བོད་ཀྱི་རྩོམ་པ་པོ་སྒོ་ཡོན་བཙོན་ཁང་ནས་གློད་གྲོལ་བཏང་ཡོད་འདུག 

ཟླ་༡༢ པའི་ཚེས་༦ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་གཞིགས་ན། ཕྱི་ལོ་༢༠༢༡ ལོའི་ཟླ་བཅུ་གཉིས་ཀྱི་ནང་ཁམས་བྲག་མགོ་ནས་ཡིན་པའི་བོད་ནང་གི་རྩོམ་པ་པོ་སྒོ་ཡོན་སོགས་འཇུ་བཟུང་བྱས་ཏེ་བཙན་དབང་འོག་གར་སོང་ཆ་མེད་དུ་གྱུར་བའི་སྐོར་གྱི་ཁུངས་ལྡན་གྱི་གནས་ཚུལ་འབྱོར་རྗེས། ཡུན་རིང་ཁོང་གི་གནས་བབ་ཐད་རྒྱུས་ལོན་མི་ཐུབ་པ་གྱུར་ཡོད་པ་དང་། འདི་ལོ་ཟླ་བརྒྱད་པའི་ནང་དུ་ཁོང་ཉིད་གློད་གྲོལ་ཐོབ་ཡོད་ཚུལ་གྱི་གནས་ཚུལ་ཞིག་འབྱོར་ཡང་བདེན་མིན་རྩད་གཅོད་མཐིལ་ཕྱིན་མ་ཐུབ་པར་ལུས་ཡོད་འདུག

འོན་ཀྱང་ལྟེ་གནས་ཁང་གིས་བརྗོད་དོན་ལ། ཉེ་ལམ་ཕྱི་ཟླ་ ༡༡ པའི་ཚེས་ ༣༠ ཉིན་སྒོ་ཡོན་གྱི་སྐད་འཕྲིན་རྒྱབ་ངོས་སུ་“ལོ་ངོ་གཉིས་ལྷག་ལ་དྲྭ་ལམ་དང་བྲལ་ཏེ། ད་ལྟ་ལེགས་སྐྱེས་ཆུང་ཆུང་འདི་འདྲ་ཞིག་འཁྱེར་ནས་ཐོན་ཡོད་”ཅེས་ཁོང་ཉིད་ཀྱིས་གསར་དུ་བསྒྱུར་བའི་ “སྐྱེས་ཐོབ་ཀྱི་གསོ་བྱེད་ Healing Without Medicine” ཞེས་པའི་འཚོ་བཅུད་རིག་པའི་འགྱུར་དེབ་ཅིག་གསར་དུ་ཐོན་ཡོད་པ་གསལ་བསྒྲགས་བྱས་འདུག་པས་ཁོང་ཉིད་གློད་གྲོལ་ཐོབ་ཟིན་པ་དངོས་བདེན་ཡིན་ཚོད་འདུག སྤྱིར་ཁོང་གིས་སྐད་འཕྲིན་རྒྱབ་ངོས་སུ་གནས་ཚུལ་སྤེལ་བ་ཅུང་མང་ན་ཡང་ཕྱི་ལོ་ ༢༠༢༠ ལོའི་ཕྱི་ཟླ་ ༨ ནས་ཉེ་ལམ་བར་དུ་གནས་ཚུལ་གཅིག་ཀྱང་སྤེལ་མེད་པ་ཡིན་འདུག

རྩོམ་པ་པོ་སྒོ་ཡོན་ཕྱི་ལོ་༢༠༡༠ ལོའི་ཟླ་ ༦ པའི་ཚེས་ ༥ ཉིན་ཁྲེན་ཏུ་གྲོང་ཁྱེར་གྱི་སྲང་ལམ་ཞིག་ནས་ཁོང་གི་གྲོགས་པོ་གཉིས་དང་ལྷན་དུ་རྒྱ་ནག་གི་ཉེན་རྟོག་པས་རྒྱུ་མཚན་ཅི་ཡིན་འདི་ཡིན་མེད་པར་བཙན་ཁྲིད་བྱས་ཏེ་མཚན་གཅིག་ཧྲིལ་པོར་བཀག་ཉར་བྱས་ནས་རྡུང་རྡེག་མནར་གཅོད་ཚད་ལས་བརྒལ་བ་བཏང་ནས་རྨས་སྐྱོན་ཚབས་ཆེན་འཕོག་པ་སོགས་གནས་ཚུལ་གྱི་བརྒྱུད་རིམ་ཞིབ་ཚགས་ཁོང་གི་རྩོམ་ཡིག་“བཙོན་ཁང་གི་མནར་གཅོད་” ཅེས་པའི་ནང་དུ་གསལ་ཡོད་འདུག་པ་དང་། ན་ནིང་ཁོང་ཉིད་འཇུ་བཟུང་བཙན་ཁྲིད་བྱས་ཟིན་པའི་གནས་ཚུལ་ཤེས་རྟོགས་བྱུང་མཚམས་སུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་ཁོང་དང་ན་གཞོན་ཤེས་ཡོན་པ་ས་བུ་ཆེ། སྙན་ངག་པ་རོང་བོ་དགེ་འདུན་ལྷུན་འགྲུབ་དང་རོང་བོ་གངས་དཀར་སོགས་ཀྱི་གནས་བབ་ཐད་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཆེད་མཁས་ཚན་ཁག་ལ་སྙན་གསེང་ཞུས་ཀྱང་། རྒྱ་ནག་གཞུང་གིས་ས་བུ་ཆེ་དང་རོང་བོ་དགེ་འདུན་ལྷུན་འགྲུབ་གཉིས་འཇུ་བཟུང་བྱས་ཟིན་པ་ངོས་ལེན་བྱས་པ་མ་གཏོགས་སྒོ་ཡོན་གྱི་སྐོར་ལ་གསལ་བཤད་གང་ཡང་བྱས་མེད་པ་རེད་འདུག 

 ཉེ་ལམ་ཁོང་ཉིད་གློད་གྲོལ་ཐོབ་ཟིན་ཡོད་ན་ཡང་དེ་མིན་བོད་ཀྱི་ཆབ་སྲིད་བཙོན་ཟུར་དང་རྩོམ་པ་པོ་ཁག་ཅིག་ལ་བཙོན་འཇུག་ཁྲིམས་ཆད་ཤིན་ཏུ་ལྕི་མོ་བཏང་འདུག དེ་ཡང་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་བོད་ཀྱི་ཆབ་སྲིད་བཙོན་ཟུར་དང་ཤེས་ལྡན་པ་བོད་མི་དྲུག་ཙམ་ལ་“རྒྱལ་ཁབ་ཁ་བྲལ་ལ་ངན་སྐུལ་”བྱས་པ་དང་“རྒྱལ་ཁབ་ཀྱི་བདེ་འཇགས་ལ་གནོད་སྐྱོན་”བཟོས་པ་སོགས་ཀྱི་ཉེས་མིང་འོག་ཁྲིམས་ཆད་ལྕི་མོ་བཏང་འདུག ཐེངས་འདིར་ཁྲིམས་ཆད་ནན་པོ་ཕོག་མཁན་ཚང་མ་ཆབ་སྲིད་བཙོན་ཟུར་ཤ་སྟག་ཡིན་པ་མ་ཟད་སྤྱི་ཚོགས་ཁྲོད་དུ་ཤུགས་རྐྱེན་གང་འཚམ་ཡོད་པའི་ཤེས་ལྡན་མི་སྣ་ཤ་སྟག་རེད་འདུག དེ་དག་ལས་གངས་སྐྱེས་སྒྲུབ་པ་སྐྱབས་ལ་ལོ་ ༡༤ ཡི་དུས་བཀག་བཙོན་འཇུག་དང་བསམ་འགྲུབ་དང་གངས་ཚེ་རིང་སྒྲོལ་མ་ལ་ལོ་༨། གངས་བུ་གཡུ་བྷྲུཾ་ལ་ལོ་༧།  སྲས་རྣམ་ལ་ལོ་ ༦། བྲག་མགོ་ནས་ཡིན་པའི་པདྨ་རིན་ཆེན་ལ་ལོ་ ༤ བཅས་ཀྱི་ཁྲིམས་ཆད་བཏང་ཡོད་སྐོར་གྱི་གནས་ཚུལ་འདུག །

གསར་འགོད་པ་སྐལ་བཟང་དོན་གྲུབ། 

Share this:

Leave a Reply