བྱང་ཀོ་རི་ཡས་མཱ་ཀི་པེན་སེ་དང་ཐུག་འཕྲད་བྱ་རྒྱུ་ཕྱིར་འཐེན་བྱས་སོང་ཟེར།

ཟླ་འདིའི་ཕྱི་ཚེས་༢༡ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་སྲིད་འཛིན་གཞོན་པ་མཱ་ཀི་པེན་སེ་དང་། བྱང་ཀོ་རི་ཡའི་སྲིད་འཛིན་ཀིམ་ཇོང་ཨུན་གྱི་སྲིང་མོ་ཀིམ་ཡོ་ཇོང་གཉིས་ལྷོ་ཀོ་རི་ཡར་འཚོགས་པའི་དགུན་ཁའི་ཨོ་རྩལ་འགྲན་ཚོགས་ཀྱི་མཇུག་ཏུ་ཐུག་འཕྲད་བྱ་རྒྱུ་བྱས་འདུག་ཀྱང་། ཐུག་འཕྲད་བྱེད་ལ་ཉེ་དུས་བྱང་ཀོ་རི་ཡས་ཕྱིར་འཐེན་བྱས་ཡོད་འདུག

དེ་ཡང་ཨ་རིའི་མགྲིན་ཚབ་པ་ཞིག་གིས་མཱ་ཀི་པེན་སེ་དང་། བྱང་ཀོ་རི་ཡའི་སྲིད་འཛིན་ཀིམ་ཇོང་ཨུན་གྱི་སྲིང་མོ་ཀིམ་ཡོ་ཇོང་དང་ཐུག་འཕྲད་བྱ་རྒྱུའི་དུས་ཚོད་བསྒྲིགས་ཡོད་པ་རེད་ཅེས་བརྗོད་འདུག་ཅིང་། དེ་ནི་ཊོམ་སྲིད་གཞུང་དང་བྱང་ཀོ་རི་ཡ་གཉིས་དངོས་སུ་གཞུང་འབྲེལ་གྱི་ཐོག་ནས་འབྲེལ་བ་བྱུང་བ་ཐེངས་དང་པོ་དེ་ཆགས་ཡོད་པ་རེད་འདུག ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལྕམ་ཧཱེ་ཐེར་ནོར་ཊིས་བྱང་ཀོ་རི་ཡའི་སྐུ་ཚབ་དང་ཐུག་འཕྲད་ཡོང་སྲིད་པའི་གནས་བབ་ཅིག་བྱུང་སྟེ། ཐུག་འཕྲད་ཀྱི་གོ་སྐབས་བྱུང་ཚེ་ཨ་རིའི་སྲིད་འཛིན་གཞོན་པ་མཱ་ཀི་པེན་སེས་དེ་བརྒྱུད་བྱང་ཀོ་རི་ཡའི་རྡུལ་མཚོན་བཟོ་སྐྲུན་གྱི་ལས་གཞི་མཚམས་འཇོག་ཡོང་རྒྱུའི་གལ་གནད་གླེང་རྒྱུ་བྱས་ཡོད་སྐོར་བརྗོད་ཡོད་པ་དང་། དེ་བཞིན་མོས་“ཐུག་་འཕྲད་བྱེད་རྒྱུའི་སྐེ་མཚམས་ལ་སླེབས་དུས་ཀོ་རི་ཡ་མི་མང་སྤྱི་མཐུན་རྒྱལ་ཁབ་ཀྱི་ལས་བྱེད་ཚོས་ཐུག་འཕྲད་མི་བྱེད་རྒྱུར་ཐག་བཅད་པ་རེད། གོ་སྐབས་འདི་མ་བྱུང་བར་ང་ཚོར་འགྱོད་པ་ཡོད་”ཅེས་བསྒྲགས་གཏམ་ནང་བརྗོད་ཡོད་འདུག་ཀྱང་། བྱང་ཀོ་རི་ཡས་ཨ་རིའི་སྐད་ཆ་དེར་ད་བར་བརྡ་ལན་གང་ཡང་སྤྲད་མེད་འདུག

ད་ཐེངས་ལྷོ་ཀོ་རི་ཡར་འཚོགས་པའི་དགུན་ཁའི་ཨོ་རྩལ་འགྲན་ཚོགས་ནང་བྱང་ཀོ་རི་ཡ་མཉམ་ཞུགས་བྱས་པ་དེ་ནི། ཀོ་རི་ཡ་ཕྱེད་གླིང་ཕྲན་ཐོག་ཡང་ཡང་ནས་ཛ་དྲག་གི་གནས་སྟངས་ཆགས་བཞིན་པའི་འབྲེལ་ལམ་ཐད་ཡར་རྒྱས་ཤུགས་ཆེ་ཤོས་སུ་སོང་བ་ཞིག་ལ་ངོས་འཛིན་བྱེད་ཀྱི་ཡོད་འདུག་ཀྱང་། བྱང་ཀོ་རི་ཡས་ཨོ་རྩལ་འགྲན་ཚོགས་ཀྱི་གོ་སྐབས་དེ་སྤྱད་ནས་རྒྱལ་སྤྱིའི་ཐོག་ནས་ཁོ་རང་ཚོར་ལྟ་སྟངས་བཟང་དུ་གཏོང་ཐབས་བྱས་ཡོད་མེད་ཀྱི་ཐོག་ལ་བསམ་གཞིག་བྱེད་དགོས་པ་ཞིག་ཡིན་སྐོར་འདུག ད་བར་ཨ་རི་གཙོས་པའི་རྒྱལ་ཁབ་མང་པོ་ཞིག་གིས་རྡུལ་མཚོན་བཟོ་སྐྲུན་གྱི་ལས་གཞི་མཚམས་འཇོག་དགོས་པ་དང་། འགྲོ་བ་མིའི་ཐོབ་ཐང་གི་གནད་དོན་ཡར་རྒྱས་གཏོང་དགོས་པ་གཉིས་ཀྱི་ཐོག་ནས་བྱང་ཀོ་རི་ཡར་ཉེན་བརྡ་ཡང་ནས་ཡང་དུ་སྤྲད་དང་སྤྲོད་མུས་ཡིན་པ་རེད།

དེ་བཞིན་ཁག་ཅིག་གིས་ལྷོ་ཀོ་རི་ཡར་བྱང་ཀོ་རི་ཡའི་སྲིད་འཛིན་གྱི་སྲིང་མོ་ཀིམ་ཡོ་ཇོང་ཡོད་པའི་སྐབས་སུ་མཱ་ཀི་པེན་སེས་ཕྱི་འབྲེལ་གྱི་ཐོག་ནས་འབྲེལ་ལམ་མ་བཟུང་བར་སྐྱོན་བརྗོད་བྱེད་བཞིན་ཡོད་འདུག་ཅིང་། དེའི་ཐོག་མཱ་ཀི་པེན་སེས་“ཨ་མི་རི་ཁས་སྡིངས་ཆ་དེའི་ཐོག་ནས་མོ་རང་ལ་དོ་སྣང་བྱ་རྒྱུ་དེ་འོས་མཚམས་ཞིག་རེད་བསམ་མ་བྱུང་”ཞེས་བརྗོད་ཡོད་པ་དང་། ཨོ་རྩལ་འགྲན་ཚོགས་སྐབས་ཀིམ་ཡོ་ཇོང་དང་མཱ་ཀི་པེན་སེ་གཉིས་ཕན་ཚུན་གྱི་འདུག་སྟེགས་ཧ་ཅང་ཐག་ཉེ་པོ་ཡིན་སྐོར་འདུག

མཱ་ཀི་པེན་སེ་ཨོ་རྩལ་འགྲན་ཚོགས་ནས་ཕྱིར་ལོག་པའི་སྐབས་ཨ་རིའི་མཐུན་ཕྱོགས་རྒྱལ་ཁབ་རྣམས་ཀྱིས་བྱང་ཀོ་རི་ཡའི་ཐོག་དཔུང་སྒྲིག་བརྟན་པོ་བྱེད་དགོས་ཞེས་བརྗོད་ཡོད་འདུག་ཀྱང་། ལྷོ་ཀོ་རི་ཡའི་སྲིད་འཛིན་མུན་ཇཱ་ཨུན་གྱིས་བྱང་ཀོ་རི་ཡའི་སྲིད་འཛིན་ཀིམ་ཇོང་ཨུན་གྱིས་ཁོ་རང་ལ་མགྲོན་ཤོག་བཏང་ཚེ་བྱང་ཀོ་རི་ཡའི་རྒྱལ་ས་ཧྥོན་ཡང་ལ་ཐུག་འཕྲད་དུ་བསྐྱོད་རྒྱུའི་བསམ་བློ་ཡོད་སྐོར་བརྗོད་ཡོད་འདུག །

གསར་འགོད་པ་བཀྲ་ཤིས་དོན་གྲུབ།