བོད་མཐོ་སྒང་གི་གཙང་པོ་དང་འབྲེལ་བའི་དུས་ཐུང་འགྲེམས་སྟོན་ཞིག་གོ་སྒྲིག་བྱས་འདུག
རྒྱ་ནག་གིས་བོད་ནང་འཛུགས་སྐྲུན་ལས་གཞི་དུ་མ་སྤེལ་པའི་རྐྱེན་གྱིས་བོད་ཀྱི་ཁོར་ཡུག་གཏོར་སྐྱོན་ཚབས་ཆེན་ཕོག་བཞིན་ཡོད་པ་དང་། དེ་བཞིན་བོད་ནང་ཡོད་པའི་བོད་ཀྱི་གཙང་པོ་མང་པོ་ཞིག་གི་ཐོག་ཆུ་རགས་གསར་རྒྱག་བྱས་པ་དང་། གློག་ཁང་འཛུགས་སྐྲུན་བྱས་པའི་རྐྱེན་གྱིས་བོད་གཅིག་པུ་མ་ཡིན་པར། ཁྱིམ་མཚེས་རྒྱལ་ཁབ་མང་པོ་ཞིག་ལ་ཡང་གནོད་སྐྱོན་ཕོག་གི་ཡོད་པ་བོད་ཀྱི་ཁོར་ཡུག་སྐོར་ཉམས་ཞིབ་པ་པད་མ་དབང་རྒྱལ་གྱིས་བརྗོད་སོང་།
ཕྱི་ཚེས་༨ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་འགྲེམས་སྟོན་ཁང་དུ་བོད་མཐོ་སྒང་གི་གཙང་པོ། འཁྱམས་རོམ་ནས་ལུང་གཤོངས་བར་(Rivers of the Sky, Glacies to valleys)ཞེས་པའི་བརྗོད་གཞི་ཐོག་དུས་ཐུང་འགྲེམས་སྟོན་ཞིག་དབུ་འབྱེད་གནང་སོང་། དུས་ཐུང་འགྲེམས་སྟོན་གྱི་དབུ་འབྱེད་སྐབས་སུ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་ཕེབས་གནང་སོང་ལ། དེ་བཞིན་འཇར་མན་ནང་གནས་སྡོད་ཁོར་ཡུག་སྐོར་ཉམས་ཞིབ་པ་པད་མ་དབང་རྒྱལ་ལགས་ཕེབས་གནང་འདུག པད་མ་དབང་རྒྱལ་ལགས་ནི་འཇར་མན་ནང་གནས་སྡོད་བྱེད་མཁན་བོད་མི་ཞིག་ཡིན་འདུག་པ་དང་། ཁོང་ཕྱི་ལོ་༡༩༨༧ ལོར་བོད་ལ་ཐོག་མ་ཕྱིན་དུས་བོད་ནང་རྒྱ་ནག་གཞུང་གིས་འཛུགས་སྐྲུན་ལས་གཞི་འདྲ་མིན་སྤེལ་པའི་རྐྱེན་གྱིས་བོད་ནང་གི་ཁོར་ཡུག་ལ་གཏོར་སྐྱོན་ཚབས་ཆེན་ཕོག་བཞིན་ཡོད་པའི་སྐོར་དོ་སྣང་བྱུང་ཡོད་འདུག་པ་དང་། ཕྱིས་སུ་ཁོང་བོད་ལ་ཐེངས་མ་༡༠ ཙམ་ཕྱིན་ནས་དུས་ཡུན་དེ་དག་གི་རིང་ཁོང་གིས་རྒྱ་ནག་གཞུང་གིས་བོད་ཀྱི་ཤིང་ནགས་གཅོད་འབྲེག་དང་། གཙང་པོ་འདྲ་མིན་ཐོག་ཆུ་མཛོད་གསར་རྒྱག
དེ་བཞིན་རྡོ་ཉོ་ཚོང་བྱེད་པ་སོགས་ཀྱི་བོད་ནང་གི་ཁོར་ཡུག་ལ་གཏོར་སྐྱོན་ཕོག་བཞིན་པ་དག། པར་མང་པོ་ཞིག་བརྒྱབ་ནས་གསོག་ཉར་བྱས་ཡོད་འདུག་ཅིང་། དེ་རིང་དུས་ཐུང་འགྲེམས་སྟོན་སྐབས་སུ་གློག་པར་བརྒྱུད་ནས་པར་རིགས་དེ་དག་བསྟན་སོང་། སྐབས་དེ་དུས་ཁོང་གི་བརྗོད་དོན་ལ་རྒྱ་ནག་གཞུང་གིས་རང་གི་དཔལ་འབྱོར་ཡར་རྒྱས་འགྲོ་ཆེད་དུ་བོད་ཀྱི་རང་བྱུང་ཐོན་ཁུངས་རྣམས་འཁྱེར་བཞིན་ཡོད་པ་བརྟེན། གནད་དོན་དེ་དག་རྒྱལ་སྤྱི་ཚོགས་ལ་ངོ་སྤྲོད་བྱེད་ནི་ཧ་ཅང་གལ་ཆེན་པོ་ཡིན་པ་བརྗོད་གནང་སོང་ལ། ད་དུང་ཁོང་གིས་བོད་ནང་ཐེངས་༡༠ སོང་བའི་རིང་བོད་ཀྱི་ཤིང་ནགས་མང་པོ་ཞིག་རྒྱ་ནག་གིས་གཅོད་འབྲེག་བྱེད་བཞིན་པ་མཐོང་དུས་ཧ་ཅང་གི་བློ་ཕམ་བྱུང་ཡོད་ཚུལ་དང་། བོད་ཀྱི་ཁོར་ཡུག་ནི་བོད་གཅིག་པུ་མ་ཟད། ཨེ་ཤེ་ཡའི་ཁྱིམ་མཚེས་རྒྱལ་ཁབ་ཚོ་ལ་ཧ་ཅང་གལ་འགངས་ཆེན་པོ་ཡིན་པས། ཁོང་རང་ཉིད་ཀྱི་ངོས་ནས་མ་སྐུལ་དྭང་བླངས་ཐོག་ནས་བོད་ནང་ཤིང་སྡོང་༥༠༠༠ ཟམ་གསར་འཛུགས་བྱས་ཡོད་པ་བརྗོད་གནང་སོང་། ཕྱིས་སུ་ཁོང་རྒྱ་ནག་གཞུང་གིས་བོད་ནང་ཡོང་མ་བཅུག་ནས་བཀག་འགོག་བྱས་ཡོད་འདུག
དེ་བཞིན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་གིས་ཕྱི་ལོ་༡༩༩༢ ལོར་༧གོང་ས་མཆོག་གིས་སའི་གོ་ལ་ལྷན་ཚོགས་ཐོག་༧གོང་ས་མཆོག་གིས་གནང་པའིབཀའ་སློབ་ཅིག་ལུང་དྲངས་ནས་བརྗོད་དོན་ལ་བོད་ཀྱི་ཁོར་ཡུག་དང་གཙང་པོ་རྣམས་ནི་འཛམ་གླིང་གི་མཐོ་སྒང་ཡིན་པས། བོད་ཀྱི་ཁོར་ཡུག་ལ་གཏོར་སྐྱོན་ཕོག་ན་ལྷོ་ཤར་ཨེ་ཤེ་ཡའི་ས་ཆ་མང་པོ་ཞིག་གི་ཁོར་ཡུག་ལའང་གཏོར་སྐྱོན་ཡོང་གི་ཡོད་པ་བརྟེན། བོད་ཀྱི་ཁོར་ཡུག་གི་གལ་གནད་དེ་རྒྱལ་སྤྱིའི་ཐོག་ངོ་སྤྲོད་ཐུབ་རྒྱུ་ནི་ཧ་ཅང་གི་གལ་ཆེ་ཡིན་པ་དང་། ད་དུང་འགྲེམས་སྟོན་ཁང་གིས་པར་རིགས་ཐོག་བྲིས་པའི་བོད་ཀྱི་གཙང་པོ་རྣམས་ཀྱི་མིང་རྣམས་ལ་བོད་ཀྱི་མིང་ངེས་པ་དུ་བྲིས་ནས་བོད་ཀྱི་གཙང་པོ་བོད་པའི་ཡིན་པ་ངོ་སྤྲོད་བྱེད་དགོས་པ་བརྗོད་སོང་།
དེ་རིང་གི་དུས་ཐུང་འགྲེམས་སྟོན་སྐབས་སུ་གཞན་ཡང་མི་མང་མང་པོ་ཕེབས་འདུག་ཅིང་། ཕྱི་དྲིལ་བོད་ཀྱི་འགྲེམས་སྟོན་ཁང་གིས་དུས་ཐུང་འགྲེམས་སྟོན་སྐབས་སུ་བོད་ཀྱི་གཙང་པོ་དང་། གངས་རི་གཏན་འཇགས་འཁྱམས་རོམ་སོགས་སྔོན་དང་ད་ལྟ་བར་འགྱུར་ལྡོག་གང་འདྲ་འགྲོ་བཞིན་ཡོད་མེད་སྐོར་པར་དང་བརྙན་སོགས་དུ་མ་ཞིག་བསྟན་གནང་སོང་།།
གསར་འགོད་པ། བསོད་ནམས་ཕུན་ཚོགས།
