༢༠༢༤ ་ལོའི་ཨ་རིའི་སྲེིད་འཛིན་འོས་བསྡུས་སྐོར་གྱི་ལམ་སྟོན་ཁག་ཅིག
དེ་ཡང་མི་ཚང་མས་སེམས་འཚབ་བྱེད་བཞིན་པའི་གནད་དོན་གལ་ཆེན་ཞིག་ནི་ལོ་འདིའི་ཨ་རིའི་སྲེིད་འཛིན་གྱི་འོས་བསྡུའི་ནང་། མང་གཙོ་ཚོགས་པའི་སྲིད་འཛིན་འོས་མི་ཀ་མ་ལ་ཧེ་རི་སི་ཨ་རིའི་ལོ་རྒྱུས་ཁྲོད་བུད་མེད་སྲིད་འཛིན་དང་པོ་དེ་ཆགས་སྲིད་པའམ། ཡང་ན། སྤྱི་མཐུན་ཚོགས་པའི་སྲིད་འཛིན་འོས་མི་ཊོ་ནལ་ཊམ་བསྐྱར་དུ་འདེམས་ཐོན་ཡོང་མིན་གྱི་དོགས་པ་དེ་རེད། དྲི་བ་དེའི་ལན་ནི་ཟླ་འདིའི་ཚེས་༥ ་ཉིན་གྱི་འོས་ཤོག་གྲངས་བཤེར་ལ་གཞིགས་ནས་ཤེས་ཐུབ་པ་མ་ཟད། སྐབས་དེར་མི་མང་གིས་ཁྲིམས་གཏན་འབེབས་བྱེད་མཁན་གྱི་གྲོས་ཚོགས་འཐུས་མི་རྣམས་ཀྱང་འོས་འདེམས་བྱེད་ཀྱི་ཡོད་འདུག
༡༽ཨ་རིའི་སྲིད་འཛིན་འོས་བསྡུ་དེ་ག་དུས་རེད།
ཨ་རིའི་སྲིད་འཛིན་འོས་བསྡུ་དེ་ཕྱི་ལོ་༢༠༢༤ ་ཟླ་༡༡ ་ཚེས་༥ ་ཉིན་ཡིན་པ་དང་། རྒྱལ་ཁ་ཐོབ་མཁན་གྱིས་ཕྱི་ལོ་༢༠༢༥ ཟླ་༡ ་ཉིན་ནས་བཟུང་ཕོ་བྲང་དཀར་པོར་ལོ་བཞིའི་རིང་ལས་འགན་སྒྲུབ་རྒྱུ། སྲིད་འཛིན་སྒེར་ལ་ཁྲིམས་འགའ་ཤས་གཏན་འབེབས་བྱེད་རྒྱུའི་དབང་ཚད་ཡོད་ཀྱང་། ཁྲིམས་མང་ཆེ་བ་ནི་གྲོས་ཚོགས་འཐུས་མི་དང་མཉམ་ལས་བྱས་ནས་གཏན་འབེབས་བྱེད་དགོས་ཀྱི་ཡོད་འདུག
༢༽ འོས་མི་སུ་ཡིན་པ་དང་ཁོང་ཚོ་འདེམས་བསྒྲུག་བྱེད་ཕྱོགས།
ཆབ་སྲིད་ཚོགས་པ་གཉིས་ཀྱིས་སྲིད་འཛིན་གྱི་འོས་མི་འདེམས་ཐོན་ཆེད་འོས་བསྡུ་རིམ་པ་མང་པོ་བྱས་ནས་ཚོགས་མི་ཚོས་ཆབ་སྲིད་ཚོགས་པའི་སྲིད་འཛིན་གྱི་འོས་མི་འདེམས་བསྒྲུག་བྱེད་ཀྱི་ཡོད་པ་དང་། སྤྱི་མཐུན་ཚོགས་པར་མཚོན་ན། སྲིད་འཛིན་ཟུར་པ་ཊོ་ནལ་ཊམ་ལ་སྤྱི་མཐུན་ཚོགས་པའི་རྒྱབ་སྐྱོར་ཆེན་པོ་ཐོབ་ནས་ཚོགས་པའི་སྲིད་འཛིན་འོས་མིའི་རྒྱལ་ཁ་ཐོབ་ཡོད་པ་དང་།
མང་གཙོ་ཚོགས་པའི་སྲིད་འཛིན་འོས་མི་(ལས་ཐོག་སྲིད་འཛིན་) ་བྷ་ཌན་གྱིས་སྲིད་འཛིན་གྱི་འོས་མི་ནས་ཕྱིར་འཐེན་བྱས་རྗེས། སྲིད་འཛིན་གཞོན་པ་ཀ་མ་ལ་ཧེ་རི་སི་འོས་མིར་ལངས་ཞིང། མང་གཙོ་ཚོགས་པའི་ཚོགས་མི་གཞན་སུས་ཀྱང་ཁོང་དང་འགྲན་བསྡུར་བྱས་མེད། ཡིན་ཡང་རང་མོས་ཀྱིས་སྲིད་འཛིན་གྱི་འོས་བསྡུའི་ནང་ཞུགས་མཁན་འགའ་བྱུང་ཡོད།
༣༽ མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་ལངས་ཕྱོགས།
མང་གཙོ་ཚོགས་པ་ནི་གུ་ཡངས་ཅན་གྱི་ཚོགས་པ་ཞིག་ཡིན་པ་དང་། དེས་གཙོ་བོ་མི་སེར་གྱི་ཐོབ་ཐང་། སྤྱི་ཚོགས་བདེ་འཇགས། གནམ་གཤིས་འགྱུར་ལྡོག་སེལ་ཐབས་བཅས་ལ་འབད་བརྩོན་བྱེད་ཀྱི་ཡོད། སྤྱི་མཐུན་ཚོགས་པ་ནི་ཨ་རིའི་གནའ་བོའི་ཚོགས་པ་ཆེན་པོ་ཞེས་པའམ། ཇི་ཨོ་པི་(GOP) ་ཞེས་ཀྱང་འབོད། དེས་ཁྲལ་ཆག་ཡང་གཏོང་བ་དང་། མེ་མདའི་ཐོབ་ཐང་། སྐྱབས་བཅོལ་དང་ཕྲུ་གུ་མངལ་ནས་སྐྱུར་བ་ལ་དམ་བསྒྲགས་ཆེ་རུ་གཏོང་བ་བཅས་ལ་རྒྱབ་སྐྱོར་བྱེད་ཀྱི་ཡོད།
༤༽ ཨ་རིའི་སྲིད་འཛིན་འོས་བསྡུའི་ལམ་ལུགས་གང་འདྲ་ཡིན་ནམ།
རྒྱལ་ཡོངས་ཀྱི་འོས་ཤོག་མང་ཤོས་ཐོབ་མཁན་དེ་རྒྱལ་ཁ་ཐོབ་མཁན་མིན། དེའི་ཚབ་ལ་འོས་མི་གཉིས་ཀས་མངའ་སྡེ་༥༠ ་ནང་གི་འགྲན་བསྡུར་ནང་རྒྱལ་ཁ་ཐོབ་ཐབས་བྱེད་ཀྱི་ཡོད། མངའ་སྡེ་རེ་རེའི་མི་འབོར་ལ་གཞི་བཅོལ་བའི་འོས་འདེམས་པ་ཡོད་པ་དང་། འོས་ཤོག་འཕེན་པའི་གྲངས་ཀ་ངེས་ཅན་ཞིག་ཡོད། ཁྱོན་བསྡོམས་འོས་ཤོག་༥༣༨ ་ཡོད་པ་དང་། འོས་ཤོག་༢༧༠ ་ཡང་ན། དེ་ལས་མང་བ་ཐོབ་མཁན་གྱི་འོས་མི་དེ་རྒྱལ་ཁ་ཐོབ་མཁན་ཆགས་ཀྱི་ཡོད། མངའ་སྡེ་གཅིག་གི་ནང་འོས་ཤོག་མང་ཤོས་འཐོབ་མཁན་ལ་མངའ་སྡེ་དེའི་འོས་ཤོག་ལྡུག་མཁན་ཚང་མའི་འོས་ཤོག་ཐོབ་ཀྱི་ཡོད།
༥༽ ཨ་རིའི་སྲིད་འཛིན་འོས་བསྡུའི་ནང་འོས་འཕེན་ཆོག་མཁན་སུ་ཡོད་དམ།
ཨ་རིའི་མི་སེར་ཡིན་པ་ལོ་ན་༡༨ ་དང་དེའི་ཡན་ཆད་ཚང་མས་འོས་འདེམས་བྱེད་ཆོག བྱང་ཕྱོགས་(DAKOTA) ་ལས་གཞན་མངའ་སྡེ་ཚང་མས་འོས་འདེམས་མ་བྱེད་གོང་ཐོ་འགོད་བྱེད་དགོས། མངའ་སྡེ་ཚང་མར་སོ་སོའི་འོས་འཕེན་ཆེད་ཐོ་འགོད་བྱེད་ས་དང་དུས་བཀག་ཡང་ཡོད།
ཨ་རིའི་མི་སེར་ཡིན་པ་ཕྱི་རྒྱལ་དུ་གནས་སྡོད་བྱེད་མཁན་ཚོས་མཀྱང་(HC-4(FEDERAL POST CARD APPLICATION) ་ཞེས་པ་འགེངས་ཤོག་བསྐངས་ཏེ་འོས་འཕེན་ཆོག་གི་ཡོད་འདུག
༦༽ཟླ་བ་བཅུ་གཅིག་པའི་ནང་སུ་ཞིག་ལ་འོས་འདེམས་བྱེད་ཀྱི་ཡོད་དམ།
མི་ཚང་མས་དོ་སྣང་ནི་སུ་ལ་སྲིད་འཛིན་གྱི་རྒྱལ་ཁ་ཐོབ་མིན་ཐོག་རེད། འོན་ཀྱང་འོས་ཤོག་འཕེན་སྐབས། ཁོང་ཚོས་ཁྲིམས་གཏན་འབེབས་བྱེད་མཁན་གྱི་གྲོས་ཚོགསའཐུས་མི་གསར་པ་ཡང་འོས་འདེམས་བྱེད་ཀྱི་ཡོད་འདུག ཨ་རིའི་རྒྱལ་ཡོངས་གྲོས་ཚོགས་སུ་མི་མང་གིས་ཐད་ཀར་འོས་འདེམས་བྱས་པའི་གྲོས་ཚོགས་འོག་མར་རྐུབ་སྟེགས་༤༣༥ ཡོད་པ་དང་། གྲོས་ཚོགས་གོང་མར་རྐུབ་སྟེགས་༣༤ ཡོད་འདུག
༧༽སྲིད་འཛིན་འོས་མི་སུ་ལ་ཐོབ་མིན་ག་དུས་ཤེས་སམ།
སྤྱིར་གང་ཟག་སུ་ལ་རྒྱལ་ཁ་ཐོབ་པ་དེ་འོས་འདེམས་བྱུང་བའི་ཉིན་གྱི་དགོང་མོར་ཤེས་རྟོགས་བྱུང་ཡང་ཕྱི་ལོ་༢༠༢༠ ་ལོར་འོས་གྲངས་བརྩི་རྒྱུའི་ཆེད་ཉིན་གྲངས་མང་པོ་འགོར་ཡོད་པ་དང་། གལ་སྲིད་སྲིད་འཛིན་འགྱུར་བ་ཕྱིན་ཡོད་ན། འོས་བསྡུའི་ཚར་བའི་རྗེས་ཀྱི་དུས་ཡུན་དེར་སྲིད་འཛིན་འཕོ་འགྱུར་གྱི་དུས་སྐབས་ཟེར། དེས་སྲིད་གཞུང་གསར་པར་རང་གི་བློན་ཆེན་རྣམས་བསྐོ་གཞག་བྱེད་པ་དང་། ལས་ཡུན་གསར་པའི་ལས་དོན་འཆར་གཞི་འདིང་བའི་དུས་ཚོད་སྤྲོད་ཀྱི་ཡོད། ལོ་ལྟར་ཟླ་བ་དང་པོའི་ནང་ཨ་རིའི་རྒྱལ་ས་ཝ་ཤིང་ཊོན་དུ་ཡོད་པའི་གྲོས་ཚོགས་ཀྱི་ཐེམ་སྐས་འགྲམ་དུ་མཛད་སྒོ་ཞིག་སྤེལ་སྲོལ་ཡོད་པ་དེར་དམ་འབུལ་མཛད་སྒོ་ཞེས་འབོད་ཅིང་། ཕྱི་ཟླ་དང་པོའི་ནང་སྲིད་འཛིན་གསར་པས་ལས་འཁུར་དམ་འབུལ་ཞུ་ཡི་ཡོད་འདུག།
གསར་འགོད་པ། བསྟན་འཛིན་ཆོས་དབྱངས།
