བོད་པའི་གློག་བརྙན་དུས་སྟོན་ཐེངས་བཅུ་པའི་ཐོག་གི་འགྲན་སྡུར།

ཟླ་འདིའི་ཚེས་༡༡ ནས་ཉིན་གཉིས་རིང་བོད་ཀྱི་གློག་བརྙན་དུས་སྟོན་ཐེངས་བཅུ་པ་དེ་དྷ་སའི་ཉེ་འཁྲུས་ནོར་གླིང་དུ་འཚོགས་པ་དང་། དེར་གློག་བརྙན་ཐུང་གྲས་སྐར་མ་བཅུ་གཉིས་ལས་མ་རིང་བའི་འགྲན་སྡུར་ནང་གློག་བརྙན་“བསྟན་འཛིན་འཁྲབ་སྟོན་པ་”ལ་ཨང་དང་པོའི་བྱ་དགའ་ཐོབ་ཡོད་པ་རེད།

གློག་བརྙན་འགྲན་སྡུར་དེ་ནི་བོད་པ་གློག་བརྙན་བཟོ་སྐྲུན་སྦྱོང་བརྡར་བ་ཚོའི་ཆེད་དུ་ཡིན་པ་དང་། ཐེངས་འདིར་འགྲན་སྡུར་ནང་གློག་བརྙན་གསར་པ་ལྔ་བྱུང་ཡོད་པའི་ནང་ནང་ནས་ཟུར་དཔང་པས་བརྒྱ་ཆ་སྤྲད་པའི་ཨང་དང་པོར་གཟེངས་རྟགས་ཨ་སྒོར་གཅིག་སྟོང་དང་། ལྟད་མོ་བས་དགའ་མོས་བྱེད་སའི་གློག་བརྙན་ལ་གཟེངས་རྟགས་ཨ་སྒོར་སུམ་བརྒྱ་ཡོད་པ་གཉིས་ཀ་བསྟན་འཛིན་འཁྲབ་སྟོན་པ་ལ་ཐོབ་ཡོད་པ་རེད།

གློག་བརྙན་དུས་སྟོན་དེའི་ཐོག་རྒྱུན་དུ་གློག་བརྙན་བོད་ཕྱི་ནང་གཉིས་ནས་བཟོས་པའི་བོད་ཀྱི་སྐོར་དང་ཡང་ན་བོད་མིས་བཟོས་པ་གཉིས་ཁོ་ན་སྟོན་གྱི་ཡོད་པ་རེད།

གོ་སྒྲིག་པས་བོད་ཀྱི་གློག་བརྙན་དུས་སྟོན་འགོ་བཙུགས་ནས་ལོ་བཅུ་འཁོར་གྱི་ཡོད་པས། གློག་བརྙན་ཁག་ཡར་རྒྱས་སོང་ཡོད་པ་དང་། མཉམ་ཞུགས་བྱེད་མཁན་དང་རྒྱབ་སྐོར་བྱེད་མཁན་ཤུགས་ཆེ་རུ་འགྲོ་བའི་རེ་བ་ཡོད་སྐོར་གསུངས་སོང་།

གློག་བརྙན་དུས་སྟོན་དེ་༢༠༠༨ལོར་རྒྱ་ནག་གི་བཙན་འོག་དུ་ཡོད་པའི་བོད་མི་ཚོར་དོན་གྲུབ་དབང་ཆེན་གྱིས་བོད་དོན་དང་འབྲེལ་བའི་བཅར་འདྲི་བྱས་པའི་གློག་བརྙན་<<འཇིགས་བྲལ་>>ཞེས་པ་བཟོས་རྗེས།དོན་གྲུབ་དབང་ཆེན་རྒྱ་གཞུང་གིས་འཇུ་བཟུང་བྱས་ཏེ། ལོ་དྲུག་གི་བཙོན་འཇུག་ཁྲིམས་ཐག་བཅད་པར། རྗེས་དྲན་ཆེད་དུ་༢༠༠༩ལོར་འགོ་འཛུགས་བྱས་པ་ཞིག་ཡིན་པ་རེད།།

གསར་འགོད་པ་ཆོས་ཉིད་འོད་ཟེར།