འགྲོ་བ་མིའི་ཐོབ་ཐང་གི་སྲིད་བྱུས་མིང་དོན་མཚུངས་པ་ཞིག་ལག་ལེན་ཡོང་བའི་འབོད་སྐུལ་ཞུ་རྒྱུ་ཡིན།
དབུ་མའི་ལམ་གྱི་སྲིད་བྱུས་གཞིར་བཞག་བོད་དོན་འགྲིག་ཆགས་ཡོང་ཐབས་སུ་རྒྱ་གཞུང་གི་འགོ་འཁྲིད་དང་གྲོས་མོལ་ཞུ་རྒྱུའི་ཆོད་སེམས་བརྟན་པོ་ཡོད་ཅེས་རྒྱ་གཞུང་གི་འགོ་འཁྲིད་ཚོར་སླར་ཡང་ནན་བརྗོད་བྱེད་འདོད་བྱུང་ཞེས་སྲིད་སྐྱོང་གིས་གསུངས་སོང་།
ཟླ་འདིའི་ཚེས་༡༠ ཉིན་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་ལ་ནོ་སྦེལ་ཞི་བདེའི་གཟིགས་རྟགས་ཕུལ་ནས་ལོ་༢༧ འཁོར་བའི་དུས་ཆེན་གྱི་གཞུང་འབྲེལ་མཛད་སྒོར་ཁྲིམས་ཞིབ་པ་རྣམས་དང་། སྲིད་སྐྱོང་དང་སྤྱི་འཐུས་ཚོགས་གཙོ་གཙོས་པའི་དབུས་མིའི་བོད་མིའི་སྒྲིག་འཛུགས་ཀྱི་མཛད་གཙོ་རྣམས། ས་གནས་ཀྱི་མི་མང་བཅས་ཀྱིས་མཉམ་ཞུགས་བྱས་སོང་། མཛད་སྒོའི་ཐོག་བཀའ་སྤྱི་གཉིས་ཀྱིས་གཏམ་བཤད་གནང་བ་དང་། གཞུང་གི་སྲི་ཞུ་ལས་བྱེད་ཞབས་ལོ་༢༥ འཁོར་མཁན་དང་། བགྲེས་ཡོལ་དུ་ཕེབས་མཁན་ཚོར་གཟེངས་བསྟོད་ལེགས་སྐྱེས་ཕུལ་ཡོད་པ་རེད།
མཛད་སྒོ་མཇུག་བསྒྲིལ་རྗེས་བཀའ་སྤྱི་གཉིས་ཀྱིས། བླ་རུང་སྒར་དང་ཡ་ཆེན་སྒར་གྱི་གཏོར་བཤིག་གི་གདུང་སེམས་མཉམ་བསྐྱེད་དང་དེ་བཞིན་ཟླ་འདིའི་ཚེས་༨ ཉིན་རང་སྲེག་རྒྱ་རྒོལ་གནང་མཁན་བོད་མི་བཀྲ་ཤིས་རབ་བརྟན་གྱི་ཆེད། གཞུང་འབྲེལ་མཆོད་འབུལ་སྨོན་ལམ་འཚོགས་སོང་།
དེ་བཞིན་ཉིན་རྒྱབ་ལ་ཉིན་མོ་འདི་དང་བསྟུན་ནས། དྷ་སའི་ཧིན་བོད་མཛའ་འབྲེལ་ཚོགས་པའི་གོ་སྒྲིག་བྱས་པའི་ཧི་མ་ལ་ཡའི་དུས་ཆེན་ཐེངས་༢༡ པ་དེ་ཚོགས་རྒྱུ་ཡིན་པ་དང་། དེ་གར་སྲིད་སྐྱོང་མཆོག་སྐུ་མགྲོན་གཙོ་བོར་ཕེབས་རྒྱུ་ཡིན་པ་རེད་འདུག
ཉིན་དེའི་བཀའ་ཤག་གི་གཏམ་བཤད་སྲིད་སྐྱོང་གིས་སྒྲོགས་སྦྱང་བྱས་པའི་ནང་འཁོད་དོན། “ལོ་རེ་བཞིན་༸གོང་ས་༸སྐྱབས་མགོན་ཆེན་པོའི་མཚན་སྙན་མཛད་འཕྲིན་ཡར་ངོའི་ཟླ་བ་ལྟར་འཕེལ་བཞིན་པའི་དབང་གིས་འཛམ་གླིང་ཤར་ནུབ་རྒྱལ་ཁབ་དང་ཚོགས་སྡེ་མང་པོས་ཀྱང་གཟེངས་བསྟོད་དང་ཕྱག་འཁྱེར་གྲངས་ ༡༥༠ ལྷག་འབུལ་བཞེས་བྱུང་ཡོད་པ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིང་ནང་གུས་བཀུར་ཆེ་ཤོས་ཞུ་ཡུལ་གྱི་དབུ་ཁྲིད་ཅིག་ལ་ངོས་འཛིན་ཞུ་བཞིན་ཡོད་པ་གསལ་པོ་མཚོན་ཐུབ།”
“ནོ་སྦེལ་ཞི་བདེའི་གཟེངས་རྟགས་དེ་བཞིན་༸གོང་ས་མཆོག་ལ་འབུལ་བཞེས་མཛད་པ་དེས་གཟེངས་རྟགས་ཀྱི་རིན་ཐང་དང་ཆེ་མཐོང་སྔར་ལྷག་གོང་མཐོར་སོང་བ་དང་ཆབས་ཅིག བོད་ཀྱི་བདེན་དོན་སྐོར་རྒྱལ་སྤྱིའི་ནང་གོ་རྟོགས་དང་། དོ་སྣང་། རྒྱབ་སྐྱོར་ཇེ་ཆེར་འགྲོ་རྒྱུར་ཕན་ཐོགས་ཤུགས་ཆེ་བྱུང་ཡོད། ང་ཚོ་ཚང་མས་ངོས་འཛིན་གསལ་པོ་ཐུབ་དགོས་པ་ཞིག་ལ། རྒྱལ་སྤྱི་ཁྱོན་ཡོངས་ནས་བོད་དང་བོད་མིར་རྒྱབ་སྐྱོར་དང་གདུང་སེམས་མཉམ་བསྐྱེད་ཤུགས་ཆེ་ཡོང་བཞིན་པ་འདི་དག་ནི་གཙོ་བོ་༸གོང་ས་མཆོག་གིས་བོད་མིའི་རང་དབང་འཐབ་རྩོད་འདི་བཞིན་འཚེ་མེད་ཞི་བའི་ཐབས་ལམ་ཁོ་ན་ལ་བརྟེན་ནས་བསྒྲུབ་རྒྱུའི་ཡང་དག་པའི་དབུ་འཁྲིད་ལམ་སྟོན་དང་། གཞིས་བཞུགས་བོད་མི་རྣམས་ཀྱི་ཞུམ་པ་མེད་པའི་སྙིང་སྟོབས་དང་ཆོད་སེམས་ལ་བརྟེན་ནས་བྱུང་བ་ཞིག་ཡིན་”ཞེས་འཁོད་ཡོད་པ་རེད།
“དེ་རིང་གི་དུས་ཆེན་གྱི་གོ་སྐབས་འདི་དང་བསྟུན་ནས་འདི་ལོའི་ནོ་སྦེལ་གཟེངས་རྟགས་བཞེས་མཁན་སྤྱི་དང་། ལྷག་པར་ཀོ་ལོམ་བྷི་ཡའི་སྲིད་འཛིན་ཧུའན་མེ་ནོལ་སན་ཊོས་ (Mr. Juan Manuel Santos) མཆོག་གིས་ཆོད་སེམས་བརྟན་པོའི་ཐོག་ལོ་ངོ་ལྔ་བཅུ་བརྒལ་བའི་རིང་གི་ནང་འཁྲུག་འཚེ་མེད་ཞི་བའི་ངང་སེལ་ཐབས་འབད་བརྩོན་གནང་བར་ཞི་བདེའི་གཟེངས་རྟགས་ཐོབ་པར་དམིགས་བསལ་འཚམས་འདྲི་ཞུ་རྒྱུ་ཡིན་”ཞེས་འཁོད་འདུག
བཀའ་ཤག་གི་གཏམ་བཤད་ནང་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་ནས་གསུང་དོན། “དེ་རིང་གི་ཉིན་མོ་འདི་མཉམ་འབྲེལ་རྒྱལ་ཚོགས་ཀྱིས་ཡོངས་ཁྱབ་འགྲོ་བ་མིའི་ཐོབ་ཐང་གསལ་བསྒྲགས་སྤེལ་ནས་མི་ལོ་ ༦༨ འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཡང་སྲུང་བརྩི་བྱེད་ཀྱི་ཡོད་རུང་། བློ་ཕམ་པ་ཞིག་ལ་ད་ལྟའང་བོད་ཀྱིས་གཙོས་འཛམ་གླིང་ཡུལ་གྲུ་མང་པོའི་ནང་འགྲོ་བ་མིའི་ཐོབ་ཐང་ལ་བརྡལ་བཤིག་ཚབས་ཆེ་གཏོང་མུས་ཀྱི་གནས་སྟངས་སོགས་ལ་གཞིགས་ཚེ་དེ་འདྲའི་ཉིན་མོ་ཞིག་ཏུ་སྲུང་བརྩི་བྱེད་འོས་མ་མཐོང་ནའང་། བཙན་གནོན་དང་དམ་བསྒྲགས་འོག་སྡུག་གཅོང་མནར་གཅོད་མྱོང་བཞིན་ཡོད་པ་དེ་དག་དྲན་གསོ་ཞུ་རྒྱུའི་དུས་ཚིགས་ཤིག་ལ་ངོས་འཛིན་གྱིས་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་སོགས་ནས་ཐུགས་ཁུར་བཞེས་ཏེ་འགྲོ་བ་མིའི་ཐོབ་ཐང་གི་སྲིད་བྱུས་མིང་དོན་མཚུངས་པ་ཞིག་ལག་ལེན་ཡོང་བའི་འབོད་སྐུལ་ཞུ་རྒྱུ་ཡིན་”ཞེས་བོད་ནང་ནས་རྒྱ་ནག་གཞུང་ལ་ངོ་རྒོལ་བ་ཚོར་མནར་གཅོད་དང་། དྲག་གནོན་བྱེད་ཀྱི་ཡོད་སྐོར་སོགས་འཁོད་འདུག
“ཕྱི་ལོ་ ༢༠༡༦ ལོའི་ཨ་རིའི་སྲིད་གཞུང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་ལྟར་ན། ཆོས་དད་རང་དབང་ཐད་དམིགས་བསལ་གྱིས་དོ་འཁུར་བྱེད་དགོས་པའི་རྒྱལ་ཁབ་ ༩ ཐེར་འདོན་བྱས་པའི་ནང་རྒྱ་ནག་ཀྱང་ཚུད་ཡོད་པ་མ་ཟད་ཆོས་དད་རང་དབང་ལ་བརྡལ་བཤིག་བཏང་བའི་གནས་སྟངས་སྔ་ལོ་ལས་ཇེ་སྡུག་ཏུ་ཕྱིན་ཡོད། དེ་བཞིན་བོད་མིའི་རིག་གཞུང་དང་ཆོས་དད་ཐོག་སྟངས་འཛིན་དང་དམ་བསྒྲགས་ཤུགས་ཆེ་བྱེད་པ་དང་། བོད་ཀྱི་དགོན་སྡེ་ཁག་གི་ནང་རྒྱ་ནག་གཞུང་གི་གཏན་སྡོད་ལས་བྱེད་པ་ཚོས་ལྟ་རྟོག་ནན་པོ་བྱེད་བཞིན་པའི་ཐོག་ཆོས་བྱེད་གྲྭ་བཙུན་ཚོར་དམར་ཤོག་ཚོགས་པའི་ལྟ་བ་དང་ལངས་ཕྱོགས་དྲིལ་བསྒྲགས་རྒྱ་ཆེ་སྤེལ་བཞིན་ཡོད་པ་སོགས་བཀོད་འདུག་”ཅེས་དང་།
“རྒྱ་ནག་གཞུང་གིས་བོད་བཙན་བཟུང་བྱས་པ་ནས་བཟུང་ད་བར་བོད་མིའི་ཐོག་དྲག་གནོན་དང་གཡོན་ཐལ་ཅན་གྱི་སྲིད་བྱུས་རིམ་པ་ལག་བསྟར་བྱས་དང་བྱེད་མུས་ཡིན་པ་དང་། ཡང་ཕྱོགས་གཞན་ནས་དཔལ་འབྱོར་ལྷུག་གཏོང་གི་སྲིད་བྱུས་ཤིག་ཀྱང་འཛིན་ཁུལ་བྱེད་ཀྱི་ཡོད་ནའང་། ཇི་སྲིད་བོད་དོན་ཐག་གཅོད་མ་བྱུང་གི་བར་བོད་མི་ཚོའི་བློ་སེམས་ནམ་ཡང་འགུག་ཐབས་བྲལ་བ་ཞིག་ཡིན་པ་དེ་རྒྱ་གཞུང་གི་འགོ་འཁྲིད་ཚོས་ངོ་གསལ་པོ་འཕྲོད་པའི་ཐོག ༸གོང་ས་༸སྐྱབས་མགོན་ཆེན་པོ་མཆོག་གིས་འདོན་གནང་མཛད་པའི་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་བོད་དོན་དཀའ་རྙོག་བསལ་དགོས་པར་འབོད་སྐུལ་བྱེད་རྒྱུ་ཡིན། སྲིད་འཛིན་ཞི་ཅིན་ཕིང་ལ་ཏང་སྲིད་དམག་གསུམ་གྱི་དབང་ཆ་ཆ་ཚང་ཡོད་ཐོག་ཉེ་ཆར་དམར་ཤོག་ཚོགས་ཆེན་ཐེངས་དྲུག་པའི་ཐོག་དབུ་འཁྲིད་གོང་མ་དང་མི་འདྲ་བར་’ཏང་དང་རྒྱལ་ཁབ་ཀྱི་སྲོག་ཤིང་’ཞེས་པར་ངོས་འཛིན་བྱས་ཡོད། དེར་བརྟེན་ཆབ་སྲིད་ཀྱི་ཆོད་སེམས་ཤིག་ཡོད་ན་དབང་ཆ་དང་གོ་སྐབས་གཉིས་ཀ་ཡོད་པས་ང་ཚོའི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཞག་བོད་དོན་འགྲིག་ཆགས་ཡོང་ཐབས་སུ་རྒྱ་གཞུང་གི་འགོ་འཁྲིད་དང་གྲོས་མོལ་ཞུ་རྒྱུའི་ཆོད་སེམས་བརྟན་པོ་ཡོད་ཅེས་རྒྱ་གཞུང་གི་འགོ་འཁྲིད་ཚོར་སླར་ཡང་ནན་བརྗོད་བྱེད་འདོད་བྱུང་”ཞེས་སོགས་འཁོད་ཡོད་པ་རེད།
སྤྱི་འཐུས་ཀྱི་གཏམ་བཤད་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་སྒྲོགས་སྦྱང་གནང་བའི་ནང་འཁོད་དོན། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མི་ལོ་བཅུ་ཕྲག་དུ་མའི་རིང་སྐུ་ངལ་ལྷུར་བཞེས་ཀྱིས་འཛམ་གླིང་ས་ཕྱོགས་གང་སར་༸ཞབས་ཀྱིས་བཅགས་ཏེ་སྐྱེ་འགྲོ་སྤྱི་ཡི་བདེ་ཐབས་འཚེ་མེད་ཞི་བའི་མཛད་འཕྲིན་སྤྱི་དང། ཁྱད་པར་འཛམ་གླིང་ཆོས་ལུགས་མི་འདྲ་བ་རྣམས་ཕན་ཚུན་དམ་གཙང་ངང་གནས་ཐབས། ཆོས་དང་མ་འདྲེས་པའི་བཟང་སྤྱོད་སྐོར་ངོ་སྤྲོད་ཁྱབ་སྤེལ། ནང་ཆོས་དང་ཚན་རིག་དབར་འབྲེལ་ལམ། བོད་ཀྱི་བདེན་མཐའ་གསལ་ཐབས་དང་། ཆོས་དང་རིག་གཞུང། སྐད་ཡིག བོད་ཀྱི་ཁོར་ཡུག་བཅས་པར་དམིགས་བསལ་ཐུགས་འཁུར་མཛད་བཞེས་བསྐྱངས་དང་སྐྱོང་བཞིན་པར་བརྟེན། ནོ་སྦེལ་ཞི་བདེའི་གཟེངས་རྟགས་ཀྱིས་མཚོན་པའི་ཆེ་བསྟོད་སོགས་གཟེངས་རྟགས་ཧ་ཅང་མང་པོ་འབུལ་བཞེས་གནང་དང་གནང་བཞིན་ཡོད་”ཅེས་དང་།
རྒྱ་བོད་འབྲེལ་ལམ་ཡོང་ཐབས་སྐོར་དང་འབྲེལ་ནས་འཁོད་དོན། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱ་གཉིས་དབར་ཞི་འགྲིག་ཡོང་ཐབས་སུ་ལྷག་བསམ་རྣམ་དག་གིས་རྒྱུན་སྐྱོང་མཛད་པ་དང་། བོད་མིའི་མང་གཙོའི་སྒྲིག་འཛུགས་ཀྱི་ཁྲིམས་བཟོ་ལྷན་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ནི་རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་དགོས་ཞེས་ཁ་བྲལ་མིན་པ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་གནས་རྒྱུ་ཡིན་པ་གསལ་པོ་ཤེས་བཞིན་དུ་རྒྱ་ནག་གཞུང་གིས་དུས་སྐབས་ནམ་བྱུང་ལ་ཁ་བྲལ་བ་ཞེས་ཡང་ནས་བསྐྱར་དུ་བཤད་དེ་རེ་སྟོང་ཞིག་འགྲུབ་རེའི་མཁྲེགས་འཛིན་གྱི་སྲིད་བྱུས་དེར་འགྱུར་བ་བཏང་སྟེ་བོད་རྒྱ་གཉིས་ཀའི་འཕྲལ་ཕུགས་གཉིས་ཕན་གྱི་ཞི་འགྲིག་ལ་འཕྲལ་ནས་མྱུར་དུ་བསམ་ཤེས་ཀྱིས་༸གོང་ས་མཆོག་གི་སྐུ་ཚབ་དང་རྒྱ་གཞུང་བར་འབྲེལ་མོལ་གང་མྱུར་ཡོང་ཐབས་གནང་དགོས་པའི་འབོད་སྐུལ་བྱ་རྒྱུ་ཡིན་”ཞེས་འཁོད་འདུག
“དེ་རིང་གི་ཉིན་མོ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་པའི་དུས་དྲན་སྲུང་བརྩི་ཞུ་བའི་ཉིན་མོ་ཞིག་ཡིན་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བའི་དུས་ཆེན་གལ་ཆེ་ཞིག་ཀྱང་ཡིན། འོན་ཀྱང་རང་རེའི་ཕ་ཡུལ་བོད་ལྗོངས་འདི་བཞིན་རྒྱ་དམར་གྱི་བཙན་འོག་ཏུ་ཚུད་པ་ནས་བཟུང་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཞན་པའི་གནས་ཚུལ་རྣམས་བགྲངས་ཀྱིས་མི་ལངས་ཀྱང་། ཉེ་བའི་དུས་ཀྱི་ནང་བོད་ནང་འགྲོ་བ་མིའི་ཐོབ་ཐང་བརྡལ་བཤིག་དང། ལྷག་པར་བོད་མིའི་ཆོས་དང་རིག་གཞུང་། དེ་བཞིན་ཁོར་ཡུག་བཅས་པར་གཏོར་སྐྱོན་བཏང་དང་གཏོང་བཞིན་ཡོད་”ཅེས་འཁོད་འདུག
དེ་རིང་གི་ཉིན་མོ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་པའི་དུས་དྲན་སྲུང་བརྩི་ཞུ་བའི་ཉིན་མོ་ཞིག་ཡིན་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བའི་དུས་ཆེན་གལ་ཆེ་ཞིག་ཀྱང་ཡིན། འོན་ཀྱང་རང་རེའི་ཕ་ཡུལ་བོད་ལྗོངས་འདི་བཞིན་རྒྱ་དམར་གྱི་བཙན་འོག་ཏུ་ཚུད་པ་ནས་བཟུང་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཞན་པའི་གནས་ཚུལ་རྣམས་བགྲངས་ཀྱིས་མི་ལངས་ཀྱང་། ཉེ་བའི་དུས་ཀྱི་ནང་བོད་ནང་འགྲོ་བ་མིའི་ཐོབ་ཐང་བརྡལ་བཤིག་དང། ལྷག་པར་བོད་མིའི་ཆོས་དང་རིག་གཞུང་། དེ་བཞིན་ཁོར་ཡུག་བཅས་པར་གཏོར་སྐྱོན་བཏང་དང་གཏོང་བཞིན་ཡོད་”ཅེས་བོད་ནང་གི་དཀའ་ངལ་སྐོར་འཁོད་ཡོད་པ་རེད།
༧གོང་ས་མཆོག་ལ་གུས་ཞབས་དགོས་སྐོར་དང་འབྲེལ་ནས་འཁོད་དོན། “སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་པའི་དུས་དྲན་སྲུང་བརྩི་ཞུ་བའི་ཉིན་མོ་དང་བསྟུན་དེ་རིང་ཉིན་རྒྱབ་ནས་ཉིན་གཉིས་རིང་བཞུགས་སྒར་རྡ་རམ་ས་ལར་ཧི་མ་ལ་ཡའི་དུས་སྟོན་སྲུང་བརྩི་དང་འབྲེལ་ས་གནས་ཡུལ་མི་རྣམས་ནས་ཀྱང་༸གོང་ས་༸སྐྱབས་མགོན་ཆེན་པོའི་མཛད་འཕྲིན་ལ་ཆེ་བསྟོད་ཞུ་བ་དང། ཧིན་བོད་མི་མང་དབར་མཛའ་བརྩེའི་ལར་ཞེན་གཡོ་བ་མེད་པའི་རྣམ་པ་མཚོན་གྱི་ཡོད་སྟབས། ཧི་མ་ལ་ཡའི་དུས་སྟོན་གོ་སྒྲིག་འགན་བཞེས་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་དབུས་སའི་གཞུང་དང། མི་མང་གིས་ང་ཚོར་ཕན་གྲོགས་གནང་བའི་བཀའ་དྲིན་ནི་དུས་ནམ་ཡང་བརྗེད་ཐབས་མེད་པས་ད་རེས་སླར་ཡང་ཐུགས་རྗེ་བཀའ་དྲིན་ཆེ་ཞེས་ཞུ་རྒྱུ་དང་། ད་དུང་ཧིན་བོད་གཉིས་ཀྱི་མི་མང་དབར་མཛའ་མཐུན་གོང་འཕེལ་མུ་མཐུད་གནས་རྒྱུར་ཚང་མས་མཉམ་རུབ་རྒྱུན་བསྲིངས་གནང་རྒྱུའི་འབོད་སྐུལ་ཞུ་བཞིན་ཡོད་”ཅེས་འཁོད་འདུག
“དེ་རིང་གི་གོ་སྐབས་འདི་བརྒྱུད་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་འཛམ་གླིང་ས་གཞི་འདིའི་སྟེང་རང་དབང་མང་གཙོ་དང། དྲང་བདེན་ལ་དགའ་ཞེན་དང་གུས་བཀུར་བྱེད་མཁན་གྱི་གཞུང་དང་གྲོས་ཚོགས། དེ་མིན་ཚོགས་སྒེར་སོགས་ཀྱིས་དངོས་ཤུགས་བརྒྱུད་གསུམ་ནས་བོད་དོན་ཐོག་མཐུན་འགྱུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞེས་ཞུ་རྒྱུ་མ་ཟད། མ་འོངས་པར་མུ་མཐུད་རྒྱབ་སྐྱོར་ཤུགས་ཆེ་གནང་རྒྱུའི་འབོད་སྐུལ་ཞུ་རྒྱུ་ཡིན་”ཞེས་སོགས་འཁོད་འདུག།
གསར་འགོད་པ་སྐལ་བཟང་དོན་གྲུབ།
