ཆབ་སྲིད་བཙོན་པ་ཚེ་མགོན་རྒྱལ་གྱིས་འདྲི་གཅོད་ལ་ངག་བཅད་ངོ་རྒོལ་གནང་བཞིན་པ།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ནས་གནས་ཚུལ་སྤེལ་གསལ། ཟླ་འདིའི་ཚེས༢༤ ཉིན། ཆབ་སྲིད་བཙོན་པ་ཚེ་མགོན་རྒྱལ་གྱི་ནང་མིར་མཚོ་སྔོན་ཞིང་ཆེན་མཚོ་བྱང་ཁུལ་རྒྱལ་ཁབ་བདེ་འཇགས་ལས་ཁུངས་ཟེར་བས་ཚེ་མགོན་རྒྱལ་དངོས་སུ་འཛིན་བཟུང་བྱས་པའི་ཡིག་ཆ་སྤྲད་ཡོད་པ་དང་། ཡིག་ཆའི་ནང་དུ་ཚེ་མགོན་རྒྱལ་ལ་རྒྱལ་ཁབ་ཁ་བྲལ་ལ་ངན་བསྐུལ་གྱི་ཉེས་འཛུགས་བྱས་འདུག ས་གནས་སུ་ཡོད་པའི་ཚེ་མགོན་རྒྱལ་གྱི་གྲོགས་པོ་ཞིག་གིས་བཤད་གསལ་ལྟར་ན། ཚེ་མགོན་རྒྱལ་གྱིས་བཀག་བསྐྱིལ་ཁང་དུ་འདྲི་གཅོད་དང་ལེན་མ་བྱས་པར་ངག་བཅད་ངོ་རྒོལ་བྱེད་ཀྱིན་པ་མཚོ་བྱང་ཁུལ་རྒྱལ་ཁབ་བདེ་འཇགས་ལས་ཁུངས་ཟེར་བའི་ལས་བྱེད་ཅིག་གིས་བརྗོད་འདུག ཚེ་མགོན་རྒྱལ་ནི་ལོ༥༣ ཡིན་པ་དང་། ཕྱི་ལོ༢༠༡༦ ལོའི་ཟླ༡༢ པའི་ཚེས༩ ཉིན་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྒྱལ་ཁབ་བདེ་འཇགས་ལས་ཁུངས་ཀྱིས་མཚོ་བྱང་ཁུལ་མདའ་བཞི་རྫོང་ནས་འཛིན་བཟུང་བྱས་ནས། ད་བར་རྐང་ཚ་རྫོང་སྤྱི་བདེ་བཀག་ཉར་ཁང་དུ་བཙོན་འཇུག་འོག་ཡོད་པ་རེད་འདུག
ཕྱི་ལོ་༡༩༩༣ ལོའི་འགོར། མཚོ་སྔོན་ཞིང་ཆེན་རྒྱལ་ཁབ་བདེ་འཇགས་ཅུད་ནས་ཕྱི་སྡོད་གསང་བའི་རྩ་འཛུགས་ལ་ངན་འབྲེལ་གྱིས་བོད་རང་བཙན་ཆེད་ (མདོ་སྨད་གཞོན་ནུ་འཆི་ཕོད་ཚོགས་པ་ ) ཟེར་བ་ཞིག་བཙུགས་པར་ཁ་གཡར་ཏེ་ཚེ་མགོན་རྒྱལ་དང་བཙན་བྱོལ་ནང་འབྱོར་ཟིན་པའི་ཆབ་སྲིད་བཙོན་ཟུར་ཨ་ཚོགས་ཀླུ་མཁར་བྱམས།(ཀླུ་བྷེ) ཆབ་སྲིད་བཙོན་ཟུར་གནམ་ལོ་ཡག(ལྡོང་སྲས)བཅས་འཛིན་བཟུང་གིས་གསང་བའི་བཙོན་འཇུག་དང་། ཕྱི་ལོ ༡༩༩༤ ལོའི་ཟླ ༧ཚེས ༢༨ཉིན། མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་གིས་ཚེ་མགོན་རྒྱལ་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ་༡༦ དང་ཆབ་སྲིད་ཁེ་དབང་ལོ་༤ ཕྲོགས། ཀླུ་མཁར་བྱམས་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ ༡༧ དང་ཆབ་སྲིད་ཁེ་དབང་ལོ་༥ ཕྲོགས། གནམ་ལོ་ཡག་ལ་གསང་མྱུལ་བའི་ཉེས་པ་དང་གསར་བརྗེ་ངོ་ལོག་པའི་ཚོགས་པ་འཛུགས་མཁན་གྱི་ཉེས་པར་ལོ་ངོ་༡༢ དང་ཆབ་སྲིད་ཁེ་དབང་ལོ་༤ ཕྲོགས།
དེ་རྗེས་དོན་རྐྱེན་འདི་རྒྱལ་སྤྱིའི་བརྒྱུད་ལམ་ཁག་ལ་ཐོན་པས། རྒྱལ་སྤྱིའི་སྟེང་ནས་སྐབས་དེའི་རྒྱ་དམར་གཞུང་ལ་གནོན་ཤུགས་རབ་དང་རིམ་པ་སྤྲད་ནས་ལས་འགུལ་ཤུགས་ཆེན་སྤེལ་འདུག ཕྱོགས་གཞན་གཅིག་ནས་ཕྱི་ལོ་༡༩༩༧ ལོར་རྒྱ་དམར་གཞུང་གིས་ཧོང་ཀོང་བདེ་ལེགས་ངང་རྩིས་ལེན་བྱེད་སླད་ཁྲིམས་ལུགས་ཁག་ལ་བསྐྱར་བཅོས་དང་(གསར་བརྗེ་ངོ་ལོག་)ཟེར་བའི་ཉེས་མིང་དེ་བཞིན་(རྒྱལ་ཁབ་ཀྱི་བདེ་འཇགས་ལ་གནོད་སྐྱོན་བཟོ་བ་)བར་བསྒྱུར་ཡོད་པས། (གསར་བརྗེ་ངོ་ལོག་པ་)ཟེར་བ་དེ(རྒྱལ་ཁབ་ཁ་བྲལ་)ལ་བརྗེ་བསྒྱུར་བྱས་ཡོད།
ལོ་དེའི་དགུན་ཁར་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཚེ་མགོན་རྒྱལ་ལ་རྒྱལ་ཁབ་ཁ་བྲལ་བའི་ཉེས་པར་ལོ་༦ དང་ཆབ་སྲིད་ཁེ་དབང་ལོ་༢ ཕྲོགས། གནམ་ལོ་ཡག་ལ་རྒྱལ་ཁབ་ཁ་བྲལ་བའི་ཉེས་པར་ལོ་༤ དང་ཆབ་སྲིད་ཁེ་དབང་ལོ་༡ ཕྲོགས། (ཀླུ་མཁར་བྱམས་སྨན་བཅོས་སྐབས་བྲོས་བྱོལ་བྱས་ཟིན)བཅས་ཀྱི་བཅད་ཁྲ་བཏང་ཡོད། ཧ་ལམ་ཁོང་ཚོ་བོད་མིར(རྒྱལ་ཁབ་ཁ་བྲལ་བ)ཟེར་བའི་ཉེས་པ་ཕོག་མཁན་དང་པོ་ཆགས་འདུག
ཚེ་མགོན་རྒྱལ། མིང་གཞན་རྐང་གཞོང་ཨ་ཚེ། ཕྱི་ལོ་༡༩༦༣ ལོའི་ཟླ་༨ ཚེས་༡༢ ཉིན་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་གི་འབྲོག་ཁྱིམ་ཞིག་ཏུ་འཁྲུངས་པ་དང་། ད་ལྟ་ཁོང་གི་ཕ་ཚེ་ལོ་ལོ་ན་༨༣ དང་ཨ་མ་ཚེ་དབང་སྐྱིད་ལོ་༧༩ ཟིན་ཡོད་འདུག །
གསར་འགོད་པ་ཆོས་ཉིད་འོད་ཟེར།
