གཞུང་འབྲེལ་གྱིས་རྒྱ་གར་རང་བཙན་ཉིན་མོ་སྲུང་བརྩི་ཞུས་སོང་།
རྒྱ་གར་གྱི་རང་བཙན་ཉིན་མོར་སྲིད་སྐྱོང་གིས། རྒྱ་གར་གཞུང་མང་གཉིས་བཀའ་དྲིན་ཆེན་པོ་ཡིན་པ་དང་། བོད་ཀྱི་འཐབ་རྩོད་དེ་ཡང་རྒྱ་གར་ལྟར་འཚེ་མེད་ཞི་བའི་ཐོག་ནས་འགྲོ་བཞིན་ཡོད་པ་དང་། དེ་བཞིན་ཧོང་ཀོང་ནང་གི་མང་གཙོ་ལས་འགུལ་དང་འབྲེལ་ནས་མང་གཙོ་དང་རང་དབང་རྩོད་མཁན་ཚང་མར་བོད་མི་ཚོས་ཀྱང་གདུང་སེམས་མཉམ་བསྐྱེད་ཡོད་སྐོར་གསུངས་སོང་།
ཟླ་༨ པའི་ཚེས་༡༥ ཉིན་ནི་རྒྱ་གར་གྱི་རང་བཙན་ཉིན་མོ་ཐེངས་༧༣ པ་ཡིན་པས། ལོ་ལྟར་བཞིན་བོད་མིའི་སྒྲིག་འཛུགས་ཀྱི་བཀའ་ཤག་མདུན་ཐང་དུ། སྲིད་སྐྱོང་བློ་བཟང་སེང་གེ་དབུས་པའི་བཀའ་བློན་རྣམ་པ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་མཉམ་འཛོམས་ཀྱིས། ཉིན་མོ་དེ་སྲུང་བརྩི་ཞུས་སོང་།
སྲིད་སྐྱོང་གིས་གསུང་དོན། དེ་རིང་རྒྱ་གར་རང་བཙན་ཐོབ་ནས་ལོ་༧༣ འཁོར་བའི་ཉིན་མོ་གལ་ཆེན་ཞེ་དྲག་རེད། ང་ཚོར་རྒྱ་གར་གཞུང་མང་གཉིས་བཀའ་དྲིན་ཆེན་པོ་ཞེ་དྲག་རེད། ༧གོང་ས་མཆོག་གཙོས་པའི་བོད་མིའི་སྒྲིག་འཛུགས་དང་། བཙན་བྱོལ་བོད་མི་མང་ཤོས་རྒྱ་གར་དུ་གནས་ཡོད་པར་བརྟེན། ད་ལྟ་བར་དུ་ང་ཚོའི་རྩ་དོན་དང་ཆོས་རིག་གཞུང་། སྐད་ཡིག་སོགས་གང་ཅིའི་ཐད་ནས་མགོ་བོ་ཡར་བཀྱགས་ནས་ལངས་ཐུབ་པ་དེ་རྒྱ་གར་གཞུང་མང་གཉིས་ཀྱི་བཀའ་དྲིན་རེད། བོད་མིའི་སྒྲིག་འཛུགས་ཀྱི་ཚབ་ཞུས་ཏེ་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་དང་། རྒྱ་གར་གྱི་དཔལ་འབྱོར་དང་ཆབ་སྲིད་སོགས་གནས་སྟངས་གང་ཅིའི་ཐད་ནས་བྱ་བ་ལམ་འགྲོ་དང་ཡར་རྒྱས་ཡོང་བར་ཤོག་ཞུ་རྒྱུ་ཡིན་ཞེས་གསུངས་སོང་།
བོད་ཀྱི་འཐབ་རྩོད་དང་རྒྱ་གར་གྱི་རང་བཙན་ཉིན་མོ་འདི་འབྲེལ་ནས་ཁོང་གིས་གསུང་དོན། ༧གོང་ས་མཆོག་གིས་དུས་རྟག་ཏུ་གསུང་བཞིན་པ་དང་ལྟར། རྒྱ་གར་གྱི་རང་བཙན་དེ་གྷན་རྡི་མཆོག་གི་འཚེ་མེད་ཞི་བའི་ལམ་གཞིར་བཞག་པའི་ཐོག་ནས་ཐོབ་པ་རེད། ང་ཚོ་བོད་མི་ཚོས་ཀྱང་འཚེ་མེད་ཞི་བའི་ཐོག་ནས་དབུ་མའི་ལམ་གཞིར་བཞག་གིས་མིང་དོན་མཚུངས་པའི་རང་སྐྱོང་རྩོད་ཀྱི་ཡོད་པ་རེད། རྒྱ་གར་ལ་འཚེ་མེད་ཞི་བའི་ལམ་ནས་ལམ་ལྷོངས་བྱུང་ཡོད་པས། ང་ཚོའི་རེ་བ་ལ་ཡང་ཞི་བའི་ལམ་ནས་རྩ་དོན་བསྒྲུབ་ནས། བོད་མིའི་མངོན་འདོད། ༧གོང་ས་མཆོག་བོད་ལ་གདན་འདྲེན་ཞུ་ཐུབ་པ་དང་། བོད་མི་རྣམས་ཀྱི་རྨང་གཞིའི་རང་དབང་བསྐྱར་གསོ་བྱེད་ཐུབ་པ་ཡོང་བར་ཤོག་ཞུ་ཡི་ཡོད་ཅེས་གསུངས་སོང་།
དེ་བཞིན་ཧོང་ཀོང་ནང་གི་མང་གཙོའི་ལས་འགུལ་དང་འབྲེལ་ནས་གསུང་དོན། རྒྱལ་སྤྱིའི་ནང་མང་གཙོ་དང་རང་དབང་རྩོད་མཁན་ཚང་མར་བོད་མི་ཚོས་གདུང་སེམས་མཉམ་བསྐྱེད་ཡོད། རང་དབང་དང་མང་གཙོ་ནི་རང་ཆས་སུ་ཡོད་པའི་ཐོབ་ཐང་ཞིག་ཡིན་པས། ཁོ་ཚོས་རྩོད་བཞིན་པ་དེ་ནི་དྲང་བདེན་ཞིག་རེད། མཉམ་འབྲེལ་རྒྱལ་ཁབ་དང་འགྲོ་བ་མིའི་ཐོབ་ཐང་གི་ཁྲིམས་ནང་ཡོད་པའི་ཐོབ་ཐང་ཐོག་རྩོད་ཀྱི་ཡོད་པ་རེད། གནས་ཚུལ་གོ་བ་ལྟར་ན་རྒྱ་ནག་གི་དམག་མི་ཧོང་ཀོང་གི་ས་མཚམས་སུ་སླེབས་ཡོད་འདུག་པས། ༧གོང་ས་མཆོག་གི་བཀའ་དགོངས་གཞིར་བཟུང་བོད་མི་རྣམས་ཀྱིས་ཞི་བའི་ལམ་ནས་རྩ་དོན་རྩོད་ཀྱི་ཡོད་པ་དང་། ཞི་བའི་ལམ་ལ་མཐའ་གཅིག་ཏུ་ཡིད་ཆེས་བྱེད་མཁན་ཡིན་པས། དྲག་གནོན་གྱི་ལས་འགུལ་སྤེལ་ཚེ། གནས་ཚུལ་སྡུག་ཏུ་མ་གཏོགས་ཡག་ཏུ་འགྲོ་རྒྱུ་མེད་པས། དེ་ལས་ཞི་བའི་ལམ་གཞིར་བཞག་ནས་ཕན་ཚུན་གྲོས་མོལ་བྱས་ནས་གནད་དོན་སེལ་ཐུབ་པ་ཡིན་ན། ཕྱོགས་ཚང་མར་ཕན་ཐོགས་ཡོང་རྒྱུ་རེད་ཅེས་གསུངས་སོང་།
དེའི་རྗེས་སུ་སྲིད་སྐྱོང་དྷ་ཤོད་ཀ་ཅཱ་རི་ཉེན་རྟོག་ཐང་དུ། ཀང་རཱ་རྫོང་གི་རྒྱ་གར་རང་བཙན་ཉིན་མོ་སྲུང་བརྩིའི་མཛད་སྒོའི་སྐུ་མགྲོན་དུ་ཕེབས་ཡོད་པ་རེད།
ཟླ་༨ པའི་ཚེས་༡༥ ཉིན་ནི་རྒྱ་གར་གྱི་རང་བཙན་ཉིན་མོ་དང་། ཧིན་རྡུ་ཆོས་ལུགས་ཀྱི་སྤུན་མཆེད་ཕོ་མོ་གཉིས་ཀྱི་མཛའ་འབྲེལ་ཉིན་མོ། དེ་བཞིན་བོད་ཚེས་༡༥ ཡང་ཡིན་པ་རེད།།
གསར་འགོད་པ་སྐལ་བཟང་དོན་གྲུབ།
