ཡུ་རོབ་ནང་བོད་མིས་སྐྱབས་བཅོལ་ཞུ་རྒྱུ་ཁག་ཏུ་འགྲོ་སྲིད་སྐོར་བཀའ་ཤག་གིས་གསུངས་སོང་།

ཟླ་འདིའི་ཚེས་༢༥ ཉིན་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་བཅུ་གཅིག་པའི་ཐོག་ཡུ་རོབ་ཁུལ་གྱི་བོད་མི་སྐྱབས་བཅོལ་བའི་དཀའ་ངལ་སྐོར་གྲོས་ཚོགས་འཐུས་མི་ཁག་ཅིག་གིས་གླེང་སློང་དང་། བཀའ་ཤག་ལ་དྲི་བ་བཏང་བར། སྲིད་སྐྱོང་དང་ཕྱི་དྲིལ་བཀའ་བློན་གཅིག་ལྕོག་བློ་བཟང་སེང་གེས་ལན་འདེབས་གསལ་བཤད་གནང་ཡོད་པ་རེད།

དེ་ཡང་སྲིད་སྐྱོང་བློ་བཟང་སེང་གེས་གསུང་དོན། “ཡུ་རོབ་ཁག་གི་རྒྱལ་ཁབ་འགའ་ཤས་ནང་བོད་མི་ཚོར་ཡིག་ཆ་མ་རག་པའི་དཀའ་ངལ་ཡོད་པ་དངོས་ཡོད་གནས་ཚུལ་རེད། སྦེལ་རྗམ་དང་ནེ་དྷི་ལན་ཌི་སོགས་ལ་དེ་སྔོན་ཡིན་ན་སྲིད་སྐྱོང་དང་ཕྱི་དྲིལ་བཀའ་བློན་སོགས་བཀའ་བློན་རྣམ་པ་སུ་ཕེབས་ནའང་། ཕྱི་སྲིད་ལས་ཁུངས་དང་གནད་ཡོད་མི་སྣ། གྲོས་ཚོགས་འཐུས་མི། བོད་དོན་རྒྱབ་སྐྱོར་བ་སོགས་དང་མཇལ་ནས་སྐོར་བསྐྱོད་གནང་གི་ཡོད་རེད། ཉེ་ཆར་ནས་ཆེད་དུ་སྐྱབས་བཅོལ་ཞུ་སའི་ལས་ཁུངས་ཀྱི་འགན་འཛིན་དང་། སྐྱབས་བཅོལ་བར་ལྟ་མཁན་གཉིས་ཀར་བཅར་ནས། བོད་ནང་གི་གནས་སྟངས་མ་འདྲ་བ་ཡིན་པ་དང་། བོད་ནང་ནས་ཆབ་སྲིད་ཀྱི་སྐྱབས་བཅོལ་བ་འདིར་ག་རེ་བྱས་ནས་ཡོང་གི་ཡོད་པ་ཆ་ཚང་ཞུ་ཡི་ཡོད། ཁོ་རང་ཚོས་འདིར་བོད་མི་བཞི་སྟོང་ལྷག་ཡོད་རེད། བཞི་བརྒྱ་ལ་ཡིག་ཆ་མ་རག་པའི་དཀའ་ངལ་ཡོད་རེད། བརྒྱ་ཆ་བཅུ་རེད། ལུང་པ་ཁ་ཤས་ཀྱི་སྐྱབས་བཅོལ་བ་བརྒྱ་ཆ་དྲུག་ཅུ་ལ་ཡིག་ཆ་རག་གི་ཡོད་པ་མ་རེད། སྤྱི་ཡོངས་ཀྱི་གནས་སྟངས་ལ་བལྟས་ན་བོད་པའི་གནས་སྟངས་ཡག་པ་རེད་ཟེར་གྱི་འདུག་”ཅེས་གསུངས་སོང་།

སྲིད་སྐྱོང་གིས་མུ་མཐུད་ཡུ་རོབ་ཀྱི་བོད་མི་སྐྱབས་བཅོལ་བའི་སྐོར་གསུང་དོན། “བོད་མི་བཞི་བརྒྱ་ལ་དཀའ་ངལ་འཕྲད་པ་དཀའ་ངལ་ཆེན་པོ་རེད། བོད་རིགས་སྤུན་ཟླ་རེད། མང་པོ་ཞིག་གིས་བུ་ལོན་བླངས་ནས་སོང་བ་དང་སྐྱེད་ཀ་ཆེན་པོ་སྤྲད་དགོས་པ་དང་། ཕར་ཡིག་ཆ་མ་རག་པའི་སེམས་ཁྲལ་ཡོད་པ་རེད། གྲོས་ཚོགས་འདིའི་ནང་དུ་ཕར་ཕྱོགས་ལ་སྤུན་མཆེད་མེད་ནའང་། ངོ་ཤེས་ཡོད་ཀྱི་རེད། ང་རང་གི་ངོ་ཤེས་ཡོད། ཁོང་ཚོས་དཀའ་ངལ་བཤད་ཡོང་དུས་སེམས་འགུལ་ཐེབས་པ་དང་། ད་ག་རེ་བྱས་ན་དྲག་བསམ་ནས་ཚོར་བ་ཡོང་གི་ཡོད་པ་རེད། ཉེ་ཆར་ནས་ཕྱི་རྒྱལ་ཁག་གང་ལ་སོང་ནའང་ཆེད་དུ་སྐྱབས་བཅོལ་ཞུ་ས་ལ་གནས་སྟངས་ཞུ་ཡི་ཡོད། ཁོང་ཚོས་དགོངས་པ་བཞེས་ཀྱི་འདུག་ཀྱང་། བོད་པའི་གནས་སྟངས་སྤྱི་ཡོངས་ལ་བལྟས་ན་ཡག་པོ་རེད་ཟེར་གྱི་འདུག ད་ལྟ་སུད་སི་དང་། ནི་དྷི་ལན་ཌི་སོགས་ཚང་མར་དཀའ་ངལ་ཡོད་མཁན་ཡོད་པ་དང་། དེ་ཚོ་ཚང་མར་བཀའ་ཤག་ནས་དོན་གཅོད་ཁག་ལ་གང་ཐུབ་རོགས་པ་གནང་དགོས་པ་རེད་ཅེས་བཀོད་ཁྱབ་བཏང་ཡོད་པ་རེད། མ་འོངས་པར་ཡང་སྲིད་སྐྱོང་དང་བཀའ་བློན་སུ་ཕྱི་རྒྱལ་ཁག་ཏུ་ཕེབས་སྐབས། ལམ་སྟོན་དང་དཀའ་ངལ་སེལ་ཐབས་ཀྱི་ཐབས་ལམ་གནང་རོགས་ཟེར་གྱི་ཡོད་”ཅེས་གསུངས་སོང་།

ཁོང་གིས་མུ་མཐུད་ཡིག་ཆ་མ་རག་པའི་དཀའ་ངལ་འཕྲད་རྐྱེན་སྐོར་གསུང་དོན། “ཕར་ཕེབས་ཚར་མཁན་ཚོའི་དཀའ་ངལ་སེལ་ཐབས་བྱེད་དགོས་རེད་ལ། སྐྱབས་བཅོལ་ཞུ་རྒྱུར་བོད་པར་དཀའ་ངལ་ཆེ་རུ་འགྲོ་སྲིད་པ་རེད། ཕར་མ་ཕེབས་མཁན་ཚོས་དགོངས་པ་བཞེས་རོགས། སུད་སི་ནས་ཉེ་ཆར་སྙན་ཐོ་ཞིག་བཏོན་པའི་ནང་རྒྱ་གར་ནང་བོད་མིར་ཐོབ་ཐང་མང་པོ་ཡོད་པ་དང་། ཁྲིམས་ཐོག་ནས་སྲུང་སྐྱོབ་ཡོད་སྐོར་འཁོད་པ་དེར་ཡུ་རོབ་ཀྱི་རྒྱལ་ཁབ་ཁག་ཅིག་གིས་ཞིབ་འཇུག་བྱས་ནས། རྒྱ་གར་ནང་ཡོད་པའི་བོད་མི་ཚོའི་གནས་སྟངས་ཡག་ཏུ་འགྲོ་ཡི་ཡོད་པ་འཁོད་ཡོད་པ་རེད། དེའི་ཐོག་གསལ་བཤད་བྱས་པ་ཡིན་མོད། དེ་མ་རེད་ཟེར་བ་ཡང་ཡོད་པ་མ་རེད། ༢༠༡༤ ལོར་རྒྱ་གར་དབུས་གཞུང་གིས་བོད་མིར་མཐུན་རྐྱེན་སྦྱོར་དགོས་པའི་སྲིད་ཇུས་ཡོད་པ་དང་། རྒྱ་གར་ནང་གནས་སྡོད་ཆོག་པའི་ལག་ཁྱེར་ཡང་ལོ་ལྔ་ལ་སྤོར་པ་སོགས་བྱས་ནས། ཁྲིམས་ཐོག་ཡིག་ཆ་བཟོས་ཡོང་སྐབས། ཁྲིམས་ཐོག་ལ་ལྟ་ཡོང་དུས། མ་འོངས་པར་བོད་མི་སྐྱབས་བཅོལ་ཞུ་མཁན་ཚོར་དཀའ་ངལ་ཆེ་རུ་འགྲོ་བའི་ཉེན་ཁ་ཡོད་པ་རེད། ཁྲིམས་ཐོག་ནས་འགྲོ་དགོས་པ་རེད། བཀའ་ཤག་ནས་དཀའ་ངལ་སེལ་ཐབས་སུ་ཐབས་ཤེས་གནང་གི་ཡོད་ལ། མ་འོངས་པར་ཡང་གནང་གི་ཡིན། ཡིན་ཡང་མ་འོངས་པར་ཕེབས་མཁན་ཡོད་ན་དགོངས་པ་ཡག་པོོ་བཞེས་རོགས། ཡུ་རོབ་ནང་སྐྱབས་བཅོལ་བ་ས་ཡ་མང་པོ་འགྲོ་ཡི་ཡོད་པས། ཆབ་སྲིད་ཀྱི་འགྲོ་སྟངས་ཐོག་ནས་སྐྱབས་བཅོལ་བར་འཁོན་འཛིན་མིན་ནའང་དམ་དྲག་དགོས་ཀྱི་འདུག སྐྱབས་བཅོལ་བ་མང་དྲགས་ནས། དཔལ་འབྱོར་ལ་གནོད་ཀྱི་འདུག་ཅེས་རྒྱལ་ཁབ་རང་གི་ནང་བསམ་ཚུལ་མང་པོ་ཡོང་གི་ཡོད་པས། ད་ལྟ་སྐྱབས་བཅོལ་བར་ཡུ་རོབ་ནང་ཁོར་ཡུག་ཡག་པོ་མི་འདུག་ཅེས་བཀའ་ཤག་གིས་ཁ་གསལ་པོ་བྱས་ནས་ཞུ་རྒྱུ་ཡིན་”ཞེས་གསུངས་སོང་།།
གསར་འགོད་པ་ཆོས་ཉིད་འོད་ཟེར།