འཕགས་བོད་མཉམ་འབྲེལ་ཚོགས་པ་དབུ་བརྙེས་ནས་ལོ་འཁོར་ཧྲིལ་པོ་ ༢༥ འཁོར་འདུག

ཟླ་འདིའི་ཚེས་༥ ཉིན་༸གོང་ས་མཆོག་འཕགས་བོད་མཉམ་འབྲེལ་ཚོགས་པ་(Bharat Tibbat Sahyog Manch) དབུ་བརྙེས་ནས་ལོ་ངོ་འཁོར་ཧྲིལ་པོ་༢༥ འཁོར་བའི་དུས་ཆེན་སྲུང་བརྩིའི་མཛད་སྒོར་ཆིབས་བསྒྱུར་བསྐྱངས་དང་བཀའ་སློབ་གནང་སོང་།

སྐབས་དེར་༧གོང་ས་མཆོག་གིས་ངོས་རང་ནང་པའི་དགེ་སློང་ཞིག་ཡིན་པས་ནང་པའི་ཡུལ་གྲུ་ཁག་ནས་གནས་སྐོར་དང་འབྲེལ་ང་ཚོ་མཇལ་བའི་གོ་སྐབས་མང་པོ་ཡོང་གི་འདུག བཀའ་མོལ་ཞུས་པའི་སྐབས་སུ་ང་ཚོ་བོད་གངས་ཅན་གྱི་ལྗོངས་སུ་བོད་ཡིག་ནང་བཀའ་བསྟན་པོ་ཏི་སུམ་བརྒྱ་ལྷག་ཅིག་ཡོད་པ་རེད་ལ། ང་ཚོས་སློབ་སྦྱོང་བྱེད་ཀྱི་ཡོད་པ་རེད། སློབ་སྦྱོང་བྱེད་པ་དང་ཆབས་ཅིག་ཉམས་ལེན་དང་། སྒོམ་རྒྱག་གི་ཡོད། སྒོམ་ལ་དཔྱད་སྒོམ་དང་འཇོག་སྒོམ་གཉིས་ཡོད་པས་འཇོག་སྒོམ་རྐྱང་རྐྱང་མ་ཡིན་པར་དཔྱད་སྒོམ་གྱི་ཐོག་ནས་དཔྱད་པ་གཏོང་གི་ཡོད་པས་ཚད་མའི་གཞུང་རྣམས་གལ་ཆེན་པོར་བརྩིས་ཏེ་སློབ་སྦྱོང་བྱེད་བཞིན་ཡོད། ཡིན་དང་མིན་ནི་རིགས་པས་དཔྱད་པ་བྱས་ཏེ་སློབ་སྦྱོང་བྱེད་བཞིན་ཡོད། སངས་རྒྱས་ཀྱི་གསུངས་པ་རེད་ཡིན་དང་ཡིན་ཟེར་བ་མིན་པར། སངས་རྒྱས་ཀྱི་གསུངས་པ་རེད་དེ་རྒྱུ་མཚན་ག་རེ་རེད་ཅེས་དཔྱད་པ་བྱེད་ཀྱི་ཡོད་ཅེས་དང་།

 ངོས་རང་རྒྱ་གར་ལ་སླེབས་ནས་གསར་པ་བྱས་པ་གཅིག་ནི། བཙུན་མ་ཚོས་ཀྱང་མཚན་ཉིད་ལ་བལྟ་དགོས་པ་རེད་ཅེས་འབོད་སྐུལ་བྱས་ཏེ། དེང་སང་བཙུན་མ་ཚོའི་ནང་དུ་རྟགས་གསལ་གཏོང་མཁན་ཡག་ཐག་ཆོད་ཡོང་གི་འདུག ཧ་ཅང་ཡག་པོ་རེད། དེ་བཞིན་ང་ཚོའི་སློབ་གྲྭ་ཁག་ཏུ་དེ་སྔ་ཆོས་དགེ་ཞེས་ཆོས་ཀྱི་དགེ་རྒན་ཟེར་བ་ལྟ་བུ་མིང་ཞིག་བཏགས་ནས་ཡོང་གི་ཡོད། དེ་ལ་ངོས་ཀྱིས་ལྟ་གྲུབ་དགེ་རྒན་ཟེར་ནས་འགྱུར་བ་བཏང་བ་ཡིན། ཆོས་དགེ་ཟེར་དུས་ཆོས་གཅིག་པུ་དང་། ལྟ་གྲུབ་དགེ་རྒན་ཟེར་དུས་ཕྱི་ནང་གི་ལྟ་གྲུབ་ཀྱིས་མཚོན་པའི་ལྟ་གྲུབ་འདྲ་མི་འདྲ་སློབ་སྦྱོང་བྱེད་རྒྱུ་ཡོད་པ་རེད། དེར་བརྟེན། ཆོས་དགེ་ཞེས་མ་ལབ་པར་ལྟ་གྲུབ་དགེ་རྒན་ཟེར་བའི་མིང་འཁྱེར་ན་ཡག་པོ་འདུག་ཅེས་ངོས་ཀྱིས་བསམ་འཆར་བཤད། དེང་སང་མི་ཚོས་དེ་ལག་ལེན་དུ་འཁྱེར་བཞིན་ཡོད་པ་རེད།

ང་ཚོ་བཙན་བྱོལ་བ་ཚོས་སོ་སོའི་ལྟོ་གོས་འགྲིག་ཙམ་མ་ཡིན་པར་དེང་དུས་ཀྱི་ཤེས་ཡོན་སློབ་སྦྱོང་བྱེད་པ་དང་། དེ་དང་ཆབས་ཅིག་བོད་རང་གི་ལོ་ངོ་སྟོང་ཕྲག་རིང་ཡོད་པའི་བཀའ་བསྟན་ནང་ཡོད་པ་རྣམས་མུ་མཐུད་ནས་སློབ་སྦྱོང་བྱེད་བཞིན་ཡོད། དེ་ལྟ་བུའི་གོ་སྐབས་ལ་གཙོ་བོ་རྒྱ་གར་གཞུང་གིས་རོགས་རམ་རྒྱ་ཆེན་པོ་གནང་བ་རེད། དམིགས་བསལ་གྱིས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་ང་ཚོའི་བོད་ཕྲུག་གཞོན་སྐྱེས་ཚོས་དེང་དུས་ཀྱིས་ཤེས་ཡོན་བསླབ་པ་དང་ཆབས་ཅིག་ལྟ་གྲུབ་དགེ་རྒན་གྱིས་ནང་ཆོས་ཀྱི་ལྟ་གྲུབ་སྐོར་ལའང་སློབ་སྦྱོང་སྤྲོད་ཀྱི་ཡོད་པ་རེད། དེར་བརྟེན། ཕྱོགས་གཅིག་ནས་བསམ་བློ་བཏང་ན་དེ་སྔ་ང་ཚོ་བོད་ལ་ཡོད་པའི་སྐབས་སུ་སློབ་ཕྲུག་ཚོར་དེ་ལྟ་བུའི་གོ་སྐབས་ཡོད་པ་མ་རེད། དེང་སང་ལྟ་གྲུབ་དགེ་རྒན་བཙུགས་ནས་སློབ་སྦྱོང་བྱེད་རྒྱུ་ཡོད་པ་དེ་ལྟར་རེད། ང་ཚོ་བཙན་བྱོལ་བ་བྱས་ནས་བསྡད་རིང་འདིར་ཕྱི་ནང་གི་མཐུན་རྐྱེན་མང་པོ་ཞིག་གཙོ་ཆེར་རྒྱ་གར་གཞུང་གིས་གནང་བ་རེད། གོ་སྐབས་འདི་བཟུང་ནས་རྒྱ་གར་གཞུང་ལ་ཐུགས་རྗེ་ཆེ་ཞུ་རྒྱུ་ཡིན། འབྲེལ་ཡོད་རྒྱ་གར་གྱི་ནང་སྲིད་ལས་ཁུངས་སོགས་ཀྱི་ལས་བྱེད་པ་རྣམས་ལའང་བཀའ་དྲིན་རྗེས་སུ་དྲན་ནས་ཐུགས་རྗེ་ཆེ་ཞུ་བཞིན་ཡོད། ཚོགས་པ་འདི་བཙུགས་ནས་ལོ་ ༢༥ འཁོར་འདུག དངོས་གནས་ཁ་ཡོད་ལག་ཡོད་ཀྱི་བྱས་རྗེས་བཞག་ཡོད་པ་རེད། ཁ་ཡོད་ལག་ཡོད་ཀྱི་ཐོག་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་པའི་ཐོག་ལ་ཕྱོགས་མང་པོ་ནས་རྒྱབ་སྐྱོར་དང་རོགས་རམ་གནང་གི་ཡོད་པ་ལ་ཞེ་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། བཀྲ་ཤིས་བདེ་ལེགས། ཞེས་བཀའ་སློབ་བསྩལ་སོང་།

ཚོགས་པ་དེ་ནི་ཕྱི་ལོ་ ༡༩༩༩ ལོར་ཧིན་དྷི་(RSS) ཚོགས་པས་གསར་འཛུགས་གནང་བ་དང་། སྐབས་དེར་༸གོང་ས་མཆོག་དབུ་འབྱེད་མཛད་སྒོར་༸ཞབས་སོར་འཁོད་མྱོང་ཡོད་པ་དང་། ད་རེས་ཚོགས་པ་འདི་དབུ་བརྙེས་ནས་ལོ་ངོ་༢༥ ཧྲིལ་བོ་འཁོར་བའི་དུས་ཆེན་སྲུང་བརྩིའི་མཛད་སྒོ་རུ་རྒྱ་གར་རྒྱལ་ཡོངས་ནས་འཕགས་བོད་མཉམ་འབྲེལ་ཚོགས་མི་རྣམས་དང་། དཔལ་ལྡན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དཔལ་ལྡན་བདེ་སྲུང་བཀའ་བློན་རྒྱ་རི་སྒྲོལ་མ་མཆོག བོད་མི་མང་སྤྱི་འཐུས་ཁག་ཅིག འཕགས་བོད་འབྲེལ་མཐུད་ཚོགས་པའི་འཛིན་སྐྱོང་འགན་འཛིན་སྐུ་ཞབས་ཧར་ཇི་ཏེ་ སིངྒ་ གྷི་རེ་ཝལ་ (Shri Harjeet Singh Grewal) ལགས་དང་ས་གནས་མང་ཚོགས་བཅས་ཕེབས་ཡོད་འདུག་ལ།

དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། སྲིད་ཚབ་དཔལ་ལྡན་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཧི་མ་ཅཱལ་མངའ་ཁོངས་ནས་ཡིན་པའི་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཀི་ཤན་ཀ་པུར་ (Shri. Kishan Kapoor) མཆོག ཇ་མུ་མངའ་ཁོངས་ནས་ཡིན་པའི་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་ཇུ་གྷལ་ཀི་ཤོར་ཤར་མ་ (Shri Jugal Kishore Sharma) མཆོག པཎྜི་ཏ་ལག་མི་ཅན་ཌ་སྣང་རིས་སྒྱུ་རྩལ་གཙུག་ལག་སློོབ་གཉེར་ཁང་གི་ཉེ་བའི་རིགས་བདག་སྐུ་ཞབས་གྷ་ཇེན་དྷ་ར་ཅའོ་ཧན་ (Gajendra Chauhan, Vice-Chancellor of Pandit Lakhmi Chand State University of Performing and Visual Arts)  མཆོག་བཅས་ཆེ་བསྟོད་སྐུ་མགྲོན་དུ་ཆེད་ཕེབས་གནང་ཡོད་པ་རེད།

གསར་འགོད་པ། བློ་བཟང་རྒྱ་མཚོ།