བྱང་རྩེ་གྲྭ་ཚང་ཚན་རིག་སྡེ་ཚན་གྱི་ཚོགས་ཁང་དང་འཛིན་ཁང་གསར་བཞེངས།

ཟླ་འདིའི་ཚེས་༡༦ ཉིན་གྱི་སྔ་དྲོ་རྒྱ་གར་ལྷོ་ཕྱོགས་མོན་གྷོ་ས་གནས་སུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་ཚན་རིག་སྡེ་ཚན་གྱི་ཚོགས་ཁང་དང་འཛིན་ཁང་བཅས་གསར་བཞེངས་ལེགས་པར་གྲུབ་པའི་དབུ་འབྱེད་མཛད་སྒོ་ཞིག་འཚོགས་སོང་།

དེ་ཡང་ཉིན་འདིའི་སྔ་དྲོ་ཆུ་ཚོད་༨ པའི་ཐོག་འདུ་ཁང་སྒོ་འབྱེད་ཀྱི་མཛད་སྒོ་དངོས་སུ་དབུ་འཛུགས་གནང་བ་དང་།  མཛད་སྒོའི་སྐུ་མགྲོན་གཙོ་བོ་དགའ་ལྡན་ཁྲི་པ་རི་རྫོང་སྲས་སྤྲུལ་རིན་པོ་ཆེ་དང་དགའ་ལྡན་ཤར་བྱང་གཉིས་ཀྱི་མཁན་པོ་མཁན་ཟུར་རྣམ་པ། མོན་གྷོ་ས་གནས་འགོ་འཛིན་ཕུན་ཚོགས་ཚེ་རིང་དང་ཕྱི་རྒྱལ་ཡུལ་གྲུ་ཁག་ཅིག་ནས་ཕེབས་པའི་ཚན་རིག་གི་དགེ་རྒན་ཁག་གཅིག  དེ་བཞིན་བོད་པའི་ཚན་རིག་དགེ་རྒན་དང་གདན་ས་གྲྭ་ཚང་ཁག་གི་ཚན་རིག་སློབ་གཉེར་གནང་མཁན་གྲྭ་མང་བཅས་མཉམ་ཞུགས་བྱས་ཡོད་པ་རེད།

ཐོག་མར་དགའ་ལྡན་ཁྲི་རིན་པོ་ཆེས་དར་ཚོན་གཅོད་འབྲེག་དང་འབྲེལ་ཚོགས་ཁང་སྒོ་འབྱེད་ཀྱི་ལས་རིམ་གྲུབ་པ་དང་སྐུ་མགྲོན་དང་ཚོགས་ཞུགས་པ་ཡོངས་ཚོགས་ཁང་ནང་བཞུགས་གྲལ་དུ་འཁོད་མཚམས་སུ་དགའ་བྱང་ཚན་རིག་སྡེ་ཚན་གྱི་འགན་འཛིན་དགེ་བཤེས་ཆོས་དབྱངས་ ཀྱིས་དགའ་བྱང་ཚན་རིག་སྡེ་ཚན་གྱི་ཚོགས་ཁང་འཛིན་ཁང་བཅས་གསར་བཞེངས་ཀྱི་བརྒྱུད་རིམ་དང་འདི་ལྟར་ལེགས་གྲུབ་བྱུང་བའི་མཐུན་འགྱུར་གནང་མཁན་སྦྱིན་བདག་དང་འབྲེལ་ཡོད་གྲྭ་ཚང་དང་ལས་ཀྱི་སྣེ་མོ་ཡོངས་ཀྱི་བཀའ་དྲིན་སྐོར་དང་། འདི་ལྟར་དགའ་བྱང་ཚན་རིག་སྡེ་ཚན་གསར་འཛུགས་གནང་ནས་ལོ་ཁ་ཤས་སོང་ཡོད་པ་དང་། ད་ཐེངས་ཚན་རིག་སློབ་གཉེར་བ་རྣམས་ལ་སློབ་གཉེར་གནང་སའི་འཛིན་ཁང་དང་ཚོགས་ཁང་བཅས་པ་གསར་བཞེངས་ལེགས་འགྲུབ་བྱུང་བ་འདི་ནི་༧གོང་ས་མཆོག་གི་དགོངས་གཞིའི་ཆ་ཤས་ཤིག་བསྒྲུབ་ཡོད་ཡོད་ངོས་འཛིན་བྱེད་ཀྱི་ད་སྐོར་སོགས་གསུངས་སོང་།

དེ་ནས་རིམ་པས་སྐུ་མགྲོན་རྣམས་པས་གདན་ས་གྲྭ་ཚང་ཁག་གི་ནང་ཚན་རིག་སློབ་གཉེར་བྱེད་ཀྱི་ཡོད་པ་དང་།  དེའི་མཐུན་རྐྱེན་གང་ལེགས་སྒྲུབ་བཞིན་པ་འདི་ནི་༧གོང་ས་མཆོག་གི་བཀའ་དགོངས་ཡིན་ཕྱིན་ད་དུང་སྔར་ལྷག་ཤུགས་རྒྱག་དགོས་སྐོར་སོགས་གསུངས་སོང་།།
ལྷོ་ཕྱོགས་གསར་འགོད་པ་ཐུབ་བསྟན་བཀྲིས།