བོད་དོན་དེ་དབྱིན་ཡུལ་གྱི་ཁྲིམས་བཟོའི་ལས་རིམ་ནང་གི་གནད་དོན་གལ་ཆེན་ཞིག་འགྱུར་ཐབས་སུ་ཚང་མས་ནུས་པ་མཉམ་སྤུངས་གནང་དགོས་ཞེས་གསུངས།
དཔལ་ལྡན་ཚོགས་གཙོ་མཆོག་གིས་སྣེ་ཁྲིད་པའི་སྤྱི་འཐུས་སྐུ་ཚབ་ཚོགས་ཆུང་གི་ཚོགས་མི་རྣམ་པ་དབྱིན་ཡུལ་སྐུ་ཚབ་དོན་གཅོད་ཁང་དུ་ཕེབས་ཏེ་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་ཚོགས་མི་རྣམ་པར་མཇལ་འཕྲད་དང་ས་གནས་བོད་མི་རྣམས་དང་ཐུག་འཕྲད་གནང་ཡོད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་སྣེ་ཁྲིད་པའི་སྤྱི་འཐུས་སྐུ་ཚབ་ཚོགས་ཆུང་ཞིག་གིས་དབྱིན་ཡུལ་གྱི་རྒྱལ་ས་ལོན་ཌོན་ཁུལ་ལ་ཉིན་གྲངས་བཞིའི་རིང་གི་ཤེས་ཡོན་ལས་འཆར་གྱི་ལས་རིམ་ཁག་གྲུབ་རྗེས། ཟླ་འདིའི་ཚེས་༢༢ ཉིན་ཁོང་རྣམས་དབྱིན་ཡུལ་སྐུ་ཚབ་དོན་གཅོད་ཁང་ལ་ཕེབས་ནས་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་ཚོགས་མི་རྣམ་པར་མཇལ་འཕྲད་གནང་ཡོད་འདུག སྐབས་དེར་དཔལ་ལྡན་ཚོགས་གཙོས་དབྱིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དང་། ཧོང་ཀོང་། ཡུ་གུར་ཚོགས་པ་བཅས་ཀྱི་དབར་ཐུན་མོང་གི་དམིགས་ཡུལ་བསྒྲུབ་ཆེད་མཉམ་རུབ་ཀྱི་ཐོག་ནས་དབྱིན་ཡུལ་གྲོས་ཚོགས་ནང་དེ་དོན་སྐོར་གོ་རྟོགས་སྤེལ་ཐུབ་ཐབས་བྱ་རྒྱུ་གལ་ཆེན་པོ་ཡིན་པ་དང་། བོད་ཀྱི་གནད་དོན་དབྱིན་ཡུལ་གྱི་ཁྲིམས་བཟོའི་ལས་རིམ་ནང་གི་གནད་དོན་གལ་ཆེན་ཞིག་ཏུ་འགྱུར་ཐབས་སུ་ཚང་མས་ནུས་པ་མཉམ་སྤུངས་གནང་དགོས་པ། བོད་ཀྱི་རྩ་དོན་གྱི་ནུས་པ་གོང་མཐོར་གཏོང་ཆེད་འབྲེལ་ཡོད་གྲོས་ཚོགས་ཀྱི་ཚོགས་ཆུང་ཁག་དང་འབྲེལ་བ་གནང་སྟེ། ཨ་རིའི་གཞུང་གིས་གཏན་འབེབས་གནང་བའི་བོད་རྒྱའི་རྩོད་རྙོག་སེལ་བར་སྐུལ་འདེད་ཀྱི་ཁྲིམས་ཡིག་ལྟ་བུ་ཞིག་དེ་གའི་གྲོས་ཚོགས་ནས་ཀྱང་གཏན་འབེབས་ཡོང་ཐབས་གནང་དགོས་པ་སོགས་ཀྱི་སྐོར་གསུང་བཤད་ཡོད་འདུག
བོད་དོན་རྒྱབ་སྐྱོར་ཚོགས་ཁག་གི་སྐུ་ཚབ་ཚོགས་མི་རྣམས་དང་མཇལ་འཕྲད་གནང་སྐབས། རྒྱལ་སྤྱིའི་ནང་བོད་དོན་ཞུ་སྐུལ་གྱི་ནུས་པ་གོང་མཐོར་གཏོང་རྒྱུའི་ཐབས་ལམ་དང་། བོད་ཀྱི་རྩ་དོན་གྱི་ནུས་པ་གོང་མཐོར་ཡོང་བར་བོད་མིའི་སྒྲིག་འཛུགས་དང་། ཚོགས་སྡེ་ཁག མི་མང་བཅས་ཀྱི་དབར་འབྲེལ་བ་དམ་ཟབ་དགོས་རྒྱུའི་གལ་གནད། བོད་ཀྱི་རྩ་དོན་ཐོག་ཚང་མས་མཉམ་རུབ་ཀྱི་ནུས་པ་སྤུང་རྒྱུ་དང་རྒྱལ་སྤྱིའི་མཐུན་ཕྱོགས་ཚོགས་སྡེ་ཁག་དང་མི་མང་རྣམས་མཉམ་ཁྲིད་ཐུབ་རྒྱུའི་ཐབས་ལམ་བཙལ་རྒྱུའི་གལ་གནད། བོད་མི་མང་སྤྱི་འཐུས་ལྷན་ཚོགས་དང་། དབྱིན་ཡུལ་གྲོས་ཚོགས་དབར་ཕན་ཚུན་འབྲེལ་བ་སྲ་བརྟན་དང་། དེ་གའི་གྲོས་ཚོགས་ནས་བོད་དོན་ཐོག་རྒྱབ་སྐྱོར་བརྟན་པོ་ཡོང་ཐབས་བྱ་རྒྱུ། གཞན་ཡང་རྒྱ་ནག་དམར་གཞུང་གིས་བོད་ཀྱི་གནས་ཚུལ་རྫུན་སྒྲིག་འཁྱོག་བཤད་རིགས་ལ་གདོང་ལེན་གནང་ཕྱོགས་དང་། རྒྱལ་སྤྱིའི་ནང་བོད་ཀྱི་དངོས་ཡོད་གནས་ཚུལ་འགྲེལ་བརྗོད་གནང་ཐུབ་དགོས་རྒྱུའི་གལ་གནད་སོགས་ཀྱི་ཐོག་བཀའ་བསྡུར་གནང་ཡོད་འདུག
ཉིན་དེའི་དགོང་མོར་སྐུ་ཚབ་ཚོགས་ཆུང་གིས་ལོན་ཌོན་ནང་རྟེན་གཞི་བྱས་པའི་འཇམ་དབྱངས་ཆོས་ཚོགས་སུ་ས་གནས་བོད་མི་རྣམས་ལ་ཐུག་འཕྲད་དང་། བོད་ཀྱི་ཐུན་མོང་མ་ཡིན་པའི་རིག་གཞུང་དང་སྐད་ཡིག་སྲུང་སྐྱོབ་བྱ་རྒྱུར་ཚང་མས་མཉམ་རུབ་ཀྱི་ནུས་པ་སྤུང་དགོས་པ་སོགས་ཀྱི་ཐོག་གསུང་བཤད་གནང་ཡོད་པ་བོད་མིའི་སྒྲིག་འཛུགས་ཀྱི་དྲྭ་རྒྱུའི་ཐོག་བཀོད་འདུག།
གསར་འགོད་པ། བློ་བཟང་རྒྱ་མཚོ།
