བོད་ཀྱི་ཞུ་གཏུག་མཐུན་ཚོགས་ཀྱིས་ལྡི་ལིར་བོད་དོན་ཞུ་གཏུག་གི་ལས་འགུལ་སྤེལ་བཞིན་འདུག
རྒྱ་གར་གྱི་རྒྱལ་ས་ལྡི་ལི་ལ་རྒྱ་གར་གྱི་གྲོས་ཚོགས་གོང་འོག་གཉིས་ཀྱི་དགུན་དུས་གྲོས་ཚོགས་འཚོག་བཞིན་པ་དང་བསྟུན། བོད་ཀྱི་ཞུ་གཏུག་མཐུན་ཚོགས་ཀྱི་ཚོགས་མི་ཚོས་ཟླ་འདིའི་ཚེས་༢༥ ནས་བཟུང་རྒྱ་གར་གྱི་གྲོས་ཚོགས་འཐུས་མི་རྣམས་དང་མཇལ་འཕྲད་གནང་ནས་བོད་དོན་གླེང་སློང་ཡོང་བའི་ཞུ་གཏུག་གི་ལས་འགུལ་སྤེལ་བཞིན་འདུག
བོད་ཀྱི་ཞུ་གཏུག་མཐུན་ཚོགས་ནང་དབུས་བོད་ཀྱི་གཞོན་ནུ་ལྷན་ཚོགས་དང་བོད་རང་བཙན་སློབ་ཕྲུག་ཚོགས་པ། བོད་ཀྱི་བུད་མེད་ལྷན་ཚོགས་དང་བོད་རྒྱལ་ཡོངས་མང་གཙོ་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ཁང་དང་འཚེ་བ་མེད་པའི་ཐབས་ལམ་གྱི་འདམ་ཀའི་ཐེབས་རྩ་ཁང་བཅས་གཞུང་འབྲེལ་མ་ཡིན་པའི་ཚོགས་པ་དྲུག་ལས་གྲུབ་པ་ཞིག་ཆགས་ཡོད་འདུག
བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་གིས་བོད་ཀྱི་ཞུ་གཏུག་མཐུན་ཚོགས་ཀྱི་དམིགས་ཡུལ་གཙོ་བོ་ནི། ཐབས་བྱུས་ལྡན་པའི་ཐོག་རྒྱ་གར་གྱི་དབུས་དང་མངའ་སྡེ་གཉིས་ཀྱི་གྲོས་ཚོགས་འཐུས་མི་ཚོ་ལ་ཐུག་འཕྲད་བྱས་ནས་བོད་དོན་གླེང་སློང་ཡོང་བ་བྱེད་རྒྱུ་དང་། རྒྱ་གར་ནང་གི་ཆབ་སྲིད་ཚོགས་པ་མང་དག་ཅིག་ཡོད་པ་དེ་ཚོར་སྙོབ་ཐབས་ཀྱིས་བོད་དོན་ཐོག་རྒྱབ་སྐྱོར་ཚད་མཐོ་རག་ཐབས་བྱེད་རྒྱུ་དེ་ཡིན་ཞེས་གསུངས་སོང་།
དེ་བཞིན་ཁོང་གིས་ཐེངས་འདིའི་ཞུ་གཏུག་ལས་འགུལ་དང་འབྲེལ། བོད་དེ་བཙན་གནོན་འོག་ཏུ་ཡོད་པའི་རྒྱལ་ཁབ་ཅིག་ལ་ངོ་འཛིན་བྱེད་དགོས་པ་དང་བོད་ནང་གི་ཛ་དྲག་གནས་སྟངས་ཐད་རྒྱ་གར་གྱི་གྲོས་ཚོགས་སུ་གླེང་སློང་བྱས་ནས་རྒྱ་གཞུང་ལ་གནོན་ཤུགས་སྤྲོད་དགོས་པ། རྒྱ་གར་གྱི་ཁྱིམ་མཚེས་རྒྱལ་ཁབ་དེ་རྒྱ་ནག་མིན་པས་གྲོས་ཚོགས་འཐུས་མི་ཚོས་རྒྱ་དཀར་ནག་གི་ས་མཚམས་ཞེས་པའི་ཚབ་ཏུ་ཧིན་བོད་ཀྱི་ས་མཚམས་ཞེས་པའི་ཐ་སྙད་བེད་སྤྱོད་གཏོང་དགོས་པ། ༧གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་ཉམས་པ་སླར་གསོ་དང་མི་ཉམས་གོང་འཕེལ་ཆེད་མཛད་རྗེས་རླབས་ཆེན་བཞག་ཡོད་པར་བརྟེན། རྒྱ་གར་གྱི་གྲོས་ཚོགས་སུ་གླེང་སློང་གིས་ངོས་འཛིན་ཡོང་ཐབས་བྱེད་དགོས་པ། ༧གོང་ས་མཆོག་གི་ཡང་སྲིད་དེ་བོད་ཀྱི་སྔར་སྲོལ་ལྟར་ཡང་སྲིད་ངོས་འཛིན་བྱེད་དགོས་པའི་ཐོག་རྒྱ་གར་གཞུང་གིས་རྒྱབ་སྐྱོར་གྱི་བསྒྲགས་གཏམ་སྤེལ་དགོས་པ་བཅས་དགོས་འདུན་དོན་ཚན་གསུམ་གྱི་ཐོག་ལ་ཞུ་གཏུག་བྱེད་བཞིན་ཡོད་ཅེས་དང་།
གཞན་ཡང་། ཁོང་གིས་འདས་པའི་ཉིན་གྲངས་གསུམ་གྱི་རིང་། རྒྱ་གར་གྱི་ཆབ་སྲིད་ཚོགས་པ་དགུ་ཙམ་གྱི་གྲོས་ཚོགས་འཐུས་མི་༡༥ ཙམ་ཐུག་འཕྲད་བྱས་ནས་ཞུ་གཏུག་བྱས་ཡོད་པ་མ་ཟད། བདུན་ཕྲག་འདིའི་རེས་གཟའ་པ་སངས་བར་མུ་མཐུད་ཞུ་གཏུག་གི་ལས་འགུལ་སྤེལ་རྒྱུ་ཡིན་ཞེས་ངོ་སྤྲོད་གནང་བྱུང་། གཞུང་འབྲེལ་མ་ཡིན་པའི་ཚོགས་པ་དྲུག་ལས་གྲུབ་པའི་བོད་ཀྱི་ཞུ་གཏུག་མཐུན་ཚོགས་ཀྱིས་ཞུ་གཏུག་གི་ལས་འགུལ་སྤེལ་བ་ཐེངས་དང་པོ་དེ་ཆགས་ཀྱི་ཡོད་འདུག
གསར་འགོད་པ། བློ་བཟང་རྒྱ་མཚོ།
