མང་གཙོའི་རིང་ལུགས་གཅིག་འགྱུར་ལག་བསྟར་བྱེད་མཁན་ཞིག་ཡིན་པའི་གདུང་སེམས་མཉམ་བསྐྱེད་མཚོན་ཆེད་ཡིན།
ཟླ་འདིའི་ཚེས་༡༥ ཉིན་གྱི་ཕྱི་དྲོར་ཨ་རིའི་རྒྱལ་སར་རྟེན་གཞི་བྱས་པའི་ཨ་རིའི་མང་གཙོ་གོང་སྤེལ་བསྟི་གནས་ཁང་གིས་མང་གཙོ་དང་རེ་བ་ཞེས་པའི་བགྲོ་གླེང་འཚོགས་པ་དང་། སྐབས་དེར་མང་གཙོ་གོང་སྤེལ་བསྟི་གནས་ཁང་དེས་བོད་མིའི་སྒྲིག་འཛུགས་ཀྱི་མང་གཙོའི་ལམ་ལུགས་ལ་ཆེ་བསྟོད་ཀྱི་གཟེངས་རྟགས་དང། ཆབ་སྲིད་བཙོན་ཟུར་འདས་པོ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་མཚན་ཐོག་ཏུ་ཆེ་བསྟོད་གཟེངས་རྟགས་ཕུལ་ཡོད་པ་རེད།
མཛད་སྒོ་དེའི་ཐོག་༧གོང་ས་མཆོག་དང། ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནན་སི་པི་ལོ་སི་དང་། གྲོས་ཚོགས་གོང་མའི་འཐུས་མི་རྒན་གྲས་ལྕམ་ཌེན་ཕ་ཡིན་སི་ཊེན་(Diane Feinstein) ཨ་རིའི་གློག་བརྙན་འཁྲབ་སྟོན་པ་གྲགས་ཅན་རི་ཆ་ཌི་སྒེར་བཅས་ལྷན་ཞུགས་མཛད།
ཨ་རིའི་རྒྱལ་ཡོངས་མང་གཙོ་ཡར་རྒྱས་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མི་རྣམས་ལ་མང་གཙོའི་ལམ་བཟང་གསོལ་སྩལ་མཛད་ནས་ད་བར་མང་གཙོའི་ཀ་བ་གསུམ་ལྡན་གྱི་ཆ་ལག་ཆ་ཚང་ཚང་ཞིང་། མི་མང་གིས་མང་གཙོའི་ལམ་ནས་བཀའ་སྤྱི་འོས་འདེམས་བྱ་རྒྱུས་མཚོན། བཙན་བྱོལ་བོད་མིའི་མང་གཙོའི་གྲུབ་འབྲས་ལ་ཆེ་བསྟོད་ཀྱི་གཟེངས་རྟགས་གནང་བ་དེ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེས་བཞེས་ཡོད་པ་རེད།
སྐབས་དེར་སྲིད་སྐྱོང་གིས་གཟེངས་རྟགས་བཞེས་པ་དང་འབྲེལ་གསུང་བཤད་གནང་དོན། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་མང་གཙོའི་རིང་ལུགས་ཐོག་ཁྲིད་གནང་མཛད་རྒྱུའི་ཐུགས་ཀྱི་འཆར་སྣང་ལ་བརྟེན་ནས་བཙན་བྱོལ་བོད་མིའི་མང་གཙོའི་ལམ་ལུགས་འཛུགས་ཐུབ་པ་བྱུང་ཡོད། བཙན་བྱོལ་བོད་མིའི་མང་གཙོའི་ལམ་ལུགས་ཀྱི་གྲུབ་འབྲས་ལ་ངོས་འཛིན་གནང་བ་འདིས་གཞིས་བཞུགས་བོད་མི་རྣམས་ལ་རེ་བའི་བརྡ་ལན་ཤུགས་ཆེ་ཞིག་གཏོང་རྒྱུ་མ་ཟད། བོད་ནང་གི་བོད་མི་ཆབ་སྲིད་བཙོན་པ་རྣམས་ལ་གདུང་སེམས་མཉམ་བསྐྱེད་ཀྱི་རྣམ་པ་ཤུགས་ཆེ་མཚོན་ཐུབ་པ་ཞིག་ཡོང་ངེས་”ཞེས་གསུངས་པ་དང། ཕྱི་ལོ་ ༡༩༦༠ རེ་གྲངས་ནང་བོད་མི་རྣམས་བཙན་བྱོལ་དུ་འབྱོར་རྗེས་རིང་པོར་མ་ཐོག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་གཙོའི་ལམ་བཟང་ཐོག་ཁྲིད་ཐབས་མཛད་པའི་བརྒྱུད་རིམ་རྣམས་ངོ་སྤྲོད་གནང།
ཁོང་གིས་མཐུད་གསུང་དོན། “༡༩༥༩ ལོར་རྒྱལ་ཁབ་ཤོར་བ་དང་། ༧གོང་ས་མཆོག་བཙན་བྱོལ་དུ་༸ཞབས་སོར་འཁོད་བསྟུན་ཕྱི་ལོ ་༩༦༠ ནང་ཌལ་ཧོར་ལམ་བཟོ་རྒྱུག་བཞིན་པའི་བོད་མི་ཁག་གཅིག་ལ་བཀའ་སློབ་སྩོལ་སྐབས། ང་ཚོ་བོད་མི་རྣམས་དེང་རབས་མང་གཙོའི་ལམ་ལུགས་ཐོག་བསྐྱོད་དགོས་ཞེས་བཀའ་སློབ་བསྩལ་ཡོད། སྐབས་དེར་༸གོང་ས་མཆོག་དགུང་གྲངས་༢༤ ལས་སོན་མེད། འོན་ཀྱང་སྐུ་ན་ཤིན་ཏུ་ཕྲ་བའི་སྐབས་དེར་ཡང་བཙན་བྱོལ་བོད་མི་རྣམས་མང་གཙོའི་ལམ་ལུགས་ཐོག་བསྐྱོད་དགོས་པའི་རླབས་ཆེན་གྱི་དགོངས་བཞེད་མཛད་ཡོད། དེར་བརྟེན་ཕྱི་ལོ་ ༡༩༦༠ སྐབས་ནས་བོད་མི་བཙན་བྱོལ་བ་རྣམས་ཀྱིས་གྲོས་ཚོགས་འཐུས་མི་འོས་འདེམས་བྱ་འགོ་བཙུགས་ཟིན་པ་མ་ཟད། གྲོས་ཚོགས་འཐུས་མི་རྣམས་འོས་བསྡུའི་ལམ་ནས་བསྐོ་གཞག་བྱ་ཐུབ་ཡོད། ལྷག་པར་བུད་མེད་རྣམས་ཀྱིས་གྲོས་ཚོགས་ནང་ཆ་ཤས་ལེན་ཐུབ་པ་བྱུང་ཡོད་”ཅེས་སོགས་གསུངས་ཡོད་པ་རེད།
དེ་རྗེས་ཨ་རིའི་རྒྱལ་ཡོངས་མང་གཙོ་ཡར་རྒྱས་བསྟི་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོས་གསུང་བཤད་གནང་སྐབས། ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་རྣམས་ཡང་དག་པའི་མང་གཙོའི་ལམ་བཟང་ཐོག་ཁྲིད་པའི་རླབས་ཆེན་གྱི་མཛད་རྗེས་ལ་ཆེ་བསྟོད་རྒྱ་ཆེ་ཞུས་པ་དང་སྦྲགས། བོད་མིའི་སྒྲིག་འཛུགས་ཀྱི་གྲུབ་འབྲས་དང་ཆོད་སེམས་བརྟན་པོས་མང་གཙོའི་ལམ་ལུགས་རྒྱུན་སྐྱོང་ལག་བསྟར་གནང་བཞིན་པ་དེར་བསྔགས་བརྗོད་གནང་དོན། བཙན་བྱོལ་དུ་བོད་མི་གྲངས་ ༡༥༠༠༠༠ ཡོད། ཆིག་སྒྲིལ་དང་བཟོད་སྲན། ཤེས་ཡོན་བཅས་ཚང་བའི་སྒྲིག་འཛུགས་སྲ་བརྟན་འདི་ལྟ་བུ་ཞིག་འབད་བརྩོན་གང་ཡང་མེད་པར་རང་བཞིན་ངང་བྱུང་བ་དེ་འདྲ་ཡོང་ཐབས་མེད་པ་མ་ཟད། བཙན་བྱོལ་བའི་གནས་སྟངས་འོག་ཡོད་སྟབས་འབྱུང་འགྱུར་གནས་སྟངས་བཟང་ངན་ཇི་འདྲ་ཆགས་མིན་གཞན་དབང་སྟབས་བསྟུན་ཁོ་ན་ཡིན་པ་ལས་མ་འོངས་པའི་གནས་སྟངས་འདི་འདྲ་ཞིག་ཆགས་རྒྱུ་རེད་ཅེས་ཁ་ཚོན་གཅོད་ནས་སུས་ཀྱང་བརྗོད་ཐབས་མེད། བཙན་བྱོལ་བ་བྱས་ནས་གནས་དགོས་ན་དཀའ་ངལ་ཧ་ཅང་ཡོད། འོན་ཀྱང་བོད་མི་བཙན་བྱོལ་བ་རྣམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་དབུ་ཁྲིད་དང་བོད་མིའི་སྒྲིག་འཛུགས་ཀྱིས་སྣེ་ཁྲིད་འོག་ཧྲ་ཐག་ཐག་བྱས་ནས་འཚོ་གནས་བྱེད་བཞིན་ཡོད། བཙན་བྱོལ་བོད་མི་རྣམས་སྐབས་ཤིག་ལ་རྒྱ་གར་གཞིས་ཆགས་ཁག་ནང་གནས་ཡོད་ཀྱང་ད་ཆ་འཛམ་གླིང་ཡུལ་གྲུ་གང་སར་ཁྱབ་ཡོད། བོད་མི་བཙན་བྱོལ་བ་རྣམས་རང་ཡུལ་བྲལ་ནས་མི་ལོ་༦༠ ཙམ་སོང་ཡང་བོད་མི་རིགས་ཀྱི་ཐུན་མིན་ངོ་བོ་དང་བོད་མིའི་ཁྱད་ཆོས་དེ་དག་རྒྱུན་འཛིན་བྱེད་ཐུབ་ཡོད། སྤྱིར་དེ་རིང་ང་ཚོས་གཟེངས་རྟགས་འདི་བོད་མིའི་སྒྲིག་འཛུགས་ཀྱི་མང་གཙོའི་རིང་ལུགས་ལག་བསྟར་བྱས་པའི་གྲུབ་འབྲས་ལ་ངོས་འཛིན་ཞུས་ནས་གཟེངས་རྟགས་གོ་སྒྲིག་ཞུས་པ་ཞིག་ཡིན་ཡང་། གཙོ་ཆེ་བོད་མིའི་སྒྲིག་འཛུགས་ཀྱིས་མང་གཙོའི་ངོ་བོ་མཚོན་པའི་ཐོག་ནས་ལས་དོན་རྣམས་ཚགས་ཚུད་གནང་བ་དེར་ངོས་འཛིན་ཞུས་པ་ཞིག་ཡིན། འདས་པའི་ལོ་ངོ་༦༠ རིང་བོད་མིའི་སྒྲིག་འཛུགས་ཀྱི་ངོ་བོར་ཡར་རྒྱས་ཤུགས་ཆེ་ཕྱིན་ཡོད་”ཅེས་དང་། “དེ་རིང་ཨ་རིའི་རྒྱལ་ཡོངས་མང་གཙོ་ཡར་རྒྱས་བསྟི་གནས་ཁང་གིས་ཆེ་བསྟོད་གཟེངས་རྟགས་འདི་ལྟ་བུ་གོ་སྒྲིག་ཞུས་པ་འདི་གཙོ་བོ་བོད་མི་རྣམས་ལ་ང་ཚོས་མང་གཙོའི་རིང་ལུགས་གཅིག་འགྱུར་ལག་བསྟར་བྱེད་མཁན་ཞིག་ཡིན་པའི་གདུང་སེམས་མཉམ་བསྐྱེད་མཚོན་ཆེད་ཡིན་”ཞེས་སོགས་གསུངས་ཡོད་པ་རེད།
དེ་བཞིན་ཉིན་དེར་རྒྱ་གཞུང་གི་བཙོན་ཁང་ནང་གློ་བུར་དུ་འདས་གྲོངས་སུ་སོང་བའི་སྤྲུལ་སྐུ་བསྟན་འཛིན་བདེ་ལེགས་རིན་པོ་མཆེ་དམ་པ་ཁོང་གིས་བོད་མིའི་འཐབ་རྩོད་ཁྲོད་མི་རིགས་ཀྱི་ལ་རྒྱ་དང་རིག་གཞུང་སྲུང་སྐྱོབ་སོགས་ཀྱི་ཐད་ལ་རླབས་ཆེན་གྱི་མཛད་རྗེས་བསྐྱངས་པར་ཆེ་བསྟོད་དང་སྦྲགས། མང་གཙོ་ཞབས་ཞུའི་གཟེངས་རྟགས་འབུལ་བཞེས་གནང་འདུག གཟེངས་རྟགས་དེ་དྷ་སར་གནས་སྡོད་རིན་པོ་ཆེའི་ཚ་བོ་དགེ་བཤེས་འཇམ་དབྱངས་ཉི་མས་བཞེས་ཡོད་པ་དང་། སྐབས་དེར་དགེ་བཤེས་ཉི་མས་ཚོགས་པ་དེའི་ངོས་ནས་རིན་པོ་ཆེའི་མཛད་རྗེས་ཁག་ལ་ངོས་འཛིན་གྱིས་གཟེངས་རྟགས་གནང་བར་རིན་པོ་ཆེའི་འབྲེལ་ཡོད་ནང་མི་དང་ཁོང་གི་རྗེས་འཇུག་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་བཀའ་དྲིན་ཆེ་ཞུས་པ་དང་སྦྲགས། གཟེངས་རྟགས་འདི་རིན་པོ་ཆེ་གཅིག་པུ་ཙམ་མ་ཡིན་པར་རིན་པོ་ཆེ་དང་འདྲ་བའི་རྒྱ་གཞུང་གིས་བཙོན་འོག་ཏུ་ཡོད་པའི་བོད་མི་ཡོངས་ལ་ཐོབ་པ་ཞིག་ཏུ་ངོས་འཛིན་ཞུ་ཡི་ཡོད་པ་གསུངས་འདུག །
གསར་འགོད་པ་ཆོས་ཉིད་འོད་ཟེར།
