རྒྱ་ནག་གཞུང་གིས་སྐྱེས་མ་ཞི་རྒོལ་བ་ཞིག་འཇུ་བཟུང་།
ཟླ་འདིའི་ཚེས་༡ ཉིན་གྱི་བོད་ནང་གི་ཆུ་ཚོད་ ༡༢ ཙམ་ལ་བོད་མདོ་སྨད་རྔ་པ་རྫོང་རྨེའུ་རུ་མ་ཡུལ་ཚོའི་ཁྲོམ་ལམ་དུ་༸གོང་ས་སྐྱབས་མགོན་ཆེན་པོ་མཆོག་གི་སྐུ་པར་ཞིག་ལག་གཉིས་ཀྱིས་གནམ་ལ་འཕྱར་ནས་རྒྱ་ནག་གཞུང་ལ་ངོ་རྒོལ་སྐད་འབོད་བྱེད་བཞིན་གོམ་བགྲོད་བྱེད་སྐབས། རྒྱ་ནག་གི་ཉེན་རྟོག་པས་འཛིན་བཟུང་བཙན་ཁྲིད་བྱས་ནས་ད་བར་གནས་སྟངས་གང་ཡང་ཤེས་རྟོགས་ཐུབ་ཀྱི་མེད་པ་རེད།
ཁོང་མོ་རང་ལོ་ ༣༣ དང་། ཕ་མིང་ལ་ཚེ་པེ། མ་མིང་ལ་པདྨ་སྐྱིད་ཟེར་ཞིང་། ཕ་མ་གཅིག་པའི་མིང་སྲིང་དགུ་ཡོད་པ་ལས་བརྒྱད་པ་དེ་ཡིན་འདུག ཤུལ་དུ་ལོ་ ༡༤ ཡིན་པའི་ཁོང་གི་བུ་མོ་གང་གཱའི་ལྷ་མོ་གཅིག་པུ་ལས་ཁྱིམ་མི་གཞན་མེད་འདུག བོད་མདོ་སྨད་རྔ་པ་རྫོང་རྨེའུ་རུ་མ་ཡུལ་ཚོ། རུ་ཆེན་དང་པོ་ནས་ཡིན་འདུག
གཞན་ཡང་ཕྱི་ལོ་ ༢༠༠༨ ལོ་རྨེའུ་རུ་མའི་མི་ཚང་རེ་རེར་རྒྱ་དར་འཕྱར་དགོས་པའི་བཙན་བཀའ་བཏང་སྐབས་མང་དགའ་ཡིས་དང་ལེན་མ་གནང་བ་མ་ཟད། འབྲེལ་ཡོད་ལས་བྱེད་དང་རྩོད་པ་ཤོར་ནས་ཟླ་བ་བརྒྱད་ལྷག་རིང་འཛིན་བཟུང་གིས་གཅར་རྡུང་ཚད་ལས་བརྒལ་བ་ཕོག་མྱོང་མཁན་གྱི་ཆབ་སྲིད་བཙོན་ཟུར་ཞིག་ཡིན་འདུག གནས་ཚུལ་དེ་བྱུང་བའི་རྗེས་སུ་རྨེའུ་རུ་མའི་ཡུལ་ཚོའི་སྟེང་དམག་མི་དང་ཉེན་རྟོག་པ་སྔར་ལས་མང་པོ་འགྲེམས་འཇོག་བྱས་ཡོད་འདུག ལོ་སྔོན་མའི་ཕྱི་ཟླ་ ༩ ཚེས་ ༡༠ ཉིན་ནས་རྔ་པ་རྫོང་དུ་རྒྱ་གཞུང་གི་ལས་ཁང་ཁག་ཕུད་པའི་དྲ་རྒྱའི་བརྒྱུད་ལམ་ཡོངས་རྫོགས་བཀག་སྡོམ་བྱས་ཡོད་ཅིང་། དེའི་རིང་ལ་ཟ་ཁང་དང་ཚོང་གི་སྦྱིན་བདག་སོགས་མང་ཚོགས་ཚོས་དྲ་སྒོ་ཕྱེ་དགོས་པའི་རེ་ཞུ་ཐེངས་མང་བྱས་ཀྱང་ཉན་འཇོག་རྩ་བ་མེད་པར་མུ་མཐུད་མང་ཚོགས་ཀྱི་དྲ་བའི་བརྒྱུད་ལམ་ཁག་ཆ་ཚང་བཀག་ཡོད་འདུག །
གསར་འགོད་པ་ཆོས་ཉིད་འོད་ཟེར།
