འོས་འཕེན་པ་དང་འོས་མིར་སྣང་ཆུང་ཤོར་བས་མང་གཙོ་ཚོགས་པར་ཕམ་ཉེས་ཐེངས་གཉིས་བྱུང་།
ཟླ་འདིའི་ཚེས་༦ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཟླ་འདིའི་ཚེས་༥ ཉིན་ཨ་རིའི་མངའ་སྡེ་༥༠ ནང་རྒྱལ་ཡོངས་འོས་བསྡུ་བྱས་པའི་ཁྲོད། སྤྱི་མཐུན་ཚོགས་པའི་སྲིད་འཛིན་འོས་མི་ཊོམ་ལ་སྲིད་འཛིན་༤༧ པའི་རྒྱལ་ཁ་ཐོབ། ཐེངས་འདིའི་འོས་བསྡུ་དང་འབྲེལ་ཨ་རིའི་ནང་གི་བུད་མེད་མང་ཆེ་བས་མང་གཙོ་ཚོགས་པར་རྒྱབ་སྐྱོར་བྱེད་རྒྱུའི་ཚོད་དཔག་བྱས་ཡོད་ཀྱང་། ཚོད་དཔག་ལྟར་རྒྱབ་སྐྱོར་བྱས་མེད་པ་མ་ཟད། ཆབ་སྲིད་ཚོགས་པ་གཉིས་ལས་གང་ལ་རྒྱབ་སྐྱོར་བྱེད་རྒྱུའི་ངེས་པ་མེད་པའི་(ངེས་མེད་མངའ་སྡེ་) བདུན་ཡོད་པ་ཚང་མས་སྤྱི་མཐུན་ཚོགས་པར་རྒྱབ་སྐྱོར་བྱས། འོས་བསྡུའི་རྒྱལ་ཁ་ཐོབ་མཁན་ཊོམ་ནི་རྙོག་གླེང་ཆེ་ཤོས་ཡོད་མཁན་གྱི་འདེམས་ཐོན་སྲིད་འཛིན་ཞིག་ཏུ་གྱུར་པའི་གནས་ཚུལ་ཐོན་འདུག
ཨ་རིའི་ནང་འོས་འཕེན་པའི་སྐུ་ཚབ་(Electoral College) ཞེས་ཁྱོན་བསྡོམས་༥༣༨ ཡོད་པ་དང་། སྲིད་འཛིན་གྱི་རྒྱལ་ཁ་ཐོབ་པར་འོས་འཕེན་པའི་སྐུ་ཚབ་གྲངས་༢༧༠ འཐོབ་དགོས་ཀྱི་ཡོད་འདུག ཐེངས་འདིའི་འོས་བསྡུའི་ནང་སྲིད་འཛིན་འོས་མི་ཀ་མ་ལ་ཧེ་རི་སི་ལ་འོས་འཕེན་སྐུ་ཚབ་༢༢༦ མ་གཏོགས་ཐོབ་མེད་པ་དང་། སྲིད་འཛིན་འོས་མི་ཊོམ་ལ་འོས་འཕེན་པའི་སྐུ་ཚབ་༣༡༢ ཐོབ་ནས་ཨ་རིའི་སྲིད་འཛིན་༤༧ པའི་རྒྱལ་ཁ་ཐོབ། ཊོམ་ནི་ཨ་རིའི་ལོ་རྒྱུས་ཁྲོད་འོས་བསྡུའི་ནང་ཕམ་ཉེས་བྱུང་རྗེས། སླར་ཡང་སྲིད་འཛིན་གྱི་རྒྱལ་ཁ་འཐོབ་མཁན་གྱི་མི་སྣ་གཉིས་པ་དེར་གྱུར་ཡོད་འདུག
ད་ལྟའི་ཆར་ཨ་རིའི་ནང་ངེས་མེད་མངའ་སྡེ་(Swing state) ཞེས་སྐབས་རེར་སྤྱི་མཐུན་ཚོགས་པར་རྒྱབ་སྐྱོར་བྱེད་པ་དང་། མཚམས་རེར་མང་གཙོ་ཚོགས་པར་རྒྱབ་སྐྱོར་བྱེད་མཁན་གྱི་མངའ་སྡེ་བདུན་ཡོད་པ་དང་། མངའ་སྡེ་དེ་དག་ལ་འོས་འཕེན་པའི་སྐུ་ཚབ་ཁྱོན་བསྡོམས་༩༣ ཡོད་ཅིང་། འོས་བསྡུའི་རྒྱལ་ཁ་འཐོབ་པར་མངའ་སྡེ་དེ་དག་ཧ་ཅང་གལ་ཆེན་ཆགས་ཡོད་པར་བརྟེན། ཆབ་སྲིད་ཚོགས་པ་གཉིས་ཀས་མངའ་སྡེ་དེ་དག་གི་ནང་འོས་བསྡུ་དྲིལ་བསྒྲགས་ཀྱི་འབད་བརྩོན་ཤུགས་ཆེན་བྱས་ཡོད་ན་ཡང་། ཐེངས་འདིའི་འོས་བསྡུའི་ཁྲོད་མངའ་སྡེ་བདུན་ཀས་སྤྱི་མཐུན་ཚོགས་པར་རྒྱབ་སྐྱོར་བྱས་ཡོད་འདུག ཕྱི་ལོ་༢༠༢༠ ལོར་ངེས་མེད་མངའ་སྡེ་བདུན་ལས་དྲུག་གི་མང་གཙོ་ཚོགས་པའི་སྐབས་དེའི་སྲིད་འཛིན་འོས་མི་བྷ་ཌན་ལ་རྒྱབ་སྐྱོར་བྱས་ཡོད་པ་དང་། སྐབས་དེར་སྤྱི་མཐུན་ཚོགས་པར་རྒྱབ་སྐྱོར་བྱེད་མཁན་བྱང་ཁེ་རོ་ལི་ན་(North Carolina) མ་གཏོགས་མ་བྱུང་བས་ཕམ་ཉེས་ཆེན་པོ་བྱུང་ཡོད་འདུག
ཨ་རི་ནི་འཛམ་གླིང་ཐོག་མི་འབོར་མང་ཤོས་གསུམ་པ་ཡིན་པའི་ཨ་རི་ལ་མི་འབོར་ས་ཡ་༣༤༠ ཙམ་ཡོད་པའི་ཁྲོད་ནས་འོས་འཕེན་མཁན་ས་ཡ་༡༤༢ ལྷག་བྱུང་ཡོད་འདུག འདས་པའི་ཟླ་བ་མང་པོའི་རིང་། སྲིད་འཛིན་འོས་མི་གཉིས་ཀྱིས་ཨ་རིའི་ནང་གི་དཔལ་འབྱོར་དང་གཞིས་སྤོའི་དཀའ་ངལ། ས་མཚམས་དང་བདེ་འཇགས་སོགས་ཀྱི་ཐོག་བགྲོ་གླེང་དང་གླེང་སློང་ཤུགས་ཆེན་བྱུང་ཡོད་པའི་ནང་ནས། ཐེངས་འདིའི་འོས་འཕེན་པ་བརྒྱ་ཆ་༣༩% ཡིས་སེམས་ཁྲལ་ཆེ་ཤོས་བྱེད་ས་ནི་དཔལ་འབྱོར་གྱི་གནད་དོན་དང་བརྒྱ་ཆ་༢༠% ཡིས་དོ་སྣང་དང་སེམས་ཁྲལ་བྱེད་ས་གཙོ་བོ་ནི་གཞིས་སྤོས་(Immigration) ཀྱི་གནད་དོན་ཆགས་ཡོད་འདུག ཊོམ་དེ་སྔ་ཨ་རིའི་སྲིད་འཛིན་ཡིན་པའི་སྐབས་ནས་བཟུང་། ཨ་རིར་བྲོས་བྱོལ་དུ་ཡོང་མཁན་ཚོས་ཨ་རིའི་ནང་རྙོག་དྲ་བཟོ་བཞིན་ཡོད་པ། གཞིས་སྤོས་ཡོང་མཁན་ཚོ་ནི་ཨ་རིའི་དཀའ་ངལ་ཞིག་ལ་ངོས་འཛིན་གྱིས་ས་མཚམས་བཀག་པ་སོགས་བྱས་ཡོད་པ་དང་། ཐེངས་འདིའི་འོས་བསྡུའི་ནང་གཞིས་སྤོས་ཀྱི་གནད་དོན་དེ་མང་གཙོ་ཚོགས་པ་ཕམ་ཉེས་གཏོང་བའི་ལག་ཆ་གལ་ཆེན་ཞིག་ཆགས་ཡོད་འདུག མང་གཙོ་ཚོགས་པས་མངལ་དབྱུང་(Abortion) གྱི་གནད་དོན་དེ་གལ་ཆེན་ཞིག་ལ་བརྩིས་ནས་དྲིལ་བསྒྲགས་བྱས་ཀྱང་། གནད་དོན་དེ་གལ་ཆེན་རྩིས་མཁན་འོས་འཕེན་པ་བརྒྱ་ཆ་༡༡ ཙམ་མ་གཏོགས་བྱུང་མེད་པ་དང་། མང་གཙོ་ཚོགས་པར་བུད་མེད་འོས་འཕེན་མཁན་བརྒྱ་ཆ་༥༤% དང་ཊོམ་ལ་འོས་འཕེན་མཁན་བརྒྱ་ཆ་༤༤% བྱུང་ནས་མང་གཙོ་ཚོགས་པར་འོས་འཕེན་མཁན་མང་བ་བྱུང་ཡོད་ན་ཡང་། ཕྱི་ལོ་༢༠༢༠ ལོ་དང་བསྡུར་ན། ཊོམ་ལ་འོས་འཕེན་མཁན་གྱི་བུད་མེད་བརྒྱ་ཆ་༢% འཕར་ཡོད་འདུག
སྲིད་འཛིན་འོས་མི་ཊོམ་ལ་རྒྱལ་ཁ་ཐོབ་ཀྱང་། ཁོང་ནི་རྙོག་གླེང་ཆེ་ཤོས་ཡོད་མཁན་གྱི་འདེམས་ཐོན་སྲིད་འཛིན་ཞིག་ཏུ་གྱུར་ཡོད་འདུག ཁོང་སྲིད་འཛིན་ཡིན་པའི་སྐབས། མེག་སི་ཀོ་ས་མཚམས་སུ་གྱང་བརྩིགས་པ་དང་། ཕ་མ་དང་ཕྲུ་གུ་ཁ་བྲལ་དུ་བཏང་པ། ཕྱི་ལོ་༢༠༢༠ ལོར་པེ་རི་སི་ཆིངས་ཡིག་(Paris Agreement) ནས་ཕྱིར་འཐེན་བྱས་པ། ཁ་ཆེ་བ་ཚོར་དམ་དྲག་དང་བཀག་སྡོམ་བྱས་པ། ཕྱི་ལོ་༢༠༢༠ ལོར་སྲིད་འཛིན་འོས་བསྡུ་ཕམ་ཉེས་བྱུང་བ་ཁས་མ་ལེན་པ་དང་། ཊོམ་གྱི་རྒྱབ་སྐྱོར་བ་ཚོས་ཨ་རིའི་གྲོས་ཚོགས་ཁང་དུ་དྲག་རྒོལ་བྱས། སྲིད་འཛིན་གྱི་དུས་ཡུན་རིང་། གྲོས་ཚོགས་ཀྱིས་ནག་ཉེས་སྐྱོན་འཛུགས་ཐེངས་གཉིས་བྱས་པ་སོགས་བྱུང་ཡོད་འདུག
རྒྱ་གར་གྱི་Firstpost ཞེས་པའི་གསར་ཁང་གིས་ཕྱི་ལོ་༢༠༡༦ ལོར་མང་གཙོ་ཚོགས་པས་ཊོམ་ལ་སྣང་ཆུང་ཤོར་ནས་ཕམ་ཉེས་བྱུང་ཡོད་པ་དང་། ཕྱི་ལོ་༢༠༢༤ ལོར་མང་གཙོ་ཚོགས་པས་འོས་འཕེན་པར་སྣང་ཆུང་ཤོར་ནས་འོས་བསྡུའི་ཕམ་ཁ་བྱུང་པ་རེད་ཅེས་བརྗོད་འདུག།
གསར་འགོད་པ། བློ་བཟང་རྒྱ་མཚོ།
