ཟབ་སྦྱོང་ཁག་གསུམ་གོ་སྒྲིག་གནང་འདུག

ཟླ་བ་འདིའི་ཚེས་ ༥ ནས་༡༨ བར་ཤེས་རིག་ལས་ཁུངས་དང་འབྲས་སྤུངས་བློ་གསལ་གླིང་གྲྭ་ཚང་གཉིས་མཉམ་འབྲེལ་ཐོག། གཞི་རིམ་བར་མའི་སྤྱི་ཚོགས་ཚན་རིག་དགེ་རྒན་གྱི་བོད་ཡིག་ཟབ་སྦྱོང་དང་། སཾ་བྷོ་ཊའི་ཁྱབ་ཁོངས་གཞི་རིམ་འོག་མའི་དགེ་རྒན་གྱི་བོད་ཡིག་ཟབ་སྦྱོང་། སློབ་ཕྲུག་རིགས་ལམ་རྒྱུས་སྟོན་པ་གསོ་སྐྱོང་གི་ཟབ་སྦྱོང་བཅས་ཟབ་སྦྱོང་ཁག་གསུམ་གོ་སྒྲིག་གནང་འདུག

ཤེས་རིག་བོད་ཡིག་ཤེས་ཡོན་འགན་འཛིན་དངོས་གྲུབ་བསྟན་པས་ཟབ་སྦྱོང་གི་ལས་བསྡོམས་མདོར་བསྡུས་སྙན་སྒྲོན་ཞུས་སྐབས་ཁོང་གིས། ཟབ་སྦྱོང་ཁག་གསུམ་ཡོད་པ་ལས་དང་པོར་གཞི་རིམ་བར་མའི་སྤྱི་ཚན་དགེ་རྒན་གྱི་ཟབ་སྦྱོང་དུ་ཚོགས་བཅར་བ་གྲངས་ ༢༡ དང་། གཞི་རིམ་འོག་མའི་ཟབ་སྦྱོང་དུ་ཚོགས་བཅར་བ་གྲངས་ ༡༨། སློབ་ཕྲུག་རིགས་ལམ་ཟབ་སྦྱོང་དུ་ཚོགས་བཅར་བ་གྲངས་ ༤༢ ཡོད་པ་དང་། ཕྱི་ཚེས་ ༥ ནས་ ༡༨ བར་དངོས་སུ་འཛིན་གྲྭ་ཚུགས་ཡུན་ཉིན་གྲངས་ ༡༢ དང་། ཉིན་རེར་ཆུ་ཚོད་ ༧ ནས་ ༨ བར་ལས་རིམ་བཀོད་སྒྲིག་ཞུས་ཤིང་། རེས་གཟའ་ཟླ་བ་གཉིས་སུ་ཉེ་འཁོར་དགོན་སྡེ་ཁག་ལ་མཆོད་མཇལ་དང་གོ་བཱ་རུ་ཤེས་ཡོན་ལྟ་སྐོར་གོ་སྒྲིག་ཞུས་ཡོད་ཅེས་དང་། གཞན་ཡང་ཁོང་གི་དགེ་རྒན་ཟབ་སྦྱོང་ཁག་གཉིས་ཀྱི་དམིགས་ཡུལ་གཙོ་བོ་གང་ཡིན་མིན་ཐོག་ལ་སྙན་སྒྲོན་གནང་དོན། དགེ་རྒན་ཟབ་སྦྱོང་ཁག་གཉིས་ཀྱི་དམིགས་ཡུལ་གཙོ་བོ་ནི་བོད་ཡིག་གི་གནས་ཚད་ཡར་རྒྱས་གཏོང་རྒྱུ་དང་། སློབ་ཕྲུག་གི་ཟབ་སྦྱོང་ནི་རིགས་ལམ་ཐོག་ཆེད་སྦྱོང་གནང་རྒྱུ་ཡིན་པ་བཅས་བོད་ཡིག་གི་གནས་ཚད་ཡར་རྒྱས་གཏོང་རྒྱུ་དང་། སློབ་ཕྲུག་གི་ཟབ་སྦྱོང་ནི་རིགས་ལམ་ཐོག་ཆེད་སྦྱོང་གནང་རྒྱུ་ཡིན་པ་བཅས་ཀྱི་ཐོག་ལ་ལས་བསྡོམས་སྙན་སྒྲོན་ཞུས་གནང་འདུག 

ཐེངས་འདིའི་ཟབ་སྦྱོང་ཁག་གསུམ་གྱི་ཚོགས་བཅར་བ་སྐུ་ཚབ་རེ་ནས་མྱོང་ཚོར་གསུང་དོན། ད་བར་ཟབ་སྦྱོང་འདི་ལྟ་བུར་བཅར་མྱོང་མེད་པས་ཕན་ཐོགས་ཆེན་པོ་བྱུང་བ་དང་། འདི་ནས་ཚོགས་བཅར་བ་སོ་སོར་བློ་བསྐྱེད་གང་བྱུང་བ་རྣམས་དངོས་སུ་སློབ་གྲྭར་ལག་ལེན་འཁེལ་ཐབས་སུ་ནུས་པ་འདོན་རྒྱུའི་ཆོད་སེམས་བརྟན་པོ་ཡོད་པས། མ་འོངས་པར་ཡང་ཟབ་སྦྱོང་འདི་ལྟ་བུ་གོ་སྒྲིག་ཐུབ་ན་ཕན་ཐོགས་ཆེན་པོ་ཡོང་ངེས་དང་། ཟབ་སྦྱོང་ཚོགས་ཡུལ་དུ་མཐུན་རྐྱེན་དང་ཁོར་ཡུག་བཅས་ནི་ཡིད་དབང་འཕྲོག་པ་ཡོད་ལུགས་བཅས་ཀྱི་མྱོང་ཚོར་གསུངས་ཡོད་འདུག

 དེ་བཞིན་སྐུ་མགྲོན་གཙོ་བོ་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེ་བློ་བཟང་བསམ་གཏན་གྱིས། སྤྱིར་དགེ་བཤེས་མ་ཐོན་བར་གྲྭ་སའི་ནང་བཞུགས་ནས་དཔེ་ཆ་ལྟ་བའམ་གྲྭ་ཚང་གི་ཕྱག་ལས་མ་གནང་བར་སུ་ཞིག་ཀྱང་བཞུགས་ཆོག་གི་མེད་པ་རེད། གྲྭ་ཚང་བློ་གསལ་གླིང་དུ་དགེ་འདུན་པ་སུམ་སྟོང་ལྷག་ཙམ་ཡོད་པ་ལས་དགེ་བཤེས་བཏང་ཚར་མཁན་ཞིག་ཡིན་ནའང་སྔགས་ཀྱི་རྒྱུགས་སྤྲོད་ལོ་གསུམ་ཡོད། བློ་གསལ་གླིང་དུ་ལོ་བཅུ་བདུན་རིང་འཛིན་གྲྭ་ཐོན་རྗེས་དགེ་བཤེས་གཏོང་ཆོག་ཅིང་། དེ་རྗེས་དགེ་བཤེས་ལྷ་རམས་པ་ཐོན་པར་ལོ་དྲུག་རིང་དགེ་ལུགས་རྒྱུགས་སྤྲོད་འགྲིམ་དགོས་ཀྱི་ཡོད། མདོར་ན་ལོ་ཉི་ཤུ་རྩ་གསུམ་མ་ཐོར་པར་དགེ་བཤེས་ལྷ་རམས་པ་གཏོང་ཆོག་གི་མེད་པ་དང་། ལོ་བཅུ་བདུན་མ་ཐོན་པར་དགེ་བཤེས་ཚོགས་རམས་པ་གཏོང་ཆོག་གི་མེད། དེས་ན་སློབ་སྦྱོང་དེ་མ་ཐོན་བར་གྲྭ་སར་བཞུགས་དགོས་ཀྱི་ཡོད། ལོ་གཅིག་ལ་འཛིན་གྲྭ་འཚོགས་རྒྱུའི་བརྒྱ་ཆ་ ༧༥ མ་ལོན་པ་ཡིན་ན། སོ་སོར་རྒྱུགས་སྤྲོད་གཏོང་རྒྱུའི་སློབ་སྦྱོང་ཇི་ཙམ་ཡོད་ཀྱང་བརྒྱ་ཆ་དེ་མ་ལོན་ན་རྒྱུགས་སྤྲོད་གཏོང་མི་ཆོག་པའི་སྒྲིག་ལམ་ཡོད། ཡིན་ནའང་དེ་འདྲའི་སློབ་སྦྱོང་མ་ཐོན་ནའང་ཤེས་རིག་ལས་ཁུངས་ཀྱིས་བཀའ་ཕེབས་ཚེ་སློབ་གྲྭ་ཁག་ལ་གཏོང་རྐྱང་བྱེད་ཀྱི་ཡོད། དེ་རིང་ཡང་འདིར་བདུན་གཉིས་རིང་ཟབ་སྦྱོང་གནང་ཐུབ་པ་ཡག་པོ་ཞེ་དྲགས་བྱུང་སོང་ཅེས་བཀའ་སློབ་གནང་ཡོད་འདུག

གཞན་ཡང་ཕྱི་ཚེས་ ༡༩ ཞོགས་པར་ཟབ་སྦྱོང་ཚོགས་བཅར་བ་རྣམས་ལ་འབྲས་སྤུངས་ཚོགས་ཆེན་མཁན་པོ་ཁྲི་པ་དཀོན་མཆོག་པ་སངས་མཆོག་གིས་དགེ་སློབ་ཡོངས་ལ་བླང་དོར་བཀའ་སློབ་ལམ་སྟོན་ཟབ་རྒྱས་གནང་ཡོད་འདུག །

གསར་འགོད་པ་བདེ་སྒྲོན། 

Share this:

Leave a Reply