བོད་ཀྱི་ན་གཞོན་བུད་མེད་ཅིག་གི་སྙན་དེབ་དབུ་འབྱེད།
ཟླ་འདིའི་ཚེས་༡༦ དགོང་མོར་དྷ་ས་མེག་གྷན་དུ་བུད་མེད་ན་གཞོན་སྙན་ངག་པ་སྐལ་བཟང་གིས་དབྱིན་ཡིག་ཐོག་བརྩམས་པའི་སྙན་ངག་ཕྱོགས་བསྒྲིགས་ཀྱི་དེབ་ཆུང་ཞིག་སྒོ་འབྱེད་བྱས་ཡོད་པ་དང་། དཔེ་དེབ་དེ་ནི་བོད་སྨྱུག་དྲ་ཐོག་རྩོམ་སྒྲིག་ཁང་གིས་པར་སྐྲུན་བྱས་ཡོད་པ་རེད།
དེབ་དེའི་མིང་དབྱིན་ཡིག་ཐོག་Broken Portraits ཞེས་པ་དེ་ཡིན་པ་དང་། དབུ་འབྱེད་མཛད་སྒོའི་ཐོག་རྩོམ་པ་པོ་བསྟན་འཛིན་བརྩོན་འགྲུས་དང་རྩོམ་པ་པོ་བུ་ཆུང་བསོད་ནམས། སྙན་ངག་པ་བསྟན་ཕུན་བཅས་ཀྱིས་ངོ་སྤྲོད་གསུང་བཤད་དང་། སྙན་ངག་གྱེར་འདོན་བྱས་ཡོད་པ་རེད།
དེབ་དེའི་སྐོར་སྐལ་བཟང་གིས་འགྲེལ་བརྗོད་གནང་དོན། “དེབ་དེ་ལོ་ཤས་རིང་བྲིས་པའི་སྙན་ངག་ཕྱོགས་བསྒྲིགས་རེད། ང་ཚོ་ཕྲུ་གུ་ཡིན་དུས་དང་ཆེན་པོ་ཆགས་རྗེས་བོད་པ་ཞིག་ཡིན་པའི་ཆ་ནས་འཐབ་རྩོད་དང་འབྲེལ་བ་ཡོད་པའི་སྙན་ངག་རྐྱང་རྐྱང་འབྲི་དགོས་པ་ལས། དེ་མིན་འཚོ་བ་དང་འབྲེལ་བའི་ཚོར་བ་སྐྱེས་རྒྱུ་མེད་པ་འདྲ་རེད། ང་རང་བོད་པའི་བུད་མེད་ཅིག་ཡིན་པའི་ཆ་ནས་སོ་སོའི་སེམས་ལ་ཉེ་བོ་ཡོད་པའི་གནས་ཚུལ་དང་མཉམ་མྱོང་ག་རེ་བྱུང་བ་དེ་ཚོ་བྲིས་ཡོད། དེ་ནས་ངས་བུད་མེད་ཀྱི་ཐོབ་ཐང་ཐོག་བསམ་བློ་ཤུགས་ཆེན་པོ་བཏང་བ་དང་། བཙན་བྱོལ་ནང་གི་མི་རབས་གསུམ་པའི་བུ་མོ་ཞིག་ཡིན་པའི་མྱོང་ཚོར་སྐོར་བྲིས་ཡོད་པ་རེད་”ཅེས་གསུངས་སོང་།
ཁོང་གིས་སྙན་ངག་དེབ་དེ་འབྲི་རྐྱེན་སྐོར་གསུང་དོན། “ང་གཏན་འཇགས་སློབ་གྲྭར་འགྲོ་སྐབས་འཛིན་གྲྭ་དྲུག་པ་རེད་ལ། ནང་དང་ཐག་རིང་པོ་ཆགས། སློབ་གྲོགས་གཞན་པ་ཚོ་དང་བསམ་བློ་ཞེ་དྲག་མ་མཐུན་པ་བྱུང་ནས། སོ་སོ་གཅིག་པུར་ལྷག་སྐབས། དེབ་བཀླགས་པ་དང་། ང་རང་གི་ཉིན་ཐོའི་ནང་སྐྱིད་པོ་བྱུང་མིན་སོགས་བཀོད་པ་རེད། ཉིན་ཐོ་དེ་རིང་པོ་འདྲ་ཆགས་འགྲོ་ཡི་འདུག་ལ། སྙན་ངག་ཐུང་ཐུང་ཞིག་གི་ནང་སོ་སོའི་ཚོར་བ་ཆ་ཚང་འབྲི་ཐུབ་པ་དང་། མི་གཞན་པས་ཀློག་སྐབས་ཕྱེད་ཀ་ཞིག་གོ་བ་ལེན་ཐུབ་པ་དང་། ཕྱེད་ཀ་དེ་ཀློག་མཁན་གྱི་མི་ཚེའི་མྱོང་ཚོར་དང་འབྲེལ་བའི་གོ་བ་ལེན་སྟངས་ཡོད་པས། འཛིན་གྲྭ་༧ དང་༨ པ་ནས་སྙན་ངག་འབྲི་འགོ་བརྩམས་པ་ཡིན་”ཞེས་གསུངས་སོང་།
དེབ་དེའི་ནང་གི་སྙན་ངག་གཙོ་བོ་མོ་རང་བཙན་བྱོལ་ནང་ཡོད་པས། སོ་སོའི་མི་རིགས་དང་རྒྱལ་རབས་ལ་ཁ་ཐག་རིང་པོ་དང་ཉེ་པོའི་ཚོར་བ་སྐོར་དང་། བུད་མེད་ཐོབ་ཐང་གི་གནས་བབས་སྐོར། བུད་མེད་ཚོས་སོ་སོའི་ཨ་མར་འདུ་ཤེས་འཛིན་སྟངས་སྐོར། ཁོང་གིས་ཞི་མི་ཞིག་ཉར་བ་དང་། ཐེངས་དང་པོ་སེམས་ཅན་ཞིག་ལ་འགན་ལེན་མཁན་གྱི་ཚོར་བ་དང་། རྗེས་སུ་ཞི་མི་དེ་ཤི་སོང་བའི་སྐབས་ཀྱི་མྱོང་ཚོར་སོགས་བྲིས་ཡོད་པ་རེད།
ཡང་ཁོང་གིས། “དེབ་ཅིག་འབྲི་སྐབས་དྲང་པོ་བྱེད་དགོས་པ་རེད་ལ། མཚམས་རེར་སོ་སོས་ཅིག་བྲིས་རྗེས་སྤྱི་ཚོགས་ནང་གནོན་ཤུགས་ག་རེ་ཡོང་མིན་དང་། ནང་མིར་གནོན་ཤུགས་ག་རེ་ཡོང་མིན་ལ་བསམ་བློ་གཏོང་ཤོར་གྱི་འདུག རིམ་པས་ལོ་ཆེ་རུ་སོང་བ་དང་བློག་ཁོག་ཀྱང་ཆེ་རུ་འགྲོ་ཡི་འདུག་ལ། མཉམ་མྱོང་ཡང་མང་དུ་ཡོང་གི་ཡོད་པས། རིམ་པས་རྩོམ་ཡིག་དེ་ལས་ཡག་པ་འབྲི་ཐུབ་པའི་རེ་བ་བྱེད་ཀྱི་ཡོད་”ཅེས་འགྲེལ་བརྗོད་གནང་སོང་།
སྐལ་བཟང་ནི་དྷ་སར་སྐྱེས་པ་དང་། བཙན་བྱོལ་བོད་མིའི་ནང་ནས་མི་རབས་གསུམ་པ་དེ་ཆགས་ཀྱི་ཡོད་པ་རེད། ལྡི་ལི་གཙུག་ལག་སློབ་གྲྭ་ནས་སློབ་མཐར་ཕྱིན་པ་དང་། ད་ལྟ་དྷ་སར་བོད་ཀྱི་ཐེབས་རྩ་ཁང་དུ་ལས་ཀ་བྱེད་བཞིན་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།
