བཙན་བྱོལ་བོད་མིའི་མང་གཙོའི་དུས་ཆེན་ཉིན་མོ་སྲུང་བརྩི།

༸གོང་ས་མཆོག་ལ་མཚན་སྨད་ཞུ་བའི་བྱ་སྤྱོད་ནི་དགྲ་དགའ་གཉེན་སྡུག་བཟོ་གཞི་མ་ཟད། བོད་ཀྱི་ཐུན་མོང་མ་ཡིན་པའི་ཡ་རབས་སྤྱོད་བཟང་དང་ཡང་འགལ་བས་བོད་མི་སྤྱི་སྒེར་ཚང་མས་དོགས་ཟོན་དང་། ནང་ཁུལ་ལམ་ནོར་ལྡོག་ཤེས་ཀྱི་སློབ་གསོ་གནང་དགོས་པའི་རེ་སྐུལ་ཞུ་རྒྱུ་ཡིན་” བཀའ་ཤག་གིས་གསུངས་སོང་།

ཟླ་འདིའི་ཚེས་༢ ཉིན་༸གོང་ས་མཆོག་གིས་བོད་འབངས་ཡོངས་ལ་མང་གཙོའི་ལམ་བཟང་གསོལ་སྩལ་གནང་སྟེ། ལོ་ངོ་༥༦ འཁོར་བའི་དུས་ཆེན་མཛད་སྒོ་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་འཚོགས་ཡོད་པ་རེད།

IMG_0128ཉིན་དེའི་དུས་ཆེན་མཛད་སྒོའི་ཐོག བོད་མིའི་སྒྲིག་འཛུགས་ཀྱི་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་དང་། ཁྲིམས་ཞིབ་པ་གཞན་རྣམ་གཉིས། སྲིད་སྐྱོང་བློ་བཟང་སེང་གེ་དང་བཀའ་བློན་གཞན་རྣམ་པ། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་དང་། སྤྱི་འཐུས་རྒྱུན་ལས་རྣམ་པ། སྐུ་མགྲོན་གཙོ་བོ་རྒྱ་གར་གྲོས་ཚོགས་འཐུས་མི་སྐུ་ཞབས་མུ་ཀུཊ་མི་ཐི་(Mukut Mithi) དང་། དམིགས་བསལ་སྐུ་མགྲོན་རྒྱ་གར་གྲོས་ཚོགས་འཐུས་མི་སྐུ་ཞབས་ཨ་རུན་ཀུ་མར་(Dr.Arun Kumar) ཕེབས་ཡོད་པ་རེད།

སྲིད་སྐྱོང་གཟེངས་རྟགས་དང་། སྲིད་སྐྱོང་གཟེངས་བསྟོད། དགའ་ལྡན་ཕོ་བྲང་སློབ་མའི་གཟེངས་རྟགས། ཁྱད་མཁས་ཚོང་པ་གསར་པའི་མ་དངུལ་རོགས་སྐྱོར་གཟེངས་རྟགས་བཅས་ཕུལ་ཡོད་པ་རེད།

ཕྱི་ལོ་ ༡༩༦༠ ལོའི་དེ་རིང་གི་ཉིན་མོར་གཞིས་བྱེས་བོད་མི་ཡོངས་ཀྱི་ངོ་ཚབ་མཚོན་པའི་ཆོལ་གསུམ་ཆོས་བརྒྱུད་དང་བཅས་པའི་སྤྱི་འཐུས་འོས་ཐོན་བསྐོ་གཞག་བྱུང་བ་རྣམས་ཀྱིས་ལས་ཁུར་འགོ་འཛུགས་ཞུས་ཏེ་བོད་མིའི་མང་གཙོའི་ལམ་བཟང་དབུ་བརྙེས་ཡོད་པ་རེད།

ཉིན་དེའི་དམིགས་བསལ་སྐུ་མགྲོན་རྒྱ་གར་གྲོས་ཚོགས་འཐུས་མི་སྐུ་ཞབས་ཨ་རུན་ཀུ་མར་དང་སྐུ་མགྲོན་གཙོ་བོ་སྐུ་ཞབས་ མུ་ཀུཊ་མི་ཐི་རྣམ་པ་གཉིས་ཀྱིས། ཁོང་གཉིས་སྒེར་དང་མངའ་སྡེ་གཞུང། རྒྱ་གར་དབུས་གཞུང་བཅས་ནས་བོད་ཀྱི་གནད་དོན་ཐད་ཐོག་སེམས་ཐག་ཉེ་བོའི་ལྟ་ཡི་ཡོད་སྐོར་དང་། ཉེ་འཆར་རྒྱ་གར་རྒྱལ་ས་ལྡི་ལིར་༢༠༡༦ ལོར་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཞིག་སྐོང་འཚོགས་པའི་སྐབས། གྲོས་ཚོགས་འཐུས་མི་རྣམས་ཀྱིས་༸གོང་ས་སྐྱབས་མགོན་ཆེན་པོ་མཆོག་རྒྱ་གར་གྲོས་ཚོགས་ནང་གདན་ཞུ་ཡོང་ཐབས་ཆེད་འབད་བརྩོན་ཞུ་རྒྱུའི་གྲོས་འཐུན་བྱུང་སྐོར་གསུངས་སོང་ལ། ཁོང་རྣམས་པས་བོད་མིའི་དབུ་མའི་ལམ་གྱི་སྲིད་ཇུས་དེ་ཡང་དག་པའི་སྲིད་ཇུས་ཤིག་ལ་ངོས་འཛིན་དང་སྦྲགས་རྒྱབ་སྐྱོར་ཡོད་སྐོར་གསུངས་སོང་།

IMG_0034སྲིད་སྐྱོང་བློ་བཟང་སེང་གེས་ཉིན་དེའི་གཏམ་བཤད་སྒྲོགས་སྦྱང་གནང་སྐབས། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་དང་། ༧གོང་ས་མཆོག་ལ་ཆེ་བསྟོད་ཞུས་པ་དང་འབྲེལ། ཁོང་གིས་གཏམ་བཤད་སྒྲོགས་སྦྱང་བྱས་པའི་ནང་ཁོད་དོན། “ང་ཚོ་ནི་རྩ་དོན་རྩོད་མཁན་གྱི་སྒྲིག་འཛུགས་ཤིག་དང་། བཙན་བྱོལ་གྱི་གནས་བབ་འོག་མང་གཙོའི་ལམ་ལུགས་ལག་བསྟར་བྱེད་མཁན་ཞིག་ཡིན་པས་གཞན་དང་གནས་སྟངས་མི་འདྲ་བ་ཡིན་པ་ཤེས་དགོས། མང་གཙོའི་རིང་ལུགས་ནང་ཐོབ་ཐང་དང་ལས་འགན་གཉིས་ཟུང་འབྲེལ་ཐོག་འགྲོ་དགོས་པ་ལས་ཐོབ་ཐང་གཅིག་པུ་ལོངས་སུ་སྤྱོད་པ་ནི་མང་གཙོ་ཡང་དག་པ་ཆགས་ཀྱི་མེད། དེ་བཞིན་མང་གཙོའི་སྤྱི་ཚོགས་ནང་བསམ་ཚུལ་མི་འདྲ་བ་ཡོང་ཆོག་པ་མ་ཟད་ཡོང་དགོས་པ་ཞིག་ཀྱང་ཡིན། འོན་ཀྱང་འགའ་རེས་གཏམ་བརྗོད་རང་དབང་ལ་ཁ་གཡར་ནས་བོད་མིའི་སྒྲིག་འཛུགས་ལ་གཞི་མེད་སྐྱོན་བརྗོད་དང་། ལྷག་པར་༸གོང་ས་མཆོག་ལ་མཚན་སྨད་ཞུ་བའི་བྱ་སྤྱོད་ནི་དགྲ་དགའ་གཉེན་སྡུག་བཟོ་གཞི་མ་ཟད། བོད་ཀྱི་ཐུན་མོང་མ་ཡིན་པའི་ཡ་རབས་སྤྱོད་བཟང་དང་ཡང་འགལ་བས་བོད་མི་སྤྱི་སྒེར་ཚང་མས་དོགས་ཟོན་དང་། ནང་ཁུལ་ལམ་ནོར་ལྡོག་ཤེས་ཀྱི་སློབ་གསོ་གནང་དགོས་པའི་རེ་སྐུལ་ཞུ་རྒྱུ་ཡིན་” འཁོད་ཡོད་པ་རེད།

རྒྱ་ནག་གིས་བོད་དབང་བསྒྱུར་སྐོར་འཁོད་དོན། “རྒྱ་ནག་གཞུང་གིས་དྲིལ་བསྒྲགས་གང་འདྲ་བྱེད་མིན་ལ་མ་ལྟོས་པར་བོད་བཙན་བཟུང་གིས་དབང་བསྒྱུར་བྱས་པའི་དུས་ཡུན་ནང་ཁྱིམ་མཚེས་རྒྱལ་ཁབ་གཞན་དང་སྤྱི་མཚུངས་ལྟར་བོད་མིའི་འཚོ་བར་ཡང་ཡར་རྒྱས་ཕྲན་བུ་ཕྱིན་ཡོད་ནའང་། དོན་དངོས་ཐོག་བོད་མིའི་ཐུན་མོང་མ་ཡིན་པའི་ངོ་བོ་དང་ཆོས་རིག་གོམས་གཤིས་རྩ་བརླག བོད་ཀྱི་སྐྱེ་ཁམས་ཁོར་ཡུག་གི་གལ་གནད་ལ་བརྩི་མེད་ཀྱིས་གང་བྱུང་འཛུགས་སྐྲུན་དང་གཏེར་ཁ་སྔོག་འདོན་སོགས་བྱེད་པར་བོད་མི་ཚོས་འདས་པའི་མི་ལོ་ལྔ་བཅུ་ལྷག་ནང་ཞི་རྒོལ་རྒྱུན་མར་བྱས་དང་བྱེད་བཞིན་པ་ནི་འཛམ་གླིང་ཡོངས་ཀྱིས་ཤེས་གསལ་རེད། དེ་བཞིན་བོད་སྐྱོར་ལས་བྱེད་ཟེར་བའི་ལས་གཞིའི་འོག་བོད་ཀྱི་ས་ཁུལ་ཁག་ཏུ་རྒྱ་རིགས་ལས་བྱེད་ཕོན་ཆེ་ཆེད་གཏོང་བྱེད་བཞིན་པ་དེ་ནི་བོད་རིགས་ལས་བྱེད་ལ་ཡིད་ཆེས་བྱེད་ཀྱི་མེད་པའི་དཔང་རྟགས་གསལ་པོ་ཡིན། ” ཞེས་འཁོད་ཡོད་པ་རེད།

ད་ལྟའི་ཆར་རྒྱ་ནག་གཞུང་གིས་ཁམས་གསེར་རྟ་བླ་རུང་སྒར་གཏོར་བཤིག་སྐོར་འཁོད་དོན། “གསེར་རྟ་བླ་རུང་སྒར་དུ་གྲྭ་ཤག་མང་པོ་གཏོར་བཤིག་དང་གྲྭ་བཙུན་སྟོང་ཕྲག་བརྒལ་བ་ཕྱིར་འབུད་ཀྱིས་ཆོས་དད་རང་དབང་གི་ཐོབ་ཐང་ལ་ཡོངས་སུ་བརྡལ་བཤིག་བཏང་ཡོད།”ཅེས་དང་། “བྱེད་བབ་དེ་རིགས་ནི་རྒྱལ་སྤྱིའི་ཁྲིམས་ལུགས་ལྟ་ཅི། རྒྱ་ནག་མི་དམངས་སྤྱི་མཐུན་རྒྱལ་ཁབ་རང་ཉིད་ཀྱི་རྩ་ཁྲིམས་ནང་གསལ་བའི་ཆོས་དད་རང་དབང་གི་ཐོབ་ཐང་བརྩི་མེད་རྡོག་རོལ་བཏང་བ་ཞིག་ཡིན་སྟབས། རང་དབང་ལ་དགའ་བའི་རྒྱལ་སྤྱིའི་སྤྱི་ཚོགས་དང་། ཨ་རིས་གཙོས་པའི་སྲིད་གཞུང་དང་གྲོས་ཚོགས་ཀྱི་འཐུས་མི་བཅས་ནས་དེར་སྐྱོན་བརྗོད་བྱས་ཡོད། ང་ཚོའི་ངོས་ནས་ཀྱང་རྒྱལ་སྤྱིའི་ནང་ངོ་རྒོལ་གྱི་ལས་འགུལ་ཞིག་སྤེལ་འཆར་ཡོད།”ཅེས་འཁོད་ཡོད་པ་རེད།

IMG_0226“ཉིན་ཤས་གོང་བོད་རང་སྐྱོང་ལྗོངས་ཟེར་བའི་དམར་ཚོགས་ཀྱི་དྲུང་ཆེ་བརྗེ་བསྒྱུར་བྱས་ཡོད། བོད་ཁྱོན་ཡོངས་ནང་ཞི་བདེ་ལྷིང་འཇགས་ཡང་དག་པ་ཞིག་ཡོང་བར་འགོ་འཁྲིད་འཕོ་བསྒྱུར་བཏང་བ་ཙམ་མ་ཡིན་པར་བོད་མིའི་ཐོག་མི་སྤྱོད་ལས་འདས་པའི་མཁྲེགས་འཛིན་དང་དྲག་གནོན་གྱི་སྲིད་བྱུས་མུ་མཐུད་ལག་བསྟར་བྱེད་བཞིན་པ་མཚམས་འཇོག་གིས་བོད་དོན་དཀའ་རྙོག་སེལ་ཐབས་བྱ་རྒྱུའི་དུས་ལ་བབས་ཡོད། བོད་མིའི་སྒྲིག་འཛུགས་ཀྱི་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་དེ་ཐབས་ལམ་ཡག་ཤོས་ཡིན་པ་དང་བོད་ཀྱི་གནད་དོན་གྲོས་མོལ་གྱི་ལམ་ནས་ཐག་གཅོད་བྱ་རྒྱུར་ཆོད་སེམས་བརྟན་པོ་ཡོད། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་དབར་འབྲེལ་མོལ་མུ་མཐུད་ཡོང་ཆེད་འབད་བརྩོན་སྔར་ལྷག་ཞུ་རྒྱུ་ཡིན།”ཞེས་འཁོད་ཡོད་པ་རེད།

སྤྱི་འཐུས་ལྷན་ཚོགས་ཀྱི་གཏམ་བཤད་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་སྒྲོགས་སྦྱང་གནང་བའི་ནང་འཁོད་དོན། “དེ་ཡང་མང་གཙོའི་ལམ་སྲོལ་སྲ་བརྟན་དང་ཡར་རྒྱས་ཡོང་མིན་ནི་མང་ཚོགས་ཀྱི་བསམ་བློའི་གནས་ཚད་དང་། སྤྱི་དོན་ཐོག་སེམས་འཁུར་དང་ཕྱར་གྲུ་མཉམ་འདེགས་བཅས་ལ་རག་ལས་སྟབས། ཉེ་སྔོན་བོད་མི་མང་སྤྱི་འཐུས་སྐབས་ ༡༦ པའི་ སྤྱི་འཐུས་རྣམས་ལས་འཁུར་དམ་བཅའ་འབུལ་བཞེས་གྲུབ་ཉིད། བོད་མི་གནས་སྡོད་ཡོངས་ཁྱབ་ཏུ་འཚམས་འདྲི་གཟིགས་སྐོར་སླད་ཕེབས་རྒྱུའི་ས་གནས་ས་བགོས་ཀྱི་ལས་འཆར་ཆེད་བསྒྲིགས་ཀྱིས་རྒྱ་ཆེའི་མང་ཚོགས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་མཛད་འཕྲིན་རྒྱས་དང་རྒྱས་བཞིན་པ་རྣམས་དང་། བོད་ནང་གི་ཛ་དྲག་གནས་སྟངས་སྐོར། བོད་དོན་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབ་སྐོར། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་རིམ་སྐོར། བོད་མི་ནང་ཁུལ་མཐུན་ལམ་རྡོག་རྩ་ཆིག་སྒྲིལ་དགོས་པ་གལ་ཆེ་ཡིན་སྐོར་སོགས་ཀྱི་གོ་རྟོགས་དང་བློ་སྟོབས་སྤེལ་རྒྱུ། དེ་དང་ཆབས་ཅིག་ས་གནས་སོ་སོའི་སྒྲིག་འཛུགས་སམ། སྡེ་ཚན་སོ་སོ་དང་། མང་ཚོགས་སྒེར་བཅས་ཀྱིས་བདེ་སྡུག་ཞུས་ཁག་བོད་མིའི་སྒྲིག་འཛུགས་ཀྱི་བཀའ་བློན་ལས་ཁུངས་གཙོ་གྱུར་སྒྲིག་འཛུགས་མ་ལག་ཁུངས་སོ་སོ་ནས་སྐབས་ཐོག་སོ་སོར་དཀའ་ངལ་སེལ་ཐབས་དང་། རོགས་སྐྱོར་ལག་བསྟར་ཐུབ་ཐབས་ཆེད་འཛིན་སྐྱོང་བཀའ་ཤག་ཏུ་ཕུལ་ཏེ་དཀའ་ངལ་སེལ་ཐབས་བྱ་བཞིན་པ་སོགས་བོད་མི་མང་སྤྱི་འཐུས་ལྷན་ཚོགས་ནས་བོད་མིའི་སྒྲིག་འཛུགས་དང་། མང་ཚོགས་དབར་ཟམ་པ་ལྟ་བུའི་གནས་བབ་བཟུང་སྟེ་ལས་དོན་བསྒྲུབས་དང་སྒྲུབ་བཞིན་ཡོད།”ཅེས་འཁོད་ཡོད་པ་རེད།

རྒྱ་ནག་གཞུང་གི་བོད་དབང་བསྒྱུར་སྐོར་འཁོད་དོན། “རྒྱ་ནག་གཞུང་གི་བོད་ཐོག་འཛིན་པའི་སྲིད་བྱུས་ལ་འགྱུར་བ་གཏོང་རྒྱུའི་རྟགས་མཚན་མེད་ཁར་དམ་དྲག་དང་ཛ་དྲག་ཆེ་རུ་འགྲོ་བཞིན་ཡོད་པས། འདས་པའི་ཟླ་ཤས་ནང་གནས་ཚུལ་ཛ་དྲག་རིགས་གཅིག་འདིར་དཔེ་མཚོན་དུ་ཞུས་ན། རྒྱ་ནག་གཞུང་གིས་ཕྱི་ལོ་ ༢༠༢༠ བར་དུ་སྐྱིད་གྲོང་ནས་བལ་ཡུལ་ས་མཚམས་ཧི་མ་ལ་ཡའི་རི་བརྒྱུད་བར་མེ་འཁོར་ལྕགས་ལམ་གྱི་ལས་གཞི་གསར་འཛུགས་བྱ་འཆར་དེ་བོད་ནས་ལྷོ་ཤར་ཨེ་ཤ་ཡ་རྒྱལ་ཁབ་ཁག་དང་། དམིགས་བསལ་དུ་རྒྱ་གར་གྱི་ཁྲོམ་ར་ཆེ་ཁག་བར་ཉོ་ཚོང་གི་འབྲེལ་ལམ་ཆེད་དང་། སྐྱིད་གྲོང་གི་མཛེས་ལྗོངས་དེར་ཡུལ་སྐོར་སྤྲོ་འཆམ་པའི་ཆེད་འགྲིམས་འགྲུལ་ལས་རིགས་ཐོག་ནས་ས་གནས་མང་ཚོགས་ཀྱི་དབུལ་སེལ་ཐུབ་ལུགས་ཀྱི་གཡོ་གཏམ་སྒྲོག་བཞིན་ཡོད་ཀྱང་། དོན་དངོས་ཐོག་དེ་ནི་རྒྱ་ནག་རྒྱ་བསྐྱེད་རིང་ལུགས་པས་བོད་ལྟ་ཅི། བལ་ཡུལ་དང་རྒྱ་གར་རྒྱལ་ཁབ་སོགས་ཁྱིམ་མཚེས་ཡུལ་གྲུར་འཇིགས་ཉེན་བཟོ་བའི་ཕུགས་རིང་གི་འཆར་གཞི་ལྡན་པའི་འཛུགས་སྐྲུན་ཞིག་ཡིན་པར་ངོས་འཛིན་བྱ་བཞིན་ཡོད།” ཅེས་དང་།

“བོད་ནང་རྒྱ་ཆེའི་ཞིང་འབྲོག་མང་ཚོགས་ཀྱིས་མི་རབས་མང་པོ་རིམ་བརྒྱུད་ཀྱིས་རང་དབང་ངང་ལོངས་སུ་སྤྱད་ནས་ཡོང་བའི་ས་ཆ་རྣམས་བཙན་ཕྲོགས་དང་། བཅད་བགོས་ཀྱིས་བོད་མིའི་འཚོ་བར་བརྡབ་གསིག་ཆེན་པོ་གཏོང་བཞིན་ཡོད་པ་ལྟར། རྩྭ་སའི་བདག་དབང་འདྲ་མཉམ་བགོ་བཤའ་རྒྱག་དགོས་པའམ་ཕྱིར་སྤྲོད་དགོས་པའི་ཞུ་གཏུགས་ཀྱི་ལས་འགུལ་སྤེལ་མཁན་རྣམས་ཀྱི་བདེ་སྡུག་ལ་བསམ་ཤེས་གང་ཡང་མེད་པའི་ཁར་བཙན་གནོན་བྱ་བཞིན་ཡོད་པ་དཔེར་ན། ཉེ་བའི་སྔོན་དུའང་སེར་ཤུལ་རྫོང་ཟེར་བའི་སྒོ་ཆེན་ཉེ་འགྲམ་དུ་དགེ་འདུན་པ་བཟོད་པ་ཞུ་བས། རྩྭ་སའི་བདག་དབང་དགོས་འདུན་གྱི་ཞུ་འབོད་གནང་བར་རྒྱ་གཞུང་གི་ཉེན་རྟོག་པས་བཙན་འཁྲིད་བྱས་ཏེ་ས་གནས་ལས་བྱེད་པས་ས་ཆ་རྒྱལ་ཁབ་ཀྱི་བདག་དབང་ཡིན་སྟབས། ཁྱེད་ཚོ་འབྲོག་པར་བདག་དབང་གང་ཡང་མེད་པ་ཤེས་དགོས་ཞེས་དང་། རྗེས་སུ་རྒྱ་གཞུང་གི་ཐག་གཅོད་ལ་དང་ལེན་མ་བྱས་པར་ཞུ་གཏུགས་བྱས་ཚེ་ཉེན་རྟོག་པ་བཏང་སྟེ་བཙོན་འཇུག་བྱ་རྒྱུ་ཡིན་པའི་སྡིགས་ར་སྐུལ་ཡོད་པ་སོགས་བོད་མི་རྣམས་རང་ཡུལ་དུ་འཚོ་གནས་བྱེད་པར་དཀའ་ངལ་ཧ་ཅང་ཆེན་པོ་བཟོ་བཞིན་ཡོད་”ཅེས་སོགས་འཁོད་ཡོད་པ་རེད།ཉིན་དེའི་དུས་ཆེན་དང་འབྲེལ་བའི་གཞས་སྣ་ཁག་ཅི་འཁྲབ་སྟོན་བྱས་པ་དང་། མཛད་སྒོ་གྲོལ་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།