བོད་ཀྱི་དཔེ་མཛོད་ཁང་ནས་གསར་དུ་དཔར་སྐྲུན་ཞུས་པའི་དེབ་གཅིག་གི་ངོ་སྤྲོད་མདོར་བསྡུས།

འཛམ་གླིང་གཉིས་ཀྱི་སྲུབས་ཀར་འཁྱམས་པའི་རྣམ་ཤེས་ཞེས་པའི་དཔེ་དེབ་འདི་ནི། ཕྱི་ལོ་༢༠༢༢ ལོ་དཔར་སྐྲུན་ཞུས་པ་རྩོམ་པ་པོ་གྲགས་ཅན་ཚེ་རིང་གཡང་འཛོམས་ཀྱི་བརྩམས་སྒྲུང་ཐོག་མ་དེ་ཡིན་ཞིང་། ཁོང་གིས་དང་པོ་དབྱིན་ཡིག་ནང་བརྩམས་ཏེ། ཉེ་ཆར་བོད་ཀྱི་དཔེ་མཛོད་ཁང་གིས་བོད་ཡིག་ཐོག་དཔར་སྐྲུན་ཞུས་པ་ཞིག་རེད་འདུག དེབ་འདི་ཨ་རི་དང་ཁེ་ན་ཌ། རྒྱ་གར་བཅས་སུ་དཔར་སྐྲུན་ཞུས་ཡོད་པ་མ་ཟད། པོ་ལན་ཌི་དང་ཧྥ་རན་སི། ཨི་ཊ་ལི་དང་བྷུལ་གྷེ་རི་ཡ་བཅས་ཀྱི་སྐད་ཡིག་ནང་དུའང་བསྒྱུར་ནས་དཔར་སྐྲུན་བྱེད་བཞིན་ཡོད་འདུག

བརྩམས་སྒྲུང་དེ་ནི་རྩོམ་པ་པོ་ཚེ་རིང་གཡང་འཛོམས་ཀྱིས་ལོ་ངོ་བཅུའི་རིང་། དཀའ་སྤྱད་འབད་བརྩོན་བྱས་ནས་འདས་པའི་ལོ་ངོ་དྲུག་ཅུའི་ནང་བོད་མི་བཙན་བྱོལ་བའི་མི་རབས་གསུམ་གྱི་དཀའ་སྡུག་མཚོན་ཐུབ་པའི་བརྩམས་སྒྲུང་ཞིག་ཆགས་ཡོད་པ་མ་ཟད། བརྩམས་སྒྲུང་དེའི་ནང་དུ་མི་སེར་སྤེལ་ཡུལ་རིང་ལུགས་ཀྱི་གདུག་རྩུབ་དང་ཡུལ་གྱར་བའི་དཀའ་སྡུག ནང་མི་དང་ཕ་ཡུལ་ལ་བཅངས་པའི་བརྩེ་སེམས། རྒྱལ་ཁབ་ཀྱི་སླད་དུ་དཀའ་ངལ་ཅི་ཡང་དང་དུ་ལེན་ཕོད་པའི་དོན་སྙིང་ཆེན་པོ་ལྡན་འདུག
ཕྱི་ལོ་༢༠༢༢ ལོར་རྩོམ་རིག་དུས་དེབ་(Publishers Weekly) ཞེས་པས་དོ་སྣང་བྱེད་དགོས་པའི་རྩོམ་པ་པོ་ཁག་གི་མིང་ཁོངས་སུ་ཚེ་རིང་གཡང་འཛོམས་བཅུག་ཡོད་པ་དང་། དེ་བཞིན་རྩོམ་རིག་དུས་དེབ་(The Millions) ཞེས་པས་ཚེ་རིང་གཡང་འཛོམས་ཀྱི་བརྩམས་སྒྲུང་དེ་ནི་ལོ་དེའི་ནང་ངང་སྒུག་ཆེ་ཤོས་བྱེད་པའི་དེབ་གཅིག་ཡིན་པར་བརྗོད་ནས་བསྟོད་བསྔགས་ཆེན་པོ་བྱས་པ་སོགས། གསར་འགྱུར་བརྒྱུད་ལམ་ཁག་ཏུ་བརྩམས་སྒྲུང་དེའི་ཐོག་གླེང་སློང་ཤུགས་ཆེན་བྱས་ཤིང་རྒྱལ་སྤྱིའི་ཐོག་གདེང་འཇོག་ཆེན་པོ་ཐོབ་འདུག ལྷག་པར་དུ་ཁེ་ན་ཌའི་ཆེས་མཐོའི་རྩོམ་རིག་བྱ་དཀའ་སི་ཀོ་ཤི་ཡ་བན་ཁེ་ གྷི་ལར་(Scotiabank Giller Prize) ཞེས་པའི་མཐའ་མའི་འགྲན་རྩོད་ཀྱི་འོས་ཁོངས་སུ་ཚུད། ཕྱི་ལོ་༢༠༢༣ (Great Lakes Colleges Association) ཞེས་པའི་མཐོ་སློབ་ཚོགས་པ་ནས་བརྩམས་སྒྲུང་འབྲི་མཁན་གསར་པའི་གཟེངས་རྟགས་ཐོབ་པ་སོགས་ཚེ་རིང་གཡང་འཛོམས་ཀྱིས་བརྩམས་པའི་བརྩམས་སྒྲུང་དེ་ནི་ཀློག་པ་པོ་ཀུན་གྱིས་དགའ་མོས་བྱེད་ས་ཞིག་ཏུ་གྱུར་ཡོད་འདུག