དུས་ཚོད་ངེས་མེད་ཀྱི་ཟས་བཅད་ངོ་རྒོལ་མཚམས་འཇོག
རྒྱ་གར་ལྷོ་ཕྱོགས་ཀརྣ་ཊ་ཀའི་མངའ་སྡེ། མེ་སོར་རྫོང་། སྦེལ་ཀོབ་ས་གནས་ཀྱི་བོད་མིའི་གཞིས་ཆགས་སུ། འདི་ལོ་ཕྱི་ཟླ་ ༡༡ ཚེས་ ༢༣ ཉིན་ནས་འགོ་འཛུགས་ཀྱིས་“བོད་མི་ཡོངས་ཀྱི་སྐྱིད་སྡུག་མཉམ་མྱོང་དང་གདུང་སེམས་མཉམ་བསྐྱེད་ཆེད་ལས་འགུལ།” ཞེས་པའི་དུས་ཚོད་ངེས་མེད་རིང་མི་མང་རེས་མོས་ཀྱིས་ཟས་བཅད་ངོ་རྒོལ་ལས་འགུལ་འགུལ་མཚམས་འཇོག་བྱས་ཡོད་པ་རེད།
སུ་ཇཱ་བོད་ཁྱིམ་སློབ་མའི་གོམ་བགྲོད་ལས་འགུལ།
ཕྱི་ཚེས་༢༧ ཉིན་སུ་ཇཱ་བོད་ཁྱིམ་སློབ་གྲྭའི་སློབ་ཕྲུག་༡༠༣ གྱིས། བོད་ནང་གི་རྒྱལ་གཅེས་རྒྱལ་གཅེས་དཔའ་བོ་དཔའ་ཚོར་གདུང་སེམས་མཉམ་བསྐྱེད་དང་། བོད་ནང་རང་དབང་ཡོང་ཆེད་བྷིར་སུ་ཇཱ་སློབ་གྲྭ་ནས་ཉིན་༢ ཀྱི་རིང་གོམ་བགྲོད་ཀྱིས་དྷ་སར་འབྱོར་ཡོད་པ་རེད།
ལྡི་ལི་བོད་སྒར་བསམ་ཡས་གླིང་བཙུགས་ཏེ་ལོ་ངོ་ ༥༠ འཁོར་བ།
ཟླ་འདིའི་ཚེས་ ༢༦ ཉིན་རྒྱ་གར་གྱི་རྒྱལ་ས་ལྡི་ལི་མན་ཇུ་ཀ་ཊི་ལར་རྟེན་གཞི་བྱས་པའི་བོད་སྒར་བསམ་ཡས་གླིང་དང་ལ་དྭགས་རྡ་རམ་ས་ལ་བཅས་སུ་བོད་མི་གནས་སྡོད་བྱེད་སའི་གཞིས་སྒར་བཙུགས་ཏེ་ལོ་ངོ་ ༥༠ འཁོར་བའི་དུས་དྲན་ཐོག་༧གོང་ས་མཆོག་ཕེབས་ཡོད་པ་རེད།
བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བདུན་པ།
བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བདུན་པ་དེ་ཟླ་འདིའི་ཕྱི་ཚེས་༢༦ ཉིན་ནས་འགོ་བརྩམས་དེ་ཉིན་བཞིའི་རིང་། ལྡི་ལི་བསམ་ཡས་གླིང་བོད་མིའི་གཞིས་སྒར་གྱི་ཉིན་མོའི་སློབ་གྲྭར་འཚོག་གི་ཡོད་པ་རེད་འདུག
སློབ་མ་ལུང་རིག་རྡོ་རྗེས་རང་སྲེག་གཏོང་རྩིས་བྱས་པ།
ཕྱི་ཚེས་༢༤ ཉིན་རྒྱ་གར་ལྷོ་ཕྱོགས་སྦེལ་ཀོབ་བོད་ཁྱིམ་སློབ་གྲའི་སློབ་མ་ཞིག་གིས་རྒྱ་གཞུང་གི་དྲག་གནོན་སྲིད་ཇུས་ལ་ངོ་རྒོལ་གྱིས་རང་ལུས་མེར་སྲེག་གཏོང་གྲབས་བྱེད་སྐབས། ཉེ་འཁོར་མི་གཞན་གྱིས་མཐོང་ནས་བཀག་འགོག་བྱས་ཡོད་པ་རེད་འདུག
བོད་མིའི་མང་གཙོའི་སྐོར་གྱི་ངོ་སྤྲོད་ཀྱི་ཟབ་སྦྱོང་།
ཟླ་འདིའི་ཚེས་ ༢༥ ཉིན་དྷ་ཤོད་བོད་ཁྱིམ་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག འཛིན་རིམ་བཅུ་གཅིག་པའི་སློབ་གཉེར་བ་རྣམས་ལ་བཙན་བྱོལ་བོད་མིའི་མང་གཙོ་དང་བོད་ནང་གི་དངོས་ཡོད་གནས་སྟངས་ངོ་སྤྲོད་ཀྱི་ཟབ་སྦྱོང་ཐེངས་དགུ་པ་འགོ་འཛུགས་བྱས་ཡོད་པ་རེད།
ཆབ་སྲིད་བཙོན་པ་གཉིས་གར་ཡོད་ཆ་མེད།
བོད་ལྷ་ས་འབྲས་སྤུངས་དགོན་པའི་གྲྭ་འཇམ་དཔལ་དབང་ཕྱུག་དང་། གྲྭ་དཀོན་མཆོག་ཉི་མ་གཉིས་༢༠༠༨ ལོར་རྒྱ་གཞུང་གིས་འཛིན་བཟུང་བྱས་ཡོད་ནའང། ད་ལྟ་གར་ཡོད་ཤེས་རྟོགས་ཐུབ་མི་འདུག
སྲིད་སྐྱོང་གིས་སྐུ་ཞབས་ཇོན་ཀེ་རིར་འཚམས་འདྲི་ཞུས་པ།
བོད་དོན་རྒྱབ་སྐྱོར་བ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇོན་ཀེ་རི་ (Senator John Kerry) ཨ་རིའི་ཕྱི་སྲིད་དྲུང་ཆེར་འདེམས་ཐོན་གནང་བར་སྲིད་སྐྱོང་བློ་བཟང་སེང་གེས་འཚམས་འདྲི་དང་སྦྲགས་མུ་མཐུད་བོད་དོན་རྒྱབ་སྐྱོར་དགོས་པའི་རེ་སྐུལ་ཞུས་ཡོད་པ་རེད།
སོ་སོའི་ཕ་མེས་ཀྱི་ཆོས་ལ་བརྩི་བཀུར་བྱེད་དགོས་པ་གལ་ཆེན་པོ་རེད།
༧གོང་ས་མཆོག་གིས་རྒྱ་གར་གྱི་རྒྱལ་ས་ལྡི་ལི་གསར་པར་ཨུ་རུ་སུ་ནས་ཆེད་དུ་བཅར་བའི་ནང་པའི་དད་ལྡན་ཆོས་ཞུ་བ་༡༢༠༠ བརྒལ་བ་གཙོས། བོད་ནས་གསར་དུ་ཕེབས་པ་ཁག་ཅིག་ལ་ཉིན་བཞིའི་རིང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་གསུང་ཆོས་གནང་གི་ཡོད་པ་རེད་འདུག
ལུས་སྟོད་དམར་ཧྲང་གི་ལས་འགུལ།
ཟླ་འདིའི་ཚེས་༢༣ ཉིན་བོད་ཀྱི་མི་རབས་གསར་པའི་མཐུན་ཚོགས་ཀྱི་གོ་སྒྲིག་འོག སུད་སི་གྲོང་ཁྱེར་ཛུ་རིག་གི་ཁྲོམ་གཞུང་དུ་མཐུན་ཚོགས་ཀྱི་ཚོགས་མི་རྣམས་གཙོས་པའི་མི་གྲངས་བཅུ་གྲངས་ཤིག་གིས། ལུས་སྟོད་དམར་ཧྲང་ཐོག་འབར་བཞིན་པའི་བོད་ཀྱི་ཛ་དྲག་གི་གནས་བབ་མཚོན་པའི་རི་མོ་དང་ཡི་གེ་སོགས་བྲིས་ཏེ་ལས་འགུལ་སྤེལ་འདུག