ཁེ་ན་ཌར་གནས་སྡོད་དཀར་པོ་ཆེ་བུ་ཁྲིད་ཕྱི་ལོ་༢༠༢༥ ལོར་ཁེ་ན་ཌའི་གྲོས་ཚོགས་འོག་མའི་འཐུས་མིའི་འོས་མི་ལང་རྒྱུའི་གསལ་བསྒྲགས་བྱས་ཡོད་འདུག
ལོ་རྗེས་མར་ཁེ་ན་ཌའི་ནང་འོས་བསྡུ་བྱེད་རྒྱུ་ཡིན་པར་བརྟེན། ཁེ་ན་ཌར་གནས་སྡོད་བོད་མི་དཀར་པོ་ཆེ་བུ་ཁྲིད་ཁེ་ན་ཌའི་དབུས་གྲོས་ཚོགས་འོག་མའི་འཐུས་མིའི་འོས་མི་ལང་རྒྱུའི་གསལ་བསྒྲགས་བྱས་ཡོད་འདུག
ཕྱི་ཚེས་༢༦ ཉིན་དྲྭ་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཁེ་ན་ཌའི་ནང་གནས་སྡོད་བོད་པའི་བུད་མེད་དཀར་པོ་ཆེ་བུ་ཁྲིད་ལོ་རྗེས་མར་ཁེ་ན་ཌའི་དབུས་གྲོས་ཚོགས་འོག་མའི་འཐུས་མིའི་འོས་མི་ལང་རྒྱུ་ཡིན་འདུག་ལ། དེ་ཡང་ཁོང་མོ་ནི་ཁེ་ནེ་ཌའི་(Taiaiako’n-Parkdale-High Park constituency)མངའ་ཁུལ་དུ་ཡོད་པའི་དམངས་གཙོ་གསར་པ་ཚོགས་པའམ་(New Democracy Party)ཟེར་བ་དེའི་སྐུ་ཚབ་ལང་རྒྱུ་ཡིན་འདུག ཁོང་མོ་དམངས་གཙོ་གསར་པ་ཚོགས་པའི་སྐུ་ཚབ་ལང་རྒྱུའི་གསལ་བསྒྲགས་བྱས་རྗེས་ཚོགས་པ་དེའི་ཚོགས་མི་གཞན་སྐུ་ཚབ་ལང་འདོད་ཡོད་མཁན་མང་པོ་ཞིག་ཕྱིར་འཐེན་བྱས་ཡོད་འདུག་ཅིང་། ལོ་རྗེས་མར་ཁེ་ན་ཌའི་གྲོས་ཚོགས་འོག་མའི་འཐུས་མི་ལངས་ནས་སྲིད་དོན་ཚོགས་པ་གཞན་དང་ལྷན་དུ་འགྲན་བསྡུར་བྱེད་རྒྱུ་གཏན་འཁེལ་བྱུང་ཡོད་འདུག་པ་དང་། མངའ་ཁུལ་དེའི་ནང་གི་མི་མང་ཚོ་ལ་གནད་དོན་མང་པོ་ཞིག་གི་ཐོག་ནས་དཀའ་ངལ་འཕྲད་བཞིན་ཡོད་པར་བརྟེན། གལ་སྲིད་ཁོང་མོ་མངའ་ཁུལ་དེའི་འཐུས་མིར་འདེམས་ཐོན་བྱུང་ཚེ་མ་འོངས་པར་དཀའ་ངལ་མང་པོ་ཞིག་སེལ་ཐུབ་རྒྱུའི་རེ་བ་ཆེན་པོ་ཡོད་པ་མངའ་ཁུལ་དེའི་མི་མང་ཚོས་རྗོད་ཀྱི་ཡོད་འདུག
དཀར་པོ་ཆེ་བུ་ཁྲིད་ཀྱིས་འདས་པའི་ཉམས་མྱོང་དང་ད་ལྟའི་མངའ་ཁུལ་དེའི་ནང་ཕྱི་མི་གཞིས་སྤོ་བ། རྒྱལ་ཁབ་གཞན་གྱི་ཐེ་བྱུས་སོགས་ཀྱིས་མི་མང་ཚོ་ལ་དཀའ་ངལ་མང་པོ་ཞིག་ཡོད་པ་དག་སེལ་ཐབས་སུ་ཁོང་མོས་འབད་རྩོན་ལྷོད་མེད་བྱེད་རྒྱུ་ཡིན་པར་བརྗོད། དེ་བཞིན་ང་རང་ཚོ་བོད་མི་ཁེ་ན་ཌའི་ནང་ཡོད་མཁན་ཚོ་ལ་མཚོན་ན། འགའ་ཤས་ཡིག་ཆ་མ་རག་པའི་རྐྱེན་གྱི་དཀའ་ངལ་འཕྲད་བཞིན་པ་དང་། འགའ་ཤས་ཕ་མ་དང་བུ་ཕྲུག་ཁ་བྲལ་ནས་ལྷག་ཡོད་མཁན་སོགས་དཀའ་ངལ་དུ་མ་ཞིག་ཡོད་པ་དག་ལ་རོགས་རམ་གང་ཐུབ་བྱེད་རྒྱུ་ཡིན་པར་བརྗོད་འདུག གཞན་ཁོང་མོ་ཡོད་སའི་(Parkdale)་མངའ་སྡེའི་ནང་དུ་ཡོད་པའི་མི་མང་དང་དམངས་གཙོ་གསར་པ་ཚོགས་པའི་ཚོགས་མི་ཚོས་བརྗོད་དོན་ལ་དཀར་པོ་ཆེ་བུ་ཁྲིད་ཁོང་མོས་འདས་པའི་དུས་ཡུན་ལོ་དྲུག་ནང་མངའ་སྡེའི་ཁང་པའི་རིན་གོང་འཕར་བ་དང་། འཕྲོད་བསྟེན་སོགས་ཀྱི་དཀའ་ངལ་མང་པོ་ཞིག་ལ་གདོང་ལེན་དང་། དཀར་ངལ་སེལ་ཐབས་བྱས་པ་སོགས་ཀྱི་ཕྱག་ལས་ཧ་ཅང་ཡག་པོ་གནང་ཡོད་པར་བརྗོད་འདུག དཀར་པོ་ཆེ་བུ་ཁྲིད་ཀྱིས་ཁོང་མོ་ལོ་རྗེས་མར་དབུས་གྲོས་ཚོགས་འོག་མའི་འཐུས་མིའི་འོས་མི་ལང་རྒྱུའི་གསལ་བསྒྲགས་བྱེད་དུས་བོད་མི་གཙོས་པའི་ས་གནས་ཀྱི་མི་མང་༢༠༠ ལྷག་ཙམ་འཛོམས་ནས་ཁོང་མོ་ལ་རྒྱབ་སྐྱོར་བྱས་ཡོད་འདུག
དཀར་པོ་ཆེ་བུ་ཁྲིད་ཀྱི་མ་འོངས་པའི་འོས་བསྡུའི་ཁྲོད་རྒྱལ་ཁ་ཐོབ་ཆེད་དུ་ས་གནས་སུ་ཡོད་པའི་བོད་པ་ཚོས་ཁོང་མོའི་འོས་བསྡུ་དྲིལ་བསྒྲགས་ཆེད་དུ་རོགས་རམ་གནང་རྒྱུ་གལ་ཆེན་པོ་ཆགས་ཀྱི་ཡོད་འདུག
གསར་འགོད་པ། བསོད་ནམས་ཕུན་ཚོགས།
