༧གོང་ས་མཆོག་གིས་བོད་ཀྱི་ལོ་གསར་ལ་འཚམས་འདྲི་བཀའ་སློབ་བསྩལ་འདུག 

བོད་རྒྱལ་ལོ་༢༡༤༨ རབ་གནས་ལྕགས་གླང་ལོའི་ལོ་གསར་བསླེབ་ལ་ཉེ་བའི་མཚམས་འདིར། བོད་ཀྱི་བླ་ན་མེད་པའི་དབུ་ཁྲིད་༧གོང་ས་མཆོག་གིས་“ལོ་གསར་པར་བཀྲ་ཤིས་བདེ་ལེགས་ཞེས་པ་ནི། འདས་པའི་ལོ་ལ་ཞིབ་འཇུག་བྱས་ཏེ་བཟང་པོའི་རིགས་བྱས་པ་རྣམས་ལ་རྗེས་སུ་ཡི་རངས་དང་། འབྱུང་འགྱུར་གྱི་ལོ་འདི་ངས་དོན་དང་ལྡན་པའི་རྒྱལ་བ་དགྱེས་པའི་མཆོད་པས་མཉེས་པ་ཞིག་བྱེད་རྒྱུར་སོ་སོའི་སེམས་ནང་དམ་བཅའ་བཞག་པ་དེ་ལྟར་གནང་ཤོག་ཨང་”ཞེས་བཀའ་སློབ་བསྩལ་འདུག  

ཕྱི་ཟླ་༢ ཚེས་༨ རེས་གཟའ་ཟླ་བའི་ཉིན་བསྩལ་བའི་གསུང་འཕྲིན་དུ། མགོན་པོ་གང་ཉིད་ཀྱིས་“དེ་རིང་ང་ཚོ་བོད་ལོའི་ལོ་གསར་སྐབས་མཚམས་འཁེལ་གྱི་ཡོད་སྟབས་གོ་སྐབས་འདི་བཟུང་ནས་བོད་ཕྱི་ནང་དུ་ཡོད་པའི་བོད་མི་དང་། སོག་པོ་ཚོ། ཧི་མ་ལ་ཡའི་རི་རྒྱུད། དེ་བཞིན་བོད་པའི་ལོ་གསར་བརྩི་མཁན་ཚང་མར་ལོ་གསར་གྱི་འཚམས་འདྲིའི་བདེ་ལེགས་ཞུ་རྒྱུ་ཡིན་”ཞེས་བོད་ཀྱི་ལོ་གསར་བརྩི་མཁན་ཡོངས་ལ་འཚམས་འདྲི་གནང་འདུག 

མགོན་པོ་གང་ཉིད་ཀྱིས་ལོ་གསར་པ་ཇི་ལྟར་དོན་སྙིང་ལྡན་པའི་ཐོག་ནས་སར་བའི་ཐད་ལ་བཀའ་སློབ་བསྩལ་དོན། “ལོ་གསར་པ་ཞེས་གསར་རྒྱུ་གང་ཡང་མེད། དུས་ཡུན་རྫོགས་འགྲོ་ཡི་ཡོད་པ་རེད། ལོ་རྙིང་པ་རྫོགས་པ་རེད། ལོ་གསར་པ་ཞིག་སླེབས་ཀྱི་ཡོད། གང་ལྟར་ལོ་རྙིང་པ་དེའི་ནང་སོ་སོར་དགེ་སེམས་ག་འདྲ་སྐྱེས་འདུག སྤྱིར་ཆོས་པ་དང་དེའི་ནང་ནས་སངས་རྒྱས་པའི་ཆོས་པ་ཞིག་བྱས་ནས་བསྡད་ཡོད་སྟབས། འདས་པའི་ལོའི་ནང་ཐོས་བསམ་སྒོམ་གསུམ་གང་འདྲ་བྱུང་འདུག་དེ་དག་ལ་ཕྱིར་མིག་ཅིག་བལྟས་ཏེ་བསམ་བློ་བཏང་། ཐོས་བསམ་སྒོམ་གསུམ་མ་བྱུང་ཟེར་ན་ག་ཚོད་ཐུབ་ཐུབ་བྱས་ཡོད་ན་དེ་ལ་རྗེས་སུ་ཡི་རངས་དང་། ལོ་གསར་པ་འདིའི་ནང་བཅོམ་ལྡན་འདས་རང་ཉིད་དང་། དེ་བཞིན་ཀླུ་སྒྲུབ་ཡབ་སྲས་ལ་སོགས་པ་འཇམ་མགོན་བླ་མ་ཙོང་ཁ་པ་ཆེན་པོའི་ཡབ་སྲས་སོགས་ཀྱི་ལེགས་བཤད་རྨད་དུ་བྱུང་བ་ཡོད་པ་དེ་དག་མུ་མཐུད་ནས་ཐོས་བསམ་སྒོམ་གསུམ་བྱས་ནས་མི་ཚེ་དོན་དང་ལྡན་པ་ཞིག་དང་། བཅོམ་ལྡན་འདས་ནས་བཟུང་དྲིན་ཅན་རྩ་བའི་བླ་མ་བར་གྱི་རྩ་བརྒྱུད་ཀྱི་བླ་མ་རྣམས་ཀྱི་ཐུགས་དགོངས་རྫོགས་པ་ཞིག་ངས་བྱེད་ཀྱི་ཡིན་བསམ་པའི་སྙིང་སྟོབས་སྐྱེས་པ་དང་དམ་བཅའ་འཇོག་དགོས་རྒྱུ་གལ་ཆེན་པོ་རེད། ལོ་གསར་པར་བཀྲ་ཤིས་བདེ་ལེགས་ཞེས་པ་ནི་འདས་པའི་ལོ་ལ་ཞིབ་འཇུག་བྱས་ཏེ་བཟང་པོའི་རིགས་བྱས་པ་རྣམས་ལ་རྗེས་སུ་ཡི་རངས་དང་། འབྱུང་འགྱུར་གྱི་ལོ་འདི་ངས་དོན་དང་ལྡན་པའི་རྒྱལ་བ་དགྱེས་པའི་མཆོད་པའི་མཉེས་པ་ཞིག་བྱེད་རྒྱུར་སོ་སོའི་སེམས་ནང་དམ་བཅའ་བཞག་པ་དེ་ལྟར་གནང་ཤོག་ཨང་།”

གཞན་ཡང་། ཁོང་གིས་ “འདིར་ང་ཚོ་བཙན་བྱོལ་དུ་ཡོད་པའི་བོད་པ་དང་། དེ་བཞིན་ཡུལ་ལུང་འདྲ་མིན་ནང་ཡོད་པའི་བོད་པའི་ཆོས་གྲོགས། ལྷག་པར་བོད་གངས་ཅན་གྱི་ལྗོངས་སུ་རང་དབང་བྲལ་ནས་ཡོད་པ་ཡིན་ནའང་སྙིང་སྟོབས་དང་དད་པ་ཞུམ་པ་མེད་པ་དང་གཡོ་བ་མེད་པ་ཡོད་པ་དེ་དག་ལ་ཕྱག་རྟགས་ཀྱི་ཚུལ་དུ་ཡིན། ངོས་ཀྱི་ལུས་འདི་བོད་ལ་གནས་མ་ཐུབ་པར་རྒྱ་གར་དུ་གནས་ཡོད། འོན་ཀྱང་མི་ལ་ཕན་ཐོགས་བྱེད་རྒྱུ་བོད་ནང་ཡོད་པ་ལས་རྒྱ་གར་ནང་ཡོད་པ་ཕལ་ཆེར་ཁྱབ་ཆེ་བ་ལྟ་བུ་རེད་འདུག དེར་བརྟེན་བོད་ནང་ཡོད་པའི་བོད་པ་ངོས་ལ་དགའ་མོས་དང་དད་པ་བྱེད་མཁན་ཚོས་༸རྒྱལ་བ་རིན་པོ་ཆེ་རྒྱ་གར་འཕགས་པའི་ཡུལ་ལ་དངོས་གནས་དྲང་གནས་སངས་རྒྱས་ཀྱི་བསྟན་པའི་ཞབས་འདེགས་དཔྱིས་ཕྱིན་པར་བསྒྲུབས་དང་སྒྲུབ་མུས་རེད་བསམ་པ་བྱས་ནས་ཁྱེད་རང་ཚོ་ཚང་མ་བློ་བདེ་པོ་བྱས་ནས་སྡོད་ཨང་། ཤེས་སོང་ངམ་”ཞེས་གཞིས་བཞུགས་བོད་མི་ཚོའི་སྙིང་སྟོབས་དང་དད་པར་བསྔགས་བརྗོད་དང་། བློ་བདེ་བར་སྡོད་དགོས་པའི་བཀའ་སློབ་གནང་སོང་། །

གསར་འགོད་པ་དཀོན་མཆོག་རབ་བརྟན།