བོད་མིའི་སྒྲིག་འཛུགས་ཀྱིས་རྒྱ་གར་རང་བཙན་ཉིན་མོ་སྲུང་བརྩི་ཞུས་སོང་།
ཟླ་༨ པའི་ཚེས་༡༥ ཉིན་ནི་རྒྱ་གར་རང་བཙན་ཐོབ་ནས་ལོ་ངོ་༧༤ འཁོར་བའི་ཉིན་མོ་ཡིན་པ་དང་། ལོ་ལྟར་བཞིན་ཐེངས་འདིར་བོད་མིའི་སྒྲིག་འཛུགས་ཀྱི་བཀའ་ཤག་མདུན་ཐང་དུ། སྲིད་སྐྱོང་གཙོས་པས་བཀའ་བློན་རྣམ་པ་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་མཉམ་འཛོམས་ཐོག སྲིད་སྐྱོང་གིས་རྒྱ་གར་གྱི་རྒྱལ་དར་སྒྲེང་འཛུགས་བྱས་ཏེ་ཉིན་མོ་སྲུང་བརྩི་ཞུས་སོང་།
སྲིད་སྐྱོང་བློ་བཟང་སེང་གེ་མཆོག་གིས་གསར་འགོད་པ་ཚོར། “ དེ་རིང་རྒྱ་གར་རང་བཙན་ཐོབ་ནས་ལོ་༧༤ འཁོར་བའི་ཉིན་དེར་བོད་མིའི་སྒྲིག་འཛུགས་ཀྱི་ཚབ་ཞུས་ནས་རྒྱ་གར་གཞུང་དང་མི་མང་ལ་མཚམས་འདྲི་ཞུ་རྒྱུ་དང་། ༧གོང་ས་མཆོག་དབུས་པའི་བཙན་བྱོལ་བོད་མི་རྣམས་ལ་རྒྱ་གར་གཞུང་དམངས་གཉིས་ནས་ད་བར་གཟིགས་རྟོག་གནང་བར་བཀའ་དྲིན་ཆེ་ཞུ་རྒྱུ་ཡིན། དེ་ནས་རྒྱ་གར་གྱི་དཔལ་འབྱོར་དང་ཆབ་སྲིད་སོགས་གང་ཅིའི་ཐད་ནས་ཡར་རྒྱས་འགྲོ་བ་ཤོག་ཅེས་སྨོན་འདུན་ཞུ་རྒྱུ་ཡིན།”ཅེས་དང་།
“ཉེ་ཆར་རྒྱ་གར་གྱི་ས་མཚམས་སུ་གནས་ཚུལ་བྱུང་སྐབས། རྒྱ་གར་ཡོངས་སུ་བོད་དེ་གང་འདྲ་གལ་ཆེན་པོ་ཡིན་པའི་གོ་རྟོགས་གང་ལ་གང་འཚམ་ཞིག་བྱུང་འདུག དེ་བྱུང་བ་ལ་བརྟེན་ནས་རང་བཞིན་གྱི་ཚོར་བ་དང་བརྩེ་བ། རྒྱབ་སྐྱོར་ཡིན་ནའང་མང་དུ་འགྲོ་བའི་རེ་བ་བྱེད་ཀྱི་ཡོད། དེ་སྔོན་རྒྱ་གར་དང་རྒྱ་ནག་བར་ས་ཡི་ས་མཚམས་ཞིག་རྩ་བ་ནས་མེད་པ་དང་། ས་མཚམས་དེ་ནི་བོད་དང་རྒྱ་གར་གྱི་ཡིན་པ་དང་། བོད་ཀྱི་ལུང་པ་ཤོར་ནས་ས་མཚམས་གཙོས་པའི་རྒྱ་ནག་གི་གནོན་ཤུགས་འོག རྒྱ་གར་ལ་གདོང་ལེན་བྱེད་དགོས་པ་དང་ཆབ་སྲིད་ཀྱི་གནས་ཚུལ་རང་བཞིན་གྱིས་ཆགས་པ་གསལ་པོ་ཞེ་དྲག་ཆགས་འདུག་པས། རྒྱ་གར་མི་མང་ཡོངས་ཀྱིས་རྒྱ་གར་དང་བོད་བར་གྱི་ས་མཚམས་དེ་ལོ་རྒྱུས་ཐོག་ནས་ཡིན་པ་དང་། ད་ལྟ་བོད་དེ་བཙན་བཟུང་བྱས་ནས་གནས་བསྡད་ཡོད་པ། བོད་ནང་ཡོད་པའི་བོད་མི་ཚོ་གདུག་རྩུབ་འོག་གནས་བསྡད་ཡོད་པ་མཁྱེན་པ་གནང་རོགས་གནང་། ད་ལྟ་བར་དུ་རྒྱབ་སྐྱོར་ཧ་ལས་པ་གནང་བྱུང་། མུ་མཐུད་ནས་གནང་རོགས་ཞུ་རྒྱུ།”ཅེས་གསུངས་སོང་།
གཞུང་འབྲེལ་གྱི་མཛད་སྒོ་གྲུབ་རྗེས། སྲིད་སྐྱོང་མཆོག་ཀང་ར་རྫོང་གི་དུས་དྲན་སྲུང་བརྩིའི་མཛད་སྒོར་སྐུ་མགྲོན་དུ་ཕེབས་རྒྱུའི་མཛད་རིམ་འདུག །
གསར་འགོད་པ་སྐལ་བཟང་དོན་གྲུབ།
