བོད་དང་ཧོང་ཀོང་། ཡུ་གུར་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར G7 ལྷན་ཚོགས་ཐོག་གླེང་སློང་བྱས་འདུག
ཉེ་ཆར་འབྱོར་ལྡན་རྒྱལ་ཁབ་བདུན་གྱི་ལྷན་ཚོགས་ཐོག་ཨ་རིའི་ཕྱི་སྲིད་དྲུང་ཆེ་ཡིས་བོད་དང་ཧོང་ཀོང་། ཡུ་གུར་བཅས་ཀྱི་འགྲོ་བ་མིའི་ཐོབ་ཐང་སྐོར་གླེང་སློང་བྱས་ཡོད་འདུག་ལ། དེ་བཞིན་ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་ཁྲོད་རྒྱ་ནག་གི་ངོས་ནས་དམག་འཁྲུག་མཚམས་འཇོག་ཐབས་སུ་འབད་རྩོན་བྱེད་དགོས་པ་ལས་ཨུ་རུ་སུ་ལ་རྒྱབ་སྐྱོར་བྱས་ན་མི་འགྲིག་པ་བརྗོད་ཡོད་འདུག
ཕྱི་ཚེས་༢༧ ཉིན་ལྷོ་རྒྱ་ནག་ཆ་འཕྲིན་གྱིས་གནས་ཚུལ་སྤེལ་གསལ་ལྟར་ན། ཨི་ཊ་ལིའི་ནང་འབྱོར་ལྡན་རྒྱལ་ཁབ་བདུན་གྱི་ལྷན་ཚོགས་དེ་ཕྱི་ཚེས ༢༥ ནས་༢༦ བར་ཉིན་གཉིས་རིང་འཚོགས་ཡོད་པ་དང་། ལྷན་ཚོགས་དེའི་ཐོག་ཨ་རིའི་ཕྱི་སྲིད་དྲུང་ཆེ་ཨན་ཐོ་ནེ་བྷེ་ལེ་ཀིན་(Antony Blinken)གྱིས་བོད་དང་ཧོང་ཀོང་། ཡུ་གུར་བཅས་ཀྱི་འགྲོ་བ་མིའི་ཐོབ་ཐང་ཐད་རྒྱ་ནག་གི་ངོས་ནས་ཡར་རྒྱས་གཏོང་དགོས་པར་བརྗོད་ཡོད་འདུག དེ་ཡང་གཟའ་མིག་དམར་ཉིན་ལྷན་ཚོགས་དེ་མཇུག་བསྒྲིལ་ཡོད་ཅིང་། སྐབས་དེ་དུས་ལྷན་ཚོགས་ཐོག་ཨ་རིའི་ཕྱི་སྲིད་དྲུང་ཆེ་ནས་ད་བར་འབྱོར་ལྡན་རྒྱལ་ཁབ་བདུན་གྱིས་འདས་པའི་དུས་ཡུན་ནང་ལས་དོན་རླབས་ཆེན་མང་པོ་གྲུབ་ཡོད་པ་དང་མ་འོངས་པར་སྔར་ལས་ལྷག་པའི་ཐབས་བྱུས་དང་། སྲིད་བྱུས་གསར་པ་བཟོས་ནས་ལྷན་ཚོགས་དེ་རྒྱུན་གནས་ཐུབ་ཐབས་ལ་འབད་དགོས་པ་དང་། མ་འོངས་པར་ཨ་རིའི་སྲིད་འཛིན་གསར་པ་ཊོམ་སླེབས་དུས་ལྷན་ཚོགས་དེ་ལ་དཀའ་ངལ་འཕྲད་སྲིད་པར་བརྗོད་ཡོད་འདུག་ལ། འདས་པའི་དུས་ཡུན་ནང་ང་ཚོས་ལས་དོན་ཧ་ཅང་མང་པོ་ཞིག་ལེགས་གྲུབ་བྱུང་ཡོད་ཀྱང་། རྒྱ་ནག་ཐོག་ང་ཚོ་འབྱོར་ལྡན་རྒྱལ་ཁབ་བདུན་པོས་ངེས་པར་དུ་མཉམ་རུབ་ཐོག་ནས་གདོང་ལེན་བྱེད་དགོས་པ་དང་། འབྱོར་ལྡན་རྒྱལ་ཁབ་བདུན་པོས་གདོང་ལེན་བྱས་ན་དེ་ནི་འཛམ་གླིང་གི་དཔལ་འབྱོར་(GDP)རྒྱབ་ཆ་༥༠ ཆགས་ཀྱི་ཡོད་པར་བརྟེན། འབྱོར་ལྡན་རྒྱལ་ཁབ་བདུན་པོ་མཉམ་རུབ་ཐོག་ནས་རྒྱ་ནག་གིས་འཛམ་གླེང་ནང་ཚོང་འབྲེལ་དང་། དམངས་གཙོ། འགྲོ་བ་མིའི་ཐོབ་ཐང་སོགས་ཀྱི་ཐད་མི་འདྲ་བའི་བྱ་སྤྱོད་རིགས་སྤེལ་བཞིན་པ་དག་ལ་གདོང་ལེན་བྱེད་དགོས་པར་བརྗོད་འདུག
ཐེངས་འདིའི་ལྷན་ཚོགས་ཐོག་གཙོ་བོ་དཀྱིལ་ཤར་ཡུལ་གྲུ་ཁུལ་གྱི་དམག་འཁྲུག་དང་། ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་སོགས་གཙོས་པའི་འཛམ་གླིང་གི་གནད་དོན་མང་པོ་ཞིག་གི་སྐོར་གྲོས་བསྡུར་དང་གླེང་སློང་བྱས་ཡོད་འདུག ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་དང་འབྲེལ་ནས་ཨ་རིའི་ཕྱི་སྲིད་དྲུང་ཆེ་ཡིས་བརྗོད་དོན་ལ། རྒྱ་ནག་གིས་ཨུ་རུ་སུའི་བདེ་སྲུང་ཆེད་དུ་དངོས་ཟོག་མཁོ་སྤྲོད་བྱེད་རྒྱུ་མཚམས་འཇོག་བྱས་ནས་ཡུག་རེན་ནང་དམག་འཁྲུག་མཚམས་འཇོག་བྱེད་ཐབས་འབད་དགོས་པ་དང་། འདས་པའི་ཉིན་གྲངས་༡༠༠༠ རིང་ཨུ་རུ་སུས་ཡུག་རེན་ནང་བཙན་འཛུལ་བྱས་ནས་མི་མང་ཚོ་སྡུག་སྦྱོང་མནར་གཅོད་གཏོང་བཞིན་ཡོད་པར་བརྟེན། རྒྱ་ནག་གི་ངོས་ནས་བྱང་ཀོ་རི་ཡ་དང་ཨུ་རུ་སུ་གཉིས་ལ་གནོད་ཤུགས་སྤྲད་ནས་དམག་འཁྲུག་མཚམས་འཇོག་ཡོང་ཐབས་བྱེད་རྒྱུའི་འགན་ཆེན་པོ་ཡོད་པ་ཡང་བརྗོད་འདུག་པ་དང་། རྒྱ་ནག་ནི་འཛམ་གླིང་མཉམ་འབྲེལ་རྒྱལ་ཚོགས་ནང་གཏན་འཇགས་བདེ་སྲུང་ལྷན་ཚོགས་ཀྱི་ཚོགས་མི་ཡིན་དུས་འགན་འཁྲི་ཆེན་པོ་ཡོད་པར་བརྗོད་འདུག དེ་བཞིན་ཁོང་གིས་ང་ཚོའི་ངོས་ནས་རྒྱ་ནག་གི་དཔལ་འབྱོར་ཡར་རྒྱས་ལ་ཁ་གཏད་གཅོག་གི་མེད་ཅིང་། རྒྱ་ནག་གི་ཡར་རྒྱས་ནི་རྒྱལ་སྤྱི་ཡོངས་ཀྱི་ཡར་རྒྱས་དང་འབྲེལ་བ་ཆེན་པོ་ཡོད་ཀྱང་། རྒྱ་ནག་གི་ངོས་ནས་འབྱོར་ལྡན་རྒྱལ་ཁབ་ཚོའི་མི་མང་དང་། ཚོང་གཉེར་ཁང་། དཔལ་འབྱོར་གྱི་བདེ་འཇགས་ལ་གནོད་པའི་བྱ་སྤྱོད་རིགས་སྤེལ་རྒྱུ་མཚམས་འཇོག་བྱེད་དགོས་པར་བརྗོད་འདུག
དེ་རྗེས་ཨ་རིའི་ཕྱི་སྲིད་དྲུང་ཆེ་ཡིས་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་བྱས་ཡོད་འདུག་ལ། གླེང་སློང་དེའི་ཁྲོད་བོད་དང་ཧོང་ཀོང་། ཡུ་གུར་བཅས་ཀྱི་འགྲོ་བ་མིའི་ཐོབ་ཐང་སྐོར་གླེང་སླེང་བྱས་ཡོད་འདུག ཁོང་གིས་རྒྱ་ནག་གི་ངོས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་ཡར་རྒྱས་གཏོང་དགོས་པ་དང་། རྒྱལ་ཁབ་གཞན་གྱི་ས་ཐོག་ཏུ་དམངས་གཙོ་དང་རང་དབང་ལ་གནོད་སྐྱོན་གཏོང་རྒྱུ་མཚམས་འཇོག་བྱེད་དགོས་པ། དེ་བཞིན་ཐའེ་ཝན་དང་རྒྱ་ནག་གཉིས་ཀྱི་འབྲེལ་ལམ་ཐད་ང་ཚོའི་ངོས་ནས་རྒྱ་ནག་གཅིག་གི་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་ཀྱང་། ལྷོ་རྒྱ་ནག་རྒྱ་མཚོ་དང་། ཐའེ་ཝན་གླིང་ཕྲན་མངའ་ཁུལ་དུ་དམག་གི་འཇིགས་སྐུལ་བྱེད་པ་ནི་གཏན་ནས་འགྲིག་གི་མེད་པར་བརྗོད་འདུག
གསར་འགོད་པ། བསོད་ནམས་ཕུན་ཚོགས།
