༸སྐྱབས་རྗེ་ངོར་ཀླུ་ལྡིང་མཁན་ཆེན་འཇམ་དབྱངས་བསྟན་པའི་ཉི་མ་མཆོག་དགོངས་པ་རྫོགས་པར་སྤྱི་འཐུས་ལྷན་ཚོགས་ནས་ཐུགས་གསོ་ཞུས་འདུག

དཔལ་ལྡན་ས་སྐྱའི་ངོར་ཆེན་རྒྱལ་བའི་རྒྱལ་ཚབ་༸སྐྱབས་རྗེ་ཀླུ་ལྡིང་མཁན་ཆེན་རྡོ་རྗེ་འཆང་འཇམ་དབྱངས་བསྟན་པའི་ཉི་མ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་མཆོག་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ་ཐོན་པར། བོད་མི་མང་སྤྱི་འཐུས་ལྷན་ཚོགས་ནས་ཟླ་༡ པའི་ཚེས་༣ ཉིན་དཔལ་ལྡན་ས་སྐྱའི་ངོར་ཨེ་ཝཾ་ཆོས་ལྡན་ཆེན་པོའི་ཤར་ཆེན་ཀླུ་ལྡིང་མཁན་རིན་པོ་ཆེ་འཇམ་དབྱངས་ཆོས་ཀྱི་རྒྱལ་མཚན་མཆོག་དང་། ཀླུ་ལྡིང་བླ་བྲང་། དེ་བཞིན་དུ་ངོར་ཨེ་ཝཾ་ཆོས་སྡེ་ཆེན་པོའི་འདུས་སྤྱི་ཡོངས་དང་འབྲེལ་ཡོད་ལྷན་རྒྱས་བཅས་ལ་ཐུགས་གསོའི་འཕྲིན་ཡིག་ཕུལ་ཡོད་པ་རེད་འདུག 

དེའི་ནང་འཁོད་དོན། ངོར་ཆེན་རྒྱལ་བའི་རྒྱལ་ཚབ་༸སྐྱབས་རྗེ་ཀླུ་ལྡིང་མཁན་ཆེན་རྡོ་རྗེ་འཆང་འཇམ་དབྱངས་བསྟན་པའི་ཉི་མ་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་མཆོག་དགོངས་པ་ཆོས་དབྱིངས་སུ་མཉམ་པར་བཞག་པའི་ཚུལ་བསྟན་པ་འདི་ནི་བསྟན་སྲིད་སྤྱི་དང་། ཡང་སྒོས་དཔལ་ས་སྐྱ་པའི་བསྟན་པར་ཤིན་ཏུ་ཕངས་པའི་ཡིད་སྐྱོའི་གནས་ཚུལ་ལ་སོང་བོད་མི་མང་སྤྱི་འཐུས་ལྷན་ཚོགས་ལ་ཡིད་གདུང་དྲག་པོ་བྱུང་ཞིང་། དེ་ཡང་༸སྐྱབས་མཆོག་ཀླུ་ལྡིང་མཁན་ཆེན་རྡོ་རྗེ་འཆང་ཆེན་པོ་མཆོག་ཡབ་ཤར་ཆེན་ཀླུ་ལྡིང་པ་བཀྲ་ཤིས་རྒྱལ་མཚན་དང་། ཡུམ་སྤེན་སྐྱིད་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ལྕགས་ལུག་ཕྱི་ལོ་ ༡༩༣༡ ལོར་འཁྲུངས། དགུང་ལོ་བཅུ་པར་ཁམས་སྒ་སྟོད་དུ་ཁུ་བོ་རྡོ་རྗེ་འཆང་གི་མདུན་དུ་ཕེབས་ཏེ་གཙུག་ཕུད་ཕུལ། མཚན་འཇམ་དབྱངས་བསྟན་པའི་ཉི་མ་ཞེས་གསོལ། སྒྲུབ་ཐབས་བརྒྱ་རྩ་སོགས་ཟབ་ཆོས་དུ་མ་གསན། དགུང་ལོ་བཅུ་གཉིས་བར་དར་རྒྱས་དགོན་དུ་གསན་བསམ་གནང་། དགུང་ལོ་བཅུ་གསུམ་པར་སྐྱེ་རྒུ་དགོན་དུ་ཕན་བདེ་མཁན་པོ་ངག་དབང་མཁས་གྲུབ་རྒྱ་མཚོ་ལས་རྒྱུད་སྡེ་ཀུན་བཏུས་སོགས་ཀྱི་ཟབ་ཆོས་དུ་མ་གསན། དེ་ནས་ངོར་དུ་ཕེབས་ཏེ་ཁུ་བོ་རྡོ་རྗེ་འཆང་གི་མདུན་ནས་གསུང་ངག་ལམ་འབྲས་སོགས་གཞུང་ལུགས་དུ་མ་གསན། ལོ་གསུམ་ལྷག་རིང་ཀྱཻ་རྡོར་སོགས་ལྷག་པའི་ལྷ་མང་པོའི་བསྙེན་སྒྲུབ་མཛད། དགུང་ལོ་བཅུ་དགུ་པར་ཁུ་བོ་རྡོ་རྗེ་འཆང་ནས་མཁན་པོ་དང་། ལས་སློབ་མཆོག་སྤྲུལ་ལུང་རྟོགས་རྒྱལ་མཚན་སོགས་ལས་བསྙེན་པར་རྫོགས། ལྕགས་ཡོས་ལོར་སྐྱེ་དགོན་དུ་ཁུ་བོའི་སྐུ་ཚབ་ཏུ་ཕེབས་ཏེ་བསྟན་འགྲོའི་དོན་མཛད། དགུང་ལོ་ཉེར་བཞི་པ་ཤིང་རྟ་ལོར་ཨེ་ཝཾ་ཆོས་ལྡན་གྱི་མཁན་ཁྲིར་ཕེབས། ལོ་གསུམ་རིང་མཁན་པོ་ཁྲི་པའི་ཐུགས་འགན་བཞེས། ལམ་འབྲས་སོགས་གདམས་ངག་དུ་མ་སྩལ། མེ་བྱ་ལོར་ཁང་གསར་མཁན་རིན་པོ་ཆེར་མཁན་ཁྲི་རྩིས་འབུལ་ཞུས།

དགུང་ལོ་ཉེར་དགུ་པར་དུས་འགྱུར་བྱུང་བས་རྒྱ་གར་དུ་ཕེབས། སྔ་རྗེས་སུ་དཔལ་ས་སྐྱའི་ཁྲི་ཆེན་རྡོ་རྗེ་འཆང་ལས་གསུང་ངག་ལམ་འབྲས་སོགས་དུ་མ་གསན། གཞན་ཡང་ཕུན་ཚོགས་ཕོ་བྲང་གི་བདག་ཆེན་རིན་པོ་ཆེ་ངག་དབང་ཀུན་དགའ་བསོད་ནམས་མཆོག  ཕན་བདེ་མཁན་ཆེན། བཅོ་བརྒྱད་ཁྲི་ཆེན་ངག་དབང་མཁྱེན་རབ་ལེགས་བཤད་རྒྱ་མཚོ་མཆོག སྐྱེ་དགོན་མཁན་ཆེན་ངག་དགའ། དར་དགོན་མཁན་པོ་འཇམ་དཔལ་བློ་གྲོས། མཁན་ཆེན་ཨ་པད་རིན་པོ་ཆེ་སོགས་མདོར་ན་བླ་མ་བཅུ་ཕྲག་གཉིས་ལྷག་བསྟེན་ཏེ་དབང་ལུང་ཁྲིད་མན་ངག མདོ་སྔགས་གཞུང་ལུགས་རིག་གནས་ཀྱི་སྐོར་སོགས་གསན་བསམ་མཐར་ཕྱིན་པ་གནང་། ལྕགས་ལུག་ལོར་སྒང་ཏོག་ཏུ་ས་ངོར་ཆོས་ཚོགས་གསར་འཛུགས་མཛད། ལམ་འབྲས་སོགས་ཀྱི་གདམས་ངག་དུ་མ་སྩལ། ས་རྟ་ལོར་འཕགས་ཡུལ་སྡེ་ར་ལྡུན་མངའ་ཁོངས་མན་ཌུ་ཝ་ལར་ངོར་མ་དགོན་གསར་བཞེངས་ཀྱི་ཐུགས་འགན་གཙོ་བོ་བཞེས། བོད་དུ་ཐེངས་གཉིས་ཕེབས་ཏེ་ངོར་མ་དགོན་ཉམས་གསོ་གནང་། སྔ་ཕྱིར་ལམ་འབྲས་ཚོགས་བཤད་ཚར་བཅུ་གཉིས། སློབ་བཤད་ཚར་གསུམ་གྱིས་མཚོན་པའི་ཆོས་ཀྱི་འཁོར་ལོ་བར་མེད་དུ་བསྐོར། དགུང་ལོ་ཉེར་བཞི་པར་མཁན་ཁྲི་ཐོག་མར་གནང་བ་ནས་བཟུང་། དགུང་ལོ་བདུན་ཅུ་བར་ལོ་ཤས་མ་གཏོགས་མཁན་པོ་ཁྲི་པའི་ཐུགས་འགན་བཞེས། དེ་ནས་ཀླུ་ལྡིང་དང་ཐར་རྩེ་ཞབས་དྲུང་རྣམ་གཉིས་ལ་ངོར་ཨེ་ཝཾ་ཆོས་སྡེ་ཆེན་པོའི་མཁན་ཁྲིའི་གདན་ས་གཏད། མཁན་མཆོག་སྒྲུབ་པ་ཉམས་ལེན་འབའ་ཞིག་མཛད་དེ་བཞུགས། 

༸སྐྱབས་མཆོག་ཀླུ་ལྡིང་མཁན་ཆེན་རྡོ་རྗེ་འཆང་འཇམ་དབྱངས་བསྟན་པའི་ཉི་མ་གྲགས་པའི་རྒྱལ་མཚན་དཔལ་བཟང་པོ་མཆོག་གང་ཉིད་དགུང་གྲངས་ ༩༢ རབ་གནས་ཆུ་ཕོ་སྟག་བོད་ཟླ་ ༡༡ ཚེས་ ༦ ཕྱི་ལོ་ ༢༠༢༢ ཟླ་ ༡༢ ཚེས་ ༢༨ རེས་གཟའ་ལྷག་པའི་ཐོ་རེངས་སུ་རྒྱ་གར་འཕགས་པའི་ཡུལ་གནས་མཆོག་རྡོ་རྗེ་གདན་ངོར་ཀླུ་ལྡིང་བླ་བྲང་གི་གཟིམ་ཤག་ཏུ་དགོངས་པ་ཞི་བར་གཤེགས། ༸སྐྱབས་རྗེ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་པ་འདིས་བསྟན་འགྲོ་སྤྱི་དང་། ཁྱད་པར་གང་གི་སྐྱོང་ཡུལ་རྣམས་ལ་གོད་ཆགས་ཆེན་པོ་བྱུང་བ་ནི་བརྗོད་མ་དགོས་པ་ཞིག་ཡིན། དེར་བརྟེན་ཞིང་གཤེགས་དམ་པའི་ཀླུ་ལྡིང་བླ་བྲང་དང་། དཔལ་ས་སྐྱའི་དགོན་སྡེ་ཁག  རྒྱལ་ཕྱི་ནང་གི་སློབ་མ། ངོར་ཨེ་ཝཾ་འདུས་སྤྱིའི་ལས་སྣེ་བཅས་ལ་བོད་མི་མང་སྤྱི་འཐུས་ལྷན་ཚོགས་ནས་ཡིད་གདུང་དྲག་པོས་ཐུགས་གསོ་ཞུ་རྒྱུ་དང་། བདག་ཅག་གི་སྟོན་པས་སྐུ་མྱ་ངན་ལས་འདས་པའི་མཛད་པ་བསྟན་པ་བཞིན་ཆོས་ཉིད་ཀྱི་རང་བཞིན་ལ་དགོངས་པ་ཆེ་བཞེས་ཀྱིས་སྐྱེས་བུ་དམ་པའི་མཛད་པ་ཆོས་ཕྱོགས་ལ་སྐུལ་བ་མཁྱེན་ཆུབ་དང་། ཞི་བར་གཤེགས་པ་གང་གི་ཐུགས་དགོངས་ཟབ་མོ་རྣམས་ཡོངས་སུ་རྫོགས་ཤིང་། ས་ལམ་གྱི་བར་ཆད་ཞི་བའི་ཐུགས་སྨོན་གང་ཟབ་གནང་སྐྱོང་བ་དང་དགོངས་རྫོགས་མཆོད་དོད་དང་བཅས། ཞེས་འཁོད་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ། 

Share this:

Leave a Reply