བཙན་བྱོལ་བོད་མིའི་འོས་བསྡུ་དང་འབྲེལ་ནས་བོད་མི་གསུམ་འཛིན་བཟུང།
བོད་ནང་བོད་མི་གསུམ་བཙན་བྱོལ་གྱི་སྐད་འཕྲིན་ཚོགས་པའི་ནང་སྲིད་སྤྱི་གཉིས་ཀྱི་འོས་བསྡུའི་སྐོར་ལ་སྐད་ཆ་བཤད་རྐྱེན་འཛིན་བཟུང་བཀག་ཉར་བྱས་ཡོད་འདུག
དེ་ཡང་ནོར་ཝེ་བོད་ཀྱི་རླུང་འཕྲིན་ཁང་གིས་གནས་ཚུལ་བཀོད་གསལ། ཟླ་ ༣ ཚེས་ ༣༠ ཉིན་བོད་ནང་གི་སྔ་དྲོ་ཚོུད་ ༡༠།༠༠ ཡས་མས་ཙམ་ལ་བོད་མདོ་སྨད་མཚོ་སྔོན་ཞིང་ཆེན་མགོ་ལོག་ཁུལ། རྨ་སྟོད་རྫོང་། མཚོ་སྐྱ་རེངས་ཡུལ་མཚོ། ཆུ་མགོ་སྡེ་གསར་གྱི་སྡེ་པའི་འགོ་ཁྲིད་གཞོན་པ་བསམ་གྲུབ་ལགས་དང་རོང་ཤེར་ལགས། ལྷ་སྒྲོན་ལགས་བཅས་བོད་མི་གསུམ་རྒྱ་གཞུང་གི་དྲག་ཆས་ཉེན་རྟོག་པ་བཞིས་འཛིན་བཟུང་བྱས་ཡོད་འདུག
དེ་ཡང་ཁོང་གསུམ་གྱིས་བཙན་བྱོལ་གྱི་སྐད་འཕྲིན་ཚོགས་པ་འདྲ་མིན་ནང་མཉམ་ཞུགས་བྱས་པ་མ་ཟད། ལྷག་པར་དུ་འདི་ལོ་ ༢༠༡༦ ལོའི་བཙན་བྱོལ་བོད་མིའི་འོས་བསྡུ་ཆེན་མོ་དང་འབྲེལ་བའི་བཀའ་མོལ་གནང་པའི་དབང་གིས་ཡིན་པར་ས་གནས་བོད་མི་ཚོས་ཚོད་དཔག་གནང་གི་ཡོད་འདུག
ད་ལྟའི་ཆར་ཁོང་གསུམ་རྫོང་མི་དམངས་ཁྲིམས་ཁང་དུ་བཀག་ཉར་བྱས་ཡོད་འདུག་པ་དང། ད་ལྟ་བར་ཁོང་གསུམ་གྱི་ནང་མི་གཙོས་པའི་གཉེན་འབྲེལ་སུ་གང་ཡང་ཐུག་འཕྲད་དུ་གཏང་མེད་པ་རེད་འདུག
གཞི་རྩའི་སྡེ་པའི་འགོ་ཁྲིད་བསམ་གྲུབ་ལགས་ནི་ད་ལྟ་རང་ལོ་ ༤༠ ཙམ་ཡིན་པ་དང་ལོ་མང་རིང་སྐྱ་རེངས་ཡུལ་མཚོའི་རུ་ཁག་དྲུག་པའི་འགོ་ཁྲིད་བྱས་པ་མ་ཟད། དེང་སྐབས་རུ་ཁག་དང་པོ་དང་གསུམ་པ། ལྔ་པ་བཅས་ཀྱི་རུ་སྤོས་དུད་ཁྱིམ་ ༡༥༠ ཡོད་པའི་ནང་གི་འགོ་ཁྲིད་གཞོན་པ་ཞིག་ཡིན་པ་རེད། དེ་བཞིན་ལྷ་སྒྲོན་ལགས་ནི་རྣམ་རྒྱལ་ཚང་གི་བུ་མོ་ཡིན་ཞིང་ཁོང་ལ་ལོ་ན་ ༨ སོན་པའི་བུ་ཚེ་རྒྱམ་དང་ལོ་ན་ ༡༡ སོན་པའི་བུ་མོ་དར་དཀར་བཅས་ཕྲུ་གུ་གཉིས་ཡོད་པ་རེད། གཞན་ཡང་རོང་ཤེར་ལགས་ནི་ད་ལྟ་རང་ལོ་ ༢༩ སོན་ཡོད་པ་དང་ཁོང་གི་བཟའ་ཟླའི་མིང་ལ་དབྱངས་སྐྱིད་ཟེར་བ་དང་ཁོང་གཉིས་ལ་བུ་ཕྲུག་སོགས་མེད་པ་རེད་འདུག །
གསར་འགོད་པ་སྐལ་བཟང་དོན་གྲུབ།