རྒྱ་ནག་གཞུང་གིས་ཀིརྟི་དགོན་པའི་དགེ་འདུན་པ་ཚོ་བཙན་གྱིས་བཅའ་སྡོད་སློབ་གྲྭར་འཇུག་བཞིན་ཡོད་འདུག

རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་ཐབས་ཀྱི་ཆེད་དུ་བོད་ནང་གི་དགོན་པའི་དགེ་འདུན་པ་ཚོ་བཙན་དབང་ཐོག་ནས་རྒྱ་ནག་གི་བཅའ་སྡོད་སློབ་གྲྭར་འཇུག་གི་ཡོད་པའི་གནས་ཚུལ་ཐོན་བཞིན་འདུག

ཕྱི་ཚེས་༢ ཉིན་(Business standard)གསར་ཁང་གིས་ཨེ་ཤེ་ཡའི་རང་དབང་རླུང་འཕྲིན་ཁང་གི་སྙན་ཐོ་ཞིག་ལུང་དྲངས་ནས་བརྗོད་དོན་ལ།  རྒྱ་ནག་གཞུང་གིས་སི་ཁྲོན་ཞིང་ཆེན་རྔ་བ་རྫོང་གི་ཀིརྟི་དགོན་པའི་དགེ་འདུན་པ་ན་གཞོན་བརྒྱ་ཕྲག་མང་པོ་ཞིག་བཙན་དབང་གི་ཐོག་ནས་རྒྱ་གཞུང་གི་བཅའ་སྡོད་སློབ་གྲྭར་གནས་སྤོས་བྱས་ཡོད་འདུག་པ་དང་། དེ་ཡང་དགེ་འདུན་པ་རང་ལོ་༦ ནས་༡༧ བར་གྱི་དགེ་འདུན་པ་དེ་དག་བཙོན་ཁང་དང་འདྲ་བའི་གནས་སྟངས་འོག་རྒྱ་སྐད་ཁོ་ནར་སློབ་ཁྲིད་བྱེད་བཞིན་ཡོད་པར་བརྗོད་འདུག་ལ།  ཁོང་ཚོའི་སློབ་གྲྭའི་རྭ་བ་ནས་ཕྱི་ལ་འགྲོ་མི་ཆོག་ཅིང་། ཕ་མ་དང་འབྲེལ་བ་བྱེད་མི་ཆོག་པ་སོགས་ཀྱི་བཀག་སྡོམ་བྱས་ཡོད་པ་ཨེ་ཤི་ཡའི་རླུང་འཕྲིན་ཁང་གིས་སྙན་ཐོ་ནང་བཏོན་ཡོད་པར་བརྗོད་འདུག

སློབ་གྲྭའི་ར་བའི་ནས་བྲོས་རྩིས་བྱེད་མཁན་རྣམས་ལ་ཉེས་ཅན་པ་ལྟར་རྒོལ་རྡུང་གཏོང་བ་དང་ད་དུང་དམ་བསྒྲགས་ཤུགས་ཆེ་རུ་བཏང་ཡོད་པར་བརྗོད། ཕྱི་ཟླ་༧ པའི་ནང་ཀིརྟི་དགོན་པའི་སློབ་གྲྭ་སྒོ་བརྒྱབ་པ་དེས་དགེ་འདུན་པ་གཞོན་པ་སྟོང་ཕྲག་ལྷག་ལ་སློབ་སྦྱོང་གི་གོ་སྐབས་མེད་པར་བཟོས་ཡོ་འདུག་པ་དང་། ཁོང་ཚོ་རྒྱ་གཞུང་གི་མི་སེར་སྤེལ་ཡུལ་གྱི་བཅའ་སྡོད་སློབ་གྲྭར་གནས་སྤོས་བྱས་ཡོད་འདུག དེ་དང་དུས་མཚུངས་སུ་མཛོད་དགེ་རྫོང་གི་ལྷ་མོ་ཀིརྟི་དགོན་པའི་སློབ་གྲྭ་སྒོ་བརྒྱབ་སྟེ་སློབ་ཕྲུག་དྲུག་བརྒྱ་ལྷག་ལ་ཤུགས་རྐྱེན་ཐེབས་ཡོད་པར་བརྗོད་འདུག

ས་གནས་དེ་དག་གི་དབང་འཛིན་པ་ཚོས་ཕ་མ་རྣམས་ལ་བཙན་དབང་གི་འོག་ནས་རྒྱ་གཞུང་གི་སློབ་གྲྭར་ཕྲུ་གུ་གཏོང་རྒྱུའི་གན་རྒྱར་མིང་རྟགས་འགོད་དུ་བཅུག་ཡོད་འདུག་ཅིང་། དེར་ཁོང་ཚོར་གཞུང་གིས་ངོས་ལེན་བྱས་པའི་རྒྱལ་གཅེས་ཤེས་ཡོན་སློབ་གསོ་སྤྲོད་རྒྱུ་ཡིན་ཚུལ་བརྗོད་ཡོད་འདུག དེ་བཞིན་རྒྱ་ནག་གི་རྒྱལ་སར་ཡོད་པའི་པེ་ཅིང་ཆོས་ལུགས་ལས་དོན་སྒྲིག་གཞིའི་ནང་། དགོན་པའི་སློབ་གྲྭའི་སློབ་མ་རྣམས་ལོ་ན་ ༡༨ ཡན་ཡིན་དགོས་པ་དང་། རྒྱལ་གཅེས་ཀྱི་བསམ་བློ་ཡོད་པ། རྒྱལ་ཁབ་ཀྱི་ཁྲིམས་ལུགས་ལ་བརྩི་སྲུང་བྱེད་དགོས་པའི་དགོས་འདུན་བཏོན་ཡོད་པ་སོགས་བརྗོད་ཡོད་འདུག

བོད་དོན་འཐབ་རྩོད་པ་ཚོས་བྱ་སྤྱོད་འདི་དག་ནི་བོད་ཀྱི་སྐད་ཡིག་རྩ་མེད་དང་། བོད་ཀྱི་རིག་གཞུང་དམ་བསྒྲགས། མི་ཚེའི་ཆ་ཤས་ཡོངས་རྫོགས་ལ་རྒྱ་ནག་དང་དབང་འཛིན་གུང་ཁྲན་ཏང་ལ་དགའ་ཞེན་བྱེད་དགོས་པའི་རྒྱལ་གཅེས་ཤེས་ཡོན་སློབ་གསོའི་ལས་འགུལ་རྒྱ་ཆེ་བའི་ཆ་ཤས་ཤིག་ཏུ་ངོས་འཛིན་བྱེད་བཞིན་ཡོད་པ་ཨེ་ཤེ་ཡའི་རང་དབང་རླུང་འཕྲིན་ཁང་གིས་སྙན་ཐོ་བཏོན་པར་ཡང་བརྗོད་འདུག  དགེ་འདུན་པ་ཚོ་དགོན་པ་ནས་ཕྱིར་འཕུད་བྱས་རྗེས་ནང་མི་དང་ཁ་བྲལ་ཏེ་གཅིག་པུར་བཞག་པ་མ་ཟད། འོས་འཚམས་ཀྱི་སྨན་བཅོས་ཀྱང་ཐོབ་ཀྱི་མེད་པ་དང་། ཕྲུ་གུར་ལྟ་སྐོར་དུ་འགྲོ་མཁན་གྱི་ཕ་མ་ཚོར་གོང་རིམ་གྱི་ཆོག་མཆན་དགོས་ལུགས་སོགས་རྒྱུ་མཚན་སྣ་ཚོགས་བགྲངས་ཏེ་བཀག་འགོག་བྱེད་ཅིང་། ཕ་མས་ཨུ་ཚུགས་རྒྱག་ཚེ་བཙོན་འཇུག་གི་འཇིགས་སྐུལ་བྱེད་བཞིན་ཡོད་པར་བརྗོད་འདུག་ལ།

སློབ་གྲྭ་སྒོ་བརྒྱབ་པའི་རྗེས་སུ་དབང་འཛིན་པ་ཚོས་རྔ་བ་རྫོང་གི་བོད་མིའི་ཐོག་ལྟ་རྟོག་དང་དམ་བསྒྲགས་ཤུགས་ཆེ་རུ་བཏང་ཡོད་འདུག་ལ།  རྒྱ་ནག་མཐུན་ཕྱོགས་ལས་དོན་པུའི་དཔོན་རིགས་གཅིག་ས་གནས་དེར་ཟླ་བ་འགའ་ཤས་རིང་བསྡད་དེ་དགོན་པ་དང་ས་གནས་མི་མང་ལ་ཤུགས་རྐྱེན་ཐེབས་པའི་བྱ་སྤྱོད་འདི་དག་ལ་ལྟ་རྟོག་བྱེད་བཞིན་ཡོད་པར་བརྗོད་འདུག

དེ་བཞིན་ཕྱི་ཕྱོགས་སུ་འབྲེལ་བ་བྱེད་པར་དམ་བསྒྲགས་ཀྱང་ཤུགས་ཆེ་རུ་བཏང་ཡོད་འདུག་ལ།  ཕྱི་ཟླ་དགུ་པའི་ནང་ཀིརྟི་དགོན་པའི་དགེ་འདུན་པ་གཉིས་དང་མི་སྐྱ་གཉིས་བཅས་བོད་མི་བཞི་ས་ཁུལ་ཕྱི་ལོགས་ཀྱི་བོད་མི་དང་འབྲེལ་བ་བྱས་པའི་ཉེས་མིང་འོག་འཛིན་བཟུང་བྱས་ཡོད་པར་བརྗོད་འདུག

མཛོད་དགེ་རྫོང་དུ་དཔོན་རིགས་ཚོས་ལྷ་མོ་ཀིརྟི་དགོན་པའི་དགེ་འདུན་པ་དང་དགེ་རྒན་རྣམས་ཀྱི་ཁ་པར་བསྡུ་ལེན་བྱས་ཏེ། སློབ་གྲྭ་སྒོ་བརྒྱབ་པའི་གནས་ཚུལ་ཕྱི་ཕྱོགས་སུ་ཁྱབ་སྤེལ་བྱས་པའི་ཉེས་འཛུགས་བྱས་ཡོད་པ་ཨེ་ཤེ་ཡའི་རླུང་འཕྲིན་ཁང་གིས་སྙན་ཐོའི་ནང་བཏོན་ཡོད་པ་ལུང་དྲངས་འདུག

རྒྱ་ནག་གཞུང་གིས་བོད་མི་དང་ཕྱི་རྒྱལ་དུ་ཡོད་པའི་ཁོང་ཚོའི་གཉེན་ཉེ་དབར་གྱི་འབྲེལ་བར་དམ་བསྒྲགས་བྱེད་པ་དེ་རྒྱལ་ཁབ་ཀྱི་མཐུན་སྒྲིལ་ཆེད་དུ་མེད་ཐབས་མེད་པ་ཞིག་ཡིན་ཚུལ་ཤོད་ཀྱི་ཡོད། འོན་ཀྱང་བོད་མི་ཚོར་ལྟ་རྟོག་བྱ་སྤྱོད་འདི་དག་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པ་དང་། ཁོང་ཚོའི་ཆོས་ལུགས་དང་། སྐད་ཡིག རིག་གཞུང་གི་ངོ་བོ་རྩ་མེད་བཟོ་ཆེད་ཡིན་པར་ངོས་འཛིན་བྱེད་ཀྱི་ཡོད་པར་ཡང་བརྗོད་འདུག།

གསར་འགོད་པ། བསོད་ནམས་ཕུན་ཚོགས།