བོད་ཀྱི་བང་ཆེན་སྤྱིའི་འདོན་ཐེངས་ ༨༠༨ ཕྱི་ལོ་ ༢༠༢༠/༠༦/༢༤
ད་ལྟའི་ཆར་འཛམ་གླིང་གི་ཁོར་ཡུག་ཀུན་ཏུ་རྒྱ་ནག་གཞུང་ལ་རྒོལ་བའི་ལས་འགུལ་དང་། སྲིད་གཞུང་མང་པོ་ཞིག་གིས་རྒྱ་ནག་ལ་ཁ་གཏད་གཅོག་པའི་སྲིད་བྱུས་འཐེན་བཞིན་པའི་སྐབས་ཡིན་ཞིང་། རྒྱ་ནག་གཞུང་ལ་རྒོལ་བའི་བསམ་ཚུལ་དེ་ནི་གཞི་རིམ་སྤྱི་ཚོགས་ནས་མཐོ་རིམ་དཔོན་རིགས་ཁག་གི་དབར་བྱུང་ཡོད་ལ། རྒྱ་གར་གྱི་ས་གནས་ཁག་ཅིག་ནས་རྒྱ་གར་ཡུལ་མིས་རྒྱ་དམར་གཞུང་ལ་ངོ་རྒོལ་གྱིས་ལས་འགུལ་སྤེལ་བཞིན། རྒྱ་ནག་གི་རྒྱལ་དར་མེར་སྲེག་བཏང་བ་དང་། རྒྱ་ནག་གི་དངོས་རྫས་བཀག་འགོག་དགོས་པའི་ལས་འགུལ་ཡང་སྤེལ་བཞིན་ཡོད་པ་རེད། ལས་འགུལ་དེ་བཙན་བྱོལ་བོད་པའི་སྤྱི་ཚོགས་ནས་ཀྱང་བསྐྱར་དུ་སྤེལ་མགོ་ཚུགས་བཞིན་ཡོད་ཅིང་། རྒྱ་གར་གྱི་ས་ཁུལ་ཁྱོན་ཡོངས་ནས་ཆོད་སེམས་དང་གྲ་སྒྲིག་ལས་འགུལ་བཅས་ཚགས་ཚུད་པོ་ཞིག་བྱེད་ཐུབ་ན་མི་འབོར་དང་ཁྲོམ་རའི་གནས་སྟངས་ཐོག་ནས་རྒྱ་ནག་གཞུང་ལ་གནོན་ཤུགས་ཆེན་པོ་ཞིག་དང་། རྒྱ་གར་གཞུང་དང་རྒྱ་གར་མི་མང་ལ་དོན་དམ་པར་ཕུགས་རྒྱང་རིང་པོར་ཕན་ཐོགས་ཆེན་པོ་ཞིག་ཡོང་ངེས་རེད།
ད་དུང་ཉེ་ཆར་ལ་དྭགས་དང་བོད་ཀྱི་ས་མཚམས་སུ་རྒྱ་དཀར་ནག་གཉིས་ཀྱི་དམག་མི་གདོང་ཐུག་བྱུང་ནས་རྒྱ་གར་གྱི་དམག་མི་གྲངས་༢༠ ཙམ་བསད་ཡོད་པ་དང་། རྒྱ་ནག་ཕྱོགས་ཀྱི་དམག་མི་ཡང་དེ་ལས་ཀྱང་མང་བ་བསད་ཡོད་པའི་གནས་ཚུལ་ཞིག་ཡོང་གི་ཡོད་ནའང་། རྒྱ་དམར་གཞུང་གིས་ད་བར་གནས་ཚུལ་གང་ཡང་སྤེལ་མེད། སྤྱིར་དུས་རྒྱུན་ནས་རྒྱ་དམར་གཞུང་ལ་ཕྱི་གསལ་ནང་གསལ་གང་ཡང་མེད་པའི་གནས་ཚུལ་འདི་རྒྱུན་ལྡན་ཡིན་པ་དང་། རྒྱ་གར་གཞུང་གི་མང་གཙོ་དང་ཕྱི་གསལ་ནང་གསལ་གྱི་ཁོར་ཡུག་ཅིག་ཡོད་པས། དམག་མི་ག་ཚོད་ཙམ་ཤི་རྨས་བྱུང་བ་དེ་སྦས་གསང་གང་ཡང་བྱེད་སྲོལ་མེད་པ་དང་། བྱེད་ཐབས་ཀྱང་མེད་པ་དེ་རྒྱུན་ལྡན་གྱི་གནས་སྟངས་ཤིག་ཏུ་གྱུར་ཡོད། ད་ལན་ཕྱོགས་གཉིས་ཀ་ནས་དམག་མི་ག་ཚོད་ཙམ་བསད་ཡོད་མེད་དེ་གཙོ་བོ་མ་ཡིན་པར། རྒྱ་དཀར་ནག་གཉིས་དབར་འགལ་འབྲེལ་གྱི་གནད་དོན་དེ་ནི་རྒྱལ་སྤྱིའི་ཁོར་ཡུག་གི་གནད་དོན་གལ་ཆེན་ཞིག་དང་། བོད་དོན་འཐབ་རྩོད་ཀྱི་ཐོག་ནས་ཆེས་གལ་གནད་ཆེན་པོ་ཞིག་ཏུ་གྱུར་ཡོད།
ད་ལྟའི་ཆར་རྒྱ་གར་གྱི་ཚོང་རྫས་ཙག་ཙིག་ཕལ་མོ་ཆེ་རྒྱ་ནག་ནས་བཟོས་པ་འབའ་ཞིག་ཡིན་པ་དང་། དེ་ནི་རྒྱ་ནག་ནས་ཐོན་པའི་ཅ་ལག་ནང་དག་མ་ལས་རྫུན་མ་མང་ཞིང་། རྫུན་མ་དག་ནི་རིན་གོང་གི་ཐོག་ནས་ཀྱང་ཧ་ཅང་སྟབས་བདེ་བས། རྒྱ་གར་གྱི་ཚོང་པ་དག་གིས་ཅ་ལག་མང་པོ་ཞིག་རྒྱ་ནག་ནས་ནང་འདྲེན་བྱེད་བཞིན་ཡོད། རྒྱ་གར་གྱི་བཟོ་གྲྭ་དག་ནས་ཐོན་པའི་ཕྲུ་གུའི་རྩེད་ཆས་སོགས་ཐོན་སྐྱེད་བྱས་པ་དག་ནི་རྒྱ་ནག་ནས་བཟོས་པ་དག་ལས་བཟོ་སྟ་ཞན་པ་ལྟ་བུ་ཡོད་པ་དང་། རིན་གོང་ཐོག་ནས་ཀྱང་ཆེ་བ་ལྟ་བུ་ཡོད་པས་རྒྱ་ནག་ནས་ནང་འདྲེན་བྱས་པ་རེད། ཉོ་ཚོང་བྱེད་མཁན་གཅིག་པུ་ལ་བསམ་བློ་བཏང་ན་གོང་ཁེ་བ་དང་ཉོ་མཁན་མང་པོ་ཡོད་དགོས་པ་དེ་གཙོ་བོ་ཡིན་ཡང་། དེའི་ཤུགས་རྐྱེན་ལ་བརྟེན་ནས་རྒྱ་གར་གྱི་བཟོ་གྲྭ་མང་པོ་ཞིག་གི་སྒོ་རྒྱག་དགོས་ཐུག་གི་ཡོད་པ་དང་། དེ་དང་ཆབས་ཅིག་ལས་མི་མང་པོ་ཞིག་གི་ལས་ཀ་ཤོར་འགྲོ་གི་ཡོད་པ་འདི་ཡང་ཆོས་ཉིད་ཡིན་པས། རྒྱ་གར་གྱིས་རྒྱ་ནག་གི་ཅ་ལག་ནང་འདྲེན་མ་བྱས་ན་ཕུགས་ལ་རྒྱ་གར་གཞུང་དང་མི་མང་ལ་ཁེ་ཕན་ཆེན་པོ་ཡོད།
སྤྱིར་མི་འབོར་གྱི་ཐོག་ནས་རྒྱ་དཀར་ནག་གཉིས་ལ་ཁྱད་པར་ཆེན་པོ་མེད་པ་དང་། མང་གཙོ་དང་རང་དབང་གི་ཁོར་ཡུག་ཐོག་ནས་བསྡུར་ན་ས་དང་གནམ་གྱི་ཁྱད་པར་ཡོད་པས། དེའི་ཐོག་ནས་འཛམ་གླིང་གི་ཁོར་ཡུག་ཀུན་ཏུ་རྒྱ་གར་མཚན་མཐོང་ཆེ་བ་ཡོད་ལ། མ་འོངས་པར་དེ་བས་ཀྱང་རྒྱ་གར་ལ་རྒྱལ་སྤྱིའི་སྟེང་དུ་རྒྱ་ནག་ལས་གོ་སྐབས་མང་བ་ཡོད། དེར་བརྟེན་གོ་སྐབས་འདི་དམ་འཛིན་བྱེད་ཐུབ་མིན་འདི་རྒྱ་གར་གཞུང་ལ་རག་ལས་ཡོད་ཅིང་། མི་འབོར་དང་ས་ཁྱོན་ཁོར་ཡུག་གང་ཐད་ནས་རྒྱ་ནག་དང་མ་འོངས་པར་དུས་ཡུན་རིང་པོར་འགྲན་རྩོད་ཆེ་ཤོས་བྱེད་ཐུབ་མཁན་དེ་རྒྱ་གར་རེད། རྒྱ་དཀར་ནག་གཉིས་ཁ་གཏད་དང་གདོང་ཐུག་གི་དུས་སྐབས་ཤིག་བྱུང་ན། བོད་དོན་འཐབ་རྩོད་ཀྱི་ཐོག་ནས་གོ་སྐབས་མང་པོ་ཡོད་པ་དང་། རྒྱ་གར་གཞུང་གི་ངོས་ནས་རྒྱ་ནག་གཅིག་གི་སྲིད་བྱུས་སམ། ལོ་རྒྱུས་ཐོག་ནས་བོད་རྒྱ་ཁོངས་ཡིན་པའི་སྲིད་བྱུས་ཕྱིར་འཐེན་བྱེད་ཐུབ་པའི་ཐབས་ཤེས་གཞུང་སྒེར་ཚང་མའི་ངོས་ནས་འབད་བརྩོན་བྱེད་དགོས་པ་དེ་དུས་ལ་བབ་པའི་གནད་འགག་གལ་ཆེན་ཞིག་ཏུ་གྱུར་ཡོད།
མདོར་ན་བོད་དོན་འཐབ་རྩོད་ཀྱི་ཐབས་ལམ་ནི་དུས་དང་མཐུན་པའི་ཐོག་ནས་གོ་སྐབས་འཚོལ་དགོས་པ་དང་། ཕྲག་ཏུ་བབས་པའི་ལས་འགན་ཡིན་པ་ལས། ཐོག་མའི་ལངས་ཕྱོགས་སམ་སྲིད་བྱུས་གང་ཡིན་པ་དེར་འགྱུར་བ་གཏན་ནས་མེད་ཅེས་ཨུ་ཚུགས་མཐར་སྐྱེལ་བྱས་ན་ད་ལྟའི་དུས་འདིར་བོད་དོན་འཐབ་རྩོད་ལ་རྒྱབ་སྐྱོར་བྱེད་མཁན་ཉུང་ནས་ཉུང་དུ་འགྲོ་བའི་ཉེན་ཁ་ཡོད་པ་ཞིག་ཏུ་གྱུར་ཟིན། ༢༠༢༠ ལོ་འདིར་རྒྱལ་སྤྱིའི་ཁྱོན་ཡོངས་སུ་ནད་ཡམས་ལ་བརྟེན་ནས་མི་ཤི་རྒྱུ་གྱོང་སོགས་གང་ཐད་ནས་གོད་ཆག་ཆེན་པོ་བྱུང་ཡོད་ཀྱང་། རྒྱ་དམར་གཞུང་ལ་སྡང་སེམས་དང་འཁོན་འཛིན་ཆེ་རུ་འགྲོ་མཁན་ཆེ་ས་ནས་སྲིད་གཞུང་དང་ཆུང་ས་ནས་མི་མང་གི་བར་རྒྱ་ཁྱབ་ཏུ་གྱུར་པའི་གནད་དོན་ཞིག་ཏུ་གྱུར་ཡོད་པ་ནི་བཟང་ཕྱོགས་ཀྱི་གནས་ཚུལ་ཞིག་ཏུ་གྱུར་ཡོད། ད་ལྟའི་སྐབས་འདིར་རྒྱ་དམར་གཞུང་ལ་བསྟུན་མཁས་ཙམ་མ་ཡིན་པར། རྒྱལ་སྤྱིའི་ཆབ་སྲིད་ཀྱི་ཁོར་ཡུག་དང་བསྟུན་ཐུབ་ན་རིམ་པས་རྒྱ་གཞུང་ལ་འགྱུར་ལྡོག་ཆེན་པོ་ཞིག་འགྲོ་བའི་སྐབས་ང་ཚོས་གོ་སྐབས་དམ་འཛིན་བྱེད་ཆོག་ཆོག་ཏུ་འགྱུར་ངེས་རེད།།
