ཁྱད་ཆོས་ཚང་ཡོད་མེད། དབུས་གསར་འགོད་སྤྱི་ཁྱབ་བཀོད་འདོམ་པས་བསྐྱར་ཞིབ་བྱེད་གཏན་འཁེལ་ཡོད་ཅེས་དང༌། ཕྱི་རྒྱལ་གྱི་གསར་འགོད་པ་ཡིན་རུང་རྒྱ་ནག་ཕྱི་སྲིད་བློན་ཆེན་ལ་ཆོག་མཆན་གྱི་སྙན་ཞུ་ཕུལ་མེད་ན། གསར་འགོད་པའི་མིང་ཐོག་ནས་ཕྱི་རྒྱལ་གསར་འགོད་མཐུན་ཚོགས་ནང་ལས་ཀ་བྱེད་རྒྱུའི་ཐོབ་ཐང་མེད་ཅེས་བརྒྱུད་བསྒྲགས་བྱས་ཡོད་པ་རེད།     རྒྱལ་མཚམས་མེད་པའི་གསར་འགོད་པ་བྷོ་རོ་སིལ་ཟེར་བ་ཞིག་གིས་རྒྱ་ནག་གི་ཐོ་གཞུང་ནག་པོའི་སྐོར་བརྗོད་གསལ་ལ། རྒྱ་གཞུང་གིས་ག་དུས་ཡིན་ཡང་རང་དབང་ཅན་གྱི་གསར་འགོད་པ་དང་དེ་དག་གི་དཔྱད་བརྗོད་སོགས་རྫུན་གཏམ་རེད་ཟེར་ནས་བཀག་བསྡོམས་བྱེད་བཞིན་ཡོད་པ་དང༌། དེ་རིང་གི་སྒྲིག་གཞི་གསར་པ་འདིའང་གཙོ་བོར་དམིགས་ས་ནི་བོད་རང་བཙན་ཤོར་ནས་མི་ལོ་ ༥༠ དང༌། གནམ་སྡེ་སྒོ་མོའི་ཐང་ཆེན་དུ་ངོ་རྒོལ་གྱེན་ལངས་བྱས་ནས་མི་ལོ་ ༢༠ འཁོར་ཡོད་པས། ཞེད་སྣང་གིས་འཆར་འགོད་བྱས་པ་ཞིག་རེད་ཅེས་དང༌། ཡང་འཆར་འགོད་འདིས་ང་ཚོར་གནོན་ཤུགས་ག་ཚོད་སྤྲོད་མིན་བཤད་ཚོད་དཀའ་ནའང༌། གནད་དོན་འདི་ལ་དོ་སྣང་དང་བསམ་གཞིག་བྱེད་དགོས་ངེས་རེད་ཅེས་བརྗོད་ཡོད་པ་རེད།    རྒྱ་ནག་གིས་རྩེད་འགྲན་ཆེན་པོའི་སྐབས་སུ་རྩེད་མོ་ལམ་ལྷོང་དང་རྒྱལ་སྤྱིས་ལྟ་སྟངས་ཡག་པོ་ཡོང་ཆེད་དུ་གསར་འགོད་པར་རང་དབང་ཆེ་ཙམ་སྤྲད་ཁུལ་བྱས་ཡོད་ཀྱང༌། རྩེད་འགྲན་མཇུག་བསྡུས་མ་ཐག་ཨ་རིའི་དུས་བབ་དང་དབྱིན་ཇིའི་གསར་འགོད་མཐུན་ཚོགས། ཧོང་ཀོང་ཚགས་པར་སོགས་ཀྱི་དྲ་རྒྱ་ཡོངས་རྫོགས་བཀག་བསྡོམས་བྱས་ཡོད་པ་དང༌། ཕྱི་ལོ་ ༢༠༠༧ ནས་ད་ལྟའི་བར་གསར་འགོད་པ་ ༣༣༥ ཉེས་མིང་སྣ་ཚོགས་འོག་བཙོན་འཇུག་དང་བཀག་ཉར་འོག་ཡོད་པའི་གནས་ཚུལ་ཐོན་ཡོད་པ་རེད། གསར་འགོད་སྟངས་འཛིན་གྱི་བཀའ་རྒྱ་འདིའི་འོག་རྒྱ་ནག་ཏུ་ལྐོག་ཟ་རུལ་སུངས་དང་སྲིད་དོན་ཕྱོགས་ལྷུང་བ་ག་ཚོད་ཡོད་ཀྱང༌། གསར་འགོད་པ་ཚོ་བཙོན་འཇུག་དང་བཀག་ཉར་ལས་གནས་ནས་ཕྱིར་འབུད་བཏང་བ་སོགས་ལ་འཇིགས་ཏེ། གནས་ཚུལ་ཛ་དྲག་མང་པོ་ཞིག་ལ་གཡོལ་ཐབས་ཁོ་ན་བྱས་པ་ལས་གསར་འགོད་ཀྱི་ལས་ཀ་འཐུས་ཚང་ཞིག་བསྒྲུབ་རྒྱུ་ཧ་ཅང་ཁག་པོ་ཡིན་པའི་གནས་ཚུལ་ཐོན་ཡོད་པ་རེད།། 

Bangchen admin· · Comments are Disabled ·

ཁམས་ལི་ཐང་དུ་རྒྱ་གཞུང་ལ་ངོ་རྒོལ་དང་མི་མང་ཕོན་ཆེ་འཛིན་བཟུང༌།

འདི་ཟླའི་ཕྱི་ཚེས་༡༥ རེ་གཟའ་ཉི་མ་ཉིན་གྱི་ཞོགས་པ། བོད་ནང་གི་ཆུ་ཚོད་༨ པ་ཡོལ་ཙམ་ལ་ཁམས་ལི་ཐང་མཐིལ་ནས་ཡིན་པ། འབའ་གེ་མོ་བ་གྲྭ་བློ་བཟང་ལྷུན་འགྲུབ་༼ཡོངས་གྲགས་སུ་ལྷུན་འགྲུབ༽ཅེས་པས་རྒྱ་གཞུང་ལ་ངོ་རྒོལ་བྱས་འདུག འདི་གར་སེར་སྨད་ལི་ཐང་གྲྭ་བློ་དགའ་ལགས་ཀྱིས་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། ཕ་ཀུན་མཁྱེན་དང༌། མ་བློ་བཟང་སྒྲོལ་མ་གཉིས་ཀྱི་བུ་བློ་བཟང་ལྷུན་འགྲུབ་ཀྱིས། ྋགོང་ས་ཡིད་བཞིན་ནོར་བུའི་སྐུ་ཚེ་བསྐལ་བརྒྱར་བརྟན་པར་ཤོག། བོད་རང་དབང་རང་བཙན་གཙང་མ་ཡིན། བོད་ཡུལ་གྱི་དམྱལ་ཁམས་ན་བོད་ཀྱི་ལོ་སར་མེད། ཅེས་སོགས་སྐད་ཤུགས་ཆེན་པོས་རྒྱ་གཞུང་ལ་ངོ་རྒོལ་བྱས། ཁོས་ལག་ཏུ་དབྱུག་པ་ཞིག་ཐོགས་ཡོད་པ་དང་དེ་ནི་ཉེ་འགྲམ་གྱི་མིས་ཤ་ཚ་བྱས་ཏེ་ངོ་རྒོལ་ལ་འགོག་རྐྱེན་མི་ཡོང་བའི་ཆེད་རེད་ཟེར། ཉིན་དེའི་སྔ་ནུབ་སོགས་སུ་མྱ་ངན་གྱི་ལོ་གསར་འདི་བོད་རྒྱ་གཉིས་ཙམ་མ་ཡིན་པར་འཛམ་གླིང་གི་མི་རྣམས་ཀྱིས་ངེས་པར་ཤེས་དགོས་ཞེས་དང༌། མུ་མཐུད་དོན། རྒྱལ་ཁབ་དང་མི་རིགས་ཀྱི་དོན་དུ་ཚེས་བཅོ་ལྔ་ཉིན་རང་སྲོག་བློས་གཏོང་བྱེད་ཀྱི་ཡིན། ངའི་སྲོག་ཐོག་ལ་རྒྱ་དམག་གིས་མེ་འབུད་སྟངས་དེ་གྲོགས་པོ་ཁྱེད་རྣམས་ཀྱིས་ངེས་པར་མཐོང་དགོས་ལ་གཞན་ལ་བརྗོད་ཀྱང་དགོས།

Bangchen admin· · Comments are Disabled ·

ཨ་རིའི་ཁང་ཆེན་ཞིག་ལ་གནམ་གྲུ་རྡུང་ཁ་ཐེབས་འདུག

ཟླ་འདིའི་ཚེས་ ༡༤ ཉིན་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ཨ་རིའི་གྲོང་ཁྱེར་ནིའུ་ཡོག་གི་ཁང་ཆེན་ཞིག་ལ་འགྲུལ་སྐྱེལ་གནམ་གྲུ་ཞིག་རྡུང་ཁ་ཐེབས་ཏེ། མི་གྲངས་ ༥༠ ཙམ་གྱི་སྲོག་ཤོར་ཡོད་པའི་གནས་ཚུལ་ཐོན་ཡོད་པ་རེད། དེའི་ནང་འགྲིམ་འགྲུལ་པ་ ༤༤ དང་གནམ་གྲུའི་ལས་བྱེད་ ༦ བཅས་ཁྱོན་མི་གྲངས་ ༥༠ ཙམ་གྱི་སྲོག་ཤོར་ཡོད་པ་དང༌། དང་ཐོག་གནམ་གྲུ་རྡབ་སྐྱོན་འདི་འཇིགས་སྐུལ་རིང་ལུགས་ཀྱི་བཀོད་བྱུས་འོག་ནས་བྱུང་བར་དོགས་གཞི་བྱས་ཏེ་འདྲི་བརྩད་བྱས་ཡོད་ཀྱང༌།

Bangchen admin· · Comments are Disabled ·
སྐབས་གསུམ་པའི་བོད་རིགས་མཐོ་རིམ་སློབ་མའི་ཚོགས་ཆེན།

སྐབས་གསུམ་པའི་བོད་རིགས་མཐོ་རིམ་སློབ་མའི་ཚོགས་ཆེན།

རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་གསུམ་པ་དེ་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གིས་གོ་སྒྲིག་འོག་ཟླ་འདིའི་ཚེས་ ༡༣ ནས་ ༡༦ བར་ཉིན་གྲངས་གསུམ་གྱི་རིང་གོ་སྒྲིག་ཞུས་པ་བཞིན་སྐུ་མགྲོན་གྱི་གཙོ་བོ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་དང༌། ཚོགས་འདུའི་ཁྲི་པ་བཀུར་འོས་གཙུག་ལག་སློབ་ཁང་འདིའི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་མཆོག ཚོགས་འདུའི་སྤྱི་ཁྱབ་འབྲེལ་མཐུད་པ་བསྟན་འཛིན་ཕུན་ཚོགས་དང་སྤྱི་ཁྱབ་འགན་འཁུར་བ་བསྟན་འཛིན་ཚེ་དགའ། དེ་བཞིན་གཙུག་ལག་ཁང་གི་དགེ་ལས་སེར་སྐྱ་སློབ་མ་ཡོངས་དང༌། ཕྱོགས་མཐའ་ཁག་ནས་ཕེབས་པའི་ཚོགས་བཅར་བ་མཐོ་སློབ་ཁག་ཉེར་གསུམ་ནས་སློབ་མ་གྲངས་འབོར་ ༨༠ བཅས་གཙུག་ལག་སློབ་ཁང་གིས་དཔལ་ཨ་ཏི་ཤ་ཚོགས་ཁང་ཆེན་པོ་ནང་ཚོགས་ཆེན་གྱི་མཛད་སྒོ་ལེགས་པར་བསྐྱངས་ཡོད་པ་རེད།

Bangchen admin· · Comments are Disabled ·

བྷེལ་ཀོབ་ཏུ་གཉན་ནད་རེག་དུག་འགོག་ཐབས་ཀྱི་ཟབ་སྦྱོང༌།

ཟླ་འདིའི་ཚེས་༡༣ ཉིན་བྷེལ་ཀོབ་འཕྲོད་བསྟེན་འཚོ་བྱེད་སྨན་ཁང་གི་ཚོགས་ཁང་དུ་གདམ་ང་ཚོགས་པའི་གོ་སྒྲིག་འོག་གཉན་ནད་རེག་དུག་ HIV/IDS སྐོར་གྱི་གོ་རྟོགས་ཟབ་སྦྱོང་ཞིག་སྤེལ་ཡོད་པ་རེད།
དེ་ཡང་ཞོགས་པའི་དུས་ཆུ་ཚོད་དགུ་དང་ཕྱེད་ཐོག བྷེལ་ཀོབ་གཞིས་གྲོང་གཉིས་པའི་འཚོ་བྱེད་སྨན་ཁང་གི་ཚོགས་ཁང་དུ་མི་མང་གྲངས་༤༩ ཙམ་འདུ་འཛོམས་བྱུང་བའི་ཐོག ཚོགས་པ་དེའི་འཆར་འགོད་འགན་འཛིན་ཕུན་ཚོགས་ཆོས་འཕེལ་ལགས་ཀྱིས་ཟབ་སྦྱོང་ངོ་སྤྲོད་བྱས་པ་དང༌། སྐུ་མགྲོན་གཙོ་བོ་ལུགས་བསམ་ས་གནས་འགོ་འཛིན་བཀྲིས་དབང་འདུས་ལགས་ཀྱིས་མཛད་སྒོའི་གསུང་བཤད་གནང༌། དེ་ཡང་ཁོང་གིས་ན་ཚ་དེ་འཛམ་གླིང་ནང་ཛ་དྲག་ཏུ་བརྩི་བའི་ཉེན་ཁ་ཅན་ཞིག་ཡིན་པ་དང༌། དེ་ལ་སྔོན་འགོག་བྱ་རྒྱུ་གལ་ཆེན་ཡིན་པ། ཟབ་སྦྱོང་ལ་བཅར་མཁན་རྣམས་ཀྱིས་ཀྱང་ཉན་པ་ཙམ་མིན་པར་གང་ཐུབ་ཅི་ཡོང་གིས་ལག་ལེན་དགོས་སྐོར་ཀྱི་སྐུལ་འདེད་བྱས་ཤིང་ཟབ་སྦྱོང་སྤྲོད་མཁན་ཚོར་ཡང་སྤྱི་ཚོགས་ཀྱི་དངོས་ཀྱི་དཀའ་ངལ་ཐོག་དོན་དངོས་ཀྱི་ཕན་ཐོགས་ཡོད་པའི་ལས་འགུལ་དེ་འདྲ་སྤེལ་ཐུབ་པར་དགའ་བསུ་ཞུས་ཡོད་པ་རེད།

Bangchen admin· · Comments are Disabled ·