བོད་མདོ་སྨད་ཡ་རྫི་རྫོང་ཀ་རིང་ཡུལ་ཚོའི་ཡ་ཀ་སྡེ་དང་བིས་ཚང་སྡེ་བ་གཉིས་བཙན་གྱིས་གནས་སྤོ་དགོས་པའི་བཀའ་བཏང་ཡོད་འདུག
བོད་ནང་རྒྱ་ནག་གཞུང་གིས་འཛུགས་སྐྲུན་གྱི་ལས་གཞི་འདྲ་མིན་སྤེལ་གྱི་ཡོད་པའི་རྐྱེན་གྱིས་བོད་མི་མང་པོ་གནས་གཞན་ལ་སྤོ་དགོས་འབྱུང་བཞིན་ཡོད་པ་ལྟར། བོད་མདོ་སྨད་མཚོ་སྔོན་ཞིང་ཆེན་མཚོ་ཤར་ས་ཁུལ་ཡ་རྫི་རྫོང་ཀ་རིང་ཡུལ་ཚོའི་ཡ་ཀ་སྡེ་དང་བིས་ཚང་སྡེ་བ་གཉིས་བཙན་གྱིས་གནས་སྤོ་དགོས་པའི་བཀའ་བཏང་ཡོད་འདུག
ཕྱི་ཚེས་༡༩ ཉིན་བོད་གནས་ལྟ་ཞིབ་ཁང་གིས་གནས་ཚུལ་སྤེལ་གསལ་ལྟར་ན། ཟླ་བ་སྔོན་མའི་ཟླ་མཇུག་ཏུ་རྒྱ་ནག་གཞུང་གིས་ས་རུད་ཀྱི་ཉེན་ཁ་ཡོད་ཚུལ་བཤད་ནས་ཨ་མྱེས་ར་སྟོད་གནས་རིའི་འདབས་སུ་ཆགས་པའི་ཡར་ཀ་སྡེ་བ་དང་བིས་ཚང་སྡེ་བ་གཉིས་ཀྱི་ཁྱིམ་ཚང་ཕྱེད་ཀ་ལྷག་གནས་སྤོ་དགོས་པའི་བཙན་བཀའ་བཏང་ཡོད་འདུག སྐབས་དེར་ས་གནས་གཞུང་གིས་བོད་མི་རྣམས་ལ་གདམ་ག་གཉིས་སྤྲད་ཡོད་པ་སྟེ། ཁྱིམ་ཚང་རེར་རྒྱ་ནག་གཞུང་གི་རོགས་དངུལ་རྒྱ་སྒོར་ཁྲི་ ༡༥ སྤྲད་ནས་གནས་སྤོ་བྱེད་དུ་བཅུག་པ་དང་ཡང་ན་ཡ་རྫི་རྫོང་ཐོག་ཏུ་གཞུང་གིས་བརྒྱབས་པའི་ཁང་པའི་ནང་གནས་སྤོ་བྱེད་དུ་བཅུག་པ་བཅས་ཡིན་འདུག རོགས་དངུལ་ལེན་མཁན་ཚོར་ཁང་པ་གསར་པ་མེད་ལ་དངུལ་དེས་ས་ཉོ་བ་དང་ཁང་པ་རྒྱག་པར་འདང་གི་མེད་པ་དང་། དེ་བཞིན་གཞུང་གི་ཁང་པར་སྤོ་མཁན་ཚོར་རོགས་དངུལ་སོགས་གང་ཡང་མེད་པས། གང་ལྟར་གདམ་ག་གཉིས་ཀ་ཡིས་བོད་མི་ཚོའི་འཚོ་གནས་ཐད་དཀའ་ངལ་ཆེན་པོ་འཕྲད་རྒྱུ་ཡིན་འདུག
ཡལ་ཀ་སྡེ་བ་ནི་ཀ་རིང་ཡུལ་ཚོར་ས་མ་འབྲོག་གི་སྡེ་བ་ཆེ་ཆུང་༢༢ ཡས་མས་ཤིག་ཡོད་པའི་ནང་གི་གཅིག་དང་། སྡེ་བ་དེར་ཁྱིམ་ཚང ༢༠༠ ཙམ་ཡོད་ཅིང་། དེ་བཞིན་བིས་ཚང་སྡེ་བར་ཁྱིམ་ཚང་བརྒྱ་ལྷག་ཡོད་འདུག དེའི་ཁོངས་བརྒྱ་ཆ་དགུ་བཅུ་ཞིང་པ་ཡིན་འདུག
གནས་ཚུལ་མཁོ་སྤྲོད་པས་རྒྱ་གཞུང་གིས་ས་གནས་བོད་མིར་ས་རུད་ཀྱི་ཉེན་ཁ་ཡོད་ཚུལ་བཤད་པ་དེ་ནི་གཏེར་ཁ་སྔོག་འདོན་གྱི་ལས་གཞི་སྤེལ་ཆེད་ཀྱི་ཁ་གཡར་ས་ཞིག་ཡིན་པ་དང་། ལོ་འགའི་སྔོན་ནས་བཟུང་རི་བོ་གངས་དཀར་གྱི་གནས་སུ་ཚན་རིག་པས་རྟོག་ཞིབ་དང་ས་གཞིས་བརྟག་དཔྱད་སོགས་བྱས་ཡོད་ཀྱང་རི་བོ་དེའི་ནང་གཏེར་རྫས་གང་ཞིག་རྙེད་སོན་བྱུང་ཡོད་མེད་ཁ་གསལ་མེད་པའི་ཁར། ས་གནས་མང་ཚོགས་ཀྱི་ངག་རྒྱུན་ལྟར་ན། རི་བོ་དེའི་ནང་མཆོད་རྟེན་བརྒྱད་ཡོད་རབས་གླེང་སྲོལ་ཡོད་པར་བརྗོད་འདུག་ལ། དེ་བཞིན་རིག་གནས་གསར་བརྗེའི་སྐབས་སུ་དཔེ་ཆ་དང་མཆོད་རྫས་རྩ་ཆེན་མང་པོ་གཏེར་དུ་སྦས་པར་བཤད་སྲོལ་འདུག་ནའང་། རྒྱ་ནག་གིས་རྒྱབ་རི་དེ་སྔོག་འདོན་བྱེད་དོན་ནི་བཤད་སྲོལ་དུ་མཆོད་རྟེན་དེ་དག་མ་ཡིན་པར་གཏེར་རྫས་རིགས་ཤིག་ཡིན་པར་ཡིད་ཆེས་བྱེད་ཀྱི་ཡོད་འདུག
ད་ལྟའི་ཆར་ཡར་ཀ་གྲོང་ཚོའི་ཁྱིམ་ཚང་ཁ་ཤས་ཡ་རྩེ་རྫོང་ཐོག་ཏུ་གཞུང་གིས་བརྒྱབ་པའི་ཁང་པར་གནས་སྤོ་བྱེད་དུ་བཅུག་ཟིན་པ་དང་ཁ་ཤས་འགྲོ་འདོད་མེད་པར་རང་ཡུལ་དུ་བསྡད་མ་ཆོག་པ་བཟོས་འདུག ཡ་རྫི་རྫོང་ཀ་རིང་ཡུལ་ཚོའི་ཡ་གི་དང་མ་གི་སྡེ་བ་གཉིས་གྱི་འཚོ་རྟེན་གཙོ་བོ་ཞིང་ལས་ཡིན་པ་དང་། འབྲུ་རིགས་ལ་གྲོ་ནས་སྲན་གསུམ་དང་། ཟར་མ་དང་ལོ་དཀར་སོགས་འདེབས་ལས་བྱེད་ཀྱི་ཡོད་པ་དང་། ཡུལ་མི་ཚོར་ས་ཞིང་གི་ཐོན་ཁུངས་ཕུན་སུམ་ཚོགས་པ་ཡོད་འདུག།
གསར་འགོད་པ། བསོད་ནམས་ཕུན་ཚོགས།
