ཁྱིམ་མི་དང་འབྲེལ་ཐག་ཆད་པ།

སད་མི།

ང་ནི་ཁམས་སྟོད་ནགས་ཤོད་འབྲི་རུ་བ་ཞིག་ཡིན། 2006 འཆར་ཁ་ཞིག་ཏུ་རྒྱ་གར་ལ་སྐྱབས་བཅོལ་དུ་བྲོས་ཡོང་། དེ་ནས་བཟུང་ཏེ 2013 ལོའི་ཟླ་བ 7 པ་བར་ང་དང་ཁྱིམ་མིའི་འབྲེལ་བ་རྒྱུན་གཏན་ཅན་རེད་ལ། དུས་ཁོམ་རེ་བྱུང་དུས་ནང་མིར་ཁ་པར་འདྲ་བཏང་ནས་སྐད་ཆ་བཤད་རྒྱུ་ཡོད་དུས་སེམས་པ་ཧ་ཅང་སྐྱིད།

2013 ལོའི་ཟླ་བ 3 རྒྱ་རྒན་ཞིས་ཅིང་ཕིན་མགོ་པ་ཆགས་པ་རེད། ལོ་དེ་གའི་ཟླ་བ 9 པའི་ཚེས 27 ཡས་མས་ནས 10.1 ཏང་གི་འཁྲུངས་སྐར་ཟེར་བ་བསུ་མ་དམིགས་བསལ་བྱ་དགོས་ཟེར། དེས་མ་ཚད་ཁྱིམ་ཚང་རེ་རེའི་ཁང་ཐོག་ན་རྒྱ་མིའི་དར་དམར་བསྒྲེང་དགོས་པའི་བཀའ་རྒྱ་བཀྲམ་པ་དང་སྦྲགས་ཏེ། བོད་རང་སྐྱོང་ལྗོངས་ཟེར་བའི་མངའ་ཁོངས་གྲོང་སྡེ 5453 ལ་བཀའ་བསྒོས་གཉེར་གཏད་ནས་རྒྱ་མིའི་ལས་བྱེད་ཁྲི་ཚོ་གཉིས་ཀྱིས་གྲོང་སྡེ་སོ་སོར་རྒྱལ་གཅེས་སློབ་གསོ་དང་འཇིགས་སྐུལ་བཙན་ཤེད་ཅི་བདེ་གང་འདོད་བྱེད་བཞིན་ཡོད།

unnamedརེད་དེ། 2013.9.28 ཉིན་འབྲི་རུ་རྫོང་བརླན་ཆུ་ཤང་གི་མོ་བ་གྲོང་དང་སྨོན་ཁྱིམ་གྲོང་མིས་རྒྱ་ནག་ལ་ངོ་རྒོལ་དྲག་པོ་བྱས་ཏེ་རྒྱ་མིའི་དར་དམར་ཁང་ཐོག་ཏུ་བསྒྲེང་རྒྱུ་ལྟ་ཅི། མི་ཁྲག་གིས་སྦགས་པའི་སྐར་མ་ལྔ་ཅན་དར་དམར་དེ་དག་རྒྱལ་མོ་རྔུལ་ཆུར་གཡུགས་པ་རེད། གནད་ཚུལ་འདི་ཐོན་མ་ཐག རྒྱ་ནག་གཞུང་གིས་གནད་དོན་དེ་ནི་གནམ་སར་མི་ཤོང་བ་ཞིག་ཡིན་པར་བསྙད་ནས་དམག་དང་ཉེན་རྟོག་པ་སོགས་དྲག་པོའི་རུ་ཁག་ཐད་ཀར་མི་དམངས་ལ་རྦད་པ་རེད། དེའི་སྟབས་ཀྱིས་ས་གནས་མི་དམངས་ཚོས་རྡོ་དབྱུག་ཅི་ཐེབས་ཀྱི་འཐབ་རྒོལ་བྱ་དགོས་ཐུག འོ་ནའང་། རྒྱ་ནག་པོས་མཚོན་ཆ་ཙག་གུ་ཙམ་མེད་པའི་མི་དམངས་ལ་ལྕགས་མདའ་ནག་པོའི་སོ་ཁ་ཅི་མི་སྙམ་པར་གཏད་དེ་བཀྲ་རྒྱལ་སོགས་ས་ལ་བསྒྱེལ་བ་རེད།

དེའི་རྗེས་ནས། རྒྱ་ནག་གིས་ནམ་རྒྱུན་ལྟར་སྟོན་མཇུག་རྩིས་རྒྱག་གི་ལག་ཐབས་སྤྱད་ནས་འབྲེལ་ཡོད་འབྲེལ་མེད་ཀྱི་བོད་མི་མང་པོ་བཙན་འཇུ་བཙན་ཁྲིད་བྱས་ཏེ་བཙོན་དོང་དུ་འཕངས་མོད། ས་གནས་མི་དམངས་ཀྱིས་མུ་མཐུད་ཁོང་ཅག་གི་རྒྱབ་ལངས་དང་ར་མདའ་སྟོབས་ཀྱིས་བཞེངས་ཏེ་མང་ཚོགས་རང་བཞིན་གྱི་ཟས་བཅད་ངོ་རྒོལ་བརྩམས། དེ་བཞིན་དུ་རྒྱ་རྒོལ་རང་སྲེག གཏེར་ཁ་སྔོག་འདོན་ལ་སྡེབ་ལངས་ཀྱི་ཁ་གཏད་བཅག་པ་སོགས་རེད།

དེ་ལྟར་རྒྱ་གཞུང་གི་དྲག་གནོན་དང་ས་གནས་མི་དམངས་ཀྱི་ངོ་རྒོལ་གནོན་རེས་ལངས་རེས་ལྟ་བུ་བྱས་ནས་ཕལ་ཆེར་ལོ་ངོ་ཧྲིལ་པོ་གཅིག་ཙམ་སོང་།

མཐའ་མ། ཉེས་ཡོད་ཉེས་མེད་ཀྱི་ས་གནས་མི་དམངས་བརྒྱ་ཕྲག་བརྒལ་བ་ལ་ཁྲིམས་ཁང་གི་བརྒྱུད་རིམ་སྣེ་གཅིག་མེད་ལ། ཁྲིམས་གཅོད་བཅད་ཁྲ་བཙོན་པའི་ལག་ཏུ་ཐད་ཀར་སྤྲོད་འགྲོ་དུས་ཉེས་པ་བརྡར་ནས་ཁྲིམས་རྭ་ཞིག་འཚོག་རྒྱུ་ཕར་ཞོགས ཐ་ན་ནང་མིས་ཀྱང་ཅི་ཡིན་འདི་ཡིན་ཧ་ཙམ་གོ་གི་མེད་པ་རེད། གཞན་ད་དུང་ཆད་གཅོད་དང་། རྡུང་རྡེག ཟླ་ཞག་ཅི་རིགས་ཡུན་དུ་ས་ཕྱོགས་ལོགས་སུ་བཀར་ནས་འཇིགས་སྐུལ་སློབ་གསོ་སོགས་ཐ་ཆད་པའི་ལས་ཀ་ཅི་རིགས་པ་བྱས། ད་ལྟ་བོད་རང་སྐྱོང་ལྗོངས་ཟེར་བའི་མགོ་པ་བསྐོས་མ་ཐག་པའི་རྒྱ་རྒན་ཝུ་ཡིང་ཅེ་འདི་འབྲི་རུ་ལ་ལན་གྲངས་དུ་མར་ཡར་རྒྱུར་མར་རྒྱུག་བྱས། དུས་ཡུན་གང་འཚམ་རིང་འབྲི་རུར་བསྡད། ད་ཆ་འབྲི་རུའི་མི་དམངས་རྐང་ལག་རྐྱང་སྐུམ་ཙམ་བྱ་མི་ཆོག་པ་བཟོ་མཁན་ཁོ་རེད།

དུས་དེ་ནས་བཟུང་སྟེ། བར་སྐབས་ཤིག་ལ་འབྲི་རུའི་མི་དམངས་རྣམས་ལྷ་སར་འགྲོ་རྒྱུར་དཀའ་ལས་དྲ་མ་ཡོད་ལ། ལྷ་སར་མགྲོན་ཁང་གླ་མི་ཆོག་པའི་བརྡ་ཁྱབ་ཀྱང་བཀྲམ་བྱུང་།

ཕ་ཡུལ་ནས་གསེར་རྟ་བླ་རུང་སྒར་དང་། ཡ་ཆེན། སྡེ་དགེ་དཔལ་ཡུལ། རྫོགས་ཆེན་ཤྲཱི་སེང་། སེར་ཤུལ་བཅས་ལ་སློབ་གཉེར་དུ་བསྐྱོད་པའི་སེར་མོ་བ་བརྒྱ་ཁ་ལྷག་ཅིག་བཙན་གྱིས་རང་གནས་སུ་བཀུག བོད་ས་སྟོད་སྨད་ཐམས་ཅད་དུ་སྐད་འཕྲིན་ལམ་ནས་རྒྱལ་ཕྱི་ནང་གི་དགའ་ཉེ་ཐུག་གི་ཡོད་མོད། ང་ཚོ་ལ་མཚོན་ན། བརྒྱུད་ལམ་དེ་དག་བཀག་ནས་ཏག་ཏག་ལོ་གསུམ་ཕྱིན་ཚར། 2013 ལོའི་ཟླ་བ 7 ངས་སྐད་འཕྲིན་ལམ་ནས་ཕ་རྒན་ཐེངས་ཤིག་མཇལ་ཐུབ་པ་བྱུང་། ཏག་ཏག་ད་ལོའི་ཟླ་བ 7 པ་ཡོལ་དུས་ཁྱིམ་མི་སུ་གཅིག་མ་ཐུག་པར་ལོ་ངོ་ཧྲིལ་པོ་གསུམ་ཤར་རེ་ཕྱིན།

དུས་རིང་དེའི་ནང་། ཕྱི་སྡོད་འབྲི་རུ་བ་བརྒྱ་ཚོ་གཉིས་ཙམ་ཞིག་ཕལ་ཆེར་ཁྱིམ་མི་དང་འབྲེལ་བ་ཆད་ཡོད། ཨུ་ཚུགས་ཡག་པོ་བརྒྱབས་ན་མཚམས་རེ་ཁ་པར་འགྲོ་གི་འདུག་ཟེར། སྔ་ལོ་ཞིག་ཏུ་ཕ་ཡུལ་གཅིག་པ་ཞིག་གིས་རྒྱ་གར་ལྷོ་ཕྱོགས་ནས་ཁྱིམ་མིར་ཁ་པར་མཐུད་རྒྱུ་བྱུང་ནས་སྤུན་ཉེ་ཞིག་དང་ཁ་བརྡ་བྱས། ཉིན་ཤས་སོང་རྗེས་ཁོང་བརླགས་པ་རེད། ཟླ་ཤས་སོང་དུས་ཕྱིར་གློད་ཀྱི་རེད་དྲན་མོད་ད་ལྟའང་ཕྱིར་ཡོང་མེད་པ་རེད།

དེས་ན། ནང་མིའི་སྐོར་གཅིག་གཅིག་གཉིས་གཉིས་གོ་དཀའ་ནའང་ཕ་ཡུལ་སྤྱིའི་གནས་ཚུལ་འདྲ་བོ་སྐབས་རེ་རྒྱ་ནག་ཏུ་ཡོད་པའི་བོད་མི་འགའ་བརྒྱུད་ནས་གོ་རྒྱུ་ཙམ་ལས་གཞན་ལམ་ཁ་མེད་པ་ཆགས་ཡོད།

འདས་ལོ་དེ་དག་གི་ནང་དུ་སྙིང་ཉེ་བའི་ཡུལ་མི་ཅི་འདྲའི་མང་པོ་ཞིག་རྒྱ་མིའི་བཙོན་དུ་ཚུད་ཡོད་པ་དང་། རུས་རྐང་ཡོད་པའི་སྤུན་ཉེ་སུ་དག་ཚུལ་མིན་གྱི་དཀའ་སྡུག་གཟེད་དགོས་བྱུང་མིན་ཧ་གོ་དོན་རྟོགས་གཏན་ནས་མེད་པ་ཡིན།

2016.8.31 ཉིའུ་ཡོག