རྒྱ་གར་ནང་གི་བོད་མི་བཙན་བྱོལ་བ་རྣམས་བོད་དུ་ཕྱིར་ལོག་བྱ་རྒྱུའི་འདུན་པ་ཡོད་སྐོར་བརྗོད་པར་ལན་འདེབས།

དྲིལ་བསྒྲགས་དྲུང་ཆེ་ཚེ་དབང་རྒྱལ་པོ།

༄༅། །ཕྱི་ལོ་ ༢༠༢༠ ཟླ་ ༤ ཚེས་ ༢༧ ཉིན་རྒྱ་ནག་གཞུང་གི་མགྲིན་ཚབ་གསར་ལས་ཚན་པ་གོ་ལའི་དུས་བབ་ཅེས་པའི་ནང་རྒྱ་མི་ཤན་ཇེ་ Shan Jie ཧུ་ཡུ་ཝི་ Hu Yuwei ཟེར་བ་གཉིས་ཀྱིས་ཆེད་རྩོམ་ཞིག་སྤེལ་བའི་འགོ་བརྗོད་དུ། ” ཏོག་དབྱིབས་གཉན་རིམས་ཀྱི་འཇིགས་པ་ལས་གྲོལ་ཆེད་བཙན་བྱོལ་བོད་མིས་རྒྱ་ནག་ལ་རེ་ལྟོས་འཆའ་བ། ” ཞེས་པའི་ནང་དེང་སྐབས་ཏོག་དབྱིབས་གཉན་རིམས་ཁྱབ་གདལ་འགྲོ་བཞིན་པའི་སྐབས་འདིར་རྒྱ་གར་སྤྱི་དང་། ལྷག་པར་བཞུགས་སྒར་རྡ་རམ་ས་ལར་རིམས་ནད་བཅོས་ཐབས་དང་སྔོན་འགོག་སོགས་ཀྱི་སྨན་བཅོས་མཐུན་རྐྱེན་ཧ་ཅང་ཞན་པར་བརྟེན། བཙན་བྱོལ་བོད་མི་རྣམས་ཀྱིས་ཏོག་དབྱིབས་གཉན་རིམས་ཀྱི་འཇིགས་པ་ལས་གྲོལ་ཆེད་བོད་ནང་ཕྱིར་ལོག་བྱ་རྒྱུའི་འདུན་པ་དྲག་པོ་ཡོད་ཚུལ་འཁྱོགས་བཤད་སྣ་ཚོགས་བྱས་འདུག

འཁྱོག་བཤད་ཀྱི་ཆེད་རྩོམ་དེའི་ནང་རྒྱ་གར་ནང་གི་བཙན་བྱོལ་བོད་མི་སྤྱི་དང་། ལྷག་པར་༸རྒྱལ་བའི་བཞུགས་སྒར་རྡ་སར་གནས་འཁོད་བོད་མི་རྣམས་ཀྱི་འཚོ་བའི་གནས་སྟངས་ཞན་ཞིང་།  ནད་ཡམས་ཀྱི་འཇིགས་པ་བྱུང་འཕྲལ་ས་གནས་སུ་སྨན་བཅོས་ཀྱི་མཐུན་རྐྱེན་ཞན་པ་དང་།  སྨན་ཁང་ཡོད་ཀྱང་ཉུང་ངུ་ལས་མེད་པ་དང་།  ཉུང་ཉུང་ཡོད་པ་དེ་དག་གི་ནང་དུའང་ཏོག་དབྱིབས་གཉན་རིམས་ལྟ་བུ་ཛ་དྲག་ནད་རིམས་ཁྱབ་གདལ་འགྲོ་བཞིན་པར་གདོང་ལེན་བྱ་རྒྱུའི་མཐུན་རྐྱེན་དང་གྲ་སྒྲིག་རྩ་བ་ནས་མེད་སྟབས། བཙན་བྱོལ་བོད་མི་དེ་དག་བོད་དུ་ཕྱིར་ལོག་བྱ་རྒྱུའི་འདུན་པ་དྲག་པོ་ཡོད་པ་དང་།  ད་ཆ་རེ་ལྟོས་བྱ་ཡུལ་རྒྱ་ནག་ཡིན་པ་ལྟ་བུའི་རྣམ་པ་བསྟན་འདུག   དེ་ཡང་འཁྱོག་བཤད་ཀྱི་རྩོམ་དེའི་ནང་དུ་གསོ་བ་རིག་པའི་གཞུང་ལ་སྦྱངས་པར་རློམ་པའི་རྒྱ་མི་ལིའུ་ཡིང་ཧུ་ Liu Yinghua ཟེར་བ་དེས་བཤད་པའི་ཚིག་འགའ་ལུང་འདྲེན་བྱས་ཏེ། རྒྱ་གར་བྱང་ཕྱོགས་དང་ལྷོ་ཕྱོགས་སུ་གནས་པའི་བཙན་བྱོལ་བོད་མི་དེ་དག་གི་འཚོ་བ་ངེས་བརྟན་མེད་ཁར་དཀའ་ངལ་འཕྲད་སྐབས་ས་གནས་གཞུང་ནས་ཀྱང་བོད་མིའི་དཀའ་ངལ་དེ་དག་ལ་བསམ་ཤེས་བྱེད་ཀྱི་མེད་པ་ལྟ་བུ་བཀོད་ཡོད།  གནས་ཚུལ་དེ་དག་གཞན་མགོ་བོ་རྨོངས་སུ་འཇུག་རྒྱུའི་འཆལ་གཏམ་འབའ་ཞིག་ཡིན་པ་ལས་བདེན་པའི་ཆ་ཕྲ་མོ་ཙམ་ཡང་མེད། ཅེས་བོད་མིའི་སྒྲིག་འཛུགས་ཀྱི་ཚོར་ཤུགས་དང་གདེང་སྤོབས་ཆེན་པོས་གསལ་བཤད་བྱ་རྒྱུ་ཡིན།

ད་ལྟ་ཏོག་དབྱིབས་གཉན་རིམས་ཁྱབ་གདལ་ཤུགས་ཆེ་འགྲོ་བཞིན་པའི་ཛ་དྲག་གི་གནས་སྟངས་འོག འཛམ་གླིང་ས་ཕྱོགས་གང་སར་དཀའ་སྡུག་ཟད་མི་ཤེས་པ་མྱངས་དང་མྱོང་བཞིན་པ་དེ་ནི་གཙོ་བོ་རྒྱ་ནག་དམར་པོའི་སྲིད་གཞུང་གིས་འཛམ་གླིང་མི་མང་གི་འཕྲོད་བསྟེན་དང་བདེ་འཇགས་ཐོག་འགན་ཁུར་བསམ་ཤེས་རྩ་བ་ནས་མེད་པར་ཤེས་བཞིན་དུ་དངོས་ཡོད་གནས་ཚུལ་སྦ་གསང་བྱས་པ་དང་།  གཏམ་དྲང་པོ་སྨྲ་མཁན་ཚོར་གཞུང་གིས་ཁ་བཀག་པ་དང་།  སྡིགས་ར་བྱས་པ།  ཐ་ན་འཛིན་བཟུང་ཚུན་ཆད་བྱས་ནས་རྒྱ་ནག་ཙམ་མ་ཟད། འཛམ་གླིང་ཁྱོན་ལ་གོད་ཆགས་ཚབས་ཆེ་བཟོས་ཡོད་པར་བརྟེན་ཇུས་ཉེས་དེ་དག་ཡོངས་རྫོགས་ཀྱི་འགན་དེ་རྒྱ་ནག་དམར་པོའི་གཞུང་གིས་འཁྱེར་དགོས།  ཏོག་དབྱིབས་གཉན་རིམས་ཁྱབ་གདལ་ཐོག་རྒྱ་ནག་གཞུང་གིས་འཁྱོག་བཤད་བྱས་པ་ཙམ་མིན་པར་རྒྱལ་ཁབ་གཞན་ལའང་སྨན་བཅོས་བརྟག་དཔྱད་ཀྱི་ཡོ་བྱས་སྐྱོན་ཅན་ཤ་སྟག་བཀྲམས་ནས་དཀའ་ངལ་དང་ཉེན་ཚབས་དེ་བས་ཆེ་བ་བཟོས་ཡོད།
རྒྱ་གར་ནང་ལ་མཚོན་ན་ཏོག་དབྱིབས་གཉན་རིམས་སྔོན་འགོག་ཆེད་དབུས་སའི་གཞུང་གི་ཐེམ་སྤང་བཀའ་བསྒོས་ལྟར་མི་མང་ཡོངས་ནས་མཐའ་གཅིག་ཏུ་བཀའ་གསུང་དང་ལེན་ཞུས་དང་ཞུ་མུས་ལ་བརྟེན་ནད་ཡམས་སྔོན་འགོག་ཧ་ཅང་ཚགས་ཚུད་ངང་སྤེལ་ཐུབ་བཞིན་ཡོད།  རྡ་སའི་ས་ཁུལ་ལ་དུ་ད་བར་ཏོག་དབྱིབས་གཉན་རིམས་ཕོག་མཁན་མི་གྲངས་ ༤༠ ཙམ་བྱུང་ཡོད་ཅིང་། ནད་ཡམས་དེ་ལ་བརྟེན་ནས་མི་གཅིག་འདས་གྲོངས་སུ་གྱུར་ཡོད།
བོད་མིའི་སྒྲིག་འཛུགས་ལ་མཚོན་ནའང་ས་གནས་རྫོང་དང་གྲོང་སྡེ། དེ་བཞིན་ཉེན་རྟོག་ལས་ཁུངས་ཀྱི་འབྲེལ་ཡོད་དཔོན་རིགས་རིགས་ཚོ་དང་འབྲེལ་ཐག་ཉེ་པོའི་སྒོ་ནས་ཐེམ་སྤང་བཀའ་རྒྱར་བརྩི་བཀུར་དམ་དོན་ཐོག་ཏོག་དབྱིབས་གཉན་རིམས་སྔོན་འགོག་ཆེད་ལམ་སྟོན་ཇི་ཕེབས་ལ་བརྩི་སྲུང་དང་།  དུས་ཐོག་སྙན་སེང་ཞུ་སྒོ་ཁག་འཚེམས་ལུས་མེད་པར་གོང་རིམ་ལ་ཞུ་མུས་ཡིན།  ས་གནས་ཉེན་རྟོག་མི་སྣར་མཚོན་ནའང་ངལ་བ་ཁྱད་གསོད་ཀྱིས་ནད་རིམས་སྔོན་འགོག་ཆེད་ཉིན་མཚན་དུས་དྲུག་ཏུ་མི་མང་གི་འགྲོ་འདུག་ལ་དམ་དྲག་བཀག་སྡོམ་གྱིས་མཚོན།  སྐབས་ཐོབ་སོ་སོར་ལས་འགུལ་ཚགས་ཚུད་ངང་སྤེལ་བཞིན་པར་བོད་མིའི་སྒྲིག་འཛུགས་ཀྱིས་བཅོས་མིན་ཡི་རང་བསྔགས་བརྗོད་དང་སྦྲགས་ཐུགས་རྗེ་ཆེ་ཞུ་རྒྱུ་དང་། ས་གནས་རྒྱ་གར་འབྲེལ་ཡོད་ལས་ཁུངས་དང་དཔོན་རིགས་ཚོས་ཀྱང་བོད་མི་བཙན་བྱོལ་བ་རྣམས་ཀྱིས་ཐེམ་སྤང་བཀའ་རྒྱས་མཚོན་དུས་ཐོག་ལམ་སྟོན་ཇི་འདྲ་ཞིག་ཕེབས་ཀྱང་བཀའ་སྲུང་ཅི་སྒྲུབ་ཞུས་དང་ཞུ་མུས་ལ་བསྔགས་བརྗོད་རྒྱ་ཆེ་གནང་བཞིན་འདུག

དེ་ཡང་བཞུགས་སྒར་རྡ་རམ་ས་ལ་ནི་ཀང་ར་རྫོང་ཁོངས་སུ་ཚུད་ཡོད་ཅིང་། ས་གནས་སྨན་བཅོས་ཀྱི་མཐུན་འགྱུར་ཧ་ཅང་ཡག་པོ་ཡོད། དེ་ཡང་སྨན་ཁང་ལ་མཚོན་ན་གངས་སྐྱིད་དུ་བདེ་ལེགས་སྨན་ཁང་ཡོད་པ་མ་ཟད།  བོད་ཀྱི་སྨན་རྩིས་ཁང་ཡོད་ཅིང་།  ཕྱོགས་མཚུངས་ས་གནས་སྨན་ཁང་ལ་མཚོན་ན་རྡ་སའི་ཁྲོམ་གཞུང་གི་ཉེ་འདསབ་སུ་ Civil hospital ཞེས་གཞུང་གི་སྨན་ཁང་ཆེ་ཐག་ཆོད་གཅིག་དང་། སྣུམ་འཁོར་ནང་བསྐྱོད་ན་སྐར་མ་བཞི་བཅུ་ཙམ་འགོར་བའི་རྒྱང་ཐག་སར་ཏན་ཌ་སྨན་ཁང་ Tanda hospital ཞེས་ནད་རིགས་འདྲ་མིན་བཅོས་ཐུབ་པའི་སྨན་ཁང་ཕུན་སུམ་ཚོགས་པ་ཞིག་ཡོད།  དེ་བཞིན་སྒེར་གྱི་སྨན་ཁང་ལ་མཚོན་ན། ཕོ་ཊི་སི་ Fortis སྨན་ཁང་སོགས་ཡོད།  དེར་བརྟེན་རྩོམ་ཡིག་དེའི་ནང་དུ་རྡ་སར་སྨན་བཅོས་ཀྱི་མཐུན་རྐྱེན་ཞན་པས་བོད་མི་བཙན་བྱོལ་བ་དེ་དག་བོད་དུ་ཕྱིར་ལོག་བྱ་རྒྱུར་འདུན་པ་ཤུགས་ཆེ་ཡོད་པ་དང་།  ད་ཆ་རེ་ལྟོས་བྱ་ཡུལ་རྒྱ་ནག་ཡིན་པ་ལྟ་བུའི་རྣམ་འགྱུར་བསྟན་པ་ནི་རྣ་བར་མི་འགྲོ་བའི་གཏམ་འཆལ་འབའ་ཞིག་ཏུ་ཟད་དོ།

ཕྱོགས་གཅིག་ནས་བོད་མི་བཙན་བྱོལ་བ་རྣམས་ལ་རྒྱ་གར་དབུས་སའི་གཞུང་གིས་དུས་རྟག་ཏུ་གཟིགས་ཞིབ་ཧ་ཅང་ཡག་པོ་གནང་བཞིན་པ་དང་།  ལྷག་པར་རྒྱ་ནད་ཁྱབ་གདལ་གྱི་ཛ་དྲག་ཆེ་བའི་དུས་སྐབས་འདིར་རྒྱ་གར་དབུས་སའི་གཞུང་གིས་ང་ཚོ་བོད་མི་བཙན་བྱོལ་བ་ཚོར་ཡལ་བར་འདོར་རྒྱུའི་ཚབ་ཏུ་གཟིགས་སྐྱོང་སྔར་བས་ཆེས་ཆེར་གནང་བཞིན་འདུག་ན། རྩོམ་ཡིག་དེའི་ནང་འཁོད་པའི་རྫུན་གྱི་ཕུང་པོ་དེར་གཟུར་གནས་བློ་ལྡན་སུས་ཀྱང་ཡིད་ཆེས་བྱ་དཀའ་ཞིང་།  ཛ་དྲག་གི་དུས་སྐབས་འདིར་འཁྱོག་བཤད་དེ་ལྟར་བྱས་པ་ནི་གཞན་མགོ་བོ་རྨོངས་སུ་འཇུག་རྒྱུ་ཁོ་ན་ཡིན།

བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་དང་། ཤེས་རིག་ལས་ཁུངས། འཕྲོད་བསྟེན་ལས་ཁུངས་གསུམ་གྱིས་བཙན་བྱོལ་བོད་མིའི་འཚོ་བའི་དཀའ་ངལ་སེལ་ཐབས་དང་། འཕྲོད་བསྟེན་གཟིགས་སྐྱོང་།  ལྷག་པར་བོད་རིགས་སློབ་མ་ཚོའི་ཤེས་ཡོན་ཐོག་དུས་ཐོག་གཟིགས་སྐྱོང་གང་ལེགས་གནང་བཞིན་ཡོད། བཙན་བྱོལ་བོད་མིའི་གཞིས་ཆགས་ཁག་ལ་མཚོན་ནའང་ས་གནས་བོད་མིའི་དཀའ་སེལ་སླད་འབྲེལ་ཡོད་ས་གནས་འགོ་འཛིན་ལས་ཁུངས་ནས་གནས་ཡུལ་རྒྱ་གར་ས་གནས་ལས་ཁུངས་ཁག་ལ་དུས་ཐོག་འབྲེལ་བ་ཞུས་དང་ཞུ་མུས་ཐོག  ཁྱབ་ཁོངས་ལྷན་ཁང་ཁག་ལ་སྙན་སེང་ཞུ་མུས་རེད།

གཙོ་ཆེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྟ་བུའི་བླ་ན་མེད་པའི་དབུ་ཁྲིད་ཀྱི་ལམ་སྟོན་འོག་བོད་མིའི་སྒྲིག་འཛུགས་ཀྱིས་བཙན་བྱོལ་བའི་གནས་སྟངས་ཡིན་བཞིན་དུ་རང་བཙན་ཡོད་པའི་རྒྱལ་ཁབ་ཀྱི་ཡུལ་མི་ལས་ལྷག་མི་སྨོན་རང་སྐྱིད་ཀྱི་གནས་སྟངས་ཡོད་པ་དེར་སུ་གང་གིས་སྙོན་དུ་མེད།

རྒྱ་མི་རྩོམ་པ་པོ་གཉིས་པོས། བཙན་བྱོལ་བོད་མི་བོད་དུ་ཕྱིར་ལོག་བྱ་འདོད་པའི་སྐད་ཆ་དེའང་བལ་ཡུལ་གནས་སྡོད་བོད་མིར་རློམ་པ་དབྱངས་འཛོམས་ཟེར་བས་བཤད་པ་ལུང་འདྲེན་བྱས་ཁུལ་ཡིན་སྟབས།  བུད་མེད་དེས་སྐད་ཆ་དེ་ལྟར་བཤད་ཡོད་མེད་དེའང་དོགས་གཞི་ཅན་ཞིག་ཡིན།  དེ་ལྟར་བཤད་ཡོད་པའི་དབང་དུ་བཏང་ནའང་རྒྱ་གར་ནང་གི་གནས་སྟངས་དང་འབྲེལ་བ་རྩ་བ་ནས་མེད།  ལྷག་པར་མི་སྒེར་གཅིག་གི་བསམ་ཚུལ་དེ་མི་ཀུན་གྱི་བསམ་ཚུལ་ཡིན་པ་ལྟར་རིགས་འགྲེ་བྱེད་མི་རུང་།

དེ་ཡང་འཁྱོག་བཤད་ཀྱི་རྩོམ་དེའི་ནང་དུ་གསོ་བ་རིག་པའི་གཞུང་ལ་སྦྱངས་པར་རློམ་པའི་རྒྱ་མི་ལིའུ་ཡིང་ཧུ་ Liu Yinghua ཟེར་བས་རྒྱ་གར་ནང་བོད་ཀྱི་སྨན་རྩིས་ཁང་དུ་བོད་ཀྱི་གསོ་བ་རིག་པའི་གཞུང་ལ་བསླབས་ཡོད་ཟེར་བ་དེར་དཔྱད་སྐབས།  སྨན་རྩིས་ཁང་གི་སློབ་ཕྲུག་ཐོ་གཞུང་གང་དུའང་གསལ་མེད།

ང་ཚོས་རྒྱ་ནག་གཞུང་ལ་དེ་ལྟ་བུའི་འཁྱོག་བཤད་རིགས་གོ་ལའི་དུས་བབ་ཟེར་བའི་ནང་མ་སྤེལ་རོགས་ཞུ་རྒྱུ་ཡིན།  ད་ལྟ་འཛམ་གླིང་ཁྱོན་ཡོངས་ཏོག་དབྱིབས་གཉན་རིམས་ལ་བརྟེན་ནས་ཛ་དྲག་ནང་ལྷུང་བཞིན་ཡོད།  ཛ་དྲག་ཆེ་བའི་དུས་སྐབས་འདིར་སྐབས་འཚོལ་རིང་ལུགས་པའི་བྱེད་བབ་དེ་རིགས་འཕྲལ་མར་མཚམས་འཇོག་བྱས་ནས་དེ་ལས་ལྡོག་སྟེ་རྒྱ་གར་གྱིས་གཙོས་རྒྱལ་སྤྱིའི་སྤྱི་ཚོགས་ལ་འགན་ཁུར་ལྡན་པའི་ཐོག་ནས་ནད་ཡམས་སྔོན་འགོག་ལས་དོན་འཐུས་ཤོར་བཏང་བར་དགོངས་སེལ་ཞུ་དགོས།  །