ཚོགས་གཙོ་མཁན་པོ་བསོད་ནམས་བསྟན་འཕེལ་གཙོས་པའི་སྤྱི་འཐུས་ཁག་གཅིག་གིས་བོད་དོན་ཞུ་གཏུག་དང་འབྲེལ་བའི་ལས་འགུལ་སྤེལ་བཞིན་འདུག

དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་གྱི་སྣེ་ཁྲིད་འོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༤ ཟླ་ ༡༡ ཚེས་ ༡༧ ནས་ ༢༧ བར་དབྱིན་ཡུལ་དང་། སི་ཀོཊ་ལེན་ཌིའི་ནང་གཞུང་འབྲེལ་ཕྱོགས་ཕེབས་གནང་གཏན་ཁེལ་བ་བཞིན། སྤྱི་འཐུས་གཞན་ཁག་གཅིག་ནས་བོད་དོན་ཞུ་གཏུག་ཆེད་དུ་རྒྱལ་ཁབ་ཁག་གཅིག་ནང་ཕེབས་ཐོན་གནང་ཡོད་འདུག

དེ་ཡང་བོད་མི་མང་སྤྱི་འཐུས་ལྷན་ཚོགས་ཀྱི་དྲྭ་ཚིགས་སུ་གནས་ཚུལ་བཀོད་པ་གཞིགས་ན། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་གྱི་སྣེ་ཁྲིད་འོག བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༤ ཟླ་ ༡༡ ཚེས་ ༡༧ ནས་ ༢༧ བར་དབྱིན་ཡུལ་དང་། སི་ཀོཊ་ལེན་ཌིའི་ནང་གཞུང་འབྲེལ་ཕྱོགས་ཕེབས་གནང་གཏན་ཁེལ་བ་བཞིན།
ཕྱི་ཚེས་ ༡༧ ཉིན་དཔལ་ལྡན་ཚོགས་གཙོ་མཆོག་གིས་སྣེ་ཁྲིད་པའི་བོད་མི་མང་སྤྱི་འཐུས་སྐུ་ཚབ་ཚོགས་ཆུང་དེ་དབྱིན་ཡུལ་རྒྱལ་ས་ལོན་ཌོན་དུ་ཕེབས་ཐོན་གྱིས་ཕྱི་ཚེས་ ༢༣ བར་ས་གནས་སུ་ལས་རིམ་དང་། ཕྱི་ཚེས་ ༢༤ ནས་ ༢༧ བར་སི་ཀོཊ་ལེན་ཌིའི་རྒྱལ་ས་ཨེ་ཌིན་བྷརྒ་ནང་མུ་མཐུད་ལས་རིམ་བསྐྱང་རྒྱུ་ཡིན་འདུག་པ་དང་། གཙོ་བོ་དབྱིན་ཇིའི་གྲོས་ཚོགས་སུ་རྒྱུས་ལོན་གནང་རྒྱུ་དང་དམིགས་བསལ་གྲོས་ཚོགས་གོང་འོག་གཉིས་ཀྱི་ཚོགས་གཙོ་སོགས་དང་། མཇལ་འཕྲད་གནང་རྒྱུའི་མཛད་རིམ་ཡོད་པའི་སྐོར་ལ་ཨིན་ཡུལ་བོད་ཀྱི་སྐུ་ཚབ་དོན་གཅོད་ཚེ་རིང་དབྱངས་སྐྱིད་ནས་གསར་འགྱུར་བརྒྱུད་ལམ་ཁག་ཏུ་བརྗོད་འདུག་ལ། དེ་རྗེས་ཕྱི་ཚེས་ ༢༨ ཉིན་རྒྱ་གར་དུ་ཕྱིར་ཕེབས་གནང་རྒྱུ་ཡིན་འདུག

ཐེངས་འདིའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་རྣམ་པའི་གཞུང་འབྲེལ་གཟིགས་སྐོར་ཕེབས་པའི་སྐབས་དེར་G20ཞེས་པའི་འབྱོར་ལྡན་རྒྱལ་ཁབ་༢༠ དབུ་ཁྲིད་ཀྱི་ལྷན་ཚོགས་ཟུར་དུ་དབྱིན་ཇིའི་སྲིད་བློན་དང་རྒྱ་ནག་གི་སྲིད་འཛིན་ཞི་ཅིན་ཕིང་གཉིས་ཐུག་འཕྲད་བྱས་པ་ལྟར། དབྱིན་ཡུལ་ནང་གི་བོད་མི་དང་བོད་དོན་རྒྱབ་སྐྱོར་བ་ཚོས་གོ་སྐབས་དེ་དང་བསྟུན་ནས་དབྱིན་གཞུང་གིས་རྒྱ་ནག་དང་འབྲེལ་བའི་སྙན་ཐོ་ཞིག་འདོན་སྤེལ་གནང་རྒྱུའི་ལས་གཞི་དང་འབྲེལ། བོད་དོན་རྒྱབ་སྐྱོར་ཚོགས་པ་ཁག་གིས་ཞུ་སྐུལ་གནང་རྒྱུའི་འཆར་གཞི་ཡོད་འདུག་པ་དང་།
ས་གནས་ཀྱི་ལས་རིམ་ཁག་ཨ་རིའི་རྒྱལ་ཡོངས་མང་གཙོ་ལྟེ་གནས་ཁང་ NDI གིས་མཐུན་འགྱུར་དང་མཉམ་འབྲེལ་གྱིས་བཟོས་གནང་ཞིང་། དེ་གའི་འབྲེལ་ཡོད་ལས་བྱེད་དང་ཚོགས་དྲུང་ལས་ཁུངས་ཀྱི་ལས་བྱེད་གཉིས་ཀྱང་མཉམ་ཞུགས་གནང་གི་ཡོད་པའི་སྐོར་བཅས་བཀོད་འདུག
དེ་བཞིན་ཡུ་རོབ་ལུག་སཾ་བྷོག་རྒྱལ་ཁབ་ཏུ་བོད་དོན་ཞུ་སྐུལ་གྱི་ལས་འགུལ་ཆེད་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་དང་། སྤྱི་འཐུས་ཀུན་དགའ་བསོད་སྟོབས། སྤྱི་འཐུས་ཆོས་གྲགས་རྒྱ་མཚོ་བཅས་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༢༤ ཟླ་ ༡༡ ཚེས་ ༡༧ ཉིན་རྒྱ་གར་གྱི་རྒྱལ་ས་ལྡི་ལི་ནས་ཆེད་ཐོན་གྱིས་ལུག་སཾ་བྷོག་ཏུ་འབྱོར་ཡོད་འདུག་ཅིང་། ཕྱི་ལོ་ ༢༠༢༤ ཟླ་ ༡༡ ཚེས་ ༡༨ སྔ་དྲོ་བྷེ་ཀྲམ་བྷོག་གྲོང་སྡེའི་སྤྱི་ཁྱབ་ (Mayor of Bettembourg) དང་། རྒྱལ་ཁབ་ཀྱི་ལྷོ་ཕྱོགས་མངའ་ཁུལ་གྱི་གྲོས་ཚོགས་འཐུས་མི་སྐུ་ཞབས་ལའོ་རན་ཊི་ ཛཡེ་མཊི་ (Laurent Zeimet)་མཇལ་འཕྲད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་མང་གཙོའི་ལམ་སྲོལ་གསར་གཏོད་མཛད་པའི་རྒྱུད་རིམ་དང་འབྲེལ་བོད་མི་མང་སྤྱི་འཐུས་ལྷན་ཚོགས་ངོ་སྤྲོད། སྤྱི་འཐུས་ཚོགས་གཙོའི་མཚན་རྟགས་འཁོད་པའི་བོད་དོན་ཞུ་སྐུལ་གྱི་ཡིག་ཆའི་ནང་གསལ་ལྟར་རྒྱ་ནག་དམར་པོའི་གཞུང་གིས་བོད་ནང་དུ་བོད་མིར་དྲག་གནོན་གདུག་རྩུབ་ཚད་ལས་འདས་པ་བྱེད་བཞིན་ཡོད་པའི་སྐོར་དང་།
བོད་ཀྱི་ཆོས་དང་རིག་གཞུང་རྩ་གཏོར་ཇི་ལྟར་བྱེད་ཀྱི་ཡོད་པའི་སྐོར་སོགས་ངོ་སྤྲོད་ཞུས་ཏེ། ཡུ་རོབ་མཉམ་འབྲེལ་དང་ལྷག་པར་ལུག་སཾ་བྷོག་རྒྱལ་ཁབ་ནས་བོད་དོན་ལ་རྒྱབ་སྐྱོར་སྔར་ལྷག་ཡོང་བའི་ཞུ་སྐུལ་དང་བོད་དོན་དང་འབྲེལ་བའི་ཁྲིམས་འཆར་དང་གྲོས་ཆོད་སོགས་འཇོག་གནང་ཡོང་བ། རྒྱ་ནག་དང་འབྲེལ་ལམ་རྩ་འགོག་གམ། དེ་མིན་རྒྱུན་དུ་ཐུགས་གཟབ་མ་གནང་ཚེ་ཉིན་ཞིག་དཀའ་ངལ་ཤུགས་ཆེར་འཕྲད་རྒྱུ་ཡིན་པ་སོགས་ཕན་ཚུན་བཀའ་མོལ་ལྷུག་པོ་བྱུང་ཡོད་འདུག་པ་དང་། བོད་དོན་ཞུ་སྐུལ་གྱི་ཡི་གེའི་ནང་གསལ་བའི་གནད་དོན་རྣམས་ཁོང་ནས་ཡུལ་དེའི་སྲིད་བློན་སོགས་འབྲེལ་ཡོད་གཞུང་འཛིན་མི་སྣ་ལྷན་འཛོམས་སར་སྙན་སྒྲོན་གྱིས་རྒྱབ་སྐྱོར་ཡོང་ཐབས་གནང་རྒྱུའི་ཞལ་བཞེས་ཐོབ། ལོ་ལྟར་གསུམ་བཅུའི་དུས་དྲན་ཉིན་ཡུ་རོབ་རྒྱལ་ཁབ་མང་པོའི་གྲོང་ཁྱེར་དང་གྲོང་སྡེའི་ལས་ཁུངས་སོགས་ཀྱི་མདུན་དུ་བོད་ཀྱི་རྒྱལ་དར་སྒྲེང་འཛུགས་གནང་སྲོལ་ཡོད་པ་ལྟར་བྷེ་ཀྲམ་བྷོག་གྲོང་སྡེ་ལས་ཁུངས་ཀྱི་མདུན་དུ་བོད་ཀྱི་རྒྱལ་དར་ད་ལྟ་ཡང་སྒྲེང་འཛུགས་གནང་ནས་བཞག་ཡོད་པར་བརྗོད།
དེ་རྗེས་ལྗང་ཁུ་ཚོགས་པའི་གྲོས་ཚོགས་འཐུས་མི་དང་། གྲོས་ཚོགས་ཀྱི་ཕྱི་སྲིད་ཚོགས་ཆུང་གི་ཚོགས་མི་ལྕམ་སྐུ་སེམ་ ཊན་སན་ (Sam Tanson) དང་མཇལ་འཕྲད་སྐབས་གོང་གསལ་བཞིན་བོད་དོན་ཞུ་སྐུལ་དང་། ལྷག་པར་དུ་རྒྱ་ནག་ལྷན་དུ་འབྲེལ་ལམ་སོགས་གནང་སྐབས་གནད་དོན་གང་གི་ཐད་ཐུགས་སྣང་གནང་དགོས་པའི་གཞེན་སྐུལ་དང་། བོད་དོན་སྐོར་གླེང་སློང་ཡོང་ཐབས། འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སོགས་སུ་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་སྐོར་ལ་གླེང་སློང་དང་རྒྱབ་སྐྱོར་ཡོང་ཐབས། བོད་ནང་རྒྱ་ནག་གིས་འཛུགས་སྐྲུན་འདྲ་མིན་ལ་ཁ་གཡར་ནས་ཁོར་ཡུག་གཏོར་སྐྱོན་དང་། ལྷག་པར་དུ་འབྲི་ཆུའི་ཆུ་མཛོད་དང་འབྲེལ་བའི་ཉེན་ཚབས་རྣམས་ངོ་སྤྲོད་བཅས་ཀྱི་སྐོར་ཞུས། གོང་གསལ་དཔོན་རིགས་གཉིས་ཀར་སྤྱི་འཐུས་ལྷན་ཚོགས་ཀྱི་ཕྱག་རྟགས་དང་། ༸གོང་ས་མཆོག་གི་མཛད་རྣམ་དང་གསུང་རྩོམ་ཕྱག་དེབ། ཞྭ་སྒབ་པའི་ཕྱི་བསྐྱོད་ལམ་ཡིག་སོགས་ཡིག་ཆ་ཁག་འབུལ་ལམ་ཞུས་ཡོད་འདུག

གསར་འགོད་པ། བསོད་ནམས་ཕུན་ཚོགས།