༧གོང་ས་མཆོག་ཨ་སམ་མངའ་སྡེའི་ནང་ཆིབས་བསྒྱུར།
ཕྱི་ཟླ་༣ ཚེས་༣༡ ཉིན་༸གོང་ས་མཆོག་བཞུགས་སྒར་དྷ་ས་ནས་ཆིབས་བསྒྱུར་བསྐྱངས་ཏེ། ཕྱི་ཟླ་༤ ཚེས་༡ ཉིན་རྒྱ་གར་ཨ་སམ་མངའ་སྡེའི་གྲོང་ཁྱེར་གྷོ་ཝ་ཧ་ཌི་དུ་མངའ་སྡེ་དེའི་གསར་ཤོག་རྙིང་ཤོས་ཊིར་བྷོན་(The Assam Tribune) ཞེས་པ་ལོ་འཁོར་བདུན་ཅུ་དོན་ལྔ་འཁོར་བའི་ཉིན་མཐའ་མའི་མཛད་སྒོའི་ཐོག་བཀའ་སློབ་གནང་ཡོད་པ་རེད།
བོད་མིིའི་སྒྲིག་འཛུགས་ཀྱིས་དྲ་གནས་ཐོག་གནས་ཚུལ་སྤེལ་བ་ལྟར་ན། ཨ་སམ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་Sarbananda Sonowal དང་། མངའ་སྡེའི་སྲིད་སྐྱོང་སྐུ་ཞབས་ Banwarilala Purohit། སོགས་ཕེབས་ཡོད་པ་དང་། ཐོག་མར་ཨ་སམ་སྲོལ་རྒྱུན་གྱི་ལམ་ནས་༸གོང་ས་མཆོག་གིས་གཙོས་སྐུ་མགྲོན་རྣམ་པར་ཕེབས་བསུའི་སྣེ་ལེན་གཟབ་རྒྱས་ཞུས།
དེ་བཞིན་ཨ་སམ་ནང་གི་གསར་ཤོག་རྙིང་ཤོས་གྲས་ཨ་སམ་ཊིར་བྷོན་གྱི་ Assam Tribune འགན་འཛིན་༧གོང་མཆོག་ལ་དགའ་གསུང་བཤད་དང་། ཕྱི་ལོ་༡༩༥༩ ལོར་༸གོང་ས་མཆོག་རྒྱ་གར་ནང་བཙན་བྱོལ་དུ་༸ཞབས་སོར་བདེ་བར་འཁོད་པའི་གནས་ཚུལ་ཐོག་མ་སྤེལ་མཁན་གྱི་གསར་ཤོག་ཐོག་མ་ཡིན་སྟབས་དགའ་སྤོབས་ཡོང་བཞིན་ཡོད་སྐོར་དང་། ཨ་སམ་ཊིར་བྷུན་གསར་ཤོག་དེ་ཐོག་མར་ཕྱི་ལོ་༡༩༣༩ ཕྱི་ཟླ་༨ ཚེས་༡ ཉིན་ཨ་སམ་མངའ་སྡེའི་དིབ་རུ་གར་གྲོང་ཁྱེར་ནས་ཐོག་མར་བདུན་རེའི་གསར་ཤོག་འདོན་སྤེལ་དང་། ཕྱི་ལོ་༡༩༤༦ ཟླ་༩ ཚེས་༣༠ ཉིན་གྷོ་ཧ་ཊིར་གནས་སྤོས་བྱས་ནས་ཉིན་རེའི་གསར་ཤོག་གི་ངོ་བོར་བསྒྱུར་ཡིན་སྐོར་གསུངས་འདུག
མངའ་སྡེའི་སྤྱི་ཁྱབ་བློན་ཆེན་མཆོག་གིས་གསུང་བཤད་གནང་སྐབས། ང་རང་སྒེར་ལ་མཚོན་ན་དེ་རིང་གི་མཛད་སྒོར་བཅར་དགོས་པའི་རྒྱུ་མཚན་གཙོ་བོ་ནི་༸གོང་ས་ཏཱ་ལའི་བླ་མ་མཆོག་མཇལ་ཁ་ཞུ་རྒྱུ་དང་། ༸གོང་ས་ཏཱ་ལའི་བླ་མ་མཆོག་གིས་བཟང་སྤྱོད་དང་འབྲེལ་བའི་བཀའ་སློབ་དེ་དག་གཞི་རྩར་བཟུང་ནས་ཨ་སམ་མངའ་སྡེའི་འཛིན་སྐྱོང་ལས་དོན་གཙོ་བོར་གྱུར་བའི་སྤྱི་ཚོགས་ཀྱི་གནས་སྟངས་ཡར་རྒྱས་གཏོང་རྒྱུའི་སླད་ང་ཚོས་འབད་བརྩོན་གང་ཡོང་ཞུ་དགོས་པ་ཆགས་ཡོད། ང་ཚོའི་མངའ་སྡེའི་ནང་གཙོ་བོ་མི་བཟང་སྤྱོད་ལྡན་པ་དགོས་རྒྱུ་དེ་ཧ་ཅང་གལ་ཆེན་པོ་ཞིག་ལ་ངོས་འཛིན་བྱེད་བཞིན་ཡོད། གལ་ཏེ་དེ་ལྟར་བྱུང་ཐུབ་ཚེ་མངའ་སྡེའི་ནང་བདེ་སྐྱིད་ཕུན་སུམ་ཚོགས་པ་ཡོང་ངེས་རེད། ༸གོང་ས་ཏཱ་ལའི་བླ་མ་མཆོག་ནི་འཛམ་གླིང་ཀུན་ལ་ཞི་བདེའི་དེད་དཔོན་ཞིག་ཡིན་པ་ཡོངས་སུ་གྲགས་ཡོད་ཅེས་སོགས་གསུང་བཤད་གནང་།
དེ་ནས་མངའ་སྡེའི་སྲིད་སྐྱོང་གིས་གསུང་བཤད་གནང་བ་དང་། ༸གོང་ས་མཆོག་གིས་བཀའ་སློབ་བསྩལ་དོན། ངོས་ཀྱིས་རྒྱུན་དུ་གཏམ་བཤད་བྱེད་སྐབས་སྤུན་མཆེད་ཕོ་མོ་ཚོ། ཞེས་འགོ་འཛུགས་བཞིན་ཡོད། གང་ཡིན་བརྗོད་ན་ངོས་ཀྱི་དམ་བཅའ་གསུམ་ནས་གཅིག ང་ཚོ་འགྲོ་བ་མི་རིགས་ཐེར་འབུམ་བདུན་ཡོད་པ་ཚང་མ་འགྲོ་བ་མི་རིགས་གཅིག་གྱུར་ཡིན་བསམ་པའི་འདུ་ཤེས་གོང་མཐོར་གཏོང་རྒྱུ་འདི་ཡིན། འདི་ནི་ངོས་ཀྱིས་ཧ་ཅང་གལ་ཆེན་པོ་ཞིག་ཡིན་པར་ངོས་འདིན་བྱེད་བཞིན་ཡོད། དེང་སྐབས་འཛམ་གླིང་ནང་གི་དཀའ་ངལ་ཧ་ཅང་མང་པོ་ཞིག་ཡོད་པ་དེ་དག་གཙོ་བོ་མཐར་གཏུག་ན་མི་རང་གིས་བཟོས་པའི་དཀའ་ངལ་ཞིག་ཆགས་ཡོད། དཔེར་ན། ཕན་ཚུན་དམག་འཁྲུག་བརྒྱབ་ནས་མི་གསོད་ཁྲག་སྦྱོར་གྱི་རིགས་ལ་བརྟེན་ནས་མི་ཉམ་ཆུང་ཉེས་མེད་མང་པོ་ཞིག་འཆི་རྐྱེན་རིགས་ཡོང་བཞིན་ཡོད། ས་ཁུལ་ཁག་གཅིག་ནང་དུ་བྱིས་པ་མང་པོ་ལྟོགས་ཤི་ཐེབས་བཞིན་ཡོད། ཁོང་ཚོའང་ང་ཚོ་དང་མཚུངས་པར་འགྲོ་བ་མི་ཞིག་ཡིན་སྟབས། ང་ཚོས་སྣང་ཆུང་བྱས་ནས་འཇོག་ཐབས་རྩ་བ་ནས་མེད། ཅེས་དང་། ཡང་༸གོང་ས་མཆོག་གིས་ཞལ་ཤོབ་དང་སྦྲགས་བཀའ་སློབ་བསྩལ་དོན། གོང་དུ་ཁྱེད་ནས་ངོས་རང་༸རྒྱལ་དབང་སྐུ་ཕྲེང་༡༣ ཡང་སྲིད་ཡིན་སྐོར་དང་། ངོས་རང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་ཚུལ་གསུང་པ་དེར་གང་འདྲ་ཡིན་ནམ་སྙམ་པའི་ཐེ་ཚོམ་ཡོད། འོན་ཀྱང་ངོས་རང་འགྲོ་བ་མི་ཞིག་ཡིན་པ་བརྒྱ་ཆ་བརྒྱ་ནས་བརྒྱ་ཡིད་ཆེས་ཡོད། ངོས་རང་ལོ་ན་ཚོད་རྒས་ཀྱང་རིག་པ་གྲུང་པོ་ཡོད། དེ་ནི་གཙོ་བོ་ངོས་རང་ཅིག་གི་སྤྲུལ་པ་ཡིན་པའི་རྒྱུ་མཚན་ལ་བརྟེན་ནས་མིན། དེ་ནི་གཙོ་བོ་བོད་བརྒྱུད་ནང་བསྟན་ལ་སློབ་སྦྱོང་བྱེད་སྐབས་གསུང་ཚད་ཐམས་ཅད་ཡིན་པ་རེད། ཅེས་ཆ་མ་བཞག་པར་དེ་ལྟར་ཡིན་པའི་དགོས་པ་གང་ཡིན། རྒྱུ་མཚན་གང་ཡིན། ཞེས་བརྟག་དཔྱད་བྱས། རིག་པས་བརྡར་ཤ་བཅད་ནས་རྩོད་པ་བྱས་ནས་ཕྱིན་པ་དེའི་དྲིན་ལ་བརྟེན་ནས་རེད་ཅེས་བཀའ་སློབ་གནང་།
༧གོང་ས་མཆོག་གིས་ཨ་སམ་ཊིར་བྷོན་འགོ་བཙུགས་ནས་ལོ་ངོ་༧༥ འཁོར་བའི་དུས་དྲན་སྲུང་བརྩི་དང་སྦྲགས་ནས་བཀའ་སློབ་བསྩལ་དོན། དེ་རིང་གཙོ་བོ་གསར་ཤོག་འདི་དབུ་བརྙེས་ནས་མི་ལོ་༧༥ འཁོར་བ་རེད། འདིའི་ནང་དུ་ངོས་རང་ཐོག་མར་རྒྱ་གར་དུ་བཙན་བྱོལ་ལ་འབྱོར་སྐབས་ངོས་ཀྱི་ཨ་མ་ལགས་དང་གཅེན་མོའི་པར་འདུག ཕྱི་ལོ་༡༩༥༩ ཕྱི་ཟླ་༣ ཚེས་༡༠ ཉིན་བོད་ཀྱི་རྒྱལ་ས་ལྷ་སའི་ནང་རྔམ་སྟོན་ཧ་ཅང་ཤུགས་ཆེན་པོ་ཞིག་བྱུང་བ་རེད། ངོས་ནས་ཟིང་འཁྲུག་ཞི་འཇམ་ཡོང་ཐབས་སླད་འབད་བརྩོན་གང་ཡོང་བྱས་པ་ཡིན། འོན་ཀྱང་མཐར་གླགས་མ་ཁེལ་བ་རེད།
སྐབས་དེར་རྒྱ་མིའི་དྲག་པོའི་དམག་དཔུང་ཉིན་རེ་བཞིན་ལྷ་སའི་ནང་ཇེ་མང་དུ་འགྲོ་བཞིན་ཡོད། དེར་བརྟེན་མཐར་བྲོས་བྱོལ་ཡོང་རྒྱུ་ཁོ་ན་མ་གཏོགས་ཐབས་ལམ་གཞན་མ་རྙེད་པ་རེད། ང་ཚོ་ལྷ་ས་ནས་ཕྱི་ལོ་༡༩༥༩ ཕྱི་ཟླ་༣ ཚེས་༡༧ ཉིན་ངོས་ནས་རང་སྲོག་ལ་མ་འཛེམས་པར་བྲོས་བྱོལ་དུ་ཡོང་བ་ཡིན། སྐབས་དེར་ང་ཚོའི་བསམ་བློའི་ནང་ང་ཚོ་བོད་ཀྱི་ལྷོ་ཕྱོགས་ས་ཁུལ་དུ་འབྱོར་མཚམས་རྒྱ་ནག་དང་ལྷན་སྐད་ཆ་བཤད་ནས་འགྲིག་འཇག་ཡོང་རྒྱུའི་རེ་བ་བྱས་པ་རེད། ངོས་རང་ལྷ་ས་ནས་ཕྱི་ཚེས་༡༧ དགོང་མོ་བྲོས་པ་ཡིན། ཕྱི་ཚེས་༢༠ སྔ་དྲོར་རྒྱ་ནག་གཞུང་གིས་ལྷ་སར་འབར་རྫས་ཀྱི་གཏོར་རྒོལ་བཏང་བ་རེད། དེར་བརྟེན་སྐད་ཆ་བཤད་ནས་འགྲིག་འཇག་ཡོང་བྱ་རྒྱུའི་རེ་བ་སྟོང་ཟད་ཕྱིན་པ་རེད། དེ་རྗེས་ངོས་རང་རྒྱ་གར་ས་མཚམས་སུ་འབྱོར་སྐབས་རྒྱ་གར་གཞུང་གིས་ས་མཚམས་ནང་འཛུལ་བཅུག་ཨེ་ཡོང་བསམས་པའི་དོགས་པ་བསྐྱེས་བྱུང་། དེར་བརྟེན་ངོས་ཀྱི་ལས་བྱེད་གཉིས་རྒྱ་གར་ས་མཚམས་སུ་བཏང་བ་ཡིན། ལས་བྱེད་ཁག་གཅིག་འབྲུག་ས་མཚམས་སུ་བཏང་བ་ཡིན། རྒྱ་གར་ཕྱོགས་སུ་བཏང་བའི་ལས་བྱེད་ཚོ་ཕྱིར་ལོག་ནས་རྒྱ་གར་གཞུང་གིས་ངོས་རང་རྒྱ་གར་ནང་ཕེབས་རྒྱུར་ཆོག་མཆན་ཡོད་སྐོར་བརྗོད་བྱུང་།
དེར་བརྟེན་རྒྱ་གར་ས་ཐོག་ཏུ་འཛུལ་ནས་ཀེན་ཛ་མ་ནིར་འབྱོར་སྐབས་ངོས་ཀྱི་གྲོགས་པོ་རྙིང་པ་སྐུ་ཞབས་མེ་ནོན་ Menon དམ་པ་ཁོང་དང་ཨ་ཊུག་བྷ་བྷུ། ཡ་ཝ་ཀ་ཛི་བཅས་ཕེབས་འདུག ཁོང་ཚོ་དང་མཇལ་སྐབས་ཁོང་ཚོའི་སེམས་ནང་ལྷོད་ཤིག་ཤིག་ཆགས་སོང་བའི་རྣམ་པ་མངོན་བྱུང་། རྒྱ་གར་བྱང་ཤར་ས་ཁུལ་དུ་འབྱོར་སྐབས་ངོས་ལ་རང་དབང་ཐོབ་པའི་སེམས་ཚོར་ཞིག་བསྐྱེས་བྱུང་། སྐབས་དེར་ས་མཚམས་ས་ཁུལ་ཁག་གི་གཞུང་འབྲེལ་སྣེ་ལེན་གནང་སྐབས་ཁོང་ཚོས་ལྷག་བསམ་རྣམ་དག་ཐོག་ནས་ངོས་ལ་སྣེ་ལེན་གནང་བྱུང་། སྐབས་དེ་ནས་ངོས་ཀྱི་མི་ཚེའི་ནང་གི་ལིའུ་གསར་པ་ཞིག་འགོ་བཙུགས་པ་རེད།
སྐབས་དེར་ང་ཚོ་སྲོག་འགོ་ཐོན་ཐུབ་ན་བསམ་པ་ལས་གཞན་བསམ་བློ་དེ་ཙམ་མེད། འོན་ཀྱང་རིམ་བཞིན་བོད་མི་ཧ་ཅང་མང་པོ་རྒྱ་གར་དུ་བྲོས་བྱོལ་དུ་འབྱོར་སྐབས་ཐོག་མར་བོད་མི་ཁག་གཅིག་མེ་ས་མ་རིར་འབྱོར་བ་རེད། སྐབས་དེར་ངོས་ཀྱི་རྗེས་འབྲང་ནས་རྒྱ་གར་དུ་བཙན་བྱོལ་ལ་ཐོག་མར་འབྱོར་མཁན་བོད་མི་ཁྲི་བདུན་བརྒྱད་ཙམ་རེད། སྐབས་དེར་མེ་ས་མ་རིར་བོད་མི་དེ་དག་ལ་སྡོད་སྒར་བརྒྱབ་པ་རེད། ཕལ་ཆེར་ཕྱི་ཟླ་༤ ནང་ཡིན་པ་ཡོད། ཧ་ཅང་ཚ་བ་ཆེན་པོ་འདུག དེར་བརྟེན་སྐབས་དེར་ཛ་དྲག་ཆེ་བ་དེ་བོད་མི་དེ་དག་ས་བསིལ་ས་ཞིག་ལ་གཏོང་ཐུབ་ན་བསམ་པ་དེ་རེད། དེ་ནས་རིམ་བཞིན་གཞིས་ཆགས་དེ་དག་ཚུགས་པ་རེད།
ཐོག་མའི་སྐབས་ང་ཚོ་རྒྱ་གར་དུ་བཙན་བྱོལ་བ་བྱེད་ནས་སྡོད་རྒྱུའི་དམིགས་ཡུལ་གཙོ་བོ་དེ་བོད་ཀྱི་ཐུན་མིན་རིག་གནས་སྤྱི་དང་། ལྷག་པར་རྒྱ་གར་གྱི་དཔལ་ན་ལེནྡྲའི་གཙུག་ལག་སློབ་གྲྭའི་ལེགས་བཤད་སྨད་དུ་བྱུང་བ་དེ་དག་དང་། བོད་ཀྱི་སྐད་ཡིག་སོགས་གཅེས་འཛིན་དང་མི་ཉམ་རྒྱུན་འཛིན་བྱ་རྒྱུ་དེ་རེད། དེ་ནས་སྲིད་བློན་ནེ་རུས་ཕྱག་རོགས་གནང་བར་བརྟེན་རྒྱ་གར་གྱི་ས་ཁུལ་འདྲ་མིན་ནང་བོད་མིའི་གཞིས་ཆགས་ཚུགས་པ་རེད་ཅེས་སོགས་ཀྱི་བཀའ་སློབ་བསྩལ་ཡོད་པ་རེད།
ཕྱི་ཚེས་༢ ཉིན་༧གོང་ས་མཆོག་གིས་ཨ་སམ་མངའ་སྡེའི་རྒྱལ་ས་གྷོ་ཝ་ཧ་ཊིའི་གཙུག་ལག་སློབ་གྲྭ་ཆེན་མོའི་ཚོམས་ཆེན་དུ་དེང་གི་དུས་སུ་རྒྱ་གར་གྱི་གནའ་བོའི་ཤེས་ཡོན་གྱི་དགོས་མཁོ་ཞེས་པའི་བརྗོད་གཞིའི་ཐོག་བཀའ་སློབ་བསྩལ་རྒྱུ། དེ་རྗེས་༸གོང་ས་མཆོག་གིས་ལྗགས་རྩོམ་མཛད་པའི་ངོས་ཀྱི་ཡུལ་དང་ངོས་ཀྱི་མི་མང་ཞེས་པའི་དཔེ་དེབ་ཨ་སམ་སྐད་ཡིག་ཐོག་ཕབ་སྒྱུར་ཞུས་པ་དེ་ཉིད་དབུ་འབྱེད་མཛད་རྒྱུ་མ་ཟད། ཨ་སམ་མངའ་སྡེ་དང་རྒྱ་གར་དབུས་གཞུང་ཟུང་འབྲེལ་ཐོག་གོ་སྒྲིག་གནང་བའི་ཡར་ཀླུང་གཙང་པོ་སྲུང་སྐྱོབ་ཀྱི་ལས་འགུལ་ཞེས་པའི་མཇུག་སྡོམ་མཛད་སྒོའི་ཐོག་ཆིབས་སྒྱུར་སྐྱོང་རྒྱུ་སོགས་ཉིན་ཤས་དེར་མཛད་འཕྲིན་ཡོད་པ་རེེད།།
གསར་འགོད་པ་ཆོས་ཉིད་འོད་ཟེར།
