ཚོགས་པ་༡༦༠ ཡིས་ཕྱི་ལོ་༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དེ་རྒྱ་ནག་ནང་མི་འཚོག་པའི་རེ་འབོད་བྱས་འདུག
བོད་དང་ཡུ་གུར། ལྷོ་སོག ཧོང་ཀོང་། ཐའེ་ཝན། རྒྱ་ནག་བཅས་ལས་འགུལ་བའི་ཚོགས་པ་༡༦༠ ཡིས། རྒྱལ་སྤྱིའི་ཨོ་རྩལ་ལྷན་ཚོགས་ལ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཚབས་ཆེ་རུ་འགྲོ་བཞིན་པ་ལས་ཡར་རྒྱས་ཀྱི་རྣམ་པ་མཐོང་རྒྱུ་མེད་རྐྱེན། ཨོ་རྩལ་འགྲན་ཚོགས་ཀྱི་ལྟ་བ་ལངས་ཕྱོགས་དང་མཐུན་གྱི་མེད་པས། འགྲན་ཚོགས་དེ་རྒྱ་ནག་ལ་གོ་སྒྲིག་བྱེད་དུ་མི་འཇུག་པའི་རེ་འབོད་ཀྱི་ཞུ་ཡིག་སྤྲད་ཡོད་འདུག
དེ་ཡང་ཟླ་༩ པའི་ཚེས་༩ ཉིན་རྒྱལ་སྤྱིའི་ཨོ་རྩལ་ལྷན་ཚོགས་ཀྱི་འགན་འཛིན་ལྷན་ཚོགས་ཀྱི་ཚོགས་འདུ་འཚོགས་ཀྱི་ཡོད་འདུག་པ་དང་། ཚེས་༨ ཉིན་སུད་སིའི་གྲོང་ཁྱེར་ལུ་སཱ་ནི་རུ་བོད་དང་ཡུ་གུར། ལྷོ་སོག ཧོང་ཀོང་། ཐའེ་ཝན། དེ་བཞིན་རྒྱ་རིགས་ཀྱི་འགྲོ་བ་མིའི་ཐོབ་ཐང་དང་མང་གཙོའི་ཚོགས་པ་སོགས་ལས་གྲུབ་པའི་ལས་འགུལ་བའི་ཚོགས་པ་༡༦༠ ཡི་ཞུ་འབོད་ཡི་གེ་ཞིག བོད་མི་དང་རྒྱབ་སྐྱོར་བ་ཁག་ཅིག་གིས་ཨོ་རྩལ་ལྷན་ཚོགས་ཀྱི་ཚོགས་གཙོ་ཐོ་མཱ་སེ་བྷ་ཆེ་(Thomas Bach)ལ་ཕུལ་ཡོད་པ་རེད་འདུག
ཡི་གེ་དེའི་ནང་ལས་འགུལ་བའི་ཚོགས་པ་ཚོས། ཕྱི་ལོ་༢༠༠༨ ལོའི་དབྱར་ཁའི་ཨོ་རྩལ་འགྲན་ཚོགས་དེ་རྒྱ་ནག་ལ་མི་འཚོག་པའི་ཞུ་འབོད་དང་། དེ་འཚོགས་ཚེ་ཨོ་རྩལ་ལྷན་ཚོགས་ཀྱི་ཆེ་མཐོང་ལ་གནོད་སྐྱོན་འགྲོ་རྒྱུ་ཡིན་པའི་ཉེན་བརྡ་བཏང་ཡོད་ཀྱང་། སྐབས་སྔོན་མའི་ཚོགས་གཙོ་ཡིས་དེ་དག་སྣང་མེད་བཏང་ནས་ཕྱི་ལོ་༢༠༠༨ ལོའི་དབྱར་ཁའི་ཨོ་རྩལ་འགྲན་ཚོགས་དེ་རྒྱ་ནག་འཚོགས་ཡོད་པས། ཨོ་རྩལ་ལྷན་ཚོགས་ཀྱི་ཆེ་མཐོང་ལ་གནོད་སྐྱོན་ཆེན་པོ་བཏང་ཡོད་པ་མ་ཟད། རྒྱ་ནག་ནང་དུ་འགྲོ་བ་མིའི་ཐོབ་ཐང་ཡར་རྒྱས་འགྲོ་རྒྱུ་ཡིན་པའི་ཡིད་ཆེས་དེ་ཡང་ནོར་འཁྲུལ་ཡིན་པ་གསལ་པོ་ཆགས་ཡོད་པ་མ་ཟད། ཨོ་རྩལ་འགྲན་ཚོགས་དེ་གོ་སྒྲིག་བྱེད་རྒྱུའི་གོ་སྐབས་ཐོབ་རྗེས། རྒྱ་ནག་ལ་གདེང་སྤོབས་ཆེ་རུ་སོང་ནས་བོད་ནང་དུ་དྲག་གནོན་དང་དམ་དྲག་ཆེ་རུ་སོང་ཡོད་པ། ཡུ་གུར་མི་རིགས་ས་ཡ་༡.༨ ནས་༣ བར་བཙོན་འཇུག་བྱས་པ། ཧོང་ཀོང་ནང་དུ་རྒྱལ་ཁབ་གཅིག་ལ་ལམ་ལུགས་གཉིས་རྡོག་རོལ་བཏང་བ། ལྷོ་སོག་གི་རིག་གཞུང་དང་སྐད་ཡིག་རྩ་མེད་གཏོང་བཞིན་པ། ཐའེ་ཝན་ལ་དྲག་རྒོལ་གྱི་སྡིགས་བསྐུལ། རྒྱ་ནག་དམར་ཤོག་ཚོགས་པས་ཉེན་ཁ་འཛིན་ཡུལ་རྒྱ་རིགས་ཁྲིམས་རྩོད་པ་དང་། བུད་མེད་ཀྱི་ཐོབ་ཐང་རྩོད་ལེན་པ། མང་གཙོ་ལས་འགུལ་བ་སོགས་འཛིན་བཟུང་བཀག་ཉར་དང་གར་སོང་ཆ་མེད་བཟོས་བ། བསད་པ་སོགས་ཀྱི་གནད་དོན་མང་པོ་ལྷག་དང་ལྷག་བཞིན་ཡོད་པས། ༢༠༠༨ ཀྱི་ཨོ་རྩལ་འགྲན་ཚོགས་རྗེས་ལ་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་སྡུག་ཏུ་ཕྱིན་ཡོད་པས། རྒྱ་ནག་གིས་ཕྱི་ལོ་༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་དེ་གོ་སྒྲིག་བྱེད་ཐུབ་ཆེད་དུ། ཨོ་རྩལ་ལྷན་ཚོགས་ལ་འགྲོ་བ་མིའི་ཐོབ་ཐང་སོགས་ཡར་རྒྱས་གཏོང་རྒྱུ་ཁས་ལེན་བྱས་ཡོད་ཀྱང་། དེ་ལྟར་བྱུང་མེད་པས། ལྷན་ཚོགས་ནས་ཨོ་རྩལ་འགྲན་སྡུར་གྱི་ལྟ་བ་ལངས་ཕྱོགས་དང་ཆེ་མཐོང་གི་ཆེད་དུ། དགུན་ཁའི་ཨོ་རྩལ་འགྲན་ཚོགས་དེ་རྒྱ་ནག་ནས་ཕྱིར་འཐེན་བྱེད་རྒྱུའི་དུས་ལ་སླེབས་ཡོད་སྐོར་བརྗོད་འདུག །
གསར་འགོད་པ་སྐལ་བཟང་དོན་གྲུབ།
