བོད་སྐད་ཐོག་བྱིས་པའི་འགུལ་བརྙན་གསར་བཟོ་དང་ཕབ་བསྒྱུར།
བོད་མིའི་སྒྲིག་འཛུགས་ཀྱི་ཤེས་རིག་ལས་ཀྱིས་ཆེད་ལས་པ་དང་མཉམ་ལས་ཐོག བོད་སྐད་ཐོག་བྱིས་པའི་འགུལ་བརྙན་གཉིས་གསར་བཟོ་བྱས་འདུག་པ་དང་། དེ་བཞིན་ཧིན་རྡི་སྐད་ཐོག་ཡོད་པའི་བརྙན་ཐུང་གཉིས་བོད་སྐད་ཐོག་ཕབ་སབསྒྱུར་བྱས་ཡོད་འདུག
ཟླ་འདིའི་ཚེས་༢༡ ཉིན་དྷ་ས་གངས་སྐྱིད་གཉའ་ཁྲི་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཤེས་ཡོན་ཚན་པས། འཇམ་དཔལ་འགུལ་བརྙན་ཁང་གི་འགུལ་བརྙན་བཟོ་སྐྲུན་པ་འཇམ་དཔལ་རྡོ་རྗེ་དང་མཉམ་ལས་ཐོག བྱིས་པའི་འགུལ་བརྙན་གསར་བཟོ་བྱས་པ་དང་། དེ་བཞིན་བོད་ཀྱི་སྒྲ་སྒྱུར་ཁང་དང་མཉམ་ལས་ཐོག ཧིན་རྡི་སྐད་ཐོག་ཡོད་པའི་སྟོན་པའི་རྣམ་ཐར་དང་། སྟོན་པ་དང་འབྲེལ་བའི་བརྙན་ཐུང་གཉིས་བོད་སྐད་ཐོག་ཕབ་སྒྱུར་ལེགས་གྲུབ་བྱུང་བའི་དབུ་འབྱེད་ཀྱི་མཛད་སྒོ་འཚོགས་སོང་།
དེ་གར་སྐུ་མགྲོན་ཤེས་རིག་བཀའ་བློན་དངོས་གྲུབ་ཚེ་རིང་དང་། དྲུང་ཆེ་རྣམ་པ་གཉིས། ཆེད་ལས་པ་རྣམས། དཔེ་སྟོན་སློབ་གྲྭའི་འཛིན་རིམ་གསུམ་པའི་སློབ་མ་རྣམས། ཤེས་རིག་ལས་ཁུངས་ཀྱི་ལས་བྱེད་བཅས་མཉམ་ཞུགས་བྱས་སོང་།
ཤེས་རིག་གི་ཤེས་ཡོན་ཚན་པའི་འགན་འཛིན་ཚེ་རིང་བསམ་གྲུབ་ཀྱིས་འགྲེལ་བརྗོད་བྱས་པ་ལྟར་ན། གཅིག་ནས་ཕྲུ་གུ་ཚོས་འགུལ་བརྙན་ལ་དགའ་མོས་ཆེན་པོ་བྱེད་ཀྱི་ཡོད་པ་དང་། དེ་བཞིན་ཤེས་རིག་གི་ཚོགས་འདུ་མང་པོའི་ནང་བོད་སྐད་ཀྱི་བྱིས་པའི་འགུལ་བརྙན་རིགས་བཟོ་སྐྲུན་དགོས་པའི་བསམ་འཆར་མང་པོ་བཏོན་རྐྱེན། འགུལ་བརྙན་ཐོག་ནས་བྱིས་པ་ཚོར་བོད་ཀྱི་སྐད་ཡིག་སློབ་ཁྲིད་བྱེད་ཐུབ་པའི་རམ་འདེགས་ཞུ་ཆེད་དུ་ཡིན་འདུག བོད་པའི་སྤྱི་ཚོགས་ནང་ལ་འགུལ་བརྙན་སོགས་ཀྱི་ཆེད་ལས་མི་སྣ་གསོ་སྐྱོང་ཆེད་དུ་ཤེས་རིག་ལས་ཁང་གིས་འཇམ་དཔལ་འགུལ་བརྙན་ཁང་དང་བོད་ཀྱི་སྒྲ་སྒྱུར་ཁང་གཉིས་དང་མཉམ་ལས་བྱས་ཡོད་འདུག
གསར་བཟོ་བྱས་པའི་བྱིས་པའི་འགུལ་བརྙན་དྲན་པ་བརྗེད་སླ་བའི་ཨ་ཁུ་ཕག་པ་ཞེས་པ་དེར་ལེའུ་༡༠ ཡོད་འདུག་ཀྱང་། ད་ལྟའི་ལེའུ་༢ འགུལ་བརྙན་ཐོག་གསར་བཟོ་བྱས་ཟིན་ཡོད་འདུག དེ་ཡང་སྒྲུང་འབྲི་མཁན་སྐལ་བཟང་མཁས་གྲུབ་དང་འཁྲབ་ཁྲིད་པ་ཀརྨ་སྨོན་ལམ། འགུལ་བརྙན་བཟོ་སྐྲུན་པ་འཇམ་དཔལ་འགུལ་བརྙན་ཁང་གི་འཇམ་དཔལ་རྡོ་རྗེ་རེད་འདུག
དེ་བཞིན་ཕབ་སྒྱུར་བྱས་པའི་བརྙན་ཐུང་གཉིས་ནི་རྒྱ་གར་གྱི་ཨེ་པེག་(EPIC)བརྙན་འཕྲིན་ཁང་གིས་གསར་བཟོ་བྱས་པའི་སྟོན་པའི་རྣམ་ཐར་དང་འབྲེལ་བའི་བརྙན་ཐུང་༡༣ ལས་༢ ལ་ཕབ་སྒྱུར་བྱས་ཟིན་ཡོད་པ་དང་། དོ་བདག་གིས་ཆོག་མཆན་ཐོབ་པའི་ཐོག་ནས་ཤེས་ཡོན་ཚན་པའི་འགན་འཛིན་ཟུར་པ་ཀརྨ་སྨོན་ལམ་གྱིས་ཧིན་སྐད་ནས་བོད་སྒྱུར་དང་། བོད་ཀྱི་སྒྲ་སྒྱུར་ཁང་གིས་སྒྲ་འཇུག་བྱས་ཡོད་འདུག
མ་འོངས་པའི་འཆར་གཞིའི་ནང་དེ་སྔོན་ཤེས་རིག་ལས་ཁང་གིས་པར་སྐྲུན་བྱས་པའི་ཕ་ཡུལ་ཚགས་ཤོག་སྟེང་འབྱོར་སྐྱལ་དང་དོན་གྲུབ་ཀྱི་རི་མོའི་སྒྲུང་ཐུང་གི་ལེའུ་རྣམས། བལ་ཡུལ་དུ་ཡོད་པའི་བོད་མི་འགུལ་བརྙན་བཟོ་སྐྲུན་པ་ཞིག་དང་མཉམ་ལས་བྱེད་འཆར་ཡོད་འདུག
ཤེས་རིག་བཀའ་བློན་དངོས་གྲུབ་ཚེ་རིང་གིས། བཙན་བྱོལ་ནང་དུ་བོད་ཀྱི་བྱིས་པའི་རྩོམ་ཡིག་གི་དགོས་མཁོ་ཆེན་པོ་ཡོད་ཀྱང་། ད་ལྟའི་ཆར་ཆ་ཚང་བ་མེད་པར་སྟོང་ཆ་ཆེན་པོ་ཡོད་པས། བྱིས་པའི་འགུལ་བརྙན་དེ་ཚོས་ཕན་ཐོགས་ཡོད་སྐོར་དང་། ཤེས་ཡོན་ཚན་པས་འགན་ཁུར་བླངས་ནས་ལས་འཆར་དེར་འབད་བརྩོན་བྱས་པར་བསྔགས་བརྗོད་གནང་སོང་།
འགུལ་བརྙན་དང་སྒྲ་འཇུག་གི་བརྙན་ཐུང་དེ་དག་ཤེས་རིག་གི་དྲ་རྒྱ་བོད་ཡིག་སློབ་སྦྱོང་ཞེས་པ་ནས་ཕབ་ལེན་བྱེད་ཆོག་གི་ཡོད་འདུག
འདི་ག་གསར་འགོད་པས་འཇམ་དཔལ་འགུལ་བརྙན་ཁང་གི་འཇམ་དཔལ་རྡོ་རྗེ་ལ། འགུལ་བརྙན་དེ་གཉིས་བཟོ་བར་དུས་ཚོད་ག་ཚོད་འགོར་ཡོད་སྐོར་དྲིས་པར། ཁོང་གིས་འགུལ་བརྙན་ལེའུ་དང་པོ་དེར་ལོ་གཅིག་དང་། གཉིས་པ་དེར་ཟླ་བ་དྲུག་འགོར་ཡོད་སྐོར་ལན་འདེབས་བྱས་བྱུང་།།
གསར་འགོད་པ་སྐལ་བཟང་དོན་གྲུབ།
